Category: سیالکوٹ

سیالکوٹ( باغی ٹی وی، بیوروچیف شاہد ریاض)سونا ڈبل کرنے کا بہانہ، 10 تولہ زیورات کا فراڈ اورموٹر سائیکل سواروں سے ڈاکہ

تفصیل کے مطابقسیالکوٹ کے تھانہ مراد پورہ کے علاقے میں آصف کے گھر میں کام کرنے والی زرینہ نے سونا ڈبل کرنے کا جھانسہ دے کر فراڈ کیا۔ زرینہ نے آصف کو بتایا کہ اس کے گھر پر سونا ڈبل کرنے والے لوگ موجود ہیں، جس پر آصف نے 10 تولہ سونا ان افراد کے حوالے کیا۔ تاہم، دو نامعلوم نوسرباز زیورات لے کر فرار ہوگئے۔ پولیس نے آصف کی رپورٹ پر زرینہ سمیت دو نامزد اور دو نامعلوم ملزمان کے خلاف مقدمہ درج کرکے تحقیقات شروع کر دی ہیں۔

اسی طرح تھانہ صدر ڈسکہ کے علاقے مندرانوالہ میں شہریار اور اس کے بہنوئی کو دو مسلح ڈاکوؤں نے روکا اور ان سے نقدی 7500 روپے اور موبائل فون چھین کر فرار ہوگئے۔ پولیس نے واقعے کا مقدمہ درج کر لیا ہے۔

تھانہ موترہ کے علاقے آڈھا میں بھی ڈکیتی کی واردات ہوئی، جہاں ریاض کا بیٹا اپنے ہمسائے دوست کے ساتھ مزدوری کے بعد گھر واپس آرہا تھا۔ راستے میں دو مسلح ڈاکوؤں نے انہیں روک کر نقدی 5000 روپے، موبائل فونز اور موٹرسائیکل چھین کر فرار ہوگئے۔ پولیس نے اس واقعے کا بھی مقدمہ درج کر لیا ہے۔

سیالکوٹ و ڈسکہ(باغی ٹی وی بیوروچیف+نامہ نگار)حادثات میں دو موٹر سائیکل سوار جاں بحق، کمسن بچے کی حالت نازک

سیالکوٹ میں تھانہ کوٹلی لوہاراں کے علاقے شیر پور میں ایک نامعلوم ریڑھی سے موٹر سائیکل کے ٹکرانے سے جنید نامی شخص شدید زخمی ہو گیا اور زخموں کی تاب نہ لاتے ہوئے جاں بحق ہو گیا۔ حادثہ اس وقت پیش آیا جب ریڑھی بان اچانک شاہراہ پر آیا، جس کے باعث جنید کے موٹر سائیکل کو ٹکر لگی۔

ڈسکہ میں ایک اور دلخراش حادثے میں کوٹ گھمناں کے 18 سالہ نوجوان شیراز کو تیز رفتار آئل ٹینکر نے کچل دیا جس سے وہ موقع پر ہی جاں بحق ہوگیا۔ صدر پولیس نے نعش کو سول ہسپتال ڈسکہ منتقل کر دیا۔

دوسری جانب ڈسکہ کے گلہ تیلیانوالہ میں دو سالہ محمد بہلول نے غلطی سے بوتل میں رکھا پٹرول پی لیا، جس کے باعث اس کی حالت تشویشناک ہو گئی۔ بچے کو سول ہسپتال ڈسکہ منتقل کیا گیا، جہاں سے اسے مزید علاج کے لیے گوجرانوالہ ریفر کر دیا گیا۔

سیالکوٹ (باغی ٹی وی بیوروچیف شاہد ریاض) پولیس نے ضلع میں ڈکیتی اور راہزنی کی وارداتوں میں ملوث 3 رکنی گینگ کو ان کے سرغنہ سمیت گرفتار کر لیا ہے۔ ڈی پی او سیالکوٹ رانا عمر فاروق کی خصوصی ہدایات پر ڈی ایس پی صدر سرکل کی زیر نگرانی ایس ایچ او تھانہ کوٹلی لوہاراں سب انسپکٹر اسد اللہ نے پولیس ٹیم کے ہمراہ کارروائی کرتے ہوئے ملزمان کو گرفتار کیا۔

گرفتار ملزمان شہریوں سے اسلحہ کے زور پر نقدی، موبائل فون اور قیمتی سامان چھیننے کی وارداتوں میں ملوث تھے۔ دوران تفتیش ان سے متعدد مقدمات ٹریس ہوئے ہیں۔ پولیس نے ملزمان کے قبضہ سے 3 لاکھ 50 ہزار روپے نقدی اور وارداتوں میں استعمال ہونے والا ناجائز اسلحہ، بشمول 3 عدد 30 بور پسٹل اور متعدد گولیاں برآمد کی ہیں۔ ملزمان سے مزید تفتیش جاری ہے اور مزید برآمدگی متوقع ہے۔

سیالکوٹ (باغی ٹی وی، بیوروچیف شاہد ریاض) سیالکوٹ کے علاقے پلی دربارستارشاہ ولی محلہ مغربی سمبڑیال میں سرکاری واٹرسپلائی کی مین پائپ لائن تین دن سے پھٹی ہوئی ہے، جس کے نتیجے میں پانی کا ضیاع جاری ہے اور گھروں میں پانی کی سپلائی کا پریشر انتہائی کم ہوگیا ہے۔

تفصیلات کے مطابق، شہریوں کا کہنا ہے کہ تین دن قبل واٹرسپلائی کی مین پائپ لائن میں فنی خرابی کے باعث پھٹنے کا واقعہ پیش آیا، جس سے پانی کا ضیاع مسلسل جاری ہے۔ شہریوں نے بتایا کہ اس مسئلے کی وجہ سے نہ صرف گھروں میں پانی کی سپلائی کا پریشر کم ہوگیا ہے بلکہ کئی گھریلو صارفین پانی کی کمی کا شکار ہیں، جس سے ان کی روزمرہ زندگی متاثر ہو رہی ہے۔

مقامی شہریوں کا کہنا ہے کہ اس پائپ لائن کی خرابی کی اطلاع متعلقہ حکام کو دی گئی ہے، لیکن تاحال اس کی مرمت یا پانی کے ضیاع کو روکنے کے لئے کوئی عملی اقدام نہیں کیا گیا۔ شہریوں نے اس صورتحال پر شدید تحفظات کا اظہار کیا اور انتظامیہ سے مطالبہ کیا کہ فوری طور پر واٹرسپلائی کی مین پائپ لائن کی مرمت کی جائے تاکہ پانی کا ضیاع روکا جا سکے اور گھریلو صارفین کو پانی کی مکمل سپلائی فراہم کی جا سکے۔

علاقے کے مکینوں کا کہنا ہے کہ وہ کئی بار شکایات درج کروا چکے ہیں لیکن اس کے باوجود کوئی سنجیدہ قدم نہیں اٹھایا گیا۔ شہریوں نے انتظامیہ سے مطالبہ کیا کہ اس مسئلے کو فوری طور پر حل کیا جائے تاکہ پانی کی سپلائی میں ہونے والی کمی کو دور کیا جا سکے اور عوام کی پریشانی ختم ہو۔

سیالکوٹ(باغی ٹی وی،سٹی رپورٹر مدثر رتو کی رپورٹ) پنجاب پٹرولنگ پولیس اور اینٹی نارکوٹکس فورس نے منشیات کی اسمگلنگ کے خلاف ایک اہم کارروائی کرتے ہوئے 9 سالہ کمسن بچے سلمان گل خان کو گرفتار کر لیا۔

اطلاعات کے مطابق بچے کو پشاور سے مختلف گاڑیاں بدل کر ڈسکہ پہنچنے کی کوشش میں روکا گیا۔ انچارج پٹرولنگ پولیس گلوٹیاں موڑ یاسر محمود نے بتایا کہ انہیں مخبر خاص کی جانب سے اطلاع ملی تھی کہ منشیات کا ایک بڑی کھیپ کمسن ملزم کے ذریعے سپلائی کی جارہی ہے۔

آپریشن کے دوران گوجرانوالہ میں ایک بلا نمبری رکشے کو روکا گیا جس میں سلمان موجود تھا۔ تلاشی کے دوران 2400 گرام منشیات برآمد ہوئی۔ یہ معاملہ اس لحاظ سے توجہ طلب ہے کہ اتنی کم عمر میں بچے کو منشیات کی نقل و حمل میں استعمال کیا جا رہا تھا۔

پولیس حکام کا کہنا ہے کہ یہ ایک نیا اور خطرناک رجحان ہے جس میں بچے کو منشیات اسمگلنگ کے لیے استعمال کیا جا رہا ہے۔ انہوں نے والدین، اساتذہ اور کمیونٹی رہنماؤں سے اپیل کی ہے کہ وہ بچوں کی سرگرمیوں پر نظر رکھیں تاکہ انہیں جرائم پیشہ عناصر سے محفوظ رکھا جا سکے۔

اینٹی نارکوٹکس فورس کے نمائندے کے مطابق اس واقعے کی مکمل تحقیقات کی جا رہی ہیں تاکہ اس نیٹ ورک کے پیچھے موجود افراد کو کیفرکردار تک پہنچایا جا سکے۔ فی الحال گرفتار بچہ حفاظتی تحویل میں ہے اور اس کے پس منظر کی مزید چھان بین کی جا رہی ہے۔