Category: سیالکوٹ

سیالکوٹ، باغی ٹی وی( سٹی رپورٹر مدثر رتو ) جنگلات میں لگنے والی آگ پر بروقت قابو پانے اور نقصان کم سے کم کرنے کے لیے ریسکیو 1122 اور محکمہ جنگلات نے تحصیل پسرور کے علاقے شہزادہ میں مشترکہ فرضی مشق کا انعقاد کیا۔ مشق کی نگرانی ڈسٹرکٹ ایمرجنسی آفیسر انجینئر نوید اقبال نے کی، جبکہ ایمرجنسی آفیسر عرفان یعقوب اور تحصیل انچارج عاصم بھی موجود تھے۔

مشق میں یونین کونسل شہزادہ کی رضاکار ٹیم اور محکمہ جنگلات کے عملے نے آگ بجھانے کا عملی مظاہرہ پیش کیا، جس کے بعد ریسکیو 1122 ٹیم نے بھی امدادی کارروائیاں انجام دیں۔ ڈسٹرکٹ ایمرجنسی آفیسر نے یقین دہانی کرائی کہ ریسکیو 1122 ہر ہنگامی صورتحال میں عوام کی مدد کے لیے تیار ہے، اور کسی بھی آگ لگنے کے واقعے کی فوری اطلاع دینے پر زور دیا۔

انہوں نے مزید بتایا کہ سیالکوٹ میں 64 چھوٹے بڑے جنگلات موجود ہیں، جن کا مجموعی رقبہ 1 لاکھ 4 ہزار ایکڑ ہے۔ محکمہ جنگلات کے عملے کو ہائی الرٹ رہنے کی ہدایت جاری کی گئی ہے، جبکہ ریسکیو 1122 کی تمام تحصیلوں کو بھی جنگلات میں آگ کے خطرے کے پیش نظر الرٹ کر دیا گیا ہے تاکہ کسی بھی ہنگامی صورتحال میں فوری کارروائی کی جا سکے۔

سیالکوٹ (باغی ٹی وی، بیوروچیف شاہد ریاض) ممتاز مذہبی و سماجی رہنما صوفی رانا بیدار حسین منج نے کہا ہے کہ سیالکوٹ کی جغرافیائی اہمیت کے پیش نظر یہاں قائم ریڈیو پاکستان کے ایف ایم 101 اسٹیشن پر طاقتور ٹرانسمیٹر نصب کرنے اور میڈیم ویو نشریات شروع کرنے کی اشد ضرورت ہے۔

وہ سیالکوٹ ریڈیو لسنرز کلب کے زیر اہتمام ریڈیو کے عالمی دن کے موقع پر منعقدہ تیسری سالانہ انٹرنیشنل کانفرنس میں مہمانِ خصوصی کی حیثیت سے خطاب کر رہے تھے۔

کانفرنس کے دوران صوفی رانا بیدار حسین منج نے سیالکوٹ ریڈیو اسٹیشن کو ڈسکہ انڈسٹریل اسٹیٹ منتقل کرنے کے فیصلے کو غیر مناسب قرار دیتے ہوئے اس فیصلے کی واپسی کا مطالبہ کیا۔

صدر کانفرنس شہزاد حسین نقوی نے بھی اس معاملے پر تشویش کا اظہار کرتے ہوئے کہا کہ ڈائریکٹر جنرل ریڈیو پاکستان سے ملاقات کرکے یہ فیصلہ واپس لینے کی درخواست کریں گے۔

تقریب کی صدارت کوآرڈی نیٹر سیالکوٹ ٹورزم اینڈ کلچرل فورم شہزاد حسین نقوی نے کی، جبکہ دیگر نمایاں شرکاء میں اسٹیشن ڈائریکٹر فرخ وحید آسی، پروگرام پروڈیوسر انجم چودھری، ایگزیکٹو ڈائریکٹر کمیونٹی ڈویلپمنٹ کنسرن عبدالشکور مرزا، صدر سیالکوٹ ریڈیو لسنرز کلب زاہد حسین، ملک خورشید اعوان، چودھری محمد یونس، زاہد شریف، آر جے محمد ریحان امجد، خواجہ امتیاز راٹھور، تابندہ انور، فوزیہ طاہرہ، فاقیہہ قمر، عائشہ نوید سمیت ریڈیو کے سامعین کی بڑی تعداد شامل تھی۔

