Category: سرگودھا

سرگودھا۔ 21اگست (اے پی پی) سرگودہا کے نواحی چک نمبر125جنوبی میں کرکٹ میچ پر جواء کی اطلاع پر پولیس کا چھاپہ،کھلاڑیوں اورشرکاء کی دوڑیں لگ گئیں۔پولیس نے 6افراد کو گرفتارکرلیا اورداؤپر لگی ہزاروں روپے کی رقوم بھی برآمد کر لی گئیں۔پولیس ذرائع کے مطابق اطلاع ملی ہے کہ کرکٹ میچ میں جواء کھیلا جا رہا ہے جس پر پولیس نے ریڈ کیا تو کھلاڑی اور شرکاء کی دوڑیں لگ گئیں، تاہم پولیس نے عامر، شہزاد، انور، ظہیر، شاہ علی،نبیل کو حراست میں لے کر 13ہزار روپے جو کہ داؤ پر لگے ہوئے تھے برآمد کر لئے اور ملزمان کے خلاف قمار بازی ایکٹ کے تحت مقدمہ درج کر لیا۔

سرگودھا۔21اگست(اے پی پی) اکستان تحریک انصاف کے رہنمارکن صوبائی اسمبلی چودھری منیب سلطا ن چیمہ نے کہا ہے کہ مقبوضہ کشمیر میں بھارتی مظالم کو عالمی سطح پر جس طرح موجودہ حکومت نے سفارت کاری کے ذریعے اجاگر کیا ہے وہ قابل تحسین ہے اور یہ بات ثابت ہوگئی ہے کہ بھارت پر کشمیر کا قبضہ غیر قانونی ہے اور مقبوضہ کشمیر کے لوگ بھی بھارت سے نجات چاہتے ہیں، وزیراعظم عمران خان نے جس طرح کشمیریوں کی وکالت کی ہے اس پر کشمیری اور پاکستانی عوام وزیر اعظم پر فخر محسوس کررہے ہیں۔ ان خیالات کا اظہار چودھری منیب سلطا ن چیمہ نے صحافیوں سے گفتگو کرتے ہوئے کیا۔ انہوں نے کہا کہ 50 سال بعد اقوام متحدہ میں کشمیر کے مسئلہ پر اجلاس کا ہونا حکومت کی بہترین سفارتکاری کا نتیجہ ہے سابقہ حکومتوں نے اس مسئلے پر آج تک کچھ نہ کیا جس کی وجہ سے بھارت کشمیر پر قبضہ کرنے میں کامیاب رہا اب دنیا نے اس مسئلے کو سنجیدگی سے لیا ہے اور امید ہے کہ مسئلہ کشمیر موجودہ حکومت کے دور میں حل ہوگا۔انہوں نے کہا کہ اس وقت کشمیر میں بھارتی فوج جو مظالم ڈھا رہی ہے وقت کا تقاضا ہے کہ پوری دنیا اس ظلم سے بھارت کو روکے وگرنہ اگر اس مسئلے پر جنگ ہوئی تو اس کا خمیازہ بھارت اور پاکستان ہی نہیں پوری دنیا بھگتے گی۔

سرگودھا۔ 19 اگست (اے پی پی) حکومت کی ایک سالہ کارکردگی قابل فخر ہے صحت انصاف کارڈ بے گھر افراد کیلئے اپنا گھر‘ معاشی استحکام‘ بہترین خارجہ پالیسی کی وجہ سے پاکستان دنیا بھر میں باوقار قوم کی حیثیت سے ابھرا ہے جس کا سہرا پی ٹی آئی کی حکومت کے سر ہے ان خیالات کا اظہار چیئرمین سرگودھا ڈویلپمنٹ اتھارٹی و سینئر راہنما پاکستان تحریک انصاف الحاج ممتاز اختر کاہلوں نے کیا انہوں نے کہا کہ حکومت نے کرپٹ افراد کیخلاف وعدے کے مطابق کاروائی کرتے ہوئے کرپٹ لوگوں کو جیلوں میں ڈالا جن لوگوں کی وجہ سے ملک معاشی طور پر کمزور ہوا تھا الحاج ممتاز اختر کاہلوں نے کہا کہ جب پی ٹی آئی نے اقتدار سنبھالا اس وقت سب سے اہم مسئلہ معاشی استحکام کا تھا حکومت کے مثبت اقدامات سے اب ملک ترقی کی راہ پر گامزن ہو چکا ہے عوام کو یقین دلاتے ہیں کہ آنیوالا ہر دن ملک کی خوشحالی کا دن ہوگا

