Category: سیالکوٹ

سیالکوٹ،باغی ٹی وی(بیوروچیف شاہدریاض) لاہور گرامر سکول میں کراٹے کی بلیو بیلٹ کے حوالے سے ایک پروقار تقریب کا انعقاد کیا گیا۔ تقریب کی مہمان خصوصی ممبر پنجاب اسمبلی میڈم شکیلہ جواد اور مسٹر شاہنواز بٹ تھے۔ سکول کی پرنسپل ارم وسیم اور کوآرڈینیٹر انجم عطف بخاری کی زیر نگرانی طلبہ نے خصوصی پرفارمنس پیش کی۔

اس موقع پر خطاب کرتے ہوئے ممبر پنجاب اسمبلی شکیلہ جواد نے کہا کہ ملک کی ترقی اور خوشحالی کی بنیاد صرف تعلیم حاصل کرنے میں ہی پوشیدہ ہے۔ انہوں نے کہا کہ وہی معاشرے اور ملک ترقی کرتے ہیں جن کے طلبہ تعلیم کے ساتھ ساتھ غیر نصابی سرگرمیوں میں مصروف رہتے ہیں۔ انہوں نے سکول انتظامیہ اور خاص کر پرنسپل ارم وسیم اور کوآرڈینیٹر انجم عطف بخاری کی خصوصی کاوشوں کا ذکر کیا اور کہا کہ ان کی محنت کا نتیجہ ہے کہ آج سکول کے طلبہ کی ایک بڑی تعداد نے کراٹے کی دنیا میں مقام حاصل کیا اور بلیو بیلٹ حاصل کی۔

انہوں نے مزید کہا کہ طلبہ مزید محنت کریں اور کھیل کے میدان کے ساتھ ساتھ تعلیم کے میدان میں بھی اپنا نام پیدا کریں اور معاشرے کی ترقی اور خوشحالی میں اپنا کردار ادا کریں۔

تقریب کے اختتام پر اعلیٰ کارکردگی دکھانے والے طلبہ و طالبات میں انعامات تقسیم کیے گئے۔

سیالکوٹ ،باغی ٹی وی( سٹی رپورٹر مدثر رتو) سیالکوٹ انٹرنیشنل ایئرپورٹ لمیٹڈ (SIAL) نے اپنی سماجی ذمہ داریوں کو نبھاتے ہوئے حاجی عاشق حسین مرزا میموریل ہسپتال اینڈ میٹرنٹی ہوم روڑس کے لیے جدید ایکسرے مشین کا عطیہ دیا۔ اس حوالے سے ایک خصوصی تقریب کا انعقاد کیا گیا، جس میں معزز شخصیات اور علاقہ مکینوں نے شرکت کی۔

تقریب میں SIAL کے چیئرمین حسن علی بھٹی، سابق چیئرمین محمد افضل شاہین، بیداری کے ایگزیکٹو ڈائریکٹر ارشد محمود مرزا، بیداری کی نائب صدر محترمہ حنا نورین، اقبال گھمن سمیت دیگر معززین نے شرکت کی۔

تقریب سے خطاب کرتے ہوئے SIAL کے چیئرمین حسن علی بھٹی نے کہا کہ سیالکوٹ انٹرنیشنل ایئرپورٹ نہ صرف معاشی ترقی میں اپنا کردار ادا کر رہا ہے بلکہ صحت اور تعلیم کے شعبے میں بھی معاونت فراہم کر رہا ہے۔ انہوں نے مزید کہا کہ یہ عطیہ مقامی آبادی کو معیاری طبی سہولیات فراہم کرنے کے عزم کا حصہ ہے۔

سابق چیئرمین محمد افضل شاہین نے کہا کہ سیالکوٹ کی کاروباری برادری ہمیشہ سے سماجی ترقی کے لیے کوشاں رہی ہے اور یہ عطیہ اسی جذبے کی ایک مثال ہے۔

بیداری کے ایگزیکٹو ڈائریکٹر ارشد محمود مرزا نے اس اقدام کو سراہتے ہوئے کہا کہ اس جدید ایکسرے مشین کی تنصیب سے علاقے کے لوگوں کو بہتر طبی سہولیات میسر آئیں گی، جو صحت عامہ کے معیار کو بلند کرنے میں مددگار ثابت ہوں گی۔

