Category: سیالکوٹ

سیالکوٹ(باغی ٹی وی،بیوروچیف شاہدریاض) ڈپٹی کمشنر محمد ذوالقرنین لنگڑیال نے کہا ہے کہ اسموگ کے خاتمے اور بڑھتی ہوئی ماحولیاتی آلودگی پر قابو پانے کے لیے ڈسٹرکٹ ایڈمنسٹریشن، محکمہ ماحولیات، زراعت اور انڈسٹریز کی جانب سے انوائرمنٹ پروٹیکشن ایکٹ کی خلاف ورزی کرنے والوں کے خلاف سخت کارروائی کی جا رہی ہے۔

ڈپٹی کمشنر کے مطابق، فصلوں کی باقیات کو آگ لگانے پر تین زمینداروں کے خلاف مقدمات درج کیے گئے، 411 زمینداروں کو نوٹسز جاری کیے گئے جبکہ چار لاکھ پانچ ہزار روپے جرمانہ عائد کیا گیا۔ اسی طرح ضلع سیالکوٹ میں موجود 206 بھٹہ خشت میں سے دھواں چھوڑنے اور ایس او پیز کی خلاف ورزی پر 65 بھٹوں کو سیل، 36 بھٹہ مالکان کے خلاف ایف آئی آر درج اور 24 لاکھ روپے جرمانہ کیا گیا۔ علاوہ ازیں، 174 بھٹوں کو نوٹسز جاری کیے گئے۔

ڈپٹی کمشنر نے مزید بتایا کہ ماحولیاتی آلودگی کے باعث پانچ انڈسٹریل یونٹس کو سیل کیا گیا، جبکہ ایک لاکھ روپے جرمانہ اور 45 انڈسٹریل یونٹس کو نوٹسز جاری کیے گئے ہیں۔ ان کا کہنا تھا کہ وزیر اعلیٰ پنجاب مریم نواز شریف کی ہدایات پر محکمہ تحفظ ماحولیات کے اقدامات مزید سخت کر دیے گئے ہیں۔ سنٹرل پنجاب کے دیگر اضلاع کی طرح سیالکوٹ میں بھی تمام پارکس، چڑیا گھروں، عجائب گھروں اور کھیلوں کے مقامات پر شہریوں کے جانے پر مکمل پابندی عائد کر دی گئی ہے، جو 17 نومبر تک برقرار رہے گی اور اس پر سختی سے عملدرآمد کروایا جائے گا۔

سیالکوٹ (باغی ٹی وی بیوروچیف شاہد ریاض) پسرور میں تھانہ صدر کی حدود میں چوری، ڈکیتی اور دیگر جرائم میں مسلسل اضافے کی اطلاعات موصول ہو رہی ہیں۔ حالیہ واقعے میں تھانہ صدر پسرور کی حدود میں پسرور-سیالکوٹ روڈ پر واقع کولڈ سٹور رامکے کے قریب ایک بڑی ڈکیتی کی واردات پیش آئی۔

تفصیلات کے مطابق رانا عدیل ولد شوکت علی، جو پراسیکیوٹر ہیں، کولڈ سٹور رامکے کے قریب سے گزر رہے تھے کہ اچانک جھاڑیوں سے نکل کر تین نامعلوم مسلح ڈاکو سامنے آ گئے۔ انہوں نے اسلحے کے زور پر رانا عدیل کو روکا اور ان سے 24 ماڈل ہنڈا موٹر سائیکل CG 125، 32 ہزار روپے نقدی اور ایک vivo موبائل فون (جس کی مالیت تقریباً پچاس ہزار روپے بتائی جا رہی ہے) چھین کر پسرور سٹی کی جانب فرار ہو گئے۔

واقعے کی اطلاع ملنے پر نامعلوم ڈاکوؤں کے خلاف تھانہ صدر پسرور میں مقدمہ درج کر لیا گیا ہے اور پولیس نے ملزمان کی تلاش شروع کر دی ہے۔ شہریوں نے بڑھتی ہوئی وارداتوں پر تشویش کا اظہار کرتے ہوئے مؤثر کارروائی کا مطالبہ کیا ہے۔

سیالکوٹ (باغی ٹی وی، سٹی رپورٹر مدثر رتو ) منی پٹرول پمپوں کے خلاف سول ڈیفنس کا کریک ڈاؤن، درجنوں مشینیں ضبط

محکمہ سول ڈیفنس کے ڈائریکٹر پنجاب کی ہدایت اور ڈپٹی کمشنر سیالکوٹ کے حکم پر انسپکٹر حافظ زکریا اقبال کی سربراہی میں سیالکوٹ بھر میں منی پٹرول پمپوں کے خلاف کریک ڈاؤن جاری ہے۔ کارروائیوں کے دوران درجنوں مشینیں ضبط کر کے متعدد افراد کے خلاف مقدمات درج کیے گئے ہیں۔

حافظ زکریا اقبال نے ڈسکہ، موترہ، گھوئنکی، کوٹلی لوہاراں اور کھروٹا سیداں میں غیر قانونی منی پٹرول مشینوں کے خلاف کارروائیاں کیں اور مشینیں ضبط کر کے مالکان کے خلاف قانونی کارروائی کی۔ انسپکٹر زکریا کا کہنا تھا کہ کارروائیوں کے دوران اکثر مقامات پر بلیک میلنگ کا سامنا کرنا پڑتا ہے، مگر کسی بھی سفارش کو خاطر میں نہیں لایا جاتا۔

