Category: کوئٹہ

کیڈٹ کالج پشین میں تقسیمِ انعامات کی ایک باوقار اور یادگار تقریب کا انعقاد کیا گیا، جس میں تعلیم، نظم و ضبط اور ہمہ جہت تربیت کے شاندار مظاہر دیکھنے کو ملے۔ تقریب کے مہمانِ خصوصی میجر جنرل عاطف مجتبیٰ (آئی جی ایف سی بلوچستان نارتھ) تھے، جنہوں نے تقریب میں بطور خاص شرکت کی۔

اس موقع پر کیڈٹس کے والدین، ارکانِ قومی و صوبائی اسمبلی، پشین کے ڈپٹی کمشنر، مقامی عمائدین اور سول و ملٹری افسران کی بڑی تعداد بھی شریک ہوئی، جس سے تقریب کی اہمیت اور وقار میں مزید اضافہ ہوا۔تقریب کا آغاز کیڈٹس کی جانب سے مہمانِ خصوصی کو شاندار گارڈ آف آنر پیش کرنے سے ہوا، جس نے حاضرین کے دل جیت لیے۔ اس کے بعد کیڈٹس نے مختلف عملی سرگرمیوں، جسمانی تربیت، پریڈ اور تعلیمی صلاحیتوں کا مظاہرہ کیا، جسے شرکاء نے بے حد سراہا۔اپنے خطاب میں مہمانِ خصوصی میجر جنرل عاطف مجتبیٰ نے کیڈٹ کالج پشین کے اعلیٰ تعلیمی و تربیتی معیار کو قابلِ تحسین قرار دیتے ہوئے کہا کہ یہ ادارہ بلوچستان کے نوجوانوں کو معیاری تعلیم کے ساتھ ساتھ نظم و ضبط، قیادت اور حب الوطنی جیسے اوصاف سے آراستہ کر رہا ہے۔ انہوں نے اس عزم کا اظہار کیا کہ ایسے اداروں کی سرپرستی جاری رکھی جائے گی تاکہ نوجوان نسل کو مثبت اور تعمیری راستہ فراہم کیا جا سکے۔

تقریب کے دوران نمایاں کارکردگی کا مظاہرہ کرنے والے کیڈٹس میں انعامات اور اسناد تقسیم کی گئیں، جبکہ والدین اور دیگر شرکاء نے کیڈٹس کی محنت، خود اعتمادی اور اعلیٰ تربیتی معیار کو سراہتے ہوئے اساتذہ کی کاوشوں کو بھی خراجِ تحسین پیش کیا۔آخر میں اس امر پر زور دیا گیا کہ کیڈٹ کالج پشین جیسے تعلیمی ادارے بلوچستان کی نوجوان نسل کی کردار سازی، ذہنی و جسمانی نشوونما اور قومی جذبے کی آبیاری میں کلیدی کردار ادا کر رہے ہیں، جو مستقبل میں ملک و قوم کی ترقی کے لیے ایک مضبوط بنیاد ثابت ہوں گے۔

کوئٹہ: صوبائی دارالحکومت کوئٹہ میں فائرنگ کے ایک افسوسناک واقعے میں ایک شخص جاں بحق جبکہ دو افراد زخمی ہو گئے۔

ڈی آئی جی کوئٹہ کے مطابق واقعہ ائیرپورٹ روڈ پر پیش آیا، جہاں ویمن پولیس اسٹیشن کے ایس ایچ او کے بیٹے نے فائرنگ کر دی۔ فائرنگ کے نتیجے میں ایک شہری موقع پر ہی دم توڑ گیا جبکہ دو دیگر افراد زخمی ہو گئے جنہیں فوری طور پر قریبی اسپتال منتقل کر دیا گیا۔پولیس حکام کا کہنا ہے کہ واقعے کے بعد ایس ایچ او ویمن پولیس اسٹیشن کو عہدے سے ہٹا دیا گیا ہے، جبکہ ملزم ایان احمد کی گرفتاری کے لیے پولیس ٹیمیں مختلف مقامات پر چھاپے مار رہی ہیں۔

حکام کے مطابق ملزم کو جلد گرفتار کر کے قانون کے مطابق کارروائی عمل میں لائی جائے گی، جبکہ واقعے کی مزید تحقیقات جاری ہیں۔

کوئٹہ: صوبہ بلوچستان کے خوبصورت دارالحکومت کوئٹہ میں واقع چلتن نیشنل پارک میں موسمِ بہار کی آمد کے ساتھ ہی قدرتی حسن اپنے عروج پر پہنچ گیا ہے، جس کے باعث سیاحوں کی بڑی تعداد پارک کا رخ کر رہی ہے۔

چلتن نیشنل پارک میں رنگ برنگے پھول کھل اٹھے ہیں، سرسبز و شاداب میدان اور خوشگوار موسم نے علاقے کی خوبصورتی میں کئی گنا اضافہ کر دیا ہے۔ پارک میں ہر طرف پھیلی بہار کی دلکش فضا، ہلکی ٹھنڈی ہوا اور قدرتی مناظر سیاحوں کو اپنی جانب متوجہ کر رہے ہیں۔ فیملیز، طلبہ اور نوجوانوں کی بڑی تعداد یہاں پکنک منانے اور فطرت کے حسین نظاروں سے لطف اندوز ہونے کے لیے پہنچ رہی ہے۔سیاحوں کا کہنا ہے کہ چلتن پارک میں موجود سکون، صاف ستھرا ماحول اور دلکش پہاڑی مناظر کسی بھی ذہنی دباؤ کو کم کرنے میں مددگار ثابت ہوتے ہیں۔ خاص طور پر موسمِ بہار میں یہاں کی خوبصورتی دیدنی ہوتی ہے، جہاں مختلف اقسام کے جنگلی پھول اور سبزہ زار ایک دل فریب منظر پیش کرتے ہیں۔

مقامی انتظامیہ کے مطابق پارک میں سیکیورٹی کے مؤثر انتظامات کیے گئے ہیں تاکہ سیاح بلاخوف و خطر اپنی تفریح سے لطف اندوز ہو سکیں۔ حکام کا کہنا ہے کہ بلوچستان میں امن و امان کی صورتحال میں نمایاں بہتری آئی ہے، جس کا مثبت اثر سیاحت پر بھی پڑ رہا ہے۔ماہرین کے مطابق چلتن نیشنل پارک نہ صرف تفریح کا بہترین مقام ہے بلکہ یہ حیاتیاتی تنوع کے حوالے سے بھی اہمیت کا حامل ہے، جہاں نایاب جنگلی حیات اور پودوں کی مختلف اقسام پائی جاتی ہیں۔اگر قدرتی حسن، سکون اور خوشگوار موسم کے متلاشی ہیں تو چلتن نیشنل پارک ایک بہترین انتخاب ثابت ہو سکتا ہے، جہاں بہار کے حسین رنگ ایک یادگار تجربہ فراہم کریں گے۔

کوئٹہ میں کروڑوں روپے مالیت کی 400 کلوگرام چاندی اسمگلنگ کیس میں اہم پیشرفت سامنے آئی ہے، جہاں فیڈرل بورڈ آف ریونیو (ایف بی آر) نے غفلت، نااہلی اور مبینہ ملوث ہونے پر 6 افسران کو معطل کر دیا ہے۔

ذرائع کے مطابق معطل کیے جانے والے افسران میں گریڈ 20 کے تین سینئر افسران اور گریڈ 16 کے تین افسران شامل ہیں۔ گریڈ 20 کے افسران میں ایک کلیکٹر، ایک ڈپٹی کلیکٹر اور ایک اسسٹنٹ کلیکٹر شامل ہیں۔
ایف بی آر حکام کا کہنا ہے کہ چاندی اسمگلنگ کیس کی تحقیقات کے دوران بعض افسران کی ذمہ داری اور کارکردگی پر سنگین سوالات اٹھے، جس کے بعد ان کے خلاف فوری محکمانہ کارروائی عمل میں لائی گئی۔
اس کے ساتھ ہی کوئٹہ کسٹمز انفورسمنٹ کلیکٹوریٹ میں تین نئے افسران بھی تعینات کر دیے گئے ہیں تاکہ ادارے کے امور کو شفاف اور مؤثر انداز میں چلایا جا سکے۔حکام کے مطابق کیس میں مزید تحقیقات جاری ہیں اور امکان ظاہر کیا جا رہا ہے کہ آنے والے دنوں میں مزید اہم انکشافات اور کارروائیاں سامنے آ سکتی ہیں۔

تربت – تربت انٹرنیشنل ایئرپورٹ پر فل اسکیل ایمرجنسی ایکسرسائز کامیابی سے منعقد کی گئی، جو بین الاقوامی سول ایویشن آرگنائزیشن کے معیار اور قومی فضائی حفاظتی تقاضوں کے مطابق تھی۔

