Category: راولپنڈی

گوجرخان (قمرشہزاد) اڈیالہ جیل راولپنڈی غریب قیدی کے لیے جہنم بن گئی۔ جیل کے اندر مبینہ طور پر ملکھو گروپ کی دہشت گردی عروج پر پہنچ گئی، جیل ملازمین کی ملی بھگت سے بے گناہ قیدی پر زندگی اجیرن کر دی گئی۔ تھانہ گوجرخان کے رہائشی قیدی منصور احمد پر وحشیانہ تشدد، ناک کی ہڈی ٹوٹ گئی، سامان بھی لوٹ لیا گیا۔ متاثرہ قیدی کی ماں انصاف کے لیے تڑپ اٹھی اور سپرنٹنڈنٹ اڈیالہ جیل کو درخواست دے دی۔

تفصیلات کے مطابق اڈیالہ جیل میں قید منصور احمد ولد خالد حسین (مقدمہ نمبر 463 /2014)، کی والدہ مسرت بیگم نے سپرنٹنڈنٹ اڈیالہ جیل کو دی گئی درخواست میں موقف اختیار کیا ہے کہ میرے بیٹے کے ساتھی قیدی صدیق ولد باشا عرف ملکھو نے مبینہ طور پر ایجاز سیٹھ نامی شخص کے ایما پر وحشیانہ تشدد کیا جس کے نتیجے میں منصور احمد کی ناک کی ہڈی ٹوٹ گئی ہے۔ درخواست میں مزید انکشاف کیا گیا ہے کہ ملکھو گروپ جیل کے اندر اپنی عدالت لگاتا ہے، جو مشقت سے بھی انکاری ہے اور سائلہ کے بیٹے کو بیگناہ قصوری بھی بند کرواتا ہے جبکہ ملکھو کو جیل عملے کی مکمل پشت پناہی بھی حاصل ہے۔ بااثر قیدی نے منصور احمد کے کپڑے اور برتن بھی چھین لیے ہیں۔ اس کے علاوہ یہ الزام بھی لگایا گیا ہے کہ جیل ملازمین اس معاملے میں ملوث ہیں اور متاثرہ قیدی کو مزید سزا دینے کی دھمکیاں دی جا رہی ہیں۔متاثرہ قیدی کی بزرگ والدہ مسرت بیگم نے حکام بالا سے اپیل کی ہے کہ اس کے بیٹے کو انصاف فراہم کیا جائے اور اس معاملے کی تحقیقات کی جائیں۔

گوجرخان (قمرشہزاد) گوجرخان شہر میں آتشزدگی کے دو مختلف المناک واقعات نے شہر کو لرزا کر رکھ دیا، جہاں کروڑوں روپے مالیت کا قیمیتی سامان ادویات، موبائل فونز اور گاڑیاں جل کر کوئلہ بن گئیں۔ ریسکیو 1122 کی بروقت کارروائی نے مارکیٹ کے بڑے حصے کو مزید تباہی سے بچا لیا۔

پہلا واقعہ ڈھوک حیات علی میں واقع ایک نجی پارکنگ ایریا میں اچانک پراسرار طور پر آگ بھڑک اٹھی۔ دیکھتے ہی دیکھتے آگ نے وہاں کھڑی گاڑیوں کو اپنی لپیٹ میں لے لیا۔ آتشزدگی کے نتیجے میں تین گاڑیاں مکمل طور پر جل کر ڈھانچہ بن گئیں۔ وہاں موجود افراد نے اپنی مدد آپ کے تحت دیگر گاڑیوں کے شیشے توڑ کر انہیں دھکا لگا کر محفوظ مقام پر منتقل کیا، جس سے مزید نقصان کا خدشہ ٹل گیا۔ فائر بریگیڈ کی ٹیم نے موقع پر پہنچ کر آگ پر قابو پایا، تاہم آگ لگنے کی وجوہات تاحال معلوم نہیں ہوسکی ہیں۔

