Category: سیالکوٹ

سیالکوٹ(باغی ٹی وی،ڈسٹرکٹ رپورٹرمدثررتو)سانحہ اے پی ایس سرکاری سکولوں میں یادگاری تقاریب

سیالکوٹ میں سانحہ آرمی پبلک سکول کی یاد میں تمام سرکاری سکولوں میں یادگاری تقاریب کا انعقاد کیا گیا۔ طلبہ و طالبات نے پوسٹرز، تقاریر، ملی نغموں اور ٹیبلوز کے ذریعے شہدائے اے پی ایس کو خراج عقیدت پیش کیا۔

گورنمنٹ گرلز ہائی سکول ڈھلم بلگن، سمبڑیال میں تقریب سے خطاب کرتے ہوئے سی ای او ایجوکیشن مجاہد حسین علوی نے کہا کہ قوم کبھی بھی اس سانحہ کو نہیں بھولے گی۔ انہوں نے کہا کہ آج بچے آزاد اور پُرامن ماحول میں تعلیم حاصل کر رہے ہیں، یہ سب شہدائے اے پی ایس کی قربانیوں کی بدولت ممکن ہوا۔

سی ای او ایجوکیشن نے طالبات کے تیار کردہ پوسٹرز اور ٹیبلوز کو سراہتے ہوئے کہا کہ ان کے ذریعے شہداء کو خراج عقیدت پیش کرنا قوم کی نئی نسل میں جذبہ حب الوطنی اور شعور کی علامت ہے۔

سیالکوٹ (باغی ٹی وی ڈسٹرکٹ رپورٹر مدثر رتو) گورنمنٹ ووکیشنل ٹریننگ انسٹیٹیوٹ سیالکوٹ میں ہنر روزگار میلے کا باوقار افتتاح ڈپٹی کمشنر صباء اصغر علی اور چیئرمین پنجاب ووکیشنل ٹریننگ کونسل خالد مسعود چوہدری نے کیا۔ افتتاح کے بعد انہوں نے مختلف اسٹالز کا تفصیلی جائزہ لیا اور نوجوانوں کی محنت، لگن اور پیشہ ورانہ قابلیت کو سراہا۔

ڈپٹی کمشنر اور چیئرمین ووکیشنل کونسل نے کہا کہ ہنرمندی نوجوانوں کے باوقار مستقبل کی بنیاد ہے اور ووکیشنل ادارے اس مشن کو کامیابی سے آگے بڑھا رہے ہیں۔ اس موقع پر طلبہ و طالبات کی حوصلہ افزائی کرتے ہوئے نمایاں پوزیشن حاصل کرنے والوں میں سرٹیفکیٹس اور شیلڈز تقسیم کی گئیں۔

اس تقریب میں صنعت و تجارت سے وابستہ اہم شخصیات بھی موجود تھیں جن میں خواجہ مسعود اختر، محمد اشرف صندل، ڈاکٹر اسلم ڈار، ملک نصیر احمد، اشفاق نذر، میاں اعجاز انجم، مراد ارشد، مس گل زیب، کاشف الماس، حناء نارین، انصر محمود، سید غضنفر عباس، عمران مشتاق، چوہدری آفاق نذر، چوہدری موسیٰ اشفاق سمیت دیگر معززین شامل تھے۔

ڈپٹی کمشنر نے کہا کہ اس طرح کی تقریبات نہ صرف نوجوانوں کے لیے مفید رہنمائی فراہم کرتی ہیں بلکہ مقامی صنعت اور تعلیمی اداروں کے باہمی تعاون کی ایک روشن مثال بھی ہیں۔

سیالکوٹ (باغی ٹی وی بیوروچیف شاہد ریاض)ضلع سیالکوٹ میں 30 پانی کی کمپنیوں کے پانی کے نمونوں کا تجزیہ کیا گیا جس میں سے دو کمپنیوں کے پانی کو مضر صحت قرار دیا گیا۔ یہ معلومات وفاقی ادارہ پاکستان کونسل آف ریسرچ ان واٹر ریسورسز (PCRWR) اسلام آباد کی سیالکوٹ لیبارٹری کی حالیہ رپورٹ میں دی گئی ہیں۔

انچارج آفسیر ڈسٹرکٹ لیبارٹری سیالکوٹ تجمل لنگڑیال نے بتایا کہ مضر صحت پانی میں بیکٹریا اور دیگر نقصان دہ اجزاء موجود ہیں۔ انہوں نے شہریوں کو ہدایت کی کہ وہ اپنے گھریلو پانی کی کوالٹی جانچنے کے لیے لیبارٹری کے دفتر، ہاکی گراؤنڈ، پسرور روڈ پر رابطہ کریں۔

تجمل لنگڑیال نے کہا کہ سیالکوٹ میں تمام کمپنیوں کے پانی کے نمونے اوپن مارکیٹ اور مختلف دکانوں سے حاصل کیے گئے اور تجزیہ کے بعد رپورٹ مرتب کی گئی ہے۔ ان کا کہنا تھا کہ ادارہ ہر تین ماہ بعد پانی کے نمونوں کا معائنہ کرتا ہے تاکہ عوام کو صاف اور محفوظ پانی کی فراہمی یقینی بنائی جا سکے۔

مزید تفصیلات ادارہ کی ویب سائٹ www.pcrwr.gov.pk پر دستیاب ہیں۔

سیالکوٹ (باغی ٹی وی،بیوروچیف شاہد ریاض) ڈپٹی کمشنر صبا اصغر علی کی زیر صدارت ڈسٹرکٹ ڈسپیوٹ ریزولوشن کمیٹی (ڈی آر سی) کا اجلاس ڈی سی آفس میں منعقد ہوا، جس میں سائلین کی داد رسی کا سلسلہ جاری رہا۔ اجلاس میں 20 درخواستوں پر فیصلے کیے گئے اور ناجائز قابضین سے زمینیں واگزار کرنے کے احکامات بھی جاری کیے گئے۔

اجلاس میں ڈی پی او فیصل شہزاد، اے ڈی سی ریونیو عباس ذوالقرنین، اے ڈی سی جنرل شاہد عباس، چاروں تحصیلوں کے اسسٹنٹ کمشنرز، ایس ڈی پی اوز اور متعلقہ ریونیو افسران نے شرکت کی۔

ڈپٹی کمشنر نے حیات والد کے مکان سے حصہ حاصل کرنے کے لیے من گھڑت مؤقف پیش کرنے پر ایک شہری کو 15 ہزار روپے جرمانہ کیا۔ انہوں نے کہا کہ ڈی آر سی کا فورم صرف حقداروں کی داد رسی کے لیے ہے اور جھوٹی درخواستوں کے باعث قیمتی وقت ضائع ہوتا ہے۔

ڈپٹی کمشنر اور ڈی پی او نے اسسٹنٹ کمشنرز اور ایس ڈی پی اوز کو ہدایت کی کہ جائیداد کی متنازعہ تقسیم کی صورت میں فریقین کے درمیان باہمی افہام و تفہیم سے منصفانہ تقسیم یقینی بنائیں اور کسی کے حق کو ضائع نہ ہونے دیں۔

صبا اصغر علی نے کہا کہ جن شہریوں کو ریونیو قوانین کا علم نہیں، انہیں قانونی رہنمائی فراہم کی جائے۔ وزیر اعلیٰ پنجاب کے ویژن اور پنجاب پروٹیکشن آف ایمووایبل پراپرٹی ایکٹ 2025ء کے تحت کمیٹی اپنی ذمہ داریاں پوری کرے گی اور کسی بھی قسم کی غفلت برداشت نہیں کی جائے گی۔