اس مشق کا مقصد کرائسز اینڈ ایمرجنسی رسپانس پلان کی افادیت کا جائزہ لینا تھا، جس میں رابطہ، کمانڈ، ہم آہنگی اور ردعمل کے وقت پر خصوصی توجہ دی گئی۔تقریب میں کمانڈنگ آفیسر پی این ایس صدیق، ایڈیشنل ڈپٹی کمشنر کیچ، او سی اے ایس ایف، جی ون آرمی ایف او بی سمیت دیگر اہم نمائندگان نے شرکت کی۔ ایئرپورٹ منیجر محمد الیاس بریچ نے بریفنگ اور ڈی بریفنگ دی جبکہ ایئر سائیڈ پر ہنگامی صورتحال کا عملی مظاہرہ بھی پیش کیا گیا۔ اس مشق میں پی اے اے ریسکیو اینڈ فائر فائٹنگ سروسز، پاکستان آرمی، پاکستان نیوی، اے ایس ایف اور ڈسٹرکٹ ہیلتھ ایڈمنسٹریشن نے حصہ لیا۔یہ مشق ہنگامی ردعمل کے نظام کو جانچنے، بروقت رسائی کو یقینی بنانے اور معمولی خامیوں کی نشاندہی کے ذریعے فضائی تحفظ کو مزید مضبوط بنانے میں کامیاب رہی۔

بلوچستان کے ضلع ژوب میں جاری انسدادِ پولیو مہم کامیابی کے ساتھ جاری ہے، جہاں محکمہ صحت کی ٹیمیں گھر گھر جا کر بچوں کو پولیو سے بچاؤ کے حفاظتی قطرے پلا رہی ہیں۔

تفصیلات کے مطابق مہم کے دوران مختلف علاقوں میں مجموعی طور پر 240 بچوں کو پولیو ویکسین دی جا چکی ہے، جس کا مقصد بچوں کو اس مہلک بیماری سے محفوظ بنانا ہے۔محکمہ صحت کے حکام کا کہنا ہے کہ اس مہم کو مؤثر اور کامیاب بنانے کے لیے تمام دستیاب وسائل بروئے کار لائے جا رہے ہیں، جبکہ ٹیمیں دور دراز اور حساس علاقوں تک بھی رسائی حاصل کر رہی ہیں تاکہ کوئی بھی بچہ ویکسین سے محروم نہ رہے۔انسدادِ پولیو مہم کے پرامن انعقاد میں ایف سی بلوچستان نارتھ کی جانب سے کیے گئے مثالی سیکیورٹی انتظامات نے اہم کردار ادا کیا۔ سیکیورٹی فورسز کی موجودگی کے باعث ٹیمیں بلا خوف و خطر اپنے فرائض سرانجام دے رہی ہیں، جس سے مہم کی کامیابی یقینی بنائی جا سکی۔

علاوہ ازیں، مقامی آبادی نے بھی اس قومی مہم میں بھرپور تعاون کا مظاہرہ کیا۔ والدین کی جانب سے بچوں کو ویکسین پلانے میں دلچسپی اور آگاہی ایک مثبت پیش رفت قرار دی جا رہی ہے، جو پولیو کے مکمل خاتمے کی جانب اہم قدم ہے۔ماہرین صحت کے مطابق پولیو ایک خطرناک اور معذور کرنے والی بیماری ہے، جس سے بچاؤ صرف ویکسین کے ذریعے ممکن ہے۔ ایسے میں انسدادِ پولیو مہمات کا تسلسل نہایت ضروری ہے تاکہ آنے والی نسلوں کو ایک محفوظ اور صحت مند مستقبل فراہم کیا جا سکے۔عوامی حلقوں کی جانب سے سیکیورٹی فورسز اور محکمہ صحت کی مشترکہ کاوشوں کو سراہا جا رہا ہے، اور اس عزم کا اظہار کیا جا رہا ہے کہ پولیو کے مکمل خاتمے تک یہ جدوجہد جاری رکھی جائے گی۔

کوئٹہ میں سیشن کورٹ کے باہر پیش آنے والے افسوسناک فائرنگ کے واقعے میں 3 افراد جاں بحق جبکہ 3 زخمی ہوگئے۔

واقعہ سریاب روڈ پر اُس وقت پیش آیا جب شہری ایک مقدمے کی سماعت کے سلسلے میں عدالت پہنچے ہوئے تھے۔پولیس کے مطابق فائرنگ کا یہ واقعہ سیشن کورٹ کوئٹہ کے باہر پیش آیا، جہاں نامعلوم حملہ آوروں نے اچانک فائرنگ کردی۔ ابتدائی اطلاعات کے مطابق دو افراد موقع پر ہی دم توڑ گئے جبکہ متعدد افراد زخمی ہوئے۔ریسکیو ذرائع کے مطابق زخمیوں کو فوری طور پر قریبی اسپتال منتقل کیا گیا، جہاں دورانِ علاج ایک اور زخمی شخص جانبر نہ ہوسکا۔ اس طرح جاں بحق افراد کی تعداد بڑھ کر 3 ہوگئی۔اسپتال انتظامیہ کے مطابق زخمی ہونے والے 3 افراد کو طبی امداد فراہم کی جارہی ہے،پولیس حکام نے بتایا ہے کہ واقعہ زمین کے دیرینہ تنازع کا شاخسانہ معلوم ہوتا ہے۔ مقتولین اور دیگر افراد عدالت میں پیشی کے لیے آئے تھے کہ مخالف فریق نے ان پر حملہ کردیا۔

فائرنگ کے بعد حملہ آور موقع سے فرار ہونے میں کامیاب ہوگئے۔ پولیس نے علاقے کو گھیرے میں لے کر شواہد اکٹھے کرنا شروع کردیئے ہیں جبکہ ملزمان کی تلاش کے لیے مختلف مقامات پر چھاپے مارے جا رہے ہیں۔

سیکیورٹی فورسز نے ضلع چمن میں منشیات کے خاتمے کے لیے جاری مہم کو مزید تیز کرتے ہوئے فیز-II کے تحت بڑے پیمانے پر کارروائیاں کی ہیں۔ اس مہم کا مقصد علاقے سے افیون اور پوست کی غیر قانونی کاشت کا مکمل خاتمہ اور معاشرے کو منشیات کے مضر اثرات سے محفوظ بنانا ہے۔

انسدادِ منشیات مہم کے دوران ایف سی بلوچستان (نارتھ) اور اینٹی نارکوٹکس فورس نے مشترکہ کارروائیاں کرتے ہوئے مختلف علاقوں میں تقریباً 175 ایکڑ رقبے پر پھیلی ہوئی غیر قانونی طور پر کاشت کی گئی پوست اور افیون کی فصل کو تلف کر دیا۔ حکام کے مطابق یہ کارروائیاں خفیہ اطلاعات اور جدید سرویلنس کے ذریعے کی گئیں، جس کے نتیجے میں بڑے پیمانے پر منشیات کی پیداوار کو روکنے میں کامیابی حاصل ہوئی۔ذرائع کا کہنا ہے کہ بلوچستان بھر میں ہزاروں ایکڑ اراضی پر افیون اور پوست کی غیر قانونی کاشت کی نشاندہی کی جا چکی ہے، جنہیں مرحلہ وار ختم کرنے کے لیے جامع حکمت عملی پر عمل جاری ہے۔ اس سلسلے میں سیکیورٹی ادارے اور قانون نافذ کرنے والے دیگر ادارے مسلسل متحرک ہیں۔

حکام نے واضح کیا ہے کہ اس مہم کا بنیادی مقصد نہ صرف منشیات کی غیر قانونی پیداوار کا خاتمہ ہے بلکہ علاقے میں امن و استحکام کو فروغ دینا اور نوجوان نسل کو منشیات جیسی لعنت سے محفوظ رکھنا بھی ہے۔ انہوں نے عوام سے اپیل کی ہے کہ وہ اس قومی مقصد میں اداروں کے ساتھ تعاون کریں اور کسی بھی مشکوک سرگرمی کی اطلاع فوری طور پر متعلقہ حکام کو دیں۔ماہرین کے مطابق اس قسم کی کارروائیاں نہ صرف مقامی سطح پر منشیات کے کاروبار کو کمزور کرتی ہیں بلکہ اس کے اثرات پورے ملک میں امن و امان کی صورتحال پر بھی مثبت انداز میں مرتب ہوتے ہیں۔

مشرق وسطیٰ میں جاری کشیدگی اور جنگی صورتحال کے باعث عالمی بحری راستوں میں تبدیلی دیکھنے میں آ رہی ہے، جس کے نتیجے میں بحری جہازوں کا رخ پاکستان کی جانب بڑھنے لگا ہے۔ اسی سلسلے میں گوادر پورٹ پر ایک اور غیر ملکی جہاز کی آمد ریکارڈ کی گئی ہے۔

