Category: سیالکوٹ

سیالکوٹ(باغی ٹی وی ،سٹی رپورٹر مدثر رتو )موسمیاتی تبدیلی، بھرپور شجرکاری کرکے ماحول کو بہتر بنایاجاسکتاہے. ڈپٹی کمشنر

تفصیلات کے مطابق ڈپٹی کمشنر سیالکوٹ محمد ذوالقرنین لنگڑیال نے موسمیاتی تبدیلیوں کے بڑھتے ہوئے اثرات سے نمٹنے کے لیے وسیع پیمانے پر شجرکاری کی ضرورت پر زور دیا ہے۔ انہوں نے کہا کہ درختوں کی اہمیت اور افادیت کے بارے میں معاشرتی شعور اجاگر کرنا وقت کی اہم ضرورت ہے۔ ان خیالات کا اظہار انہوں نے روز ویلفئیر آرگنائزیشن کی جانب سے ضلع بھر میں مون سون کے دوران شجرکاری مہم میں حصہ لینے پر تنظیم کے صدر محمد اشفاق نذر کو بہترین کارکردگی پر شیلڈ دینے کی تقریب میں کیا۔

ڈپٹی کمشنر نے مزید کہا کہ جو سماجی تنظیمیں اور کارکنان "پلانٹ فار پاکستان” مہم کا حصہ بن کر محنت اور لگن سے شجرکاری کر رہے ہیں، ان کی حوصلہ افزائی کی جائے گی۔ اس موقع پر انہوں نے روز ویلفئیر آرگنائزیشن کے نائب صدر میاں اعجاز انجم اور دیگر عہدیداران کو بھی مبارکباد پیش کی اور ان کی کوششوں کو سراہا۔

محمد ذوالقرنین لنگڑیال نے امید ظاہر کی کہ یہ تنظیمیں مستقبل میں بھی بھرپور شجرکاری کرکے ماحول کو بہتر بنانے میں اپنا کردار ادا کریں گی تاکہ آلودگی میں کمی آسکے۔ یاد رہے کہ روز ویلفئیر آرگنائزیشن کے صدر محمد اشفاق نذر کو 20 اکتوبر 2022 کو وزیراعظم پاکستان اور وزارت موسمیاتی تبدیلی کی جانب سے کلین گرین پاکستان کے چیئرمین کے ایوارڈ سے بھی نوازا گیا تھا۔

سیالکوٹ (باغی ٹی وی، سٹی رپورٹر مدثر رتو) ڈپٹی کمشنر سیالکوٹ محمد ذوالقرنین لنگڑیال نے دانش سکول سنٹر آف ایکسی لینس میں آرٹس ایگزیبیشن کے دوران طلباء کے فن پاروں کا معائنہ کرتے ہوئے کہا کہ فائن آرٹس ایک گہرائی رکھنے والا تصوراتی علم ہے، جس میں فنکار اپنی تخلیقی صلاحیتوں کے ذریعے دنیا کے پوشیدہ رازوں کو ایک جدید طرز میں سامنے لاتا ہے۔

انہوں نے کہا کہ فائن آرٹس کو عام طور پر ایک آسان علم سمجھا جاتا ہے، جبکہ حقیقت میں یہ دیگر علوم کی نسبت زیادہ گہرا علم ہے، اور اس میں وہی افراد کامیاب ہو سکتے ہیں جو غیر معمولی صلاحیتوں کے حامل ہوتے ہیں۔

آرٹس ایگزیبیشن میں مہمان خصوصی عالمی شہرت یافتہ خطاط تابش سیالوی، کیلیگرافر عبداللہ ہاشمی، پرنسپل شہباز حسن اور فاضل بختیار قریشی بھی موجود تھے۔ ڈپٹی کمشنر نے فنون لطیفہ کی مختلف شاخوں جیسے خطاطی، پینٹنگ، موسیقی، مجسمہ سازی، فوٹو گرافی اور فیشن ڈیزائننگ کا ذکر کرتے ہوئے کہا کہ ٹیکنالوجی میں ترقی نے فائن آرٹس کے شعبے میں بھی انقلاب برپا کیا ہے۔

ڈپٹی کمشنر ذوالقرنین نے طلباء کی کیلیگرافی کے میدان میں کی جانے والی کوششوں کو سراہا اور کہا کہ اس صلاحیت کو مزید نکھار کر اسے روزگار کا ذریعہ بنایا جا سکتا ہے۔

سیالکوٹ (باغی ٹی وی، سٹی رپورٹر مدثر رتو): ڈپٹی کمشنر سیالکوٹ محمد ذوالقرنین نے کہا ہے کہ اساتذہ ہی قوم کے حقیقی معمار ہیں، اور نئی نسل کی تعلیم و تربیت کی عظیم ذمہ داری ان کے کاندھوں پر ہے۔ اپنے پیشے سے مخلص اساتذہ معاشرے کا روحانی باب ہیں اور قابل فخر اساتذہ میں ”ہیرو ایوارڈ” کی تقسیم حکومت پنجاب کا ان کی خدمات کا اعتراف ہے۔

یہ بات انہوں نے گورنمنٹ جامع ہائی سکول سیالکوٹ میں عالمی یومِ اساتذہ 2024 کی مناسبت سے منعقدہ تقریب میں کہی، جس کا انعقاد ڈسٹرکٹ ایجوکیشن اتھارٹی سیالکوٹ، TALEEM پروگرام، گلوبل پارٹنرشپ فار ایجوکیشن (GPE) اور یونیسف کے اشتراک سے کیا گیا تھا۔

ڈپٹی کمشنر محمد ذوالقرنین نے اپنے خطاب میں کہا کہ ہیرو ایوارڈز کا مقصد ان اساتذہ کو خراج تحسین پیش کرنا ہے جو پنجاب کے تعلیمی اداروں میں بہترین خدمات انجام دے رہے ہیں اور معیاری تعلیم کی بہتری کے لیے نمایاں کردار ادا کر رہے ہیں۔ ہر تحصیل میں پرائمری، ایلیمنٹری، سیکنڈری اور ہائر سیکنڈری اساتذہ کو ایوارڈز سے نوازا گیا۔

سی ای او ایجوکیشن جاوید اقبال نے بتایا کہ ضلع سیالکوٹ کی ہر تحصیل میں مجموعی طور پر 19 اساتذہ کو ہیرو ایوارڈ دیا جا رہا ہے، جن میں 8 پرائمری سکول ٹیچرز، 5 ایلیمنٹری اسکول ٹیچرز، 5 سیکنڈری اسکول ٹیچرز، اور 1 سینئر سبجیکٹ اسپیشلسٹ شامل ہیں۔ ایوارڈ یافتگان کا انتخاب طلبہ کے نتائج، نظم و ضبط، کلاس روم مینجمنٹ، اور کمیونٹی انگیجمنٹ کی بنیاد پر کیا گیا ہے۔ سیکنڈری اسکول کے اساتذہ کو ان کی 9ویں، 10ویں اور انٹرمیڈیٹ کلاسوں کے نتائج کے پیش نظر منتخب کیا گیا، جبکہ سینئر سبجیکٹ اسپیشلسٹ اور ہیڈ ٹیچرز کو طلبہ کی تعداد میں اضافے اور نظم و ضبط کی بہتری کی بنا پر یہ اعزاز دیا گیا۔

آخر میں ڈپٹی کمشنر محمد ذوالقرنین نے اساتذہ کو اسناد اور ہیرو ایوارڈ بیجز تقسیم کیے، اور ان کی خدمات کو سراہتے ہوئے ان کی مزید کامیابیوں کے لیے نیک خواہشات کا اظہار کیا۔

سیالکوٹ (باغی ٹی وی، سٹی رپورٹر مدثر رتو) انجمن اسلامیہ سیالکوٹ کے زیر اہتمام 113ویں سالانہ عظیم الشان سیرت رحمت اللعالمین کانفرنس کا انعقاد کیا گیا۔ اس فقیدالمثال کانفرنس کی سرپرستی حضرت مولانا حکیم محمد عبدالواحد نے کی۔ ناظم دعوت و تبلیغ مجلس احرار الاسلام پاکستان حضرت مولانا سید عطاءالمنان شاہ بخاری اور حضرت مولانا ڈاکٹر محمد سعد صدیقی نے بطور مہمان خصوصی کانفرنس میں شرکت کی۔

حضرت مولانا حکیم محمد عبدالواحد نے خطبہ استقبالیہ پیش کرتے ہوئے معزز مہمانوں کی آمد پر ان کا شکریہ ادا کیا اور کہا کہ اس وقت حضرت محمد ﷺ کی سیرت کو اپنانا اور آپ ﷺ کی عملاً اطباع کرنا بہت ضروری ہے۔ انہوں نے کہا کہ دونوں جہانوں میں کامیابی صرف اطباع رسول ﷺ سے ممکن ہے۔

حضرت مولانا سید عطاءالمنان شاہ بخاری نے اپنے خطاب میں کہا کہ دنیا کی سب سے بڑی نعمت حضور نبی کریم ﷺ کی ذات ہے اور ہمیں اپنے رب کا شکر ادا کرنا چاہیے کہ اس نے ہمیں اپنا محبوب عطا فرمایا۔ انہوں نے کہا کہ نبی کریم ﷺ کی آمد سے دنیا نور سے منور ہو گئی اور گمراہی کا خاتمہ ہوا۔ انہوں نے نبی کریم ﷺ کی سیرت کو اپنانے پر زور دیا اور کہا کہ آپ ﷺ کے اسوہ حسنہ پر عمل پیرا ہو کر دنیا و آخرت میں کامیابی حاصل کی جا سکتی ہے۔

حضرت مولانا ڈاکٹر محمد سعد صدیقی نے بھی کانفرنس میں خطاب کیا اور نبی کریم ﷺ کے اسوہ حسنہ پر عمل کرنے کی اہمیت کو اجاگر کیا۔ انہوں نے کہا کہ نبی کریم ﷺ تمام نبیوں کے سردار اور آخری نبی ہونے کے ساتھ ساتھ دونوں جہانوں کے لیے رحمت اللعالمین ہیں۔ انہوں نے کہا کہ نبی کریم ﷺ کی ذات و صفات کا تذکرہ ضروری ہے، لیکن اس کے ساتھ ساتھ ان کی سیرت کو اپنانا بھی ناگزیر ہے تاکہ دنیا و آخرت سنور جائے۔

اس موقع پر مولانا محمد عبدالباسط، مولانا حماد انذر قاسمی، ڈاکٹر شیخ عبدالخبیر، ناظم دارالشفقت انجمن اسلامیہ سیالکوٹ عثمان احمد خان، صدر انجمن اسلامیہ سیالکوٹ پروفیسر خواجہ راشد جاوید، آنریری جنرل سیکرٹری محمد افضل ڈیوڑا، اور آنریری جائنٹ سیکرٹری عبد الحمید نظامی بھی موجود تھے۔

سیالکوٹ (باغی ٹی وی،سٹی رپورٹر مدثر رتو)ستھرا پنجاب پروگرام کے تحت دیہی یونین کونسلز میں صفائی مہم کا آغاز

تفصیل کے مطابق اسسٹنٹ کمشنر سیالکوٹ انعم بابر نے بتایا ہے کہ ستھرا پنجاب پروگرام کے تحت تحصیل سیالکوٹ کی 43 دیہی یونین کونسلز میں صفائی کا کامیابی سے آغاز ہو چکا ہے۔ اس مہم میں 430 سینٹری ورکرز اور 129 لوڈر رکشوں کی مدد سے دیہات میں گھر گھر جا کر ویسٹ کلیکشن کی جا رہی ہے۔

انعم بابر نے مزید بتایا کہ زیرو ویسٹ پروگرام کے تحت تحصیل سیالکوٹ کی 17 یونین کونسلز، جن میں ڈالوالی، رسولپور بھلیاں، وریو، ہندل، کھروٹہ سیداں، گوندل، موماں کلاں، بھگوال اعوان، جوڑیاں کلاں اور مچھرالہ شامل ہیں، سے 1859 میٹرک ٹن ویسٹ ہٹا کر انہیں زیرو ویسٹ کر دیا گیا ہے۔ ہیڈ مرالہ، کور پور، اور پڑتانوالی میں بھی زیرو ویسٹ کرنے کے لیے کام جاری ہے۔

