Category: سیالکوٹ

سیالکوٹ (باغی ٹی وی،بیوروچیف شاہدریاض) الخدمت فاؤنڈیشن ڈسکہ کے زیراہتمام مقامی ہال میں مستحق معذور افراد میں ویل چیئرز تقسیم کرنے کی تقریب کا انعقاد کیا گیا۔ تقریب کے مہمانِ خصوصی صدر الخدمت فاؤنڈیشن ضلع سیالکوٹ خواجہ مسعود اختر (ہلال امتیاز، ستارہ امتیاز) تھے، جبکہ سرپرست الخدمت فاؤنڈیشن ضلع سیالکوٹ چوہدری امتیاز احمد بریار اور سرپرست الخدمت فاؤنڈیشن ڈسکہ عامر صدیق چیمہ ایڈووکیٹ بھی شریک تھے۔

تقریب کا آغاز تلاوتِ کلام پاک اور نعتِ رسول مقبول ﷺ سے ہوا۔ پروگرام کوآرڈینیٹر عمر وریاہ نے اپنی ٹیم کے ہمراہ مہمانوں کا استقبال کیا۔ تقریب کے دوران مقررین نے الخدمت فاؤنڈیشن کی ملکی و بین الاقوامی سطح پر خدمات، خصوصاً غزہ میں جاری امدادی سرگرمیوں کو سراہا۔ انہوں نے کہا کہ یہ تمام خدمات شہریوں اور مخیر حضرات کے تعاون سے جاری ہیں۔

تقریب میں مختلف سماجی و سیاسی شخصیات نے شرکت کی جن میں سابق صدر ڈسکہ بار محمد انور مغل ایڈووکیٹ، سابق چیئرمین بلدیہ خواجہ عاطف رضا پاشی، قاری ذوالفقار علی سیالوی، چیئرمین ڈسکہ پریس کلب شکیل اکرم ورک، پرنسپل گورنمنٹ کالج ڈسکہ امان اللہ راٹھور، صدر الفجر فاؤنڈیشن خلیل الرحمن مغل، اور بانی ڈسکہ یونین آف جرنلسٹ امین رضا مغل شامل تھے۔

تقریب کے اختتام پر 40 مستحق معذور افراد میں ویل چیئرز تقسیم کی گئیں اور معزز مہمانوں کو شیلڈز پیش کی گئیں۔ آخر میں ملکی سلامتی اور استحکام کے لیے خصوصی دعا کی گئی۔

سیالکوٹ(باغی ٹی وی ،سٹی رپورٹرمدثر رتو)نیشنل انسٹی ٹیوٹ آف مینجمنٹ، لاہور کی زیر نگرانی 41ویں مڈ کیئر مینجمنٹ کورس میں شامل افسران کے 17 رکنی وفد نے ڈپٹی کمشنر آفس سیالکوٹ کا دورہ کیا، جہاں ڈپٹی کمشنر محمد ذوالقرنین نے وفد سے خطاب کیا۔ انہوں نے کہا کہ سیالکوٹ تیزی سے ترقی کرتا ہوا شہر ہے جس کی بنیادی وجہ یہاں کی 8 ہزار رجسٹرڈ فرمز ہیں جو آلات جراحی، چمڑے کی مصنوعات، کھیلوں کے سامان اور میوزیکل انسٹرومنٹ سمیت مختلف مصنوعات تیار کرتی ہیں۔ ان مصنوعات کی دنیا بھر خاص طور پر یورپ اور امریکہ میں بڑی مانگ ہے، جس کے نتیجے میں سیالکوٹ کی سمال اور کاٹیج انڈسٹریز کے ذریعے ملک کو اربوں ڈالر کا قیمتی زرمبادلہ حاصل ہوتا ہے اور یہی وجہ ہے کہ سیالکوٹ کی فی کس آمدن ملک میں سب سے زیادہ ہے۔

ڈپٹی کمشنر نے مزید کہا کہ سیالکوٹ کی زمین نے کئی مشاہیر کو جنم دیا ہے جن میں مفکر پاکستان علامہ محمد اقبال، فیض احمد فیض، ظہیر عباس، ظفر علی خان، امجد اسلام امجد، اعجاز احمد، شعیب ملک اور کلدیپ نیئر شامