Category: سرگودھا

میڈیا تنقید کے ساتھ ساتھ حکومتی اچھے اقدامات سے عوام کو آگاہ کرے ۔ڈپٹی کمشن
صحافیوں کو صحت کارڈز ‘ دیگر سہولیات کی فراہمی کیلئے عملی اقدامات اٹھارہے ہیں ۔آسیہ گل
عام آدمی میں مایوسی پھیلانے کی بجائے ان کے اندر امید کی کرن پیدا کی جائے ۔آسیہ گل کاالیکٹرانک میڈیاکلب میں خطاب
سرگودہا‘13نومبر : 2019 ڈپٹی کمشنرآسیہ گل نے کہا ہے کہ عوام کو بنیادی سہولتوں کی فراہمی کو یقینی بنانے کیلئے کاغذی کارروائیوں پر اکتفا کرنے کی بجائے عملی اقدامات اٹھائے گئے ہیں۔ سرگودہا شہر میں سیوریج اور پینے کے صاف پانی کی فراہمی بنیادی اور بڑے مسائل ہیں۔ جن کے حل کیلئے مختلف منصوبوں پر کام شروع ہو چکا ہے۔ شہر میں پینے کے صاف پانی کی فراہمی کیلئے ڈویژنل انتظامیہ کی کورین کمپنی سے بات چیت بھی چل رہی ہے۔ اس امر کا ا ظہار انہوںنے الیکٹرونک میڈیا کلب میں ایک تقریب سے خطاب کرتے ہوئے کیا۔ اس موقع پر ڈائریکٹر تعلقات عامہ مقبول احمد ملک،چیئرمین ملک ندیم خان ،صدر سیف خان اور جنرل سیکریٹری جنید خان کے علاوہ سیئنر صحافیوں رانا ساجد اقبال ،آفاق گوندل ،ملک محمد الطاف ،ذوالفقار علی ہاشمی ،ملک کامران اور انیس اکرم سمیت میڈیا کے دیگر نمائندگان اور کیمرہ مین کی بڑی تعداد موجود تھی۔ ڈپٹی کمشنر نے کہا کہ ضلع بھر میں مختلف محکموںکی ترقیاتی سکیموںپر کام جاری ہے جن کی تکمیل سے عوام کا معیار زندگی بہتر بنانے میں مدد ملے گی۔ ترقیاتی منصوبوں کی شفاف انداز میں تکمیل اور دیکھ بھال کیلئے کمیٹیوں میں عوام کی شمولیت کو بھی یقینی بنایا جارہا ہے۔ انہوںنے کہاکہ ارزاں قیمتوں پر اشیائے ضروریہ کی فراہمی کو بھی یقینی بنانے کیلئے پرائس کنٹرول مجسٹریٹس سمیت دیگر ادارے بڑا فعال کردار ادا کررہے ہیں۔ ایک سوال کے جواب میں انہوں نے بتایا کہ شہر میں ضلعی انتظامیہ خصوصی سٹالز لگارہی ہے۔ جہاں پر کسان براہ راست اپنی سبزیاںاور فروٹ سمیت دیگر اجناس کو لاکر فروخت کر سکیں گے۔ ڈپٹی کمشنر آسیہ گل نے کہاکہ میڈیا ریاست کی آنکھ کان اور معاشرے کو سنوارنے کا اہم ذریعہ ہر حکومت اور ادوار میں میڈیا کی آراءکو ہمیشہ مقدم سمجھا جاتا ہے۔ انہوںنے میڈیا نمائندگان پر زور دیاکہ وہ زردصحافت کی سختی سے حوصلہ شکنی کریں ۔ عام آدمی میں مایوسی پھیلانے کی بجائے ان کے اندر امید کی کرن کو برقرار رکھا جائے۔ انہوںنے کہا کہ میڈیا سرکاری اداروں پر مثبت تنقید کے ساتھ ساتھ اچھے کاموں اور اقدامات سے بھی تمام افراد کو آگاہ کرے ۔ ڈپٹی کمشنر نے کہاکہ سرگودہا کے صحافیوں کو صحت کارڈ اور اپنی چھت کی فراہمی کو یقینی بنانے کیلئے ضلعی انتظامیہ تمام ممکنہ اقدامات اٹھارہی ہے۔ قبل ازیں ڈپٹی کمشنر نے میڈیاکلب کے سبزہ زار میں کلین اینڈ گرین مہم کے سلسلہ میں پودا لگایا ۔ کلب آمد پر ان کا شاندار استقبال کیا گیااور فضا میں کبوتر چھوڑے گئے ۔بعدا زاں چیئرمین کلب ندیم خان ،صدر سیف خان اور جنرل سیکریٹری جنید خان سمیت دیگر ممبران نے اظہار خیال کرتے ہوے اپنے ساتھیوں کو درپیش مسائل سے آگاہ اور عوامی مسائل کی جانب نشاندہی کروائی ۔ اس موقع پر میڈیا کلب کی جانب سے ڈپٹی کمشنر سرگودہا کو کلب کی اعزازی ممبر شپ اور شیلڈ بھی دی گئی ۔