انہوں نے مزید کہا کہ سوشل میڈیا پر جھوٹی اور من گھڑت خبریں شائع کرنے والوں کے خلاف بھی قانونی کارروائی کی جائے گی تاکہ ایسے افراد کی حوصلہ شکنی ہو سکے۔

ڈسکہ (باغی ٹی وی نامہ نگار ملک عمران)خراب سڑکیں،حادثات میں اضافہ،24 گھنٹوں میں 25 واقعات

ڈسکہ سرکل میں روڈ حادثات میں خطرناک اضافہ ہو گیا ہے، انسپکٹر ٹریفک پولیس نوید جو گوجرانوالہ سے سپیشل ڈیوٹی کے بعد واپس آ رہے تھے، گلوٹیاں موڑ پر موٹرسائیکل حادثے کا شکار ہوگئے۔ سڑک کی خراب حالت کے باعث موٹرسائیکل سلپ ہونے سے انسپکٹر نوید شدید زخمی ہوگئے۔ انہیں فوری طور پر ریسکیو کے ذریعے ہسپتال منتقل کیا گیا۔

وزیرآباد روڈ اور ڈسکہ روڈ پر جاری تعمیراتی کام کے دوران سڑک پر گہرے کھڈے بن چکے ہیں، جس کے باعث حادثات میں اضافہ ہو رہا ہے۔ حفاظتی اقدامات کے نہ ہونے کی وجہ سے روز بروز حادثات بڑھ رہے ہیں۔ گزشتہ 24 گھنٹوں کے دوران 25 مختلف روڈ حادثات رپورٹ کیے گئے ہیں، جن میں متعدد افراد زخمی ہوئے۔ شہریوں نے سڑکوں کی فوری مرمت اور حفاظتی اقدامات کا مطالبہ کیا ہے۔

سیالکوٹ(باغی ٹی وی ،بیوروچیف شاہدریاض) شہریوں کے تحفظ کے لیے 15 پینک بٹن فعال، فوری مدد کی سہولت

سیالکوٹ میں شہریوں کی حفاظت کو یقینی بنانے کے لئے پولیس نے جدید اقدام کے تحت شہر کے مختلف علاقوں میں 15 پینک بٹن فعال کر دیے ہیں۔ ان بٹنوں کو شہر کے 10 مختلف مقامات پر نصب کیا گیا ہے تاکہ شہری کسی بھی ہنگامی صورتحال میں فوری طور پر پولیس کی مدد حاصل کر سکیں۔ اس سسٹم کے تحت شہریوں کو پولیس سے رابطے کے لیے صرف ایک بٹن دبانا ہوگا، جس سے فوری طور پر پولیس ٹیم جائے وقوعہ پر پہنچے گی۔

پولیس کے مطابق اس اقدام کا مقصد نہ صرف شہریوں کو تحفظ فراہم کرنا ہے بلکہ ان کا اعتماد بھی بحال کرنا ہے کہ مشکل وقت میں پولیس ان کے ساتھ ہے۔ پینک بٹن کے اس منصوبے کو شہریوں نے سراہا ہے اور امید ظاہر کی ہے کہ اس سے عوامی تحفظ میں خاطر خواہ بہتری آئے گی۔

ڈسکہ (باغی ٹی وی، نامہ نگار ملک عمران) تھانہ بمبانوالہ اور سٹی پولیس کے درمیان مبینہ پولیس مقابلے میں دو ڈاکو مارے گئے ہیں۔ دونوں ملزمان دیگر مقدمات میں ریکارڈ یافتہ تھے اور پٹرولنگ پولیس کے ایک ملازم کے قتل میں بھی ملوث تھے۔

تفصیلات کے مطابق ایس ایچ او بمبانوالہ اور ان کی ٹیم نے ملزمان عمر حیات اور حیدر علی کو انٹیروگیشن کے لیے گرفتار کیا تھا۔ جب پولیس پارٹی ملزمان کو لے جا رہی تھی، تو ان ملزمان نے اپنے ساتھیوں کو چھڑانے کے لیے اچانک پولیس پر فائرنگ کر دی۔ پولیس کی جوابی فائرنگ میں عمر حیات شدید زخمی ہو گیا اور وہ بعد ازاں جاں بحق ہو گیا۔

اس دوران حیدر علی اپنے دو ساتھیوں کے ہمراہ فرار ہو گیا تاہم تھانہ سٹی پولیس کے ساتھ ہونے والے فائرنگ کے تبادلے میں حیدر علی بھی ہلاک ہو گیا۔ پولیس ذرائع کے مطابق حیدر علی اپنے ساتھیوں کی فائرنگ سے مارا گیا۔

دونوں ملزمان عمر حیات اور حیدر علی کے خلاف کئی مقدمات درج تھے اور وہ پٹرولنگ پولیس کے ملازم سید طیب کے قتل میں بھی ملوث تھے۔ ملزمان نے دوران ڈکیتی سید طیب کو گولی مار کر شہید کر دیا تھا۔

پولیس نے دونوں ملزمان کی ہلاکت کے بعد مزید تحقیقات شروع کر دی ہیں اور ان کے دیگر ساتھیوں کی تلاش بھی جاری ہے۔ پولیس حکام کے مطابق ملزمان کو قانون کے مطابق سخت سزائیں دی جائیں گی اور عوامی تحفظ کے لیے مزید اقدامات کیے جائیں گے۔

دوسری جانب اس واقعے کے بعد ڈسکہ پولیس نے علاقے میں سیکیورٹی بڑھا دی ہے اور دیگر ملزمان کی گرفتاری کے لیے سرچ آپریشن شروع کر دیا ہے۔