تقریب میں موجود معززینِ علاقہ نے SIAL کے اس تعاون پر شکریہ ادا کرتے ہوئے امید ظاہر کی کہ مستقبل میں بھی ایسے فلاحی منصوبے جاری رکھے جائیں گے۔ اس عطیے سے علاقے کے مستحق افراد کو جدید اور معیاری طبی سہولیات کی فراہمی ممکن ہوگی، جو ایک مثبت پیش رفت ہے۔

سیالکوٹ،باغی ٹی وی(بیوروچیف شاہدریاض) لیبر ویلفیئر ڈیپارٹمنٹ کی جانب سے فیکٹریوں میں کام کرنے والے مزدوروں کو ڈیتھ اور میرج گرانٹ کے چیک تقسیم کرنے کی تقریب سرجیکل ایسوسی ایشن دفتر میں منعقد ہوئی۔ تقریب میں ڈپٹی ڈائریکٹر لیبر ویلفیئر سیالکوٹ طیب ورک نے مرد و خواتین میں 39 چیک تقسیم کیے۔

اس موقع پر طیب ورک نے خطاب کرتے ہوئے کہا کہ مزدور ہمارا قیمتی اثاثہ ہیں اور ان کے بچے ملک کا مستقبل ہیں۔ پنجاب حکومت اور تاجر برادری کے تعاون سے فیکٹری ورکروں اور ان کے بچوں کو مفت طبی سہولیات اور جدید تعلیمی سہولتیں فراہم کی جا رہی ہیں۔

انہوں نے مزید بتایا کہ پنجاب گروپ آف کالجز کے ساتھ معاہدہ (MOU) سائن کیا گیا ہے، جس کے تحت مزدوروں کے بچوں کو داخلہ فیس کے علاوہ فری تعلیم کی سہولت میسر ہوگی تاکہ وہ اپنی تعلیم جاری رکھ سکیں۔ ورکرز کی بیٹیوں کے لیے جہیز گرانٹ میں بھی اضافہ کیا گیا ہے۔

تقریب میں سرجیکل انسٹرومنٹ مینوفیکچررز ایسوسی ایشن پاکستان کے چیئرمین ذیشان طارق، سینئر وائس چیئرمین سلیمان علی مغل، وائس چیئرمین عبدالمومن، صدر لیبر یونین سی بی اے فارورڈ سپورٹس خالد پرویز، ممبر ضلعی کمیٹی جبری مشقت اشفاق نذر گھمن، مسلم لیگ (ن) لیبر ونگ کے رہنما چوہدری نصیر احمد، میاں خالد محمود، بابر سعید اور فریاد سمیت دیگر اہم شخصیات نے شرکت کی۔

سیالکوٹ،باغی ٹی وی(سٹی رپورٹرمدثررتو) چیئرمین انفورسمنٹ اینڈ ریگولیٹری بورڈ / ڈپٹی کمشنر محمد ذوالقرنین لنگڑیال نے اعلان کیا ہے کہ انفورسمنٹ انسپکٹرز (بی ایس-14) اور انویسٹی گیشن آفیسرز (بی پی ایس-11) کی بھرتیاں مکمل میرٹ پر کی جائیں گی۔ شفافیت کو یقینی بنانے کے لیے تمام ممکنہ اقدامات کیے جا رہے ہیں۔

بھرتیوں کے عمل میں فزیکل ٹیسٹ پولیس لائن سیالکوٹ میں ہوگا جبکہ ڈور سٹی ہاؤسنگ میں امیدواروں کا تحریری امتحان منعقد کیا جائے گا۔ اس حوالے سے ضلعی پولیس کے ماہرین کی خدمات حاصل کی جائیں گی، اور ٹیسٹ کی ویڈیو ریکارڈنگ بھی کی جائے گی تاکہ کسی بھی قسم کی بے ضابطگی نہ ہو۔

یہ بات ڈی سی آفس کمیٹی روم میں منعقدہ ضلع انفورسمنٹ اینڈ ریگولیٹری بورڈ کے پہلے اجلاس میں کہی گئی۔ اجلاس میں ایڈیشنل کمشنر جنرل ایوب بخاری، ڈی ایس پی ملک عطا، ڈسٹرکٹ اٹارنی، ڈسٹرکٹ پبلک پراسیکیوٹر، ایڈیشنل ڈائریکٹر لائیو اسٹاک، ڈپٹی ڈائریکٹر زراعت توسیع، ڈسٹرکٹ آفیسر انڈسٹریز، نمائندہ چیف آفیسر میونسپل کارپوریشن، ڈپٹی ڈائریکٹر پنجاب فوڈ اتھارٹی، ڈسٹرکٹ فوڈ کنٹرولر، اسسٹنٹ ڈائریکٹر لیگل، ایکسٹرا اسسٹنٹ ڈائریکٹر ایگریکلچر اور سیکرٹری مارکیٹ کمیٹی سمیت دیگر افسران شریک تھے۔

