Category: سیالکوٹ

سیالکوٹ,باغی ٹی وی(بیوروچیف شاہد ریاض)ڈپٹی کمشنر سیالکوٹ سید حسن رضا نے تحصیل سمبڑیال کا تفصیلی دورہ کرتے ہوئے مختلف علاقوں میں صفائی، گرین بیلٹس، تجاوزات اور صحت کی سہولیات کے حوالے سے انتظامات کا جائزہ لیا۔ ان کے ہمراہ اسسٹنٹ کمشنر غلام فاطمہ بندیال اور چیف آفیسر ضلع کونسل فیصل شہزاد بھی موجود تھے۔

ڈپٹی کمشنر نے گرین بیلٹس کو خوبصورت بنانے اور جہاں پودے خشک ہو چکے ہیں وہاں فوری نئے پودے لگانے کی ہدایت کی۔ انہوں نے تحصیل انتظامیہ کو سڑکوں کے اطراف سے تمام غیر ضروری بینرز اور سٹریمرز فوری طور پر ہٹانے کے احکامات دیے اور واضح کیا کہ تجاوزات کے خلاف زیرو ٹالیرینس کی پالیسی پر سختی سے عملدرآمد کیا جائے گا۔

انہوں نے صفائی کے حوالے سے سیالکوٹ سالڈ ویسٹ مینجمنٹ کمپنی کو عملے کی مکمل متحرکیت، بروقت کوڑا کرکٹ اٹھانے اور گلیوں و سڑکوں کی صفائی یقینی بنانے کی ہدایت کی۔ ستھرا پنجاب پروگرام کے تحت صفائی کے معیار میں مزید بہتری لانے پر زور دیا۔

ڈپٹی کمشنر نے ایکسین ہائی ویز کو بھی ہدایت کی کہ سڑکوں کے شولڈرز کو مضبوط اور پختہ کیا جائے تاکہ سڑکوں کی پائیداری بڑھے اور ٹریفک کی روانی متاثر نہ ہو۔ انہوں نے واضح کیا کہ تعمیراتی معیار پر کسی قسم کا سمجھوتہ ہرگز برداشت نہیں کیا جائے گا۔

بعد ازاں، سید حسن رضا نے تحصیل ہیڈ کوارٹر ہسپتال سمبڑیال کا اچانک دورہ کیا، جہاں انہوں نے ڈیوٹی روسٹر کے مطابق عملے کی حاضری چیک کی، ایمرجنسی اور دیگر طبی سہولیات کا جائزہ لیا، اور مریضوں کی عیادت کی۔ انہوں نے زیر علاج افراد سے طبی سہولیات، عملے کے رویے اور مفت ادویات کی فراہمی سے متعلق معلومات حاصل کیں۔

ڈپٹی کمشنر نے کہا کہ ضلعی انتظامیہ عوامی سہولیات کی بہتری اور تجاوزات و آلودگی کے خاتمے کے لیے بھرپور اقدامات کر رہی ہے، اور کسی قسم کی غفلت یا کوتاہی ہرگز برداشت نہیں کی جائے گی۔

ڈسکہ,باغی ٹی وی(نامہ نگارعمران ملک) انجمن خدمت خلق رجسٹرڈ ڈسکہ کا 753واں ماہانہ اجلاس اور ڈینگی آگاہی سیمینار زیر صدارت صدر میاں سعید احمد صراف مدرسہ جامع عزیزیہ وڈالہ روڈ پر منعقد ہوا۔ اجلاس کا آغاز تلاوتِ قرآن پاک سے ہوا جس کی سعادت حافظ عبدالغفار نے حاصل کی جبکہ نعت رسول مقبول ﷺ انوار احمد سیال نے پیش کی۔

جائنٹ سیکرٹری ضرار احمد خاں نے فروری 2025 کے اجلاس کی کارروائی پیش کی جسے متفقہ طور پر منظور کر لیا گیا۔ فنانس سیکرٹری انوار احمد سیال نے ماہ فروری کی آمدن و اخراجات کی تفصیلات پیش کیں، جنہیں بعد از بحث منظور کر لیا گیا۔ سیکرٹری نشرو اشاعت سہیل سلمان ٹھروہی نے گزشتہ اجلاس کی شائع شدہ خبریں پیش کیں۔

اجلاس میں ڈینگی سے بچاؤ کے لیے مؤثر اقدامات پر زور دیا گیا اور انتظامیہ سے اپیل کی گئی کہ ڈسکہ شہر میں فوری سپرے کروایا جائے تاکہ بڑھتی ہوئی گرمی میں مچھروں خصوصاً ڈینگی کے پھیلاؤ کو روکا جا سکے۔ سیمینار کے بعد ڈینگی آگاہی واک کا بھی اہتمام کیا گیا۔

تجاوزات کے خلاف جاری آپریشن پر گفتگو کرتے ہوئے ممبران نے مطالبہ کیا کہ اسے جلد مکمل کیا جائے تاکہ دکاندار دوبارہ اپنا کاروبار بحال کر سکیں۔ رمضان المبارک میں ادارے کے لیے کامیاب فنڈ ریزنگ پر صدر نے تمام ممبران کو مبارکباد دی۔

اجلاس کے اختتام پر جنرل سیکرٹری محمد انور مغل کے بھتیجے اور نائب صدر حبیب الرحمان مغل کے چچازاد بھائی کے انتقال پر دعائے مغفرت کی گئی۔ دعا اور تواضع کے بعد اجلاس اختتام پذیر ہوا۔

سیالکوٹ (باغی ٹی وی، سٹی رپورٹر: مدثر رتو)ملک بھر میں جاری پانچ روزہ انسدادِ پولیو مہم کے دوران سیالکوٹ میں ریسکیو 1122 کے اہلکار اور ریسکیو اسکاؤٹس بھی پیش پیش ہیں۔ ریجنل ایمرجنسی آفیسر گوجرانوالہ ڈاکٹر فواد شہزاد مرزا کی زیر نگرانی، ریسکیورز ضلع انتظامیہ کے ہمراہ مہم میں بھرپور حصہ لے رہے ہیں۔

ریسکیو 1122 کے اہلکاروں اور 20 ریسکیو اسکاؤٹس نے ڈسٹرکٹ وارڈن جمیل جنجوعہ کی سربراہی میں لاری اڈہ کے سات مختلف مقامات بشمول بلال ٹریولز، مسجد چوک، ویگن اسٹینڈ، لاہور کوچ اسٹینڈ، وزیرآباد روڈ سبلائم چوک اور ڈسکہ روڈ دبرجی چوک پر پولیو کیمپ قائم کیے، جہاں سفر کرنے والے افراد کے ہمراہ موجود پانچ سال سے کم عمر بچوں کو پولیو سے بچاؤ کے قطرے پلائے جا رہے ہیں۔

ڈسٹرکٹ ایمرجنسی آفیسر انجینئر نوید اقبال نے کیمپس کا دورہ کیا، بچوں کو خود بھی پولیو کے قطرے پلائے اور ریسکیورز و اسکاؤٹس کی خدمات کو سراہتے ہوئے کہا کہ پولیو فری پاکستان کا خواب تبھی ممکن ہے جب ہر فرد اپنا کردار ادا کرے۔

ریسکیو اسکاؤٹس نے مہم کے ابتدائی دو روز میں مجموعی طور پر 782 بچوں کو پولیو سے بچاؤ کے قطرے پلائے، جو کہ ایک قابلِ تحسین اقدام ہے۔

سیالکوٹ ،باغی ٹی وی( بیوروچیف شاہد ریاض) پنجاب اسمبلی کے حلقہ پی پی 52 (سمبڑیال) میں ضمنی انتخاب کا شیڈول جاری کر دیا گیا۔

الیکشن کمیشن آف پاکستان نے ایم پی اے چوہدری ارشد جاوید وڑائچ کی وفات کے بعد خالی ہونے والی نشست پر ضمنی انتخاب کا اعلان کر دیا ہے۔ حلقہ پی پی 52 میں ضمنی انتخاب 1 جون 2025 بروز اتوار کو ہوگا۔ الیکشن کمیشن آف پاکستان نے اس حوالے سے باضابطہ نوٹیفکیشن جاری کر دیا ہے۔