اسسٹنٹ کمشنر نے بتایا کہ ہر ہفتے تین دیہی کونسلز کو زیرو ویسٹ بنایا جا رہا ہے۔ انہوں نے یہ بات یونین کونسل پڑتانوالی کے گاؤں بھانیوالی میں بلک ویسٹ لفٹنگ کے جائزے کے دوران کہی، جہاں اے ڈی ایل جی تحصیل سیالکوٹ، محمد جلیل بھٹی بھی ان کے ہمراہ موجود تھے۔

انہوں نے بتایا کہ وزیر اعلیٰ پنجاب مریم نواز شریف کے ویژن کے مطابق ہر گاؤں سے بلک ویسٹ اٹھایا جا رہا ہے اور اس کے دوبارہ جمع ہونے سے بچنے کے لیے گاؤں کے باہر عارضی ویسٹ کلیکشن پوائنٹس بنائے جا رہے ہیں۔ ان پوائنٹس پر سینٹری ورکرز لوڈر رکشوں کی مدد سے گھر گھر سے ویسٹ اکٹھا کر رہے ہیں، جسے پھر ضلع کونسل کے ایکسیویٹرز اور ٹرالیوں کی مدد سے لینڈ فل سائٹ پر ڈمپ کیا جا رہا ہے۔

اسسٹنٹ کمشنر انعم بابر نے عوام سے اپیل کی کہ وہ دیہات کی صفائی کے لیے ستھرا پنجاب مہم میں بھرپور تعاون کریں اور صفائی کے عملے کا ساتھ دیں تاکہ دیہات صاف ستھرے رہ سکیں۔

سیالکوٹ (باغی ٹی وی،سٹی رپورٹر مدثر رتو) دی سرجیکل انسٹرومنٹس مینوفیکچررز اینڈ ایکسپورٹرز ایسوسی ایشن آف پاکستان (سیماپ) کے نومنتخب عہدیداروں کو اختیارات سونپنے کی تقریب کا انعقاد کیا گیا۔

اس موقع پر ممبر پنجاب اسمبلی فیصل اکرام چودھری، سابق چیئرمین یوسف حسن باجوہ، سابق وائس چیئرمین محمد جمیل خان، جنرل سیکرٹری سیماپ محمد عثمان بٹ، اور دیگر اہم کاروباری شخصیات نے شرکت کی۔ آلات جراحی بنانے والے کاروباری افراد کی کثیر تعداد نے بھی اس تقریب میں شرکت کی۔

تقریب کا آغاز تلاوت کلام پاک سے ہوا، جس کے بعد سابق چیئرمین یوسف حسن باجوہ نے تقریب سے خطاب کرتے ہوئے کہا کہ سیماپ کا دنیا بھر میں ایک ممتاز مقام ہے اور اس کی ترقی میں اپنا حصہ ڈالنے پر انہیں فخر ہے۔ انہوں نے نومنتخب چیئرمین شیخ ذیشان طارق، سینئر وائس چیئرمین سلیمان علی مغل، اور وائس چیئرمین عبدالمومن کو نئی ذمہ داریاں سنبھالنے پر مبارکباد پیش کی۔

اپنے خطاب میں شیخ ذیشان طارق نے اس عزم کا اظہار کیا کہ وہ سیالکوٹ کی تاجر برادری، خصوصاً آلات جراحی بنانے والے کاروباری افراد کے مسائل کے حل کے لیے بھرپور کوشش کریں گے۔ انہوں نے کہا کہ وہ اپنی ٹیم کے ساتھ مل کر سیماپ کے نام اور مقام میں اضافے کے لیے دن رات کام کریں گے اور اس صنعت کے فروغ اور مسائل کے حل کے لیے ہر ممکن قدم اٹھائیں گے۔

