Category: راولپنڈی

راولپنڈی میں وفاقی تحقیقاتی ادارے (ایف آئی اے) کے اینٹی ہیومن ٹریفکنگ سرکل نے ورک ویزے کا جھانسہ دے کر شہریوں سے لاکھوں روپے ہتھیانے والے گروہ کے خلاف کارروائی کرتے ہوئے ایک اہم کامیابی حاصل کرلی۔ ایف آئی اے ترجمان کے مطابق انسانی اسمگلنگ اور ویزا فراڈ میں ملوث ملزم عمر رضا نعیم کو گرفتار کرلیا گیا ہے۔

ترجمان ایف آئی اے کے مطابق متاثرہ شہری کی جانب سے شکایت موصول ہونے پر اینٹی ہیومن ٹریفکنگ سرکل راولپنڈی نے کارروائی کا آغاز کیا اور ملزم کے خلاف باقاعدہ مقدمہ درج کرکے اسے حراست میں لے لیا۔

ابتدائی تفتیش میں انکشاف ہوا ہے کہ ملزم عمر رضا نعیم نے شکایت کنندہ کے 7 ساتھیوں کو بیرون ملک بہتر مستقبل اور ورک ویزے دلانے کا لالچ دیا۔ ملزم نے ویزے فراہم کرنے کا یقین دلاتے ہوئے ان افراد سے مجموعی طور پر 32 لاکھ روپے وصول کیے۔

ایف آئی اے کے مطابق رقم حاصل کرنے کے بعد ملزم نے متاثرہ افراد کو نہ تو وعدے کے مطابق ورک ویزے فراہم کیے اور نہ ہی ان کی رقم واپس کی، جس کے بعد متاثرین نے ایف آئی اے سے رجوع کیا۔

حکام کا کہنا ہے کہ ملزم کے خلاف ویزا فراڈ اور انسانی اسمگلنگ سے متعلق قوانین کے تحت مقدمہ درج کرکے مزید تفتیش شروع کردی گئی ہے۔ تفتیش کا دائرہ وسیع کیا جا رہا ہے تاکہ فراڈ میں ملوث دیگر ممکنہ ملزمان اور ان کے سہولت کاروں کا بھی سراغ لگایا جاسکے اور انہیں قانون کے مطابق کارروائی کا سامنا کرنا پڑے۔

راولپنڈی کے علاقے لال کڑتی میں 45 سالہ خاتون حنا جاوید کے قتل کیس کی پوسٹ مارٹم رپورٹ سامنے آگئی ہے۔

رپورٹ کے مطابق مقتولہ کا پوسٹ مارٹم موت کے تقریباً 12 گھنٹے بعد ڈاکٹر ماریا خالد نے کیا۔ پوسٹ مارٹم رپورٹ میں بتایا گیا ہے کہ حنا جاوید کی گردن کی ہڈی ٹوٹی ہوئی تھی، جبکہ پسلیوں اور کولہے کی ہڈی پر بھی زخموں کے نشانات پائے گئے۔رپورٹ کے مطابق مقتولہ کی پیریکارڈیئم، یعنی دل کے گرد موجود جھلی، خون سے بھری ہوئی تھی۔مقتولہ کے ڈی این اے کے نمونے حاصل کرکے لیبارٹری بھجوا دیے گئے ہیں، جبکہ ابتدائی طور پر موت کی حتمی وجہ کا واضح تعین نہیں ہوسکا۔ مزید فرانزک تجزیے کے لیے لاش سے حاصل کیے گئے نمونے بھی فرانزک لیبارٹری بھجوا دیے گئے ہیں۔پوسٹ مارٹم رپورٹ اور فرانزک کے لیے حاصل کیے گئے نمونے لیڈی کانسٹیبل رافعہ تبسم نے وصول کیے۔

واضح رہے کہ حنا جاوید کے قتل کا مقدمہ اسلام آباد کے تھانہ سول لائنز میں مقتولہ کے بھائی فہد جاوید کی مدعیت میں درج ہے۔ پولیس نے مقتولہ کے شوہر اور گھریلو ملازم کو گرفتار کرکے تین روزہ جسمانی ریمانڈ حاصل کر رکھا ہے۔پولیس کی جانب سے ڈاکٹر کو فراہم کی گئی ابتدائی رپورٹ کے مطابق مقتولہ کو مبینہ طور پر اس کے شوہر نے پھندا دے کر لٹکایا تھا۔