نوٹیفکیشن کے مطابق، ڈپٹی کمشنر ڈسٹرکٹ ریٹرننگ آفیسر اور ایڈیشنل ڈپٹی کمشنر ریونیو محمد اقبال سنگھیڑا ریٹرننگ آفیسر کی ذمہ داریاں انجام دیں گے۔ انتخابی شیڈول درج ذیل ہے:

22 اپریل: پبلک نوٹس جاری ہوگا۔
23 سے 25 اپریل: امیدواروں سے کاغذات نامزدگی وصول کیے جائیں گے۔
26 اپریل: امیدواروں کی فہرستیں آویزاں کی جائیں گی۔
30 اپریل: کاغذات نامزدگی کی جانچ پڑتال کی آخری تاریخ ہوگی۔
3 مئی: ریٹرننگ افسر کے فیصلے کے خلاف اپیل کی جا سکے گی۔
10 مئی: اپیلٹ ٹریبونل تمام درخواستیں نمٹانے کا پابند ہوگا۔
11 مئی: امیدواروں کی حتمی فہرستیں آویزاں کی جائیں گی۔
12 مئی: کاغذات نامزدگی واپس لینے کی آخری تاریخ ہوگی۔
13 مئی: انتخابی نشانات الاٹ کیے جائیں گے۔
1 جون 2025: حلقہ میں ووٹنگ ہوگی۔

الیکشن کمیشن نے شفاف اور منظم انتخابات کے انعقاد کے لیے تمام ضروری انتظامات کو یقینی بنانے کی ہدایت کی ہے۔

سیالکوٹ،باغی ٹی وی( بیورو چیف شاہد ریاض): پاکستان میں تعینات ایتھوپیا کے سفیر ڈاکٹر جمال بیکر عبداللہ نے سیالکوٹ چیمبر آف کامرس اینڈ انڈسٹری (ایس سی سی آئی) کا دورہ کیا۔ صدر چیمبر اکرام الحق، سینئر نائب صدر وسیم شہباز لودھی، اور نائب صدر عمر خالد نے مہمان کا پرتپاک استقبال کیا۔

صدر اکرام الحق نے خطبہ استقبالیہ میں کہا کہ پاکستان اور ایتھوپیا کے درمیان گہرے برادرانہ تعلقات ہیں، جو دونوں ممالک کی عوام کے لیے فائدہ مند ہیں۔ انہوں نے باہمی تجارت اور اقتصادی تعلقات کو فروغ دینے کے لیے مخلصانہ کوششوں کے عزم کا اظہار کیا اور تجارتی وفود کے تبادلے پر زور دیا۔

ایتھوپیا کے سفیر ڈاکٹر جمال بیکر عبداللہ نے کہا کہ پاک-ایتھوپیا تجارتی حجم بڑھانے کی ضرورت ہے۔ انہوں نے 15 سے 17 مئی 2025 کو ایتھوپیا میں منعقد ہونے والی پانچویں پاکستان-افریقہ ٹریڈ ڈویلپمنٹ کانفرنس اینڈ سنگل کنٹری نمائش میں سیالکوٹ کے تاجروں کو شرکت کی دعوت دی، جو پاکستانی کاروباری برادری کے لیے نئے مواقع فراہم کرے گی۔ سفیر نے سیالکوٹ چیمبر کی دستاویزی فلم "سیالکوٹ: دی سٹی آف پروگریسو پیپل” میں بھی گہری دلچسپی ظاہر کی۔

اجلاس کے اختتام پر صدر چیمبر اکرام الحق نے معزز مہمان کو یادگاری شیلڈ پیش کی۔ اس موقع پر چیئرمین یونیورسٹی آف سیالکوٹ ملک فیصل منظور، ڈی جی ٹی ڈی پی خالد رسول، سابق صدور چیمبر ملک اشرف اور ڈاکٹر خرم، سابق ضلعی ناظم میاں نعیم جاوید، ایگزیکٹو رکن اعجاز احمد غوری سمیت دیگر اہم شخصیات موجود تھیں۔

