Category: سیالکوٹ

سیالکوٹ (بیوروچیف شاہد ریاض) ڈسٹرکٹ پولیس آفس سیالکوٹ میں نئے ترقی پانے والے پولیس افسران کے اعزاز میں ایک پروقار تقریب کا انعقاد کیا گیا۔ اس تقریب میں اسسٹنٹ سب انسپکٹر سے سب انسپکٹر، ہیڈ کانسٹیبل سے اسسٹنٹ سب انسپکٹر اور کانسٹیبل سے ہیڈ کانسٹیبل کے عہدے پر ترقی پانے والے 37 افسران کو رینک لگائے گئے۔

تقریب میں ڈی پی او سیالکوٹ فیصل شہزاد نے ترقی پانے والے افسران کے اہل خانہ کے ہمراہ انہیں نئے عہدے کے رینک لگائے اور انہیں مبارکباد پیش کی۔ انہوں نے افسران کے مستقبل کے لیے نیک خواہشات کا اظہار بھی کیا۔

اس موقع پر ڈی پی او سیالکوٹ فیصل شہزاد نے کہا کہ پولیس سروس میں محکمانہ پروموشن درحقیقت ذمہ داریوں میں اضافے کی عکاسی کرتا ہے۔ انہوں نے پروموٹ ہونے والے افسران کو ہدایت کی کہ وہ قانون کے یکساں نفاذ، میرٹ کی پاسداری اور بہترین سروس ڈلیوری سے شہریوں کی خدمت اور تحفظ کو شعار بنائیں۔

سیالکوٹ ،باغی ٹی وی( بیوروچیف شاہد ریاض+سٹی رپورٹر مدثر رتو)پاکستان مسلم لیگ ن کے سینئر رہنما، رکن پنجاب اسمبلی اور صوبائی پارلیمانی سیکرٹری برائے سوشل ویلفیئر و بیت المال پنجاب، ایم پی اے حلقہ PP-152 سیالکوٹ چوہدری ارشد جاوید وڑائچ انتقال کرگئے۔ ان کے انتقال کی خبر سن کر سیاسی، سماجی اور عوامی حلقوں میں گہرے رنج و غم کی فضا چھا گئی۔

چوہدری ارشد جاوید وڑائچ تین بار (2013، 2018، 2024) مسلم لیگ ن کے ٹکٹ پر مسلسل ایم پی اے منتخب ہوئے اور ان کا شمار میاں نواز شریف کے قریبی ساتھیوں میں ہوتا تھا۔ مرحوم 13 دسمبر 1956 کو پیدا ہوئے۔

چوہدری ارشد جاوید وڑائچ کی نماز جنازہ بعد از نماز عصر سیالکوٹ کے علاقے کینال سٹی میں ادا کی گئی، جس میں زندگی کے مختلف شعبوں سے تعلق رکھنے والے ہزاروں افراد نے شرکت کی۔

نماز جنازہ معروف عالم دین حافظ عمران بشیر نے پڑھائی۔ جنازے میں وفاقی وزیر دفاع خواجہ محمد آصف، اسپیکر پنجاب اسمبلی ملک محمد احمد خان، وزیر مملکت ارمغان سبحانی، صوبائی وزیر سوشل ویلفیئر خاور بٹ، ڈپٹی کمشنر سیالکوٹ محمد ذوالقرنین لنگڑیال، اراکین اسمبلی محمد منشاء اللہ بٹ، چوہدری فیصل اکرام، چوہدری طارق سبحانی، انجینئر خرم دستگیر خان، رانا فیاض، رانا شمیم خان، خرم ورک، نوید اشرف، رانا عارف ہرناہ سمیت دیگر سیاسی و سماجی شخصیات نے شرکت کی۔

وزیراعظم پاکستان محمد شہباز شریف نے ایم پی اے ارشد جاوید وڑائچ کے انتقال پر گہرے رنج و افسوس کا اظہار کیا اور مرحوم کی بیٹی محترمہ حنا ارشد وڑائچ سے ٹیلی فونک رابطہ کر کے تعزیت کی۔ وزیراعظم نے مرحوم کی سیاسی و سماجی خدمات کو خراج تحسین پیش کرتے ہوئے بلندی درجات کی دعا کی۔