ڈاکٹرز، نرسز اور پیرامیڈیکل اسٹاف کی شدید کمی، قیمتی طبی مشینری غیر فعال، قاضیاں مرکز سے لیڈیں چوری ہونے کا انکشاف
غریب مریض علاج کو ترسے، عملہ واپس بلانے اور مشینری چوری کی فوری تحقیقات کا مطالبہ
گوجرخان(قمرشہزاد) ٹی ایچ کیو ہسپتال گوجرخان اور مضافاتی مراکزِ صحت میں ڈاکٹرز، نرسوں اور پیرامیڈیکل اسٹاف کی شدید کمی کے باعث غریب مریضوں کو مشکلات کا سامنا ہے۔ مبینہ ذرائع کے مطابق ہسپتال کے مختلف شعبوں سے وابستہ کم و بیش 16 ملازمین، جن میں ڈاکٹرز، چارج نرس، ڈسپنسر، کک اور نائب قاصد شامل ہیں، گوجرخان کے بجائے مری، راولپنڈی اور دیگر محکموں میں جنرل ڈیوٹی پر مامور ہیں، جس سے مقامی طبی نظام شدید دباؤ کا شکار ہے۔ مضافاتی بنیادی مرکز صحت قاضیاں میں تکنیکی عملے کی عدم دستیابی کے باعث لاکھوں روپے مالیت کی قیمتی طبی مشینری طویل عرصے سے غیر فعال پڑی ہے۔ مبینہ ذرائع کے مطابق مرکز صحت قاضیاں سے لاکھوں روپے مالیت کی مشینری کی لیڈیں بھی چوری ہونے کے انکشافات سامنے آئے ہیں، جن کے بغیر متعلقہ مشینری چلانا ممکن نہیں، جس کے باعث قیمتی سرکاری آلات عملاً بیکار ہو کر رہ گئے ہیں۔ عوامی حلقوں نے مطالبہ کیا ہے کہ مشینری کی عدم فعالیت اور مبینہ چوری کے معاملے کی فوری شفاف انکوائری کرائی جائے اور ذمہ داروں کا تعین کیا جائے۔ ذرائع کے مطابق ٹی ایچ کیو ہسپتال انتظامیہ صورتحال سے اعلیٰ حکام کو تحریری طور پر آگاہ کر چکی ہے، جبکہ ڈسٹرکٹ ہیلتھ اتھارٹی راولپنڈی کا کہنا ہے کہ جنرل ڈیوٹی آرڈرز سے متعلق قانونی و انتظامی معاملات جلد حل کیے جائیں گے۔گوجرخان کے عوامی، سماجی اور فلاحی حلقوں نے وزیراعلیٰ پنجاب اور سیکریٹری ہیلتھ سے فوری نوٹس لے کر دیگر علاقوں میں اٹیچ عملہ واپس بلانے، مراکزِ صحت میں ضروری اسٹاف فراہم کرنے اور قاضیاں مرکز صحت سے مبینہ طور پر چوری ہونے والی مشینری کی لیڈیں برآمد کرانے کا مطالبہ کیا ہے، تاکہ غریب عوام کو ان کی دہلیز پر علاج کی بنیادی سہولیات میسر آسکیں۔

وفاقی کابینہ نے آئین کے آرٹیکل 245 کے تحت راولپنڈی میں 6 ماہ کے لیے پاک فوج کی 3 کمپنیوں کی تعیناتی کی منظوری دے دی، جس کا باقاعدہ نوٹیفکیشن بھی جاری کردیا گیا ہے۔

ذرائع کے مطابق پاک فوج کی تعیناتی کا فیصلہ ہوم ڈیپارٹمنٹ پنجاب کی درخواست پر کیا گیا ہے۔ فوج ضلعی انتظامیہ کے ساتھ مل کر راولپنڈی میں امن و امان کی صورتحال برقرار رکھنے کے لیے فرائض انجام دے گی۔تعیناتی کے دوران حساس مقامات اور اہم شاہراہوں پر سیکیورٹی انتظامات مزید مؤثر بنائے جائیں گے، جبکہ کسی بھی ناخوشگوار صورتحال سے نمٹنے کے لیے پاک فوج ضلعی انتظامیہ کو معاونت فراہم کرے گی۔حکام کے مطابق پاک فوج کی تعیناتی آئین کے آرٹیکل 245 کے تحت عمل میں لائی گئی ہے اور اس کا مقصد راولپنڈی میں امن و امان کی صورتحال کو برقرار رکھنا اور سیکیورٹی انتظامات کو مضبوط بنانا ہے۔

راولپنڈی :انسپکٹر جنرل پولیس پنجاب عبدالکریم نے ریجنل پولیس آفس راولپنڈی کا دورہ کیا اور راولپنڈی ریجن کے سینئر پولیس افسران کے اجلاس کی صدارت کی۔ اجلاس میں آر پی او راولپنڈی بابر سرفراز الپا، سی پی او راولپنڈی حسن مشتاق سکھیرا، آر او اسپیشل برانچ، آر او سی سی ڈی، سی ٹی ڈی سمیت دیگر سینئر افسران شریک ہوئے۔

اجلاس کے دوران آئی جی پنجاب کو راولپنڈی ریجن میں جرائم، امن و امان اور مجموعی سیکیورٹی صورتحال کے علاوہ عید میلادالنبیؐ کے موقع پر کیے جانے والے سیکیورٹی انتظامات پر تفصیلی بریفنگ دی گئی۔

آئی جی پنجاب عبدالکریم نے ہدایت کی کہ عید میلادالنبیؐ کے جلوسوں، مذہبی اجتماعات اور دیگر پروگراموں کے لیے فول پروف سیکیورٹی انتظامات یقینی بنائے جائیں۔ جلوسوں کے روٹس، مجالس و اجتماعات کے مقامات اور حساس پوائنٹس پر سیکیورٹی کے خصوصی انتظامات کیے جائیں۔

