Category: سیالکوٹ

سیالکوٹ (باغی ٹی وی بیوروچیف شاہد ریاض)ڈپٹی کمشنر صبا اصغر کی زیر قیادت ڈسٹرکٹ ایمرجنسی بورڈ/ڈسٹرکٹ ڈزاسٹر مینجمنٹ اتھارٹی کا اجلاس منعقد ہوا۔ اجلاس میں ایڈیشنل ڈپٹی کمشنر ریونیو محمد اقبال، ڈسٹرکٹ ایمرجنسی آفیسر انجینئر نوید اقبال، ڈی ڈی ایم سی کیوان حسن کے علاوہ ضلع کے تمام اداروں کے سربراہوں نے شرکت کی۔

ڈسٹرکٹ ایمرجنسی آفیسر انجینئر نوید اقبال نے ریسکیو کی بابت کارکردگی رپورٹ پیش کی۔ انہوں نے محرم الحرام کے حوالے سے ریسکیو کی تیاریوں کی رپورٹ بھی اجلاس میں پیش کی۔ کیوان حسن نے حالیہ مون سون سیزن اور ممکنہ سیلاب کے حوالے سے ضلع کی تفصیلی رپورٹ پیش کی۔

ڈپٹی کمشنر صبا اصغر نے ریسکیو کی کارکردگی کو سراہا اور ہدایت کی کہ نہروں اور دریاؤں پر نہانے کی پابندی کو برقرار رکھا جائے اور دفعہ 144 کا نفاذ جاری رہے گا۔ مون سون اور ممکنہ سیلاب کے پیش نظر تمام ضلعی ادارے اپنی تیاریاں مکمل رکھیں، کسی قسم کی کوتاہی قبول نہیں کی جائے گی۔

ڈی سی نے ہدایت کی کہ بارشوں کے دوران ٹی ایم اے ہائی الرٹ رہے، ڈی واٹرنگ سیٹ آپریشنل ہوں اور عوام الناس کو بروقت ریلیف فراہم کیا جائے۔ علاوہ ازیں، شہر کے اندر اور بیرونی علاقوں میں قائم منی پیٹرول پمپس اور گیس ریفلنگ شاپس کے حوالے سے ڈپٹی کمشنر نے سول ڈیفنس کو ہدایت دی کہ انہیں نوٹسز جاری کیے جائیں اور فوری بند کروایا جائے تاکہ کوئی حادثہ پیش نہ آئے۔

ڈسکہ(باغی ٹی وی، نامہ نگار ملک عمران) انجمن خدمت خلق کا 755 واں اجلاس، افواجِ پاکستان کو خراج تحسین، سڑکوں کی تعمیر میں تاخیر پر تشویش

انجمن خدمت ِ خلق رجسٹرڈ ڈسکہ کا 755 واں ماہانہ اجلاس زچہ بچہ ہسپتال ڈسکہ میں میاں سعید احمد صراف کی صدارت میں منعقد ہوا۔ اجلاس کا آغاز تلاوتِ قرآنِ پاک سے ہوا جس کی سعادت مولانا محمد ایوب خاں نے حاصل کی، جبکہ نعت رسول مقبولؐ حاجی ضرار احمد نے پیش کی۔

جائنٹ سیکرٹری حاجی ضرار احمد نے اپریل 2025 کے اجلاس کی کارروائی پیش کی جسے متفقہ طور پر منظور کر لیا گیا۔ فنانس سیکرٹری انور احمد سیال ناسازیٔ طبع کے باعث شریک نہ ہو سکے، لہٰذا ان کی رپورٹ پیش نہ کی جا سکی۔ سیکرٹری نشرو اشاعت سہیل سلمان ٹھروہی نے گزشتہ اجلاس کی شائع شدہ خبریں پیش کیں اور ان کی کارکردگی کو سراہا گیا۔

اجلاس کے دوران بھارت کے خلاف حالیہ جنگ میں پاکستان کی فتح پر افواج پاکستان کو خراجِ تحسین پیش کیا گیا۔ حافظ عبد الغفار اور مولانا ایوب خاں نے اپنے خیالات کا اظہار کرتے ہوئے کہا کہ پوری قوم اپنی افواج کے ساتھ شانہ بشانہ کھڑی ہے۔

مزید برآں، اجلاس میں شہر کی سڑکوں کی ابتر حالت پر شدید تشویش کا اظہار کیا گیا۔ اراکین نے انتظامیہ سے مطالبہ کیا کہ سڑکوں کی تعمیر کا کام جلد از جلد مکمل کیا جائے کیونکہ گرد و غبار کے باعث شہری بالخصوص دکاندار ناک اور گلے کی بیماریوں میں مبتلا ہو رہے ہیں۔

ڈسکہ: (باغی ٹی وی، نامہ نگار ملک عمران) وزیراعلیٰ پنجاب مریم نواز شریف کے ویژن "انصاف آپ کی دہلیز پر” کے تحت ڈپٹی کمشنر سیالکوٹ صبا اصغر علی نے سول کلب ڈسکہ میں کھلی کچہری کا انعقاد کیا۔ اس موقع پر ایڈیشنل ڈپٹی کمشنر ریونیو محمد اقبال سنگھیڑا، اسسٹنٹ کمشنر ڈسکہ عثمان غنی، تحصیل کے تمام ریونیو افسران اور صحت، تعلیم سمیت دیگر محکموں کے حکام موجود تھے۔

ڈپٹی کمشنر نے شہریوں کی شکایات سن کر موقع پر احکامات جاری کیے اور ہدایت دی کہ ریونیو سے متعلق تمام مسائل فوری حل کیے جائیں۔ انہوں نے کہا کہ ہر شکایت پر عملدرآمد کی رپورٹ انہیں ذاتی طور پر پیش کی جائے۔ ریونیو حکام کو کھلی کچہری میں شکایات کے حل تک موجود رہنے کی ہدایت دی گئی، جبکہ ڈپٹی کمشنر آفس کو باقاعدہ رپورٹنگ کا پابند کیا گیا۔ زبانی شکایات درج کرنے والے شہریوں کے لیے تحریری اندراج کی سہولت فراہم کی گئی، جن پر بھی عملدرآمد کا یقین دلایا گیا۔

ڈپٹی کمشنر نے کہا کہ کھلی کچہریوں کا مقصد عوام کے مسائل کا فوری حل ہے۔ صحت اور تعلیم سے متعلق شکایات کی روشنی میں ایک مستقل پالیسی تیار کی جا رہی ہے۔

دریں اثناء، ڈپٹی کمشنر نے میونسپل کمیٹی اور پولیس حکام کے ہمراہ مرکزی امام بارگاہ ڈسکہ اور محرم الحرام کے جلوسوں کے روٹس کا معائنہ کیا اور منتظمین سے ملاقات کر کے انتظامی و سیکیورٹی امور پر تبادلہ خیال کیا۔

سیالکوٹ (باغی ٹی وی، بیوروچیف شاہد ریاض)آل پاکستان رائٹرز ویلفیئر ایسوسی ایشن (اپووا) کے ایک اعلیٰ سطحی وفد نے گورنر خیبرپختونخوا فیصل کریم کنڈی سے گورنر ہاؤس میں ملاقات کی۔ ملاقات کے دوران وفد نے گورنر کو تنظیم کی ادبی، فکری اور سماجی خدمات سے تفصیلاً آگاہ کیا۔ گورنر خیبرپختونخوا نے اپووا کی ادبی سرگرمیوں کو سراہتے ہوئے کہا کہ یہ خدمات نہ صرف قابل تحسین ہیں بلکہ دیگر اداروں کے لیے مشعل راہ بھی ہیں۔

اس موقع پر گورنر فیصل کریم کنڈی نے اپنے دست مبارک سے اپووا کے وفد کو تعریفی اسناد بھی پیش کیں، جبکہ گورنر ہاؤس کی جانب سے تمام معزز ارکان کو یادگاری سوینئرز بھی دیے گئے۔ وفد نے اس پر مسرت موقع پر گورنر کو اپووا کی اعزازی شیلڈ پیش کی اور ان کی میزبانی پر شکریہ ادا کیا۔

وفد میں ملک یعقوب اعوان، ایم ایم علی، حافظ محمد زاہد، سفیان علی فاروقی، محمد اسلم سیال، ممتاز اعوان، معاویہ ظفر، محمد بلال، ڈاکٹر عمر شہزاد، ڈاکٹر سعدیہ شہزاد، ناز پروین، بشریٰ فرخ، تابندہ فرخ، ثمینہ قادر، نیلوفر سمیع، رانی عندلیب سمیت دیگر نامور ادبی و فکری شخصیات شامل تھیں۔ وفد کی اس ملاقات کو ادبی حلقوں میں انتہائی خوش آئند اور حوصلہ افزا قدم قرار دیا جا رہا ہے۔

سیالکوٹ (باغی ٹی وی، بیورو چیف شاہد ریاض)سرجیکل انسٹرومنٹ مینوفیکچررز ایسوسی ایشن پاکستان (سیماپ) کے زیر اہتمام "ٹیکنالوجی اینڈ انویشن سمٹ 2025” کا انعقاد کیا گیا جس میں جدید سرجیکل مصنوعات کی تیسری نمائش نجی مارکی میں منعقد ہوئی۔ اس نمائش کا مقصد سرجیکل آلات تیار کرنے والے اداروں، وینڈرز، خام مال، ٹولز، سرٹیفکیشن اور لاجسٹک سروسز فراہم کرنے والے اداروں کو ایک چھت تلے جمع کرنا تھا۔

چیئرمین سیماپ زیشان طارق نے باغی ٹی وی سے گفتگو کرتے ہوئے کہا کہ یہ ایونٹ سرجیکل انڈسٹری کے تمام اسٹیک ہولڈرز کو ایک جدید پلیٹ فارم مہیا کرتا ہے جہاں وہ اپنی مصنوعات براہِ راست خریداروں کے سامنے پیش کر سکتے ہیں۔ انہوں نے کہا کہ ماضی میں جدید میٹریل کے لیے لاہور، کراچی یا بیرونِ ملک جانا پڑتا تھا، لیکن اب یہ سب سیالکوٹ میں ایک جگہ میسر ہے۔

صدر وویمن چیمبر ڈاکٹر مریم نعمان نے اس نمائش کو خوش آئند قرار دیتے ہوئے کہا کہ یہ سمٹ خواتین اور نوجوانوں کو کاروبار کی طرف راغب کرنے اور انڈسٹری کو جدید خطوط پر استوار کرنے میں مددگار ہے۔

ایونٹ میں چیئرمین سیماپ زیشان طارق، وائس چیئرمین سلمان مغل، عبدالمومن، ایم پی اے فیصل اکرام، بانی اتحاد فاﺅنڈر گروپ ریاض الدین شیخ، سابق چیئرمین خلیل احمد، صدر چیمبر اکرام الحق، سینیئر وائس پریذیڈنٹ گلنار وقاص ملک، جنرل سیکرٹری سیماپ عثمان بٹ، ڈائریکٹر میٹل انڈسٹری ڈویلپمنٹ خرم شہزاد اعوان اور بڑی تعداد میں کاروباری و سماجی شخصیات شریک ہوئیں۔

سیالکوٹ (باغی ٹی وی، بیوروچیف شاہد ریاض) سیالکوٹ کے عوام اور کاروباری طبقے کے لیے خوش آئند خبر ہے کہ ایئر سیال نے سیالکوٹ سے دبئی اور دبئی سے سیالکوٹ کے لیے باقاعدہ پروازوں کا آغاز کر دیا ہے۔ یہ اقدام نہ صرف بین الاقوامی سفر کو آسان بنائے گا بلکہ گوجرانوالہ، گجرات، وزیرآباد، نارووال، سمبڑیال اور دیگر قریبی شہروں کے مسافروں کے لیے بھی سہولت کا باعث بنے گا۔

ایئر سیال کی پروازیں سیالکوٹ انٹرنیشنل ایئرپورٹ سے دبئی انٹرنیشنل ایئرپورٹ (DXB) کے درمیان ہفتے میں کئی بار شیڈول کی گئی ہیں، جو کم خرچ، بہتر سروس اور وقت کی بچت کے لحاظ سے انتہائی مؤثر ہیں۔

کاروباری حضرات، تجارتی مسافر اور اوورسیز پاکستانی اب براہِ راست، آرام دہ اور معیاری سفر کا فائدہ اٹھا سکیں گے، جو علاقائی ترقی اور عالمی روابط کے فروغ کے لیے ایک اہم سنگ میل ثابت ہوگا۔

سیالکوٹ (باغی ٹی وی، بیوروچیف شاہد ریاض) ڈپٹی کمشنر سیالکوٹ صبا اصغر علی کی زیر صدارت تحصیل کمپلیکس میں کھلی کچہری کا انعقاد کیا گیا، جس میں شہریوں نے مختلف محکموں سے متعلق شکایات پیش کیں۔ ڈپٹی کمشنر نے متعدد شکایات پر موقع پر ہی احکامات جاری کیے۔

انہوں نے کہا کہ وزیر اعلیٰ پنجاب مریم نواز شریف کے ویژن "انصاف آپ کی دہلیز پر” کے تحت تحصیل سطح پر کھلی کچہریوں کا انعقاد کیا جا رہا ہے تاکہ عوامی مسائل کا فوری حل ممکن بنایا جا سکے۔ ریونیو سمیت مقامی سطح کے معاملات وہیں حل کیے جا رہے ہیں، جبکہ صوبائی نوعیت کے مسائل کے لیے متعلقہ حکام کو سفارشات ارسال کی جائیں گی۔

ڈپٹی کمشنر نے بتایا کہ محرم الحرام کے دوران امن و امان یقینی بنانے کے لیے سیکیورٹی انتظامات مکمل کر لیے گئے ہیں، جلوسوں کے روٹس کا معائنہ جاری ہے اور متعلقہ اداروں کو ہدایات جاری کی جا چکی ہیں۔

شہری کسی بھی مسئلے یا معلومات کے لیے ضلعی کنٹرول روم کی ہیلپ لائن 1718 یا پولیس ہیلپ لائن 15 پر رابطہ کر سکتے ہیں۔
کھلی کچہری میں ایڈیشنل ڈپٹی کمشنر ریونیو محمد اقبال سنگھیڑا اور تمام متعلقہ محکموں کے نمائندے شریک تھے۔

سیالکوٹ (باغی ٹی وی،بیوروچیف شاہدریاض) شہر اور مضافاتی علاقوں میں مرطوب ہواؤں کے باعث حبس کی شدت میں خطرناک حد تک اضافہ ہو چکا ہے، حالانکہ درجہ حرارت نسبتاً کم ہے۔ معروف ہومیوپیتھک معالج ڈاکٹر قیصر ضمیر نے باغی ٹی وی سے گفتگو کرتے ہوئے بتایا کہ بڑھتی ہوئی نمی کے باعث محسوس ہونے والا درجہ حرارت 53 ڈگری سینٹی گریڈ تک جا پہنچا ہے، جو انسانی صحت کے لیے انتہائی نقصان دہ ہو سکتا ہے۔

انہوں نے کہا کہ اس موسم میں پسینے کی زیادتی کے باعث جسم سے نمکیات کا اخراج بڑھ جاتا ہے، جس سے بالخصوص ضعیف اور مریض افراد کی حالت بگڑ سکتی ہے۔ ڈاکٹر قیصر نے مشورہ دیا کہ سکنجبین، او آر ایس اور دہی کی لسی جیسے مشروبات کا استعمال کیا جائے، کیونکہ ان میں قدرتی نمکیات موجود ہوتے ہیں۔ صرف پانی پینا کافی نہیں کیونکہ اس سے جسم سے نمکیات کی مزید کمی ہو سکتی ہے۔

انہوں نے عوام کو مشورہ دیا کہ ہلکے رنگ، ڈھیلے ڈھالے کپڑے پہنیں، دھوپ سے بچیں اور جسمانی مشقت سے گریز کریں۔ آخر میں انہوں نے زور دیا کہ اس احتیاطی پیغام کو دوسروں تک بھی پہنچایا جائے تاکہ زیادہ سے زیادہ لوگ موسمی اثرات سے محفوظ رہ سکیں۔

سیالکوٹ (باغی ٹی وی،بیوروچیف شاہد ریاض) گورنمنٹ کالج ویمن یونیورسٹی سیالکوٹ میں چھٹے سالانہ کانووکیشن کی شاندار اور پروقار تقریب کا انعقاد ہوا، جس میں مجموعی طور پر 1783 طالبات کو مختلف تعلیمی اسناد سے نوازا گیا۔ اس موقع پر جامعہ کی پہلی 8 پی ایچ ڈی اسکالرز کو بھی ڈگریاں دی گئیں جو ادارے کی علمی ترقی کا روشن ثبوت ہیں۔

تقریب میں 1474 طالبات کو بی ایس، 146 کو ایم اے/ایم ایس سی اور 92 کو ایم فل/ایم ایس کی ڈگریاں عطا کی گئیں۔ وائس چانسلر پروفیسر ڈاکٹر شازیہ بشیر نے صدارت کی جبکہ مہمان خصوصی رکن صوبائی اسمبلی چوہدری طارق سبحانی تھے۔

دیگر معزز مہمانان میں ڈاکٹر نظام الدین، ڈاکٹر فرحت سلیمی، ڈاکٹر عامر اعظم خان، ڈاکٹر سلیمان طاہر، ڈاکٹر شہزاد مرتضی، ڈاکٹر بلال طاہر، ڈاکٹر محمد شاہد رفیق، معروف سائنسدان ڈاکٹر این ایم بٹ، خواجہ مسعود اختر، مس عذرہ سبطین اور مس گل زیب شامل تھیں۔

وائس چانسلر نے خطاب میں ڈگری حاصل کرنے والی طالبات، ان کے والدین اور اساتذہ کو مبارکباد دی اور یونیورسٹی کی تعلیمی و تحقیقی کامیابیوں کا تفصیلی جائزہ پیش کیا۔ انہوں نے کنٹرولر امتحانات ملک گلشان اسکیم اور ان کی ٹیم کی کاوشوں کو بھی سراہا جن کی بدولت یہ تقریب کامیابی سے منعقد ہوئی۔