وزیراعلیٰ پنجاب مریم نواز شریف کی جانب سے تعزیتی پیغام سیکرٹری کوارڈینیشن ٹو سی ایم، سید واجد علی شاہ نے مرحوم کے اہلخانہ تک پہنچایا اور ان کیلئے صبر جمیل کی دعا کی۔

سیالکوٹ کی فضاء مرحوم چوہدری ارشد جاوید وڑائچ کے انتقال پر سوگوار رہی جبکہ سیاسی کارکنوں اور عوام کی بڑی تعداد نے ان کی سیاسی خدمات کو خراج عقیدت پیش کیا۔

سیالکوٹ (بیوروچیف شاہد ریاض) پاکستان مسلم لیگ ن کے مرکزی قائد اور وفاقی وزیر دفاع خواجہ محمد آصف نے اپنی رہائش گاہ پر سیالکوٹ کے شہریوں کے مسائل سنے اور ان کے حل کے لیے متعلقہ محکموں کے مقامی حکام کو فوری ہدایات جاری کیں۔

اس موقع پر رکن صوبائی اسمبلی محمد منشاء اللہ بٹ، خواجہ سلطان ٹیپو سمیت مسلم لیگ ن کے عہدیداران اور کارکنان بھی موجود تھے۔

رکن صوبائی اسمبلی محمد منشاء اللہ بٹ نے گفتگو کرتے ہوئے کہا کہ بجلی کی قیمتوں میں کمی اور مہنگائی کی شرح میں خاطر خواہ کمی مسلم لیگ ن کی قیادت اور اتحادی جماعتوں کی انتھک محنت کا نتیجہ ہے۔ انہوں نے کہا کہ وزیر اعظم پاکستان محمد شہباز شریف نے لڑکھڑاتی معیشت کو اپنے پاؤں پر کھڑا کردیا ہے اور آج اس کے ثمرات عوام کے ساتھ شیئر کیے جارہے ہیں۔

انہوں نے مزید کہا کہ اللہ رب العزت نے مسلم لیگ ن کو ایک بڑے امتحان میں سرخرو کیا ہے اور وفاقی اور صوبے میں حکومت میاں محمد نواز شریف کے وژن کو آگے بڑھا رہی ہے۔ ملک بھر کی طرح سیالکوٹ میں بھی میگا ترقیاتی منصوبوں کا آغاز کیا جارہا ہے۔

سیالکوٹ، باغی ٹی وی( بیورو چیف شاہد ریاض کی خصوصی رپورٹ)اسٹرابری جو کبھی آسمانوں کی سیر کرتی تھی، اس سال زمین پر آ گری۔ مارچ کے آغاز میں 600 روپے فی کلو تک فروخت ہونے والی یہ رسیلی لذت اب 150 سے 100 روپے کلو تک گر چکی ہے، مگر پھر بھی خریدار اسے ہاتھ لگانے کو تیار نہیں۔ آخر وجہ کیا ہے؟

اس دلچسپ کہانی کے پیچھے اصل راز کاشتکاروں اور دکانداروں کی اپنی ہاتھوں سے کی گئی زیادتی ہے۔ اس سال انہوں نے اسٹرابری کی شیلف لائف بڑھانے کے چکر میں اینٹی فنگس دوائیں اور کیڑے مار ادویات کا بے دریغ استعمال کیا، جو کہ مقررہ مقدار سے کہیں زیادہ تھا۔ نتیجہ؟ اسٹرابری کا ذائقہ اور معیار دونوں برباد ہوگئے۔ دکانداروں نے بھی اسے مزید خراب کرنے میں کوئی کسر نہ چھوڑی۔ کم کوالٹی کے پھل کو مصنوعی لال رنگ میں رنگ کر بازار میں پیش کر دیا گیا۔ ایسی اسٹرابری جو نہ صرف شاپر کو رنگ دیتی ہے بلکہ دھونے پر بھی اس کا رنگ چھوڑتی ہے—ایسا عجیب منظر شاید ہی کبھی دیکھا گیا ہو!