سیالکوٹ،باغی ٹی وی( بیوروچیف شاہد ریاض)دیگر شہروں کی طرح ڈسکہ میں بھی پانچ روزہ قومی انسداد پولیو مہم کا آغاز کردیا گیا۔ ڈپٹی ڈسٹرکٹ ہیلتھ آفیسر ڈاکٹر سادات انور نے خانہ بدوش بستی میں پانچ سال تک کی عمر کے بچوں کو پولیو کے قطرے پلا کر مہم کا باقاعدہ افتتاح کیا۔

21 سے 25 اپریل تک جاری رہنے والی اس مہم کے دوران تحصیل بھر میں پانچ سال تک کی عمر کے ایک لاکھ 68 ہزار 500 بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ اس مقصد کے لیے 611 ٹیمیں تشکیل دی گئی ہیں جن میں 568 موبائل، 29 فکسڈ اور 14 ٹرانزٹ ٹیمیں شامل ہیں۔

یہ ٹیمیں گھر گھر جا کر، بھٹوں، بس اسٹینڈز، اسکولوں، اسپتالوں اور دیگر عوامی مقامات پر بچوں کو قطرے پلائیں گی۔ ڈاکٹر سادات انور نے والدین سے اپیل کی کہ وہ بچوں کو مستقل معذوری سے بچانے کیلئے پولیو کے قطرے ضرور پلوائیں اور محکمہ صحت کی ٹیموں سے بھرپور تعاون کریں تاکہ کوئی بچہ قطرے پینے سے محروم نہ رہ جائے اور پاکستان کو پولیو فری بنانے کا ہدف حاصل کیا جا سکے۔

سیالکوٹ،باغی ٹی وی(سٹی رپورٹر مدثر رتو)مقامی سماجی و مذہبی راہنما میاں اعجاز انجم نے گزشتہ روز اپنی رہائش گاہ پر منعقدہ ایک خصوصی محفل بعنوان "حقوق العباد” سے خطاب کرتے ہوئے کہا کہ حضور نبی کریم ﷺ کی زندگی تمام مسلمانوں کے لیے ایک روشن مثال ہے، جس پر عمل پیرا ہو کر ہم دنیا اور آخرت دونوں میں کامیابی حاصل کر سکتے ہیں۔

اس موقع پر خلیفہ مجاز گھمکول شریف پیر صوفی مظہر حسین نقشبندی، قومی ایوارڈ یافتہ کلین گرین چیمپین محمد اشفاق نذر، اور شہر کے اہم سماجی، کاروباری، مذہبی اور سیاسی شخصیات جن میں ایم شریف شاہد ایڈووکیٹ، خواجہ عامر رشید، چوہدری منور حسین گجر، محمد وسیم عطاری، ملک زاہد حسین، مختار احمد، ملک ابرار، میاں فیصل شہزاد، مہر شہزاد، میاں سرفراز نواز، چوہدری آفاق، خالد محمود، دلاور حسین، رانا نوید، ساجد خان، چوہدری موسیٰ اشفاق، محمد عثمان و دیگر شامل تھے، نے بھی شرکت کی۔

میاں اعجاز انجم نے اپنے خطاب میں زور دیتے ہوئے کہا کہ آج ہمیں سنجیدگی سے غور کرنا ہوگا کہ رسول اکرم ﷺ نے ہمیں جس بلند مقام پر فائز کیا تھا، کہیں ہم اس سے دور تو نہیں ہو رہے؟ انہوں نے حاضرین پر زور دیا کہ وہ آج ہی یہ عہد کریں کہ وہ ایمان اور نیک اعمال والی زندگی بسر کریں گے۔ ہمیں ہر قسم کی بدعقیدگی اور برے اعمال سے اجتناب کرنا ہوگا۔ انہوں نے مزید کہا کہ جب ہم حضور اکرم ﷺ کی سیرت طیبہ کو اپنی زندگیوں کا حصہ بنائیں گے، تو یقیناً اللہ تعالیٰ ہمیں آپ ﷺ کی سیرت کے صدقے معاف فرمائیں گے۔