شیخ ذیشان نے مزید کہامیں نے ہمیشہ اپنے بڑوں اور سینئرز سے سیکھا ہے اور انشاللہ ان کی رہنمائی میں سیماپ کے لیے بہترین کام کروں گا۔” انہوں نے آلات جراحی کے کاروباری افراد کے ساتھ مکمل تعاون کا یقین دلایا اور کہا کہ وہ ہر فورم پر ان کے مسائل کے حل کے لیے آواز اٹھائیں گے۔

تقریب کے آخر میں نومنتخب چیئرمین شیخ ذیشان طارق، سینئر وائس چیئرمین سلیمان علی مغل، اور وائس چیئرمین عبدالمومن کو باقاعدہ ہار پہنا کر ان کے اختیارات سونپے گئے اور انہیں مبارکباد دی گئی۔ تقریب کا ماحول انتہائی خوشگوار اور حوصلہ افزا رہا، جس میں تمام شرکاء نے نئے عہدیداروں کو نیک تمناؤں کا اظہار کیا۔

سیالکوٹ (باغی ٹی وی،بیوروچیف) سیالکوٹ کے ڈپٹی کمشنر محمد ذوالقرنین نے اچانک تحصیل ہیڈکوارٹر ہسپتال سمبڑیال اور بنیادی مرکز صحت دھانانوالی کا دورہ کیا۔ اس دورے کا مقصد ہسپتالوں میں فراہم کی جانے والی طبی سہولیات کا جائزہ لینا اور ڈاکٹرز و عملے کی حاضری چیک کرنا تھا۔ اس موقع پر اسسٹنٹ کمشنر سمبڑیال احسن ممتاز گوندل اور ایم ایس ڈاکٹر محمد جاوید ساہی بھی ان کے ہمراہ موجود تھے۔

ڈپٹی کمشنر نے ہسپتالوں میں زیر علاج مریضوں کی عیادت کی اور ان سے فراہم کردہ طبی سہولیات کے بارے میں پوچھا۔ انہوں نے مریضوں کو دستیاب سہولیات جیسے او پی ڈی، ایمرجنسی، اور داخل مریضوں کو ملنے والی ادویات کے مفت فراہم ہونے کی تصدیق کی۔ ڈپٹی کمشنر نے مزید بتایا کہ ہسپتال میں ہپاتائٹس کے پی سی آر سمیت دیگر میڈیکل ٹیسٹ کی سہولیات بھی دستیاب ہیں، جن کا مقصد عوام کو بہتر اور معیاری علاج فراہم کرنا ہے۔

ڈپٹی کمشنر محمد ذوالقرنین نے اسسٹنٹ کمشنر سمبڑیال کے ساتھ وزیر اعلیٰ پنجاب کے "اپنی چھت اپنا گھر” پروگرام کے تحت قائم کیے گئے سنٹر کا بھی معائنہ کیا۔ انہوں نے بتایا کہ ضلع سیالکوٹ میں اس پروگرام کے تحت مجموعی طور پر 1739 خاندانوں کی رجسٹریشن مکمل کی جا چکی ہے۔ پہلی قرعہ اندازی میں سیالکوٹ سے 212 خوش نصیب درخواست گزاروں کے کیسز منظور کر لیے گئے ہیں اور ان کے گھروں کی فراہمی کا پراسس جاری ہے۔

ڈپٹی کمشنر نے سمبڑیال میں ایکسپورٹ پروسیسنگ زون کے ساتھ جاری سیوریج ڈرین کی تعمیر کے منصوبے کی رفتار اور معیار کا بھی معائنہ کیا۔ انہوں نے متعلقہ حکام کو ہدایت کی کہ منصوبے کو مقررہ مدت میں مکمل کیا جائے اور تعمیراتی کام کے معیار پر کوئی سمجھوتہ نہ کیا جائے تاکہ علاقہ مکینوں کو بہتر سہولیات فراہم کی جا سکیں۔

ڈپٹی کمشنر محمد ذوالقرنین نے عوامی خدمت کے جذبے کے تحت ان تمام منصوبوں پر اپنی نظر رکھنے کی یقین دہانی کرائی اور کہا کہ عوامی سہولتوں کی فراہمی ان کی اولین ترجیح ہے۔