سرگودھا (بیورو رپورٹ) میٹرو پولیٹین میونسپل کارپوریشن سرگودھا میں میئر پی ٹی آئی کا آئیگا جس کیلئے ابھی سے لائحہ عمل تیار کیا جارہا ہے اور مخالفین کو ٹف ٹائم دینے کیلئے تمام حلقوں میں ایسے امیدوار لائینگے جو عوامی توقعات پر پورا اترنے کیساتھ ساتھ عوامی خدمات کے جذبہ سے سر شار ہوں ان خیالات کا اظہار پاکستان تحریک انصاف سپورٹس اینڈ کلچر فیڈریشن سرگودھا ڈویژن کے صدر راجہ عبدالوہاب نے کیا انہوں نے کہا کہ اس سلسلہ میں تمام یونین کونسلز سے سابقہ کامیاب اور ناکام رہنے والے امیدواروں سے روابط تیز کردیئے ہیں اور ایسے امیدوار پینل کی صورت میں سامنے لائینگے جو میونسپل کارپوریشن سرگودھا میں نہ صرف کرپشن روکنے بلکہ عوامی خدمات میں بھی اپنا ثانی نہیں رکھتے راجہ عبدالوہاب نے کہا کہ میونسپل کارپوریشن سرگودھا کی حدود میں اضافے کے پیش نظر اب پہلے سے زیادہ محنت کی ضرورت ہے اس لئے کارکن بلدیاتی انتخابات کی تیاریاں ابھی سے شروع کریں تاکہ وقت آنے پر امیدواروں کے چناؤ میں مشکلات کا سامنا نہ کرنا پڑے۔

سرگودھا (بیورو رپورٹ) مولانا فضل الرحمن کی جانب سے ملک بھر کی اہم شاہراہیں بند کرنے کے اعلان کے بعد حکومت نے بھی حکمت عملی تیار کرلی ہے ذرائع کے مطابق حکومت کا کہنا ہے کہ تمام معاملات افہام و تفہیم سے حل ہونے چاہیئے اگر کسی نے ملک کو لاک ڈاؤن کرنے کی کوشش کی تو قانون حرکت میں آئیگا ذرائع کا کہنا ہے کہ اس سلسلہ میں تمام اضلاع کے ایس ایس پی صاحبان کو ہدایت جاری کی گئی ہے کہ وہ اہم شاہراؤں کی نگرانی‘ مسافروں کے جان و مال کے تحفظ کو یقینی بنانے کیلئے اقدامات کریں اور اہم شاہراؤں پر پٹرولنگ‘ ضلعی‘ ٹریفک پولیس کے گشت کو یقینی بنایا جائے اور ہر طرح کے اقدامات مکمل رکھے جائیں۔

سرگودھا (بیورو رپورٹ) حکومت نے میاں نواز شریف کو انسانی ہمدردی پر بیرون ملک علاج کی اجازت دی ہے عدالت کی جانب سے 8 ہفتوں کی ضمانت دی گئی ہے اگر حکومت بغیر گارنٹی کے انہیں ملک سے باہر جانے دیتی ہے اور وہ واپس نہ آئے تو اس کی ذمہ داری تو حکومت پر ڈال دی جائیگی اس لئے حکومت نے سکیورٹی بانڈ مانگے ہیں ان خیالات کا اظہار چیئرمین سرگودھا ڈویلپمنٹ اتھارٹی و سینئر راہنما پاکستان تحریک انصاف الحاج ممتاز اختر کاہلوں نے کیا انہوں نے کہا کہ عدالت نے نواز شریف کو علاج کی اجازت دی ہے نہ کہ بیرون ملک جانے کی‘ کسی بھی مجرم کو ضمانت کے بعد عدالت میں پیش کرنا متعلقہ فریق کی ذمہ داری ہوتی ہے اس لئے حکومت چاہتی ہے کہ نواز شریف کو علاج معالجہ کی سہولتیں ہر صورت فراہم کی جائیں اور اس کیلئے ان سے سکیورٹی مانگی جارہی ہے الحاج ممتاز اختر کاہلوں نے کہا کہ سکیورٹی دینے میں ن لیگ کی ہچکچاہٹ اس بات کا ثبوت ہے کہ نواز شریف واپس آنے کا ارادہ نہیں رکھتے اگر ان کے دل میں چور نہیں ہے تو وہ سکیورٹی بانڈ جمع کرادیں۔