سیالکوٹ (باغی ٹی وی سٹی رپورٹر مدثر رتو سے) بٹ برادری فاؤنڈیشن پاکستان و انٹرنیشنل کا الیکشن، مبشر بٹ مرکزی جنرل سیکرٹری منتخب

تفصیل کے مطابق سیالکوٹ کے حاجی پورہ بوگڑہ مین روڈ پر واقع مکہ رئیل اسٹیٹ اینڈ بلڈرز میں شاندار الیکشن 2025 کا انعقاد کیا گیا، جس میں الحاج ارشاد احمد بٹ، مرکزی صدر بٹ برادری فاؤنڈیشن پاکستان و انٹرنیشنل نے ساتھیوں کے ساتھ شرکت کی۔

اس موقع پر ووٹنگ کا عمل پورے دن جاری رہا اور بالآخر مبشر بٹ کو مرکزی جنرل سیکرٹری منتخب ہونے میں کامیابی حاصل ہوئی۔
بٹ برادری میں خوشی کی لہر دوڑ گئی اور تمام افراد نے مبشر بٹ کی محنت اور لگن کو سراہا۔انہوں نے کہا کہ سیالکوٹ میں مبشر بٹ ایک انمول ہیرا ہیں جو ہمیشہ ہر فرد کی مدد کے لیے 24 گھنٹے تیار رہتے ہیں، چاہے وہ کسی بھی کام کی نوعیت ہو۔

سیالکوٹ کی تمام بٹ برادری مبشر بٹ کے لیے دعا گو ہے اور انہیں مزید کامیابیاں ملنے کی دعا کرتی ہے۔

سیالکوٹ (باغی ٹی وی، بیوروچیف شاہد ریاض) چیف منسٹر فوکل پرسن برائے پولیو عظمیٰ کاردار نے سیالکوٹ کا دورہ کرتے ہوئے پانچ روزہ قومی انسداد پولیو مہم کا جائزہ لیا۔ انہوں نے موبائل اور فکسڈ پولیو ٹیموں کی فیلڈ میں جاکر انسپکشن کی، بچوں کی فنگر مارکنگ اور گھروں کی ڈور ٹو ڈور مارکنگ کی فزیکل ویری فیکیشن کی، اور خود بھی بچوں کو پولیو سے بچاؤ کے قطرے پلائے۔

عظمیٰ کاردار نے کہا کہ پاکستان اور افغانستان دنیا کے وہ دو ممالک ہیں جہاں پولیو وائرس اب بھی موجود ہے۔ انہوں نے بتایا کہ چند ماہ میں 73 نئے پولیو کیس رپورٹ ہوئے، جن میں سے پنجاب میں صرف ایک کیس سامنے آیا ہے۔ اس صورتحال کے پیش نظر وزیر اعلیٰ پنجاب مریم نواز شریف نے انہیں فوکل پرسن کی ذمہ داری سونپی، اور وہ اب تک 32 اضلاع کا دورہ کر چکی ہیں۔

پولیو وائرس کے پھیلاؤ کا خطرہ اور حفاظتی اقدامات
عظمیٰ کاردار نے کہا کہ پنجاب، پولیو سے متاثرہ صوبوں بلوچستان، خیبر پختونخوا اور سندھ کے درمیان گھرا ہوا ہے، جہاں سے وائرس کی منتقلی کا خدشہ موجود ہے۔ اس خطرے کے پیش نظر پنجاب کے داخلی راستوں پر سیکیورٹی چیک پوسٹیں قائم کی گئی ہیں، جہاں داخل ہونے والے ہر بچے کو پولیو ویکسین دی جا رہی ہے۔ انہوں نے مزید کہا کہ پاکستان کو پولیو فری بنانے کے لیے افغانستان کے ساتھ مل کر مشترکہ حکمت عملی اپنائی جا رہی ہے۔

سیالکوٹ میں پولیو مہم کی پیش رفت
انہوں نے بتایا کہ سیالکوٹ میں 2022 کے بعد سے کسی بھی انوائرمنٹل سیمپل میں پولیو وائرس نہیں پایا گیا، جو ایک خوش آئند بات ہے، تاہم احتیاطی تدابیر ضروری ہیں۔ وائرس بچوں اور بڑوں کے ذریعے سفر کر سکتا ہے، اس لیے ہر بچے کو حفاظتی قطرے پلانے کو یقینی بنانا ہوگا۔

7 لاکھ 95 ہزار بچوں کو پولیو سے بچانے کا ہدف
ڈپٹی کمشنر سیالکوٹ محمد ذوالقرنین لنگڑیال نے اجلاس کے دوران بتایا کہ پانچ روزہ قومی انسداد پولیو مہم کے دوران 7 لاکھ 95 ہزار 877 بچوں کو پولیو ویکسین پلانے کا ہدف مقرر کیا گیا ہے، جس کے لیے 2 ہزار 879 پولیو ٹیمیں تشکیل دی گئی ہیں۔

عظمیٰ کاردار نے کہا کہ پولیو کے مکمل خاتمے کے لیے محکمہ صحت کا کردار بنیادی حیثیت رکھتا ہے، جبکہ وفاقی اور صوبائی حکومت اس مقصد کے لیے ہر ممکن تعاون فراہم کر رہی ہیں۔

سیالکوٹ (باغی ٹی وی، بیورو چیف شاہد ریاض) پنجاب کالج سٹی ہاؤسنگ کیمپس سیالکوٹ میں سپورٹس گالا اینڈ کلچرل فیسٹیول 2025ء کی رنگا رنگ اور شاندار تقریب منعقد ہوئی۔

تقریب کے مہمان خصوصی پرنسپل راؤ محمد حسان، وائس پرنسپل بوائز کیمپس پروفیسر راحت لطیف اعوان، وائس پرنسپل گرلز کیمپس پروفیسر محمد عمران اقبال، صدر شعبہ اردو پروفیسر اشفاق نیاز، اسٹاف ممبران اور طلبہ نے شرکت کی۔ تقریب کا آغاز تلاوتِ کلام پاک اور نعتِ رسول مقبول ﷺ سے ہوا، جس کے بعد قومی ترانہ پڑھا گیا۔

تقریب کا باقاعدہ آغاز غبارے فضا میں چھوڑ کر کیا گیا۔ مختلف کھیلوں میں طلبہ نے جوش و خروش کے ساتھ حصہ لیا، جن میں کرکٹ، رسہ کشی، 100، 200 اور 400 میٹر دوڑ، بیڈمنٹن، فٹ بال، ٹیبل ٹینس، ریلے ریس، بوری ریس اور تھری لیگز ریس شامل تھیں۔

کھیلوں کے ساتھ ساتھ کلچرل فیسٹیول میں بھی طلبہ نے بھرپور جوش کے ساتھ حصہ لیا۔ مختلف ہاؤسز (بلیو، ریڈ، گرین، ییلو) نے پنجاب، سندھ، بلوچستان اور خیبرپختونخوا کی ثقافت کو نمایاں کیا۔

بلیو ہاؤس نے پروفیسر محمد باقر ڈار اور کیپٹن پروفیسر علیم کی قیادت میں شاندار کارکردگی کا مظاہرہ کرتے ہوئے "سپورٹس ٹرافی 2025ء” اپنے نام کر لی۔ دیگر ہاؤسز کے انچارجز پروفیسر قاسم علی بٹ (ییلو ہاؤس)، پروفیسر اسد شہباز (گرین ہاؤس)، پروفیسر زہیب عارف (ریڈ ہاؤس) اور ان کے کیپٹنز نے بھی بہترین کارکردگی کا مظاہرہ کرتے ہوئے شیلڈز اور میڈلز حاصل کیے۔

پرنسپل راؤ محمد حسان نے اپنے خطاب میں کہا کہ ہم نصابی سرگرمیاں طلبہ کی ذہنی اور جسمانی نشوونما کے لیے نہایت اہم ہیں۔ انہوں نے طلبہ کو محنت جاری رکھنے اور کھیلوں میں بڑھ چڑھ کر حصہ لینے کی تلقین کی۔

سپورٹس گالا اور کلچرل فیسٹیول کی اس شاندار تقریب میں اساتذہ، طلبہ، اور منتظمین نے بھرپور جوش و جذبے کے ساتھ شرکت کی، اور تقریب کا اختتام بھرپور تالیوں اور کامیاب کھلاڑیوں کو انعامات دینے کے ساتھ کیا گیا۔