Category: سیالکوٹ

سیالکوٹ (باغی ٹی وی، ڈویژنل بیوروچیف شاہد ریاض)سیالکوٹ پولیس نے ڈکیتی اور راہزنی میں ملوث بدنامِ زمانہ فانا گینگ کے سرغنہ سمیت دو خطرناک ملزمان کو گرفتار کر کے لاکھوں روپے کا مال مسروقہ اور ناجائز اسلحہ برآمد کر لیا ہے۔ یہ اہم کارروائی ڈی پی او سیالکوٹ فیصل شہزاد کی خصوصی ہدایات پر ضلع بھر میں جاری جرائم پیشہ عناصر کے خلاف مہم کے تحت عمل میں لائی گئی۔

ڈی ایس پی صدر سرکل کی نگرانی میں ایس ایچ او تھانہ کوٹلی لوہاراں سب انسپکٹر شہباز اشرف نے جدید ٹیکنالوجی اور مؤثر حکمتِ عملی کے ذریعے یہ کامیابی حاصل کی۔ ترجمان پولیس کے مطابق گرفتار ملزمان شہریوں سے اسلحہ کے زور پر موٹر سائیکلیں، نقدی، قیمتی موبائل فونز چھیننے اور چوری کی متعدد وارداتوں میں ملوث تھے۔ ابتدائی تفتیش میں ملزمان نے درجنوں وارداتوں کا اعتراف کیا ہے۔

پولیس نے ملزمان کے قبضے سے درج ذیل اشیاء برآمد کی ہیں:2 عدد چوری شدہ موٹر سائیکلیں،نقدی 1 لاکھ 30 ہزار روپے،2 عدد قیمتی سمارٹ موبائل فونز،2 عدد 30 بور ناجائز پسٹل بمعہ متعدد گولیاں

گرفتار ملزمان کی شناخت عرفان ولد عبدالرحمن سکنہ چک 142 سلانوالی ضلع سرگودھا، اور طاہر ولد رحمت اللہ سکنہ چک 116 سلانوالی ضلع سرگودھا کے طور پر ہوئی ہے۔ دونوں ملزمان تھانہ کوٹلی لوہاراں کی حدود میں متعدد وارداتوں میں ملوث رہے، جن سے 11 مقدمات ٹریس کیے گئے ہیں۔ پولیس نے ملزمان کو جوڈیشل ریمانڈ پر حوالات بھجوا دیا ہے۔

ڈی پی او سیالکوٹ فیصل شہزاد نے کامیاب کارروائی پر پولیس ٹیم کو سراہتے ہوئے افسران و جوانوں کے لیے تعریفی اسناد اور نقد انعام کا اعلان کیا ہے۔ پولیس ترجمان کا کہنا ہے کہ ضلع بھر میں جرائم پیشہ عناصر کے خلاف کارروائیاں مزید تیز کر دی گئی ہیں تاکہ شہریوں کے جان و مال کا تحفظ یقینی بنایا جا سکے۔

سیالکوٹ (شاہد ریاض ڈویژنل بیوروچیف)سیالکوٹ میں پولیس کے ساتھ دو الگ الگ مقابلوں میں قتل، اقدامِ قتل اور بھتہ خوری سمیت متعدد جرائم میں مطلوب دو ملزمان ہلاک ہو گئے۔

پہلا واقعہ صدر سرکل کے تھانہ کوٹلی سید امیر کی حدود میں موضع شادیوال کے قریب ایک پولیس مقابلے میں قتل، اقدامِ قتل اور بھتہ خوری میں ملوث ملزم راحت عرف مودا ہلاک ہو گیا۔ راحت مودا اپنے ایک ساتھی کے ہمراہ موٹرسائیکل پر سوار تھا کہ اس کا سی سی ڈی ٹیم سے آمنا سامنا ہو گیا۔ فائرنگ کے تبادلے میں ملزم راحت مودا اپنے ہی ساتھیوں کی گولیوں کا نشانہ بن کر موقع پر ہی ہلاک ہو گیا۔ پولیس کے مطابق ہلاک ہونے والے ملزم راحت مودا کے خلاف مختلف نوعیت کے 42 مقدمات درج تھے۔