دوسرا واقعے ریلوے روڈ پر ہولناک آتشزدگی نے کاروبار تباہ کر دیا جہاں گزشتہ رات تقریباً ڈھائی بجے ریلوے روڈ پر واقع ایک مشہور باربی کیو شاپ میں اچانک آگ لگی جس نے سیکنڈوں میں شدت اختیار کر لی۔ آگ کے بلند ہوتے شعلوں نے پڑوس میں واقع الغفور فارمیسی ایک موبائل شاپ اور چکن شاپ کو بھی اپنی لپیٹ میں لے لیا۔ اس افسوسناک واقعے میں فارمیسی میں موجود لاکھوں روپے مالیت کی ادویات، قیمتی موبائل فونز اور دکانوں کا دیگر فرنیچر جل کر خاکستر ہو گیا۔ اطلاع ملتے ہی ریسکیو 1122 گوجرخان کی ٹیمیں فوری طور پر جائے وقوعہ پر پہنچیں اور پیشہ ورانہ مہارت کا مظاہرہ کرتے ہوئے آگ کو مزید پھیلنے سے روکا۔ ریسکیو حکام کی تندہی کے باعث مارکیٹ کی درجنوں دیگر دکانیں بڑی تباہی سے محفوظ رہیں۔ متاثرہ دکانداروں نے حکام سے مطالبہ کیا ہے کہ آگ لگنے کی وجوہات کا تعین کیا جائے اور نقصانات کا ازالہ کیا جائے

گوجرخان (قمرشہزاد) وزیر اعلیٰ پنجاب مریم نواز شریف کے ویژن کے مطابق دینی مدارس اور مساجد کے علماء کرام کی فلاح و بہبود کے لیے انقلابی قدم اٹھاتے ہوئے گوجرخان میں علماء الاؤنس کارڈ کی تقسیم کا باقاعدہ آغاز کر دیا گیا ہے۔ اسسٹنٹ کمشنر آفس گوجرخان میں منعقدہ ایک باوقار تقریب کے دوران تحصیل بھر سے منتخب علماء کرام میں الاؤنس کارڈز تقسیم کیے گئے۔

اس موقع پر اسسٹنٹ کمشنر گوجرخان نے علماء کرام سے گفتگو کرتے ہوئے کہا کہ "علماء کرام معاشرے کا سرمایہ اور مینارہ نور ہیں، حکومت پنجاب ان کی خدمات کو قدر کی نگاہ سے دیکھتی ہے اور یہ کارڈ ان کے احترام اور مالی تعاون کی جانب ایک اہم سنگ میل ہے۔ تقریب میں موجود علماء کرام نے وزیر اعلیٰ پنجاب مریم نواز کے اس اقدام کو سراہتے ہوئے اسے دیندار طبقے کی پذیرائی قرار دیا۔ انہوں نے کہا کہ پہلی بار کسی حکومت نے عملی طور پر علماء کے مسائل کو سمجھتے ہوئے ان کے لیے باقاعدہ وظائف کا اجراء کیا ہے، جو کہ خوش آئند ہے۔ تقریب کے اختتام پر ملک و قوم کی سلامتی اور اتحاد بین المسلمین کے لیے خصوصی دعا کی گئی۔انتظامیہ کے مطابق رجسٹرڈ علماء کو مرحلہ وار کارڈز کی فراہمی یقینی بنائی جا رہی ہے۔

گوجرخان (قمرشہزاد) اسسٹنٹ کمشنر گوجرخان خضر ظہور گورائیہ اور چیف آفیسر بلدیہ ملک طارق ضیاء نے قبضہ مافیا کے خلاف گھیرا تنگ کرتے ہوئے ایک اہم کارروائی میں جی ٹی روڈ پر کروڑوں روپے مالیت کی سرکاری زمین پر بننے والے غیر قانونی کمرشل ریسٹورنٹ کو سیل کر دیا گیا۔

ذرائع کے مطابق نیشنل ہائی ویز اتھارٹی (NHA) کی ملکیتی اراضی پر مبینہ طور پر غیر قانونی ریسٹورنٹ تعمیر کیا جا رہا تھا۔ اس سنگین بدعنوانی میں نہ صرف زمین پر قبضہ کیا گیا بلکہ بلدیہ میں جعلی نقشہ جمع کروا کر سرکاری فیس کی مد میں تقریباً پونے تین کروڑ روپے کا غبن کرنے کی کوشش بھی کی گئی۔ ملحقہ آبادی کے مکینوں نے اس غیر قانونی تعمیر کے خلاف دہائی دی تھی کہ ریسٹورنٹ کا سیوریج سسٹم پورے علاقے، بشمول قریبی ہسپتالوں اور سکولوں کو گندگی کے ڈھیر میں بدل دے گا۔ عوامی مفاد کو مقدم رکھتے ہوئے، اسسٹنٹ کمشنر گوجرخان خضر ظہور گورائیہ نے سخت احکامات جاری کیے جس پر چیف آفیسر بلدیہ ملک طارق ضیاء نے موقع پر پہنچ کر تعمیراتی کام رکوایا اور عمارت کو مکمل طور پر سیل کر دیا۔

شہری حلقوں نے اس دلیرانہ کارروائی پر انتظامیہ کو زبردست خراج تحسین پیش کرتے ہوئے کہا کہ خضر ظہور گورائیہ اور ملک طارق ضیاء کی نے قانون شکنوں کو واضح پیغام دے دیا ہے کہ گوجرخان میں اب لاقانونیت کی جگہ نہیں ہوگی۔ عوام نے مطالبہ کیا ہے کہ ایسے قبضہ گروہوں کے خلاف سخت ترین قانونی کارروائیاں عمل میں لاتے ہوئے انہیں عبرت کا نشان بنایا جائے تاکہ مستقبل میں کوئی سرکاری زمین یا عوامی حقوق پر شب خون مارنے کی جرآت نہ کر سکے۔

گوجرخان (قمرشہزاد) تھانہ مندرہ کے نواحی علاقے ہرنال میں گھریلو ناچاقی نے ہنستا بستتا گھر اجاڑ دیا، دو بھائیوں کے مابین ہونے والی تلخ کلامی کے نتیجے میں فائرنگ سے بدنصیب بوڑھی ماں اپنی زندگی کی بازی ہار گئی گھر میں کہرام مچ گیا۔

پولیس ذرائع کے مطابق ہرنال کے رہائشی رستم علی اور اس کے بھائی عمران کے درمیان کسی معمولی گھریلو بات پر تکرار ہوئی۔ تلخ کلامی اس قدر بڑھی کہ غصے میں بپھرے ہوئے ملزم عمران نے ہوش و حواس کھو کر 30 بور پستول نکال لیا اور اندھا دھند فائرنگ کر دی۔ اس دوران دونوں بھائیوں کے درمیان بیچ بچاؤ کرانے کی کوشش کرنے والی ان کی 56 سالہ والدہ مسمات رحمت جان زوجہ محمد ازرم گولیوں کی زد میں آ کر شدید زخمی ہو گئیں۔ زخمی خاتون کو فوری طور پر تشویشناک حالت میں اسپتال منتقل کیا جا رہا تھا، تاہم وہ زخموں کی تاب نہ لاتے ہوئے راستے میں ہی خالقِ حقیقی سے جا ملیں۔ واقعے کی اطلاع ملتے ہی ایس ایچ او مندرہ ملک تنویر اشرف نفری کے ہمراہ موقع پر پہنچ گئے اور لاش کو تحویل میں لے کر قانونی کارروائی کا آغاز کر دیا۔ پولیس نے جائے وقوعہ سے شواہد اکٹھے کر لیے ہیں۔ ایس ایچ او ملک تنویر اشرف کا کہنا ہے کہ ملزم عمران واردات کے بعد فرار ہونے میں کامیاب ہو گیا جس کی گرفتاری کے لیے ٹیمیں تشکیل دے کر مختلف مقامات پر چھاپے مارے جا رہے ہیں۔ جلد ملزم کو گرفتار کر کے قانون کے کٹہرے میں لایا جائے گا۔

