Category: راولپنڈی

عبید علی ملک کی درخواست پر ڈی جی اینٹی کرپشن اور اے سی گوجرخان کا ایکشن، تحقیقات شروع
جعلسازی ثابت ہونے پر رجسٹری منسوخ اور ملوث افراد کو جیل بھیجیں گے اسسٹنٹ کمشنر خضر ظہور

گوجرخان (قمرشہزاد) گوجرخان میں جعلی رجسٹریوں کے ذریعے شہریوں کی قیمتی جائیدادیں ہتھیانے والے ایک منظم گروہ کا انکشاف ہوا ہے۔ موضع بھگانہ کے رہائشی عبید علی ملک نے ڈائریکٹر جنرل اینٹی کرپشن پنجاب اور اسسٹنٹ کمشنر گوجرخان کو تحریری درخواست دے دی ہے، جس میں موقف اختیار کیا گیا ہے کہ تحصیل آفس کے عملے کی مبینہ ملی بھگت سے ان کی آبائی زمین کی جعلی رجسٹری کروائی گئی ہے۔

درخواست گزار کے مطابق، مذکورہ پارٹی کے پاس زمین کا کوئی ملکیتی ثبوت، فرد یا قبضہ موجود نہیں، اس کے باوجود ملی بھگت سے کاغذات تیار کیے گئے۔ متعلقہ پٹواری نے بھی اس حوالے سے لاتعلقی کا اظہار کرتے ہوئے کہا ہے کہ رجسٹری پر اس کے دستخط یا مہر موجود نہیں ہے۔ اس حوالے سے اسسٹنٹ کمشنر گوجرخان خضر ظہور گورائیہ نے میڈیا سے گفتگو کرتے ہوئے کہا کہ درخواست موصول ہو چکی ہے اور معاملے کی باریک بینی سے انکوائری کی جا رہی ہے۔ انہوں نے واشگاف الفاظ میں کہا کہ اگر رجسٹری جعلی ثابت ہوئی تو اسے فوری منسوخ کر دیا جائے گا اور جعل سازی میں ملوث عناصر کے خلاف سخت قانونی کارروائی عمل میں لائی جائے گی۔

شہریوں نے اعلیٰ حکام سے مطالبہ کیا ہے کہ کچہری میں متحرک اس جعل ساز گروہ کا قلع قمع کیا جائے جو سادہ لوح شہریوں کی جائیدادیں ہتھیا کر انہیں فروخت کرنے کے دھندے میں مصروف ہے، تاکہ لوگ اپنی جمع پونجی اور چھت سے محروم نہ ہوں۔

قصابوں نے ہڑتال کے بعد من مانے نرخ نافذ کر دیے ریٹ لسٹ کو کھلے عام جوتے کی نوک پر رکھ کر پنجاب حکومت قانون کی رٹ کو کھلا چیلنج کر دیا
شہریوں کے شدید تحفظات کا اظہار کیا بااثر قصابوں اور مقامی سیاسی شخصیات کا گٹھ جوڑ انتظامیہ کو خاموش رکھے ہوئے ہے؟
گوجرخان (قمرشہزاد) گوجرخان میں گوشت فروشوں نے انتظامیہ کی رٹ کو کھلے عام چیلنج کرتے ہوئے سرکاری نرخنامے کو عملاً ردی کی ٹوکری میں پھینک دیا ہے۔ شہر بھر میں قصاب من مانے نرخوں پر گوشت فروخت کر رہے ہیں جبکہ انتظامیہ مکمل طور پر بے بس دکھائی دے رہی ہے۔ شہریوں کے مطابق گوجرخان میں تیار کیا جانے والا سرکاری نرخنامہ اب محض ایک رسمی کاغذ بن کر رہ گیا ہے جو بازاروں میں ایسے لٹکا ہوا ہے جیسے کسی مندر کا گھنٹہ، جس کا دل چاہے بجا دے۔ چند روز قبل گوشت کی قیمتوں کے معاملے پر قصابوں نے ہڑتال کر دی تھی جس کے بعد انتظامیہ کی جانب سے واضح ہدایات جاری کی گئیں کہ گوشت صرف سرکاری ریٹ لسٹ کے مطابق فروخت کیا جائے گا۔