جب یہ معاملہ منظر عام پر آیا تو مختلف اضلاع سے لیے گئے نمونوں کی جانچ نے چونکا دینے والا انکشاف کیا: اسٹرابری پر اینٹی فنگس اسپرے اور کیڑے مار ادویات کا استعمال معمول سے 70 فیصد زیادہ تھا۔ دوسرے پھلوں کے برعکس، جن کا چھلکا ہموار ہوتا ہے اور دھونے سے کیمیکلز کے اثرات کم ہو جاتے ہیں، اسٹرابری کی کھردری اور مسام دار سطح ان زہریلے مادوں کو اندر تک جذب کر لیتی ہے۔ نتیجتاً، دھونے کے باوجود یہ باقیات مکمل طور پر ختم نہیں ہوتیں۔

اگر آپ بھی اسٹرابری کے شوقین ہیں تو احتیاط کریں۔ اسے کھلے پانی میں اچھی طرح دھوئیں، پانی میں تھوڑا سا میٹھا سوڈا ملا کر 10 منٹ تک بھگوئیں، پھر چھلنی میں ڈال کر دوبارہ دھو لیں۔ اس کے بعد ہی استعمال کریں۔

افسوس کی بات یہ ہے کہ یہ پھل، جو بچوں اور بڑوں کا پسندیدہ ہے اور جس سے ہم کروڑوں روپے کا زرمبادلہ کماتے ہیں، آج بازاروں میں دھکے کھا رہا ہے۔ چند لالچی افراد نے اپنے فائدے کے لیے اسے زہر آلود کر دیا اور پوری فصل کی ساکھ داؤ پر لگا دی۔ خریداروں کے بائیکاٹ سے آڑھتیوں کو اس سال شدید نقصان اٹھانا پڑا۔ امید ہے کہ اگلے سال یہ کاشتکار اور دکاندار اس کھٹے میٹھے پھل کو زہر میں تبدیل کرنے سے پہلے سو بار سوچیں گے۔

یہ رپورٹ ان لوگوں کے لیے ایک پیغام ہے جو سستی کے لالچ میں اسے بے دھڑک خرید رہے ہیں—جان ہے تو جہان ہے، احتیاط کریں!

سیالکوٹ (سٹی رپورٹر مدثر رتو)صوبائی وزیر صحت خواجہ سلمان رفیق نے اراکین صوبائی اسمبلی محمد منشاء اللہ بٹ اور چوہدری فیصل اکرام کے ہمراہ گورنمنٹ علامہ اقبال میموریل ٹیچنگ ہسپتال کا اچانک دورہ کیا۔

دورے کے دوران صوبائی وزیر صحت خواجہ سلمان رفیق نے ہسپتال کے او پی ڈی میں مریضوں سے ملاقات کی اور طبی سہولیات کا جائزہ لیا۔ اراکین صوبائی اسمبلی محمد منشاء اللہ بٹ اور چوہدری فیصل اکرام نے ہسپتال میں طبی سہولیات کے معیار کو بہتر بنانے کے لیے جدید آلات کی فراہمی اور ٹراما سینٹر سمیت دیگر شعبہ جات میں بہتری کے حوالے سے مسائل کی نشاندہی کی۔ انہوں نے ٹراما سینٹر کی توسیع کو وقت کی اہم ضرورت قرار دیا تاکہ ایمرجنسی میں مریضوں کو بروقت طبی امداد فراہم کی جا سکے۔

خواجہ سلمان رفیق نے کہا کہ گورنمنٹ سردار بیگم ٹیچنگ ہسپتال کی ری ویمپنگ جلد مکمل کی جائے گی، جس سے علامہ اقبال میموریل ٹیچنگ ہسپتال پر دباؤ کم ہوگا۔ انہوں نے ادویات سمیت تمام طبی سہولیات کی فراہمی کے لیے ہر ممکن وسائل مہیا کرنے اور مریضوں کے علاج معالجے پر کوئی سمجھوتہ نہ کرنے کا عزم کیا۔