گوجرخان (قمر شہزاد) اے ایس پی گوجرخان سید دانیال حسن کی زیر نگرانی اور ایس ایچ او تھانہ گوجرخان مرزا طیب ظہیر بیگ کی قیادت میں گوجرخان پولیس نے ایک بڑی کامیاب کارروائی کرتے ہوئے نواحی علاقے نگائل سے اغوا ہونے والی کمسن بچیوں کو لاہور سے بحفاظت بازیاب کروا لیا۔ پولیس کی اس فوری اور مؤثر کارروائی نے نہ صرف معصوم جانوں کو تحفظ فراہم کیا بلکہ سنگین جرائم میں ملوث عناصر کو بھی قانون کے کٹہرے میں لا کھڑا کیا۔

تفصیلات کے مطابق نواحی علاقے نگائل سے کمسن بچیوں کے اغوا کی اطلاع موصول ہوتے ہی اے ایس پی سید دانیال حسن نے واقعے کا فوری نوٹس لیا انہوں نے کیس کی حساسیت کو مدنظر رکھتے ہوئے ایس ایچ او مرزا طیب ظہیر بیگ کی قیادت میں پولیس کی خصوصی ٹیمیں تشکیل دیں جنہیں ٹارگٹڈ کارروائی کا حکم دیا۔ پولیس ٹیموں نے جدید ٹیکنالوجی، خفیہ معلومات اور اپنی پیشہ ورانہ مہارت کو بروئے کار لاتے ہوئے انتھک محنت کی اور قلیل وقت میں ملزمان کا سراغ لگا کر لاہور میں چھاپہ مارا، جہاں سے مغوی بچیوں کو بحفاظت بازیاب کرواتے ہوئے اغوا میں ملوث ملزمان کو بھی گرفتار کر لیا ہے، جن کے خلاف متعلقہ دفعات کے تحت مقدمہ درج کر کے قانونی کارروائی کا آغاز کر دیا گیا ہے۔ اس موقع پر میڈیا سے گفتگو کرتے ہوئے اے ایس پی سید دانیال حسن نے دوٹوک الفاظ میں کہا کہ کمسن بچیوں کے اغوا جیسے سنگین جرائم میں ملوث عناصر کسی رعایت کے مستحق نہیں۔ شہریوں کے جان و مال، بالخصوص بچوں کا تحفظ پولیس کی اولین ترجیح ہے۔ ایسے جرائم میں ملوث افراد کے خلاف بلا امتیاز سخت قانونی کارروائیاں جاری رکھی جائیں گی تاکہ معاشرے کو امن کا گہوارہ بنایا جا سکے۔ جبکہ ایس ایچ او مرزا طیب ظہیر بیگ نے کہا کہ بچوں کے اغوا جیسے سنگین جرائم میں ملوث درندے قانون کی گرفت سے نہیں بچ سکتے گوجرخان پولیس شہریوں کے تحفظ اور امن و امان کی بحالی کے لیے دن رات کوشاں ہے اور قانون کی بالادستی پر کوئی سمجھوتہ نہیں کیا جائے گا۔ عوامی حلقوں نے اے ایس پی گوجرخان، ایس ایچ او اور ان کی ٹیم کی اس شاندار کارکردگی کو سراہتے ہوئے انہیں خراج تحسین پیش کیا ہے، جس سے پولیس پر عوام کے اعتماد میں مزید اضافہ ہوا ہے۔