تاہم چند دن دکانیں بند رکھنے کے بعد جب قصابوں نے کاروبار دوبارہ شروع کیا تو صورتحال مزید خراب ہو گئی اور قیمتیں پہلے سے بھی زیادہ بڑھا دی گئیں۔ اس وقت گوجرخان میں گائے اور بچھڑے کا گوشت تقریباً 1300 سے 1400 روپے فی کلو فروخت کیا جا رہا ہے جبکہ اس سے قبل یہ 1200 روپے میں دستیاب تھا، حالانکہ سرکاری نرخنامے میں اس کی قیمت 900 روپے فی کلو مقرر ہے۔ اسی طرح بکرے کا گوشت 2400 سے 2500 روپے فی کلو تک فروخت کیا جا رہا ہے جبکہ سرکاری ریٹ لسٹ میں اس کی قیمت 1800 روپے فی کلو درج ہے۔ شہریوں کا کہنا ہے کہ ہڑتال کے بعد قصاب طبقہ مزید منہ زور ہو گیا ہے اور اب کھلے عام سرکاری نرخنامے کی خلاف ورزی کرتے ہوئے مہنگے داموں گوشت فروخت کر رہا ہے۔ بازاروں میں سرکاری ریٹ لسٹ تو آویزاں ہے مگر اس پر عملدرآمد کہیں نظر نہیں آ رہا۔ شہر کے رہائشیوں نے شدید غم و غصے کا اظہار کرتے ہوئے کہا ہے کہ مہنگائی پہلے ہی عام آدمی کی کمر توڑ چکی ہے اور اب گوشت بھی متوسط اور دیہاڑی دار طبقے کی پہنچ سے باہر ہوتا جا رہا ہے۔ شہریوں کا کہنا ہے کہ انتظامیہ کی خاموشی کئی سوالات کو جنم دے رہی ہے۔ کچھ شہریوں کا دعویٰ ہے کہ شہر کے قصاب بااثر ہیں اور ان کا مضبوط ووٹ بینک ہے جبکہ مقامی سیاسی شخصیات کے ساتھ مبینہ روابط کے باعث انتظامیہ ان کے خلاف سخت کارروائی کرنے سے گریزاں ہے، جس کے نتیجے میں قصاب طبقہ مزید دلیر ہو کر قانون کو چیلنج کر رہا ہے۔ شہریوں نے سوال اٹھایا ہے کہ آخر وہ کون سی پوشیدہ قوتیں ہیں جن کے سامنے گوجرخان انتظامیہ بھی بے بس دکھائی دیتی ہے اور سرکاری نرخنامہ محض نمائشی کاغذ بن کر رہ گیا ہے۔ شہریوں نے وزیراعلیٰ پنجاب، چیف سیکریٹری پنجاب اور راولپنڈی ڈویژن کی انتظامیہ سے فوری نوٹس لینے کا مطالبہ کرتے ہوئے کہا ہے کہ ناجائز منافع خوری اور مہنگائی کے خلاف جاری حکومتی مہم کا عملی نفاذ یقینی بنایا جائے اور گوجرخان میں سرکاری نرخنامے پر عملدرآمد کرایا جائے تاکہ عام شہریوں کو ریلیف مل سکے۔