صوبائی وزیر صحت نے مزید کہا کہ سرکاری ہسپتالوں کی مسلسل نگرانی کے باعث حالات میں بہتری آ رہی ہے۔ انہوں نے ڈپٹی کمشنرز، اسسٹنٹ کمشنرز اور ایم ایس حضرات کو وزیر اعلیٰ پنجاب کی ہدایات سے آگاہ کیا کہ وہ ہسپتالوں کے روزانہ دورے کریں۔ انہوں نے تمام وارڈز میں ادویات کی فہرستیں اور ڈیوٹی روسٹرز نمایاں طور پر آویزاں کرنے پر زور دیا تاکہ مریضوں کو کسی پریشانی کا سامنا نہ کرنا پڑے۔

خواجہ سلمان رفیق نے واضح کیا کہ حکومت سرکاری ہسپتالوں کے حالات بہتر بنانے کے لیے ہر ممکن اقدامات کر رہی ہے اور مریضوں کے علاج و معالجہ پر کوئی سمجھوتہ نہیں کیا جا رہا۔ انہوں نے مزید کہا کہ ہسپتالوں کے دورے جاری رہیں گے، جہاں مریضوں سے براہ راست طبی سہولیات پر فیڈ بیک لیا جائے گا اور ان کی شکایات پر موقع پر ہی ایم ایس صاحبان کو ہدایات جاری کی جائیں گی۔

سیالکوٹ سے باغی ٹی وی کے بیوروچیف شاہدریاض کی خصوصی رپورٹ :شہر میں غیر قانونی بڑے سائن بورڈز کو چھوٹ، غریب دکانداروں پر قانون کا کاری وار

سیالکوٹ کی سڑکوں پر قانون کا عجیب کھیل جاری ہے۔ ایک طرف ضلعی انتظامیہ غیر قانونی تجاوزات کے نام پر غریب دکانداروں کے روزگار پر بلڈوزر چلا رہی ہے، تو دوسری طرف شہر کی شاہراہوں اور چوراہوں پر ٹنوں وزنی غیر قانونی سائن بورڈز کو کھلی چھوٹ مل رہی ہے۔ انتظامیہ ان کے سامنے خاموش تماشائی بنی کھڑی ہے، جبکہ چھوٹے کاروباریوں کے خلاف ایف آئی آرز اور حوالات کا سلسلہ تھمنے کا نام نہیں لے رہا۔

وزیراعلیٰ پنجاب مریم نواز نے گزشتہ ماہ صاف ستھرے پنجاب کے وژن کے تحت غیر قانونی تجاوزات کے خاتمے کے احکامات جاری کیے تھے۔ صوبے بھر میں ضلعی انتظامیہ نے فوری عمل شروع کیا، دکانیں گرائیں، اور غریب دکانداروں کو قانون کے شکنجے میں جکڑ دیا۔ لیکن سیالکوٹ میں یہ احکامات جیسے ہوا میں اڑ گئے۔ یہاں مین روڈز پر غیر قانونی سائن بورڈز نہ صرف جگہ گھیرے کھڑے ہیں بلکہ انتظامیہ کی خاموشی سے انہیں گویا تحفظ کا سرٹیفکیٹ بھی مل چکا ہے۔

شہری حیران ہیں کہ جب تجاوزات کے خلاف کارروائی کی بات آتی ہے تو غریب دکاندار ہی کیوں نشانے پر؟ بڑے بڑے سائن بورڈز، جو خود غیر قانونی ہیں، انہیں ہاتھ لگانے کی جرأت انتظامیہ کیوں نہیں کرتی؟ کیا قانون کی طاقت صرف کمزوروں کے لیے ہے؟ شہر کے لوگ سوال اٹھا رہے ہیں کہ اگر صفائی کا دعویٰ سچا ہے تو یہ دوہرا معیار کیوں؟ اب سب کی نظریں اس بات پر ہیں کہ کیا وزیراعلیٰ کے احکامات کبھی ان سائن بورڈز تک پہنچیں گے یا یہ شہر قانون کے اس کھیل میں یونہی تقسیم رہے گا۔