دوسرا واقعہ ڈسکہ کے قریب پیش آیا جہاں پولیس حراست سے فرار ہونے والے ملزم احسن مون عرف مون انجلیک کا سی سی ڈی سے آمنا سامنا ہوا۔ ملزمان نے قانون نافذ کرنے والے اہلکاروں پر براہ راست فائرنگ شروع کر دی۔ تقریباً بیس منٹ تک جاری رہنے والے فائرنگ کے تبادلے کے بعد ملزم احسن مون اپنے ہی ساتھیوں کی فائرنگ سے شدید زخمی حالت میں گرفتار کر لیا گیا۔ تاہم، ہسپتال منتقل کرنے سے قبل ہی وہ زخموں کی تاب نہ لاتے ہوئے دم توڑ گیا۔

سیالکوٹ (باغی ٹی وی،بیورورپورٹ+ سٹی رپورٹر )سانحہ ڈسٹرکٹ جیل سیالکوٹ کی 22ویں برسی کے موقع پر ضلعی عدلیہ سیالکوٹ میں ایک پُراثر دعائیہ تقریب کا انعقاد کیا گیا، جس کی صدارت ڈسٹرکٹ اینڈ سیشن جج ندیم طاہر سید نے کی۔ اس موقع پر ایڈیشنل ڈسٹرکٹ اینڈ سیشن ججز، سینئر سول ججز، سول ججز اور سیکرٹری ڈسٹرکٹ بار ایسوسی ایشن افضال اسلم بھی موجود تھے۔

تقریب کا آغاز یادگار شہداء پر پھول چڑھانے اور شہید ججز کے لیے مغفرت کی اجتماعی دعا سے ہوا۔ پولیس کے چاق و چوبند دستے نے شہداء کو سلامی پیش کر کے ان کی عظیم قربانی کو سلام پیش کیا۔

ڈسٹرکٹ اینڈ سیشن جج ندیم طاہر سید نے تقریب سے خطاب کرتے ہوئے کہا کہ 25 جولائی 2003 کا دن عدلیہ کی تاریخ میں سنہری حروف سے لکھا جائے گا، جب چار معزز جج صاحبان نے ڈسٹرکٹ جیل سیالکوٹ کے معائنہ کے دوران دورانِ ڈیوٹی جام شہادت نوش کیا۔ انہوں نے کہا کہ ان جج صاحبان کی قربانی عدلیہ کی آزادی، سچائی کی سربلندی اور نظامِ عدل کے تحفظ کی ایک روشن مثال ہے۔

ان کا کہنا تھا کہ شہداء ججز کا صبر و استقامت اور فرض شناسی آئندہ نسلوں کے لیے مشعلِ راہ ہے اور عدلیہ و بار ایسوسی ایشن ان کی قربانیوں کو ہمیشہ یاد رکھے گی۔ تقریب میں شریک تمام ججز اور وکلاء نے بھی شہداء کے ایصالِ ثواب کے لیے دعائیں کیں اور ان کی عظمت کو سلام پیش کیا۔

سیالکوٹ (بیورو چیف خرم میر): سیالکوٹ پولیس نے شہریوں کو ان کی دہلیز پر انصاف فراہم کرنے کے عزم کا اعادہ کیا ہے۔ ڈسٹرکٹ پولیس آفیسر (ڈی پی او) سیالکوٹ فیصل شہزاد نے کھلی کچہری میں شہریوں کے مسائل سنے اور ان کے فوری حل کے لیے احکامات جاری کیے۔

ڈی پی او فیصل شہزاد نے کہا کہ وزیراعلیٰ پنجاب مریم نواز کے ویژن کے مطابق شہریوں کے مسائل کو ترجیحی بنیادوں پر حل کیا جائے گا۔ انہوں نے مزید کہا کہ جرائم پیشہ افراد کا خاتمہ ان کی اولین ترجیح ہے، اور اس مقصد کے لیے عوام کا تعاون ناگزیر ہے۔ انہوں نے عزم ظاہر کیا کہ سیالکوٹ کے رہائشیوں کے تعاون سے شہر کو ایک مثالی شہر بنایا جائے گا۔

کھلی کچہری سے خطاب کرتے ہوئے ڈی پی او نے کہا کہ امن و امان کی صورتحال کو برقرار رکھنے کے لیے پولیس ہمہ وقت کوشاں ہے۔ انہوں نے شہریوں سے اپیل کی کہ وہ پولیس کے ساتھ تعاون کریں تاکہ جرائم پر قابو پایا جا سکے اور سیالکوٹ کو پرامن شہر بنایا جا سکے۔

سیالکوٹ (بیوروچیف خرم میر)ڈپٹی کمشنر سیالکوٹ صبا اصغر علی کی زیر صدارت ڈسٹرکٹ کوالٹی کنٹرول بورڈ کا اجلاس ڈی سی آفس کے کانفرنس روم میں منعقد ہوا، جس میں ضلع بھر کے میڈیکل اسٹورز کے خلاف درج 31 کیسز کی سماعت کی گئی۔ اجلاس میں 5 کیسز کو ڈرگ کورٹ بھجوانے کی منظوری دی گئی، جبکہ 8 میڈیکل اسٹورز کو وارننگ جاری کرنے کا فیصلہ کیا گیا۔ 9 کیسز میں دوبارہ معائنہ کی ہدایت جاری کی گئی تاکہ خلاف ورزیوں کی تصدیق ممکن ہو سکے، جب کہ 8 کیسز کی سماعت کو آئندہ اجلاس تک مؤخر کر دیا گیا۔ ایک کیس میں خلاف ورزی کو سنگین قرار دیتے ہوئے ڈرگ کنٹرول ایکٹ کے تحت مقدمہ درج کرنے کی سفارش کی گئی۔

اجلاس کے دوران میڈیکل اسٹورز کی مختلف سنگین خلاف ورزیوں پر غور کیا گیا، جن میں بغیر ڈرگ سیل لائسنس ادویات کی فروخت، ممنوعہ، زائد المعیاد اور غیر رجسٹرڈ ادویات کی موجودگی، ادویات کے ریکارڈ کا فقدان، کوالیفائیڈ پرسن کی غیر موجودگی، اور کولڈ چین برقرار نہ رکھنے جیسے معاملات شامل تھے۔ بورڈ نے تمام کیسز کا باریک بینی سے جائزہ لیا اور قانون کے مطابق کارروائی کی منظوری دی۔

ڈپٹی کمشنر صبا اصغر علی نے اجلاس سے خطاب کرتے ہوئے کہا کہ ادویات کی فروخت کے تمام قانونی تقاضے ہر صورت پورے کروائے جائیں گے۔ انہوں نے واضح کیا کہ انسانی صحت سے متعلق کسی بھی قسم کی کوتاہی یا لاپروائی ہرگز برداشت نہیں کی جائے گی۔ ان کا کہنا تھا کہ غیر معیاری، ممنوعہ یا غیر قانونی ادویات فروخت کرنے والوں کے خلاف بلا امتیاز کارروائی عمل میں لائی جائے گی تاکہ شہریوں کو محفوظ، معیاری اور قانونی طریقہ کار کے مطابق ادویات کی فراہمی یقینی بنائی جا سکے۔

اجلاس میں ایڈیشنل ڈپٹی کمشنر جنرل ایوب بخاری، سی ای او ہیلتھ ڈاکٹر اسلم چودھری، سیکرٹری بورڈ مس فرح، اور ضلع کی چاروں تحصیلوں کے ڈرگ انسپکٹرز بھی شریک ہوئے۔