مٹن 2500 اور بیف کی 1400 تک دھڑلے سے فروخت جبکہ سرکاری نرخ 1800 اور 900 ہوا میں تحلیل جرمانوں کی دھمکی پر دکانیں بند
بلیک میلنگ یا کاروباری مجبوری؟ کیا اس بار بھی طاقتور حلقے بازی لے جائیں گے؟ یا انتظامیہ واقعی سرکاری نرخ نافذ کر کے دکھائے گی؟
گوجرخان(قمرشہزاد) گوجرخان ایک بار پھر گوشت بحران کی لپیٹ میں ہے جہاں سرکاری ریٹ لسٹ کاغذوں تک محدود اور بازار عملاً بے لگام دکھائی دے رہے ہیں۔ انتظامیہ کی جانب سے حکومتی احکامات کے تحت مٹن کی 1800 اور بیف 900 روپے فی کلو فروخت یقینی بنانے کے لیے بھاری جرمانوں، دکانوں کی سیلنگ اور مقدمات کے اندراج کی گونج ابھی سنائی ہی دے رہی تھی کہ قصاب برادری نے دکانوں کے شٹر گرا کر شہر کو عملاً یرغمال بنا لیا۔یہ محض نرخوں کا جھگڑا نہیں، ریاستی رٹ اور بازار کی من مانی کے درمیان کھلی جنگ بن چکا ہے۔ ایک طرف انتظامیہ جرمانوں اور مقدمات کی دھمکیاں دے رہی ہے، تو دوسری طرف قصاب جانوروں کی قیمتیں آسمان سے باتیں کر رہی ہیں، چارہ، ٹرانسپورٹ اور دیگر اخراجات میں ہوشربا اضافہ ہو چکا ہے، ایسے میں سرکاری نرخ زمینی حقائق سے متصادم ہیں کا جواز پیش کر کے اجتماعی دباؤ بڑھا رہے ہیں۔ نتیجہ یہ کہ عام شہری مہنگائی، قلت اور غیر یقینی صورتحال کے شکنجے میں جکڑا کھڑا ہے۔ مگر سوال یہ ہے کہ اگر نرخ ناقابلِ عمل ہیں تو پھر کھلے عام 2500 روپے فی کلو مٹن اور 1400 روپے کلو بیف دھڑلے سے فروخت کرنے کا اختیار کس نے دیا؟ شہری اس کشمکش کو محض انتظامیہ اور قصابوں کی چپقلش نہیں بلکہ ایک منظم دباؤ کی سیاست قرار دے رہے ہیں۔ ان کا کہنا ہے کہ ہر سال یہی اسکرپٹ دہرایا جاتا ہے پہلے چھاپے، پھر جرمانے، اس کے بعد ہڑتال، اور آخرکار سیاسی پنڈتوں کی مداخلت کے ذریعے خاموش سمجھوتہ نتیجہ؟ عوام کی جیب پر ڈاکہ، شہریوں نے سخت الفاظ میں کہا کہ اگر حکومت اور مقامی انتظامیہ کو آخرکار گھٹنے ہی ٹیکنے ہیں تو نرخناموں کا نمائشی ڈھول بجانا بند کیا جائے۔ بصورتِ دیگر ریاست اپنی رٹ قائم کرے اور سرکاری ریٹ لسٹ پر بلاامتیاز گوشت کی دستیابی یقینی بنائے۔ گوجرخان کے بازار اس وقت سنسان ہیں مگر سوال گونج رہا ہے کیا اس بار بھی طاقتور حلقے بازی لے جائیں گے؟ یا انتظامیہ واقعی سرکاری نرخ نافذ کر کے دکھائے گی؟ فیصلہ جو بھی ہو، اس رسہ کشی کا سب سے بڑا خمیازہ عام شہری ہی بھگت رہا ہے۔

راولپنڈی میں اوباش نوجوانوں کی جانب سے گرین بس پر پتھراؤ کے بس کے شیشے ٹوٹ گئے اور ایک مسافر زخمی ہو گیا۔

پولیس کے مطابق ون ویلنگ کرتے ہوئے اوباش نوجوان بس پر حملہ آور ہوئے، حملے کے دوران گرین بس پر پتھراؤ کیا گیا اور ڈنڈے مارےگئے، پتھراؤ سےبس کے شیشے ٹوٹ گئے اور ایک مسافر زخمی ہوا،پولیس کا کہنا ہے کہ گرین بس پر حملے کا واقعہ چکلالہ اسٹیشن کے قریب پیش آیا جس کا مقدمہ تھانہ چکلالہ پولیس نے بس کے کیپٹن کی مدعیت میں درج کر لیا ہے،پولیس کا بتانا ہے کہ گرین بس پر حملہ کرنے والے 13 افراد کو گرفتار کیا گیا ہے، گرفتار ملزمان سے ڈنڈے برآمد کیے گئے ہیں جبکہ 7 موٹر سائیکلیں بھی ضبط کر لی گئی ہیں، گرفتار ملزمان سے مزید تفتیش کی جا رہی ہے،زیر حراست افراد کو ٹھوس شواہد کے ساتھ چالان عدالت کیا جائے گا،