Category: شیخوپورہ

شیخوپورہ(نمائندہ باغی ٹی وی)پنجاب حکومت کی ہدایت پر شیخوپورہ کے میونسپل کارپوریشن ہال میں ضلعی انتظامیہ کی جانب سے کھلی کچہری کا انعقاد کیا گیا ۔صوبائی وزیر میاں خالد محمود ۔ڈپٹی کمشنر محمد اصغر جوئیہ اسسٹنٹ کمشنر محسن اقبال ۔ایڈمن آفیسر سید اظہر گیلانی سمیت محکمہ ریونیو کے عملہ نے بھی کھلی کچہری میں شرکت کی۔کھلی کچہری میں ریونیو کے متعلق شہریوں کی شکایات کو موقع پر حل کرنے کے احکامات جاری کیے گئے

ریونیو سے متعلق لگائی جانے والی کھلی کچہری میں ڈپٹی کمشنر سے لے کر پٹواری تک کا عملہ موجود تھا جہاں فرد کا اجراء ڈومیسائل سمعیت ریوینیو سے متعلق تمام سہولیات ایک ہی چھت تلے ملنے پر شہریوں نے پنجاب حکومت کا شکریہ ادا کیا۔ ڈپٹی کمشنر شیخوپورہ محمد اصغر جوئیہ کا میڈیا سے گفتگو کرتے ہوئے کہنا تھا کہ ہر مہینے کے پہلے روز ریوینیو سے متعلق کھلی کچہری لگائی جاتی ہے جس میں شہریوں کے مسائل حل کرنے کے ساتھ تمام افسران کو یہ ہدایت دی جاتی ہے کہ وہ اپنے دفاتر میں بھی شہریوں کے مسائل فوری سنیں اور ان کو ہنگامی بنیادوں پر حل کریں

شیخوپورہ (نمائندہ باغی ٹی وی) نواز لیگ کے مرکزی رہنماء اور رکن قومی اسمبلی میاں جاوید لطیف کی 85 سالہ والدہ بیگم ولایت لطیف بھائی انور لطیف اور محکمہ مال کے تین اہلکاروں رانا غلام مرتضیٰ گل نوید اور محمد رقیب کے خلاف محکمہ اینٹی کرپشن نے ایک اور مقدمہ درج کر لیا ہے جس کے بعد میاں جاوید لطیف اور ان کے خاندان کے خلاف درج شدہ مقدمات اور زیر تکمیل انکوائریوں کی تعداد ایک درجن سے تجاوز کر گئی ہے

نیا مقدمہ ڈپٹی کمشنر شیخوپورہ چوہدری محمد اصغر جوئیہ کی مدعیت میں زیر دفعہ 409 ت پ اور پانچ دو 47 انسداد رشوت ستانی ایکٹ کے تحت درج کیا گیا ہے اس مقدمہ میں گذشتہ کئی عشروں کے دوران میاں فیملی کی طرف سے خریدی جانے والی املاک پر اشٹام ڈیوٹی اور دیگر سرکاری محاصل کم مالیت کے سرکاری خزانے میں جمع کرانے کا الزام لگایا گیا ہے جن میں ایسی املاک بھی شامل ہیں جو میاں جاوید لطیف کے ایم این اے ایم پی اے اور ڈسٹرکٹ کونسلر بننے سے قبل خریدی گئی تھی

ایف آئی آر کے مندرجات کے مطابق میاں جاوید لطیف کی والدہ صاحبہ اور ان کے بھائی میاں انور لطیف کے نام پر خریدی جانے والی 24 املاک پر اشٹام ڈیوٹی اور رجسٹری فیس وغیرہ شیڈول ریٹ سے کم رجسٹری برانچ کے مذکورہ اہلکاروں کی ملی بھگت سے جمع کروا کر سرکاری خزانے کو مجموعی طور پر 24054904 روپے کا نقصان پہنچایا گیا ہے جس کی شکایت ملنے پر ڈپٹی کمشنر چوہدری محمد اصغر جوئیہ نے اسسٹنٹ کمشنر شیخوپورہ کی سربراہی میں ایک 3 رکنی انکوائری کمیٹی تشکیل دی جس کے ممبران میں جی اے ریونیو اور سپریٹنڈنٹ محکمہ مال شامل تھے اس کمیٹی کی رپورٹ میں نشاندہی کی گئی ہے کہ این اے 121 شیخوپورہ تھری کے رکن قومی اسمبلی میاں جاوید لطیف کی والدہ اور بھائی کے نام پر خریدی جانے والی بھاری مالیت کی 24 املاک پر سرکاری واجبات کی رقم مختلف اوقات کے شیڈول ریٹ کے مطابق جمع نہ کروائی گئی ہے

محکمہ مال کے باخبر ذرائع نے بتایا ہے کہ صرف 3 کلرکوں اور دو مفاد کنندگان کے خلاف الزام تراشی کرنے سے یہ الزامات سچ ثابت نہیں ہوسکتے 24 املاک کی رجسٹریاں اور دستاویزات پاس کرنے والے سب رجسٹراروں کی نشاندہی نہ کرنا اس بات کی نشاندہی کرتا ہے کہ یہ انکوائری جلد بازی میں کروائی گئی ہے دریں اثناء میاں جاوید لطیف ایم این اے نے میڈیا کے نمائندوں سے گفتگو کرتے ہوئے کہا کہ مجھے فخر محسوس ہو رہا ہے کہ میں میاں نواز شریف کے بیانیئے کے ساتھ کھڑا ہوں اور اب تک اس جرم کی سزا میں میرے خاندان کے خلاف ایک درجن سے زیادہ مقدمات درج ہوچکے ہیں اور انکوائریاں چل رہی ہیں