سرگودھا۔ 19 اگست (اے پی پی) پلانٹ فار پاکستان ڈے کے تحت سرگودھا یونیورسٹی میں شجرکاری مہم جاری ہے۔ اس حوالے سے اساتذہ، طلبہ،یونیورسٹی افسران نے بھرپور حصہ لے رہے ہیں۔اس سلسلہ میں طلبہ نے مختلف شعبہ جات میں پودے لگائے اور اس عزم کااعادہ کیا کہ ماحولیاتی آلودگی کے خاتمہ کے لئے کلین اینڈ گرین پروگرام وقت کی اہم ضرورت ہے اور ہر بشر دو شجر کے سلوگن کو اپنا کر ہم پاکستان کو سرسبز اور آلودگی سے پاک بنا سکتے ہیں۔ترجما ن سرگودھا یونیورسٹی کے مطابق کلین اینڈ گرین مہم کے تحت سرگودھایونیورسٹی، اُس کے ذیلی کالجزمیڈیکل اور زرعی کالج بشمول بھکر اور میانوالی کیمپس میں اب تک ہزاروں پودے لگائے جاچکے ہیں اور ان کے دیکھ بھال کی جا رہی ہے۔

سرگودھا۔ 19 اگست (اے پی پی) مثبت سرگرمیاں جہاں انسانی صحت پر اچھے اثرات مرتب کرتی ہیں وہاں پر معلوماتی دورے بھی خوش آئند ہیں ان خیالات کا اظہار سرگودھا پریس کلب کے جنرل سیکرٹری رانا ساجد اقبال‘ سینئر نائب صدر شہزاد شیرازی‘ کوآرڈی نیٹر چوہدری عبدالحنان‘ فنانس سیکرٹری رانا محمد اشرف‘ ایگزیکٹو ممبر ارشد محمود ارشی‘ ممبر پریس کلب محمد اشرف قریشی سمیت دیگر نے سرگودھا پریس کلب کے زیر اہتمام سرگودھا کے صحافیوں کے شمالی علاقوں کے سیاحتی دورے کے بعد پریس کلب میں منعقدہ تقریب سے خطاب کرتے ہوئے کیا انہوں نے کہا کہ سرگودھا پریس کلب میں مثبت سرگرمیوں کا آغاز خوش آئند ہے جس کا سہرا موجودہ پریس کلب کے عہدیداران کے سر ہے قبل ازیں صحافیوں نے اوچھالی‘ کھبیکھی‘ کنہٹی باغ کے علاوہ سوات‘ مینگورہ‘ سیدو شریف‘ ملم جبہ اور کالام کا سیاحتی دورہ کیا اور گزشتہ روز کلر کہار‘ کھیوڑہ‘ چوآ سیدن شاہ‘ قلعہ کٹاس راج کا دورہ کیا جہاں پر صحافیوں نے ان علاقوں کے بارے معلومات حاصل کیں اس طرح کے دورے جہاں معلومات میں اضافے کا موجب بنتے ہیں وہاں پر دنیا بھر کے سیاحوں کو پاکستان کے پُر کشش مقامات کے بارے میں آگاہی کا موجب بھی ہیں ا شہزاد شیرازی کی جانب سے کھیوڑہ میں صحافیوں کیلئے ریفریشمنٹ کا اہتمام بھی کیا گیا تھا۔