پروگرام پروڈیوسر انجم چودھری نے کانفرنس سے خطاب میں بتایا کہ وفاقی وزیر دفاع خواجہ محمد آصف نے نہ صرف ایف ایم 101 ریڈیو اسٹیشن کو سیالکوٹ میں برقرار رکھنے بلکہ اس کے لیے مناسب عمارت فراہم کرنے کا بھی وعدہ کیا ہے۔کانفرنس کے دوران خالد لطیف، طاہر منیر طاہر اور عبدالشکور مرزا کی کوششوں کو سراہا گیا، جنہوں نے سیالکوٹ میں ریڈیو پاکستان اسٹیشن کے قیام میں کردار ادا کیا۔

تقریب کے اختتام پر سیالکوٹ ریڈیو لسنرز کلب کی تیسری سالگرہ کا کیک کاٹا گیا، اور تمام شرکاء نے ریڈیو کے فروغ کے لیے اپنی جدوجہد جاری رکھنے کے عزم کا اظہار کیا۔

سیالکوٹ (باغی ٹی وی، بیوروچیف شاہد ریاض) بین الاقوامی شہرت یافتہ ادبی تنظیم آل پاکستان رائٹرز ویلفیئر ایسوسی ایشن (اپووا) کے زیر اہتمام ادبی کانفرنس 15 فروری بروز ہفتہ اللہ مالک ہوٹل، سیالکوٹ میں منعقد ہوگی۔

یہ کانفرنس زبیر احمد انصاری کی زیر سرپرستی اور بانی اپووا ایم ایم علی کی زیر نگرانی منعقد کی جا رہی ہے، جس میں ملک بھر کے نامور لکھاری، موٹیویشنل اسپیکرز، اسکالرز، ڈرامہ نگار اور شوبز سے وابستہ شخصیات شرکت کریں گی۔

نمایاں شخصیات میں ایوارڈز اور میڈلز کی تقسیم
تقریب کے دوران مختلف شعبوں میں نمایاں خدمات انجام دینے والی شخصیات کو ایوارڈز اور میڈلز سے نوازا جائے گا۔ کانفرنس میں شرکت کے لیے رجسٹریشن کا عمل مکمل کر لیا گیا ہے۔

بین الاقوامی تعاون اور فروغِ ادب کا مشن
اس تقریب کے انعقاد میں گھوئنکی لائن کلب، یو ایس اے سے فرظینہ مقصود بٹ اور کاروان قلم رائٹر فورم کا تعاون بھی حاصل ہے۔

چیئرمین اپووا زبیر احمد انصاری اور بانی اپووا ایم ایم علی کا کہنا ہے کہ اپووا فروغِ ادب کے لیے ہمہ وقت کوشاں ہے اور یہ ادبی کانفرنس بھی اسی مشن کی ایک کڑی ہے۔ انہوں نے امید ظاہر کی کہ شہرِ اقبال میں یہ ایک یادگار ادبی کانفرنس ثابت ہوگی۔

سیالکوٹ،باغی ٹی وی (بیوروچیف شاہدریاض) ریڈیو کے عالمی دن کے موقع پر سٹی میگ، سیالکوٹ آرٹ اینڈ کلچر سینٹر، مدینہ ٹرسٹ، اور کمیونٹی ڈویلپمنٹ کنسرن کے تعاون سے سیالکوٹ ریڈیو لسنرز کلب کے زیر اہتمام تیسری سالانہ انٹرنیشنل کانفرنس کا انعقاد کیا گیا۔