انہوں نے کہا کہ وہ تیر آزمائے ہمارے پاؤں میں لغزش نہ آئے گی انہوں نے کہا کہ مجھے افسوس ہے کہ میری معمر والدہ کو بھی ظلم کا نشانہ بنایا جا رہا ہے جو سینہ کے انفکیشن کی وجہ سے چند روز سے علیل ہیں انہوں نے کہا کہ میری بات کو بھی تاریخ کے باب میں شامل کر لیا جائے کہ میں میاں نواز شریف کے ساتھ کھڑا ہوں اور کھڑا رہوں گا جن 24 املاک کا مقدمہ درج کیا گیا ہے ان میں سے کچھ املاک میرے پیدا ہونے سے قبل خریدی گئی تھیں اور 95 فیصد املاک میرے عملی سیاست میں آنے سے بھی قبل خریدی گئی ہیں پھر یہ کیسے الزام لگا دیا گیا کہ میرے اثر و رسوخ کی وجہ سے شیڈول ریٹ نہیں لگا گیا میاں جاوید لطیف نے کہا کہ موجودہ دور میں ہمارے اوپر ہونے والے مظالم مشرف دور سے بھی بڑھ گئے ہیں خدا کی لاٹھی بے آواز ہے وہ وقت آنے والا ہے جب یہی نیب ہوگی مگر کٹہرے کے کردار بدل جائیں گے

شیخوپورہ (نمائندہ باغی ٹی وی) موٹر وے پولیس کے انسپکٹر ریاض احمد خان کو ڈی ایس پی موٹر ویزپولیس کے عہدہ پر ترقی دیدی گئی ہے جنہیں وفاقی وزیر مراد سعید اور آئی جی موٹر وے پولیس ڈاکٹر سید کلیم امام نے بیج لگا کر مبارکباد دی اور پیشہ وارانہ امور کی انجام دہی میں کوئی کسر اٹھا نہ رکھنے کی امید کا اظہار کیاجبکہ ڈی ایس پی کے عہدہ پر ترقی پانے پر ریاض احمد خان نے خوشی و مسرت کا اظہار کرتے ہوئے کہا کہ پیشہ وارانہ ذمہ داریوں کی انجام دہی میری ہمیشہ اولین ترجیح رہے گی اور موٹر وے پولیس کا مورال مزید بلند کرنے میں کوئی کسر نہ چھوڑی جائے گی،موٹر وے پولیس کو حاصل عزت و توقیر افسران و ملازمین کی فرض شناسی کا صلہ ہے جو ہمارے لئے قابل صد افتخارو باعث فخر ہے۔

شیخوپورہ (نمائندہ باغی ٹی وی)شیخوپورہ میں گذشتہ دو روز کے دوران متعدد علاقوں میں سیوریج کا نظام بند ہو جانے پر انکشاف ہوا کہ میونسپل کارپوریشن شیخوپورہ کے پاس انجینئرنگ سٹاف کی شدید کمی ہے نہ صرف ایکسین بلکہ ایس ڈی او اور سب انجینئروں کی بھی 6 آسامیاں کافی عرصہ سے خالی ہیں جس کی وجہ سے شہر میں سیوریج کے نظام کی دیکھ درست بھال نہیں ہو رہی ہے

اور بھکھی روڈ طارق روڈ محلہ ہنجرانوالہ محلہ کیپری پارک سمیت کئی بستیوں میں کئی کئی روز گندا پانی کھڑا رہتا ہے اس بارے میں لوگوں کی شکایت پر صوبائی وزیر ڈیزاسٹر مینجمنٹ میاں خالد محمود صوبائی دارالحکومت میں اپنی سرگرمیاں معطل کر کے شیخوپورہ پہنچ گئے جنہوں نے ڈپٹی کمشنر چوہدری محمد اصغر جوئیہ کے ہمراہ سیوریج کے نظام کی بد حالی سے متاثرہ علاقوں کا دورہ کیا صوبائی وزیر نے بتایا کہ حکومت پنجاب نے شیخوپورہ میں سیوریج کے نظام کو بہتر بنانے کے لیے ایک اور ڈسپوزل اسٹیشن بنانے کے منصوبہ کی منظوری دے دی ہے

یہ اسٹیشن فیصل آباد روڈ پر جیون پورہ کلاں کے نزدیک 3 کنال اراضی پر بنایا جائے گا جس کے لیے محکمہ پبلک ہیلتھ نے زمین ایکوائر کر لی ہے دریں اثناء ڈپٹی کمشنر نے ہدایت جاری کی ہے کہ شہر کے مختلف مقامات پر کھدائی کر کے سیوریج کے پائپوں کے معیار کا جائزہ لیا جائے اور اس بارے میں رپورٹ تیار کی جائے کہ کن کن علاقوں میں کنکریٹ کا بیڈ بنائے بغیر ہی سابقہ ادوار میں سیوریج کے پائپ بچھا دیئے گئے ہیں۔