انہوں نے کہا کہ سیکیورٹی ڈیوٹی پر تعینات افسران اور اہلکاروں کو ان کی ذمہ داریوں کے حوالے سے مکمل بریفنگ دی جائے، جبکہ مذہبی اجتماعات کے دوران علماء کرام، منتظمین اور ضلعی انتظامیہ کے ساتھ مؤثر رابطہ اور کوآرڈینیشن برقرار رکھا جائے۔

پولیس حراست سے ملزمان کے فرار کے واقعات پر آئی جی پنجاب نے سخت موقف اختیار کرتے ہوئے سپروائزری افسران کو ذاتی نگرانی کی ہدایت کی۔ انہوں نے کہا کہ ملزمان کی حراست، حوالگی اور منتقلی کے تمام مراحل میں سیکیورٹی پروٹوکول پر مکمل عملدرآمد یقینی بنایا جائے۔

آئی جی پنجاب نے وزیراعلیٰ پنجاب کے محفوظ پنجاب ویژن کا حوالہ دیتے ہوئے جرائم کی روک تھام کے لیے پٹرولنگ، ناکہ بندی، سرچ آپریشنز اور انٹیلی جنس بیسڈ کارروائیوں کو مزید مؤثر بنانے کی ہدایت کی۔

انہوں نے سنگین جرائم میں ملوث ملزمان کی گرفتاری اور مقدمات کی میرٹ پر تفتیش یقینی بنانے پر بھی زور دیا۔ ان کا کہنا تھا کہ شہریوں کی شکایات کا فوری ازالہ اور انہیں بروقت انصاف کی فراہمی پولیس کی اولین ترجیح ہونی چاہیے۔

عبدالکریم نے ہدایت کی کہ سیکیورٹی انتظامات کی مسلسل نگرانی کے لیے سینئر پولیس افسران خود فیلڈ میں موجود رہیں اور کسی بھی صورتحال سے نمٹنے کے لیے تمام ضروری اقدامات پہلے سے مکمل کیے جائیں۔

آئی جی پنجاب نے کہا کہ شہریوں کی جان و مال، عزت و آبرو اور املاک کا تحفظ پولیس کی بنیادی ذمہ داری ہے، جس کے لیے تمام دستیاب وسائل کو مؤثر انداز میں بروئے کار لایا جائے۔

راولپنڈی: کانگو کی مسلح افواج کے اعلیٰ سطح کے دفاعی وفد نے چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے جنرل ہیڈکوارٹرز (جی ایچ کیو) راولپنڈی میں ملاقات کی، جس میں دونوں ممالک کے درمیان دفاعی اور سیکیورٹی تعاون مزید مضبوط بنانے پر تفصیلی تبادلہ خیال کیا گیا۔

کانگو کی مسلح افواج کے چیف آف ڈیفنس لیفٹیننٹ جنرل بانزا مویلامبو جولز کی قیادت میں اعلیٰ سطح کا وفد جی ایچ کیو پہنچا، جہاں پاک فوج کے تینوں سروسز کے چاق و چوبند دستے نے معزز مہمان کو گارڈ آف آنر پیش کیا۔

ملاقات کے دوران باہمی دلچسپی کے امور، خطے کی مجموعی سیکیورٹی صورتحال اور پاکستان و جمہوریہ کانگو کے درمیان دفاعی و سیکیورٹی شعبوں میں تعاون بڑھانے کے امکانات پر تفصیلی گفتگو ہوئی۔

دونوں جانب سے پاکستان اور جمہوریہ کانگو کے درمیان طویل عرصے سے قائم دوستانہ اور خوشگوار تعلقات پر اطمینان کا اظہار کیا گیا۔ اس موقع پر دفاعی اور سیکیورٹی تعاون کو مزید وسعت دینے کے حوالے سے اہم پیش رفت ہوئی اور دونوں ممالک کے درمیان تعاون کو وسیع اور مضبوط بنانے کیلئے مفاہمت کی یادداشت (ایم او یو) پر دستخط بھی کیے گئے۔

ملاقات میں دونوں ممالک کے درمیان دفاعی روابط کو مزید فروغ دینے اور باہمی تعاون کے نئے شعبے تلاش کرنے کے عزم کا اظہار کیا گیا۔

کانگو کے چیف آف ڈیفنس نے پاکستان کی مسلح افواج کی پیشہ ورانہ صلاحیتوں اور آپریشنل استعداد کو سراہتے ہوئے خطے میں امن و استحکام کے قیام کیلئے ان کے کردار اور عزم کی تعریف کی۔

انہوں نے دفاعی شعبے میں مقامی پیداوار، خود انحصاری اور جدید دفاعی صلاحیتوں کے حصول کیلئے پاکستان کی مسلح افواج کی جانب سے کی جانے والی پیش رفت کو بھی قابلِ تحسین قرار دیا۔