حکام کے مطابق ایم وی ریوا گلوری نامی جہاز 14 ہزار 619 میٹرک ٹن کارگو لے کر گوادر پورٹ پہنچا، جو بندرگاہ پر بڑھتی ہوئی تجارتی سرگرمیوں کا واضح اشارہ ہے۔وفاقی وزیر جنید انوار چوہدری نے بھی جہاز کی آمد کی تصدیق کرتے ہوئے کہا کہ گوادر پورٹ کی بڑھتی ہوئی اہمیت خطے میں پاکستان کے اسٹریٹجک کردار کو اجاگر کرتی ہے۔ ان کا کہنا تھا کہ حکومت بندرگاہی نظام کو مزید فعال بنانے کے لیے ٹھوس اقدامات کر رہی ہے۔انہوں نے مزید کہا کہ سرمایہ کاروں اور بین الاقوامی شپنگ کمپنیوں کو ہر ممکن سہولیات فراہم کی جائیں گی تاکہ پاکستان کو خطے میں ایک اہم تجارتی مرکز کے طور پر فروغ دیا جا سکے۔

ماہرین کے مطابق مشرق وسطیٰ میں کشیدگی کے باعث متبادل بحری راستوں کی تلاش میں گوادر پورٹ ایک محفوظ اور مؤثر آپشن کے طور پر ابھر رہا ہے، جو مستقبل میں پاکستان کی معیشت کے لیے مثبت پیش رفت ثابت ہو سکتا ہے۔گوادر پورٹ پر تجارتی سرگرمیاں تیز، عالمی شپنگ کمپنیوں کا اعتماد بحال ہونا شروع ہوگیا ،گوادر پورٹ خطے میں ٹرانزٹ اور ٹرانس شپمنٹ تجارت کا اہم مرکز بنتا جا رہا ہے، پاکستان گوادر بندرگاہ کو عالمی معیار کا میرین گیٹ وے بنانے کے لیے پرعزم ہے

بلوچستان میں شدید بارشیں، مختلف اضلاع متاثر، ریسکیو آپریشن جاری ہے،چمن، قلعہ عبداللہ، گلستان، لورالائی، دوبندی اور دکی سمیت بلوچستان کے مختلف علاقوں میں ہونے والی شدید بارشوں کے باعث معمولاتِ زندگی شدید متاثر ہوگئے ہیں، جبکہ نشیبی علاقے زیرِ آب آنے سے شہریوں کو مشکلات کا سامنا ہے۔

بارشوں کے نتیجے میں کئی مقامات پر سیلابی صورتحال پیدا ہوگئی ہے، جس کے پیشِ نظر سیکیورٹی فورسز اور سول انتظامیہ فوری طور پر متحرک ہوگئی ہیں۔ متاثرہ علاقوں میں ریسکیو آپریشن تیزی سے جاری ہے اور شہریوں کو محفوظ مقامات پر منتقل کیا جا رہا ہے۔فرنٹیئر کور (نارتھ) بلوچستان کی جانب سے سیلاب سے متاثرہ افراد کو خوراک اور طبی امداد کی فراہمی جاری ہے۔ امدادی ٹیمیں دور دراز علاقوں تک رسائی حاصل کرکے ضرورت مند افراد کو بنیادی سہولیات فراہم کر رہی ہیں۔سیکیورٹی فورسز کی جانب سے متاثرہ علاقوں میں پھنسے شہریوں اور مسافروں کو نکال کر محفوظ مقامات پر منتقل کیا جا رہا ہے، جبکہ مقامی انتظامیہ اور پی ڈی ایم اے کی ریسکیو ٹیمیں بھی امدادی سرگرمیوں میں بھرپور حصہ لے رہی ہیں اور خصوصاً سیاحوں کی مدد کو یقینی بنایا جا رہا ہے۔

انتظامیہ نے شہریوں کو ہدایت جاری کی ہے کہ وہ غیر ضروری سفر سے گریز کریں اور بارشوں کے دوران احتیاطی تدابیر اختیار کریں۔ نشیبی علاقوں کے مکینوں کو خصوصی طور پر محتاط رہنے اور کسی بھی ہنگامی صورتحال میں متعلقہ اداروں کو فوری اطلاع دینے کی تاکید کی گئی ہے۔

دوسری جانب متاثرہ علاقوں کے شہریوں نے سیکیورٹی فورسز اور سول انتظامیہ کی بروقت اور مؤثر کارروائیوں کو سراہتے ہوئے ان کا شکریہ ادا کیا ہے، جن کی کوششوں سے کئی قیمتی جانیں بچائی جا چکی ہیں۔حکام کے مطابق بارشوں کا سلسلہ مزید جاری رہنے کا امکان ہے، جس کے پیش نظر الرٹ جاری کر دیا گیا ہے اور تمام متعلقہ اداروں کو ہائی الرٹ رہنے کی ہدایت کی گئی ہے۔