تقریب میں مختلف شعبہ ہائے زندگی سے تعلق رکھنے والی اہم شخصیات نے شرکت کی، جبکہ مہمانِ خصوصی صوفی رانا بیدار حسین منج، شہزاد حسین نقوی، اسٹیشن ڈائریکٹر فرخ وحید آسی، عبدالشکور مرزا، زاہد حسین، ملک خورشید اعوان اور چودھری محمد یونس نے کانفرنس کے موقع پر سالگرہ کا کیک کاٹا۔

اس موقع پر مقررین نے ریڈیو کی تاریخی و ثقافتی اہمیت پر روشنی ڈالتے ہوئے اسے معلومات اور تفریح کا مؤثر ذریعہ قرار دیا۔ تقریب میں ریڈیو کے فروغ اور اس کی مستقبل میں ترقی کے امکانات پر بھی گفتگو کی گئی۔

سیالکوٹ,باغی ٹی وی (سٹی رپورٹر مدثر رتو)اراکین صوبائی اسمبلی محمد منشاء اللہ بٹ اور فیصل اکرام چودھری کو پراجیکٹ ڈائریکٹر پیسپ حمزہ سالک اور نیسپاک ٹیم کی جانب سے پیسپ پراجیکٹ پر تفصیلی بریفنگ دی گئی۔ اس موقع پر ڈپٹی کمشنر محمد ذوالقرنین لنگڑیال، خواجہ ٹیپو، ایڈمنسٹریٹر میونسپل کارپوریشن اقبال سنگھیڑا، چیف انجینئر پیسپ شیخ طاہر، سیف اللہ، سی او ایم سی ایس ملک اعجاز اور سٹی مینیجر پیسپ علی خان بھی موجود تھے۔

رکن صوبائی اسمبلی محمد منشاء اللہ بٹ نے پیسپ حکام کو ہدایت کی کہ پیسپ پراجیکٹ کے تحت واٹر سپلائی اور سیور لائن ڈالنے کے بعد روڈ اور گلیوں کی بحالی کا کام 30 روز میں مکمل کیا جائے۔

پنجاب سٹیز امپروومنٹ انویسٹمنٹ پروگرام (پیسپ) کے تحت جاری ترقیاتی منصوبے تکمیل کے آخری مراحل میں پہنچ گئے ہیں۔ سیوریج اور واٹر سپلائی کی لائنیں اور کنڈوٹ ڈالنے کے بعد روڈ اور گلیوں کی بحالی کے کام کو جلد مکمل کر لیا جائے گا۔

محمد منشاء اللہ بٹ نے کہا کہ پیسپ پراجیکٹ کا مقصد سیالکوٹ کے باسیوں کا معیار زندگی بہتر بنانا ہے اور اس پراجیکٹ کو ایشین بینک کے اشتراک سے حکومت پنجاب نے شروع کیا۔

انہوں نے مزید کہا کہ منصوبے کی کوالٹی کو یقینی بنانے کے لیے نیسپاک کے کنسلٹنٹ کی خدمات حاصل کی گئی ہیں اور ان کی بنیادی ذمہ داری ڈیزائن کے مطابق منصوبے کی تکمیل اور بروقت تکمیل کو یقینی بنانا ہے۔ میونسپل کارپوریشن اور پیسپ ٹیم کے تعاون سے منصوبوں کی کوالٹی اور بحالی پر بھرپور توجہ دی جائے گی تاکہ ان منصوبوں کے ثمرات عوام تک پہنچیں اور ان کا معیار زندگی بہتر ہو سکے۔

سیالکوٹ (باغی ٹی وی، سٹی رپورٹر مدثر رتو) ڈپٹی کمشنر محمد ذوالقرنین لنگڑیال نے بتایا کہ پانچ روزہ انسداد پولیو مہم کے دوران ضلع سیالکوٹ میں 7 لاکھ 92 ہزار 446 بچوں کو پولیو کے حفاظتی قطرے پلائے گئے۔

مہم کے دوران 2276 موبائل ٹیموں نے 5 لاکھ 51 ہزار 36 بچوں کو گھروں میں، 1 لاکھ 557 کو اسکولوں میں اور 12 ہزار 173 بچوں کو ویکسین دی۔ مزید برآں، 133 فکسڈ ٹیموں نے اسپتالوں اور صحت مراکز میں 6 ہزار 445 بچوں کو کور کیا، جبکہ 69 ٹرانزٹ ٹیموں نے 13 ہزار 246 بچوں کو ویکسین دی۔

ڈپٹی کمشنر کے مطابق، دیگر اضلاع اور صوبوں سے آئے 54 ہزار 19 بچوں کو بھی ویکسین دی گئی، جبکہ 5 ہزار 623 بچے مختلف وجوہات کی بنا پر کور نہ ہو سکے، جن کا مکمل ڈیٹا محفوظ کر لیا گیا ہے اور آئندہ مہم میں انہیں ترجیحی بنیادوں پر کور کیا جائے گا۔

انہوں نے مزید کہا کہ انسداد پولیو مہم کامیاب رہی اور دورانِ مہم کوئی ناخوشگوار واقعہ پیش نہیں آیا۔ اس مہم میں محکمہ صحت سمیت تمام متعلقہ اداروں کی کارکردگی کو سراہا گیا۔

سیالکوٹ ،باغی ٹی وی( بیوروچیف شاہد ریاض): سمبڑیال میں بیداری کے زیر اہتمام اسمارٹ ویلیج سینٹر روڑس کی 23 کامیاب طالبات کے اعزاز میں اسناد تقسیم کرنے کی تقریب منعقد ہوئی۔

تقریب میں سیالکوٹ انٹرنیشنل ایئرپورٹ لمیٹڈ کے چیئرمین حسن علی بھٹی مہمانِ خصوصی جبکہ سابق چیئرمین محمد افضل شاہین، بیداری کے ایگزیکٹو ڈائریکٹر ارشد محمود مرزا، نائب صدر حنا نورین سمیت دیگر معززین نے شرکت کی۔

حسن علی بھٹی نے تربیت یافتہ طالبات کی حوصلہ افزائی کرتے ہوئے کہا کہ یہ پروگرام خواتین کو ڈیجیٹل مہارتیں فراہم کرکے خود مختار بنانے کا انقلابی قدم ہے۔ محمد افضل شاہین نے کہا کہ خواتین کی ڈیجیٹل خواندگی میں اضافہ نہ صرف روزگار کے مواقع بڑھائے گا بلکہ سماجی ترقی میں بھی اہم کردار ادا کرے گا۔

تقریب میں بہترین کارکردگی کا مظاہرہ کرنے والی تین طالبات کو خصوصی طور پر موبائل فون دیے گئے تاکہ وہ اپنی ڈیجیٹل مہارتوں کو مزید بہتر بنا سکیں۔

ڈسکہ،باغی ٹی وی( نامہ نگار ملک عمران)سلسلہ نقشبندیہ اویسیہ تنظیم الاخوان ضلع سیالکوٹ کا ماہانہ ذکر قلبی اجتماع دارالعرفان ڈسکہ مرکز میں منعقد ہوا، جس میں ضلع بھر کے سالکین سمیت خواتین نے بھی بڑی تعداد میں شرکت کی۔

شیخ سلسلہ اور تنظیم الاخوان پاکستان کے سربراہ امیر عبدالقدیر اعوان نے ویڈیو لنک کے ذریعے سالکین سے خطاب کیا۔ اس موقع پر صاحبِ مجاز عبدالحمید چھینہ ایڈووکیٹ نے نئے آنے والوں کو طریقہ ذکر سکھایا جبکہ جنرل سیکرٹری ضلع سیالکوٹ عارف رفیق نے ذمہ داران سے مختصر خطاب کیا۔

آخر میں ملکی ترقی و سلامتی کیلئے خصوصی دعائیں کی گئیں اور سالکین کی لنگر سے تواضع کی گئی۔