سیالکوٹ (باغی ٹی وی بیوروچیف شاہد ریاض سے) مرکز اہلسنت دربار امام علی الحق شہید کو اہلسنت کا قلعہ قرار دیتے ہوئے پاکستان سنی تحریک کے مرکزی جنرل سیکرٹری علامہ بلال سلیم قادری نے چادر پوشی کی تقریب کے دوران کہا کہ یہ دربار دین اسلام کے لئے ایک اہم مرکز ہے۔ انہوں نے کہا کہ امام علی الحق شہید کی خدمات کو قیامت تک یاد رکھا جائے گا۔

علامہ بلال سلیم قادری نے اولیائے کرام کے کردار کو سراہتے ہوئے کہا کہ انہوں نے ہمارے دلوں میں عشق رسول صلی اللہ علیہ وآلہ وسلم کی شمع روشن کی ہے۔ ان کا کہنا تھا کہ اولیائے کرام کے مزارات رشدوہدایت کے مینار ہیں، جن سے آج بھی فیوض و برکات کا سلسلہ جاری ہے۔ انہوں نے یہ بھی کہا کہ "اولیاء اللہ نے عمل و کردار سے اسلامی تعلیمات پر عملدرآمد کا درس دیا” اور یہ کہ ہمارے لئے ضروری ہے کہ ہم ان کی تعلیمات پر عملدرآمد کو یقینی بنائیں۔

اس تقریب میں صوبائی رہنما غلام مرتضیٰ قادری، ڈویژنل جنرل سیکرٹری شانی سلطانی، ضلعی صدر حافظ غلام مرتضیٰ، ضلعی جنرل سیکرٹری حافظ افضال، ضلعی رہنما رضوان قادری، تحصیل صدر ملک عامر، سرفراز قادری، رانا عامر، حاجی قیصر، عثمان خان لودھی، شاہد مبین اور دیگر افراد بھی موجود تھے۔

چادر پوشی کی اس تقریب نے دربار امام علی الحق شہید کی روحانی اہمیت کو اجاگر کیا اور اس بات پر زور دیا کہ ہمیں اولیائے کرام کی تعلیمات پر عمل کرنا چاہئے تاکہ ہم دین اسلام کی حقیقی روح کو سمجھ سکیں۔

سیالکوٹ (باغی ٹی وی،بیوروچیف شاہد ریاض) ڈسٹرکٹ پولیس آفس سیالکوٹ میں ترقی پانے والے پولیس افسران کے اعزاز میں ایک سادہ اور پروقار تقریب کا انعقاد کیا گیا۔

اس تقریب میں 21 افسران کو اے ایس آئی اور سب انسپکٹر کے عہدوں پر ترقی دی گئی۔ تقریب کی صدارت ڈی پی او سیالکوٹ رانا عمر فاروق نے کی، جنہوں نے افسران کو ان کی ترقی کے نئے رینک لگائے۔

تقریب میں ترقی پانے والے افسران کے اہلخانہ بھی شریک تھے، جن کے ہمراہ افسران کو رینک لگائے گئے۔ ڈی پی او رانا عمر فاروق نے افسران کو مبارکباد پیش کی اور ان کے بہتر مستقبل کے لیے نیک تمناؤں کا اظہار کیا۔

اس موقع پر ڈی پی او سیالکوٹ نے کہا کہ "پولیس سروس میں محکمانہ پروموشن دراصل ذمہ داریوں میں اضافے کی عکاسی کرتا ہے۔ ترقی پانے والے افسران کو قانون کے یکساں نفاذ، میرٹ کی پاسداری اور بہترین سروس ڈلیوری کے ساتھ شہریوں کی خدمت اور تحفظ کو اولین ترجیح دینی چاہیے۔”

تقریب کا مقصد افسران کی حوصلہ افزائی اور ان کی ذمہ داریوں کے حوالے سے آگاہی دینا تھا تاکہ وہ مزید مستعدی سے اپنے فرائض انجام دے سکیں۔