تقریب سے چیئرمین ڈسٹرکٹ رویت ہلال کمیٹی پیر غلام حسین سلطانی، علامہ محمد اقبال گھمن، علامہ پروفیسر شجاعت علی مجاہد اور علامہ محمد عصام چشتی سمیت دیگر جید علمائے کرام نے بھی خطاب کیا اور بارگاہ رسالت مآب ﷺ میں عقیدت کے پھول نچھاور کرتے ہوئے ہدیہ نعت پیش کیا۔ مقررین نے حقوق العباد کی اہمیت پر روشنی ڈالی اور معاشرے میں امن، محبت اور بھائی چارے کو فروغ دینے پر زور دیا۔

سیالکوٹ ،باغی ٹی وی(بیوروچیف شاہد ریاض) پنجاب کالج سٹی ہاؤسنگ کیمپس سیالکوٹ کے پارٹ ٹو کے طلبہ کے اعزاز میں ایک شاندار الوداعی تقریب کا اہتمام کشمیر روڈ پر واقع جیونز ہوٹل میں کیا گیا۔ اس پروقار تقریب میں طلبہ کے لیے رنگا رنگ پروگرام، قوالی کی محفل اور پرتکلف عشائیے کا خصوصی انتظام کیا گیا تھا۔

پرنسپل جناب راؤ محمد حسان کی زیر صدارت منعقد ہونے والی اس تقریب میں وائس پرنسپل بوائز کیمپس پروفیسر راحت لطیف اعوان اور وائس پرنسپل گرلز کیمپس محمد عمران اقبال نے اپنے خطاب میں اساتذہ کی انتھک تدریسی خدمات کو خراج تحسین پیش کیا۔ اسٹیج سیکرٹری کے فرائض پروفیسر محمد عمران، طالب علم حیدر علی اور عاشر جاوید نے بخوبی سرانجام دیے۔

شہر اقبال کے نامور قوال وقار مشتاق نے اپنے فن کا مظاہرہ کرتے ہوئے بہترین قوالیوں سے محفل کو گرما دیا۔ اس موقع پر پرنسپل جناب راؤ محمد حسان، وائس پرنسپل راحت لطیف اعوان اور وائس پرنسپل محمد عمران اقبال کے ہمراہ پروفیسر قاسم علی بٹ (ڈسپلن انچارج)، پروفیسر اشفاق نیاز (صدر شعبہ اردو)، پروفیسر باقر ڈار (ہیڈ آف بائیو ڈیپارٹمنٹ)، پروفیسر سرمد علی (ہیڈ آف فزکس ڈیپارٹمنٹ)، پروفیسر زوہیب عارف (کنٹرولر امتحانات)، پروفیسر مصدق علی (شعبہ انگلش)، پروفیسر فیصل منظور (شعبہ انگریزی)، پروفیسر عبداللہ (شعبہ انگریزی)، پروفیسر طاہر وسیم، پروفیسر مدثر جبار، پروفیسر حماد سلیم (شعبہ کمپیوٹر)، پروفیسر اسد شہباز (شعبہ)، پروفیسر علیم (شعبہ ریاضیات)، پروفیسر ابرار ملک (شعبہ کامرس)، پروفیسر نصیر احمد زاہدی (صدر شعبہ اسلامیات)، پروفیسر عمیر الازہری، پروفیسر نعیم رضا (شعبہ اسلامیات)، پروفیسر عتیق الرحمن (شعبہ اردو)، پروفیسر محمد یعقوب (شعبہ پولیٹیکل سائنس)، پروفیسر اظہر نذیر (شعبہ کیمسٹری) اور پروفیسر شان اعظم (شعبہ فزکس) سمیت دیگر اساتذہ کرام نے طلبہ میں یادگاری تحائف تقسیم کیے۔

وائس پرنسپل گرلز کیمپس محمد عمران اقبال نے اپنے خیالات کا اظہار کرتے ہوئے کہا کہ اساتذہ کا کردار ایک ایسے ملاح کی مانند ہے جو سخت حالات میں بھی اپنی سواریوں کو بحفاظت منزل تک پہنچاتا ہے۔ وائس پرنسپل بوائز کیمپس پروفیسر راحت لطیف اعوان نے طلبہ کو مخاطب کرتے ہوئے کہا کہ ان کی کامیابی اساتذہ کی محنت، لگن اور خلوص کا ثمر ہے۔ اساتذہ نے اپنی تمام تر صلاحیتوں کو بروئے کار لاتے ہوئے طلبہ کو بہترین تعلیمی ماحول فراہم کرنے کی کوشش کی ہے تاکہ وہ کامیاب ہو کر اچھے شہری بن سکیں اور ملک و قوم کی خدمت کر سکیں۔

صدر شعبہ اردو پروفیسر اشفاق نیاز، پروفیسر نصیر احمد زاہدی، پروفیسر اسد شہباز اور دیگر اساتذہ نے طلبہ کو محنت اور لگن کے ساتھ اپنی تعلیم جاری رکھنے کی تلقین کی اور ان کے روشن مستقبل کے لیے نیک خواہشات کا اظہار کیا۔ تقریب کے اختتام پر طلبہ کو پرتکلف عشائیہ دیا گیا اور قوال وقار مشتاق اور ان کے ساتھیوں نے اپنی شاندار پرفارمنس سے محفل کو یادگار بنا دیا۔

سیالکوٹ ،باغی ٹی وی( سٹی رپورٹر مدثر رتو) کمشنر گوجرانوالہ کا علامہ اقبال میموریل ٹیچنگ ہسپتال کا دورہ، مریض سے رقم لینے پر اہلکار معطل

کمشنر گوجرانوالہ سید نوید حیدر شیرازی نے ڈپٹی کمشنر سیالکوٹ سید حسن رضا کے ہمراہ علامہ اقبال میموریل ٹیچنگ ہسپتال سیالکوٹ کا اچانک دورہ کیا، جہاں انہوں نے مختلف وارڈز اور شعبہ جات کا معائنہ کیا اور طبی سہولیات کا جائزہ لیا۔

دورے کے دوران ایک ہسپتال ملازم کی جانب سے مریض سے رقم لینے کی شکایت پر کمشنر نے فوری کارروائی کرتے ہوئے مذکورہ اہلکار کو معطل کر دیا۔ کمشنر نے ایمرجنسی، سی او ٹی، لیبارٹری، میڈیکل وارڈز، ڈائیلسز یونٹ، فارمیسی اور بچوں کے نگہداشت یونٹ سمیت دیگر شعبوں کا تفصیلی جائزہ لیا۔

کمشنر نے واش رومز اور فارمیسی میں صفائی کی ناقص صورتحال پر سخت برہمی کا اظہار کرتے ہوئے واضح کیا کہ وزیر اعلیٰ پنجاب مریم نواز شریف کی ہدایت کے مطابق مریضوں کو معیاری طبی سہولیات اور مفت ادویات کی فراہمی حکومت کی اولین ترجیح ہے۔

انہوں نے کہا کہ فرائض میں غفلت ہرگز برداشت نہیں کی جائے گی، تمام متعلقہ افسران اور ملازمین اپنی ذمہ داریاں دیانت داری اور پیشہ ورانہ لگن سے ادا کریں۔ انہوں نے ڈپٹی کمشنر اور اسسٹنٹ کمشنر کو ہسپتالوں کی باقاعدہ انسپکشن کی ہدایت بھی جاری کی تاکہ عوام کو بہتر طبی سہولیات میسر آ سکیں۔

کمشنر نوید حیدر شیرازی نے مختلف وارڈز میں زیر علاج مریضوں کی عیادت کی، ان کے مسائل سنے اور فوری حل کے لیے احکامات جاری کیے۔ انہوں نے ڈاکٹرز اور پیرا میڈیکل اسٹاف پر زور دیا کہ وہ دکھی انسانیت کی خدمت کو اپنا مشن بنائیں۔

ڈپٹی کمشنر سید حسن رضا نے اس موقع پر کہا کہ صحت عامہ کی سہولیات کی بہتری اور تعلیمی معیار کا فروغ ضلعی انتظامیہ کی اولین ترجیح ہے۔ انہوں نے کہا کہ دستیاب وسائل کو مؤثر طریقے سے بروئے کار لایا جائے گا اور کسی قسم کی کوتاہی ہرگز برداشت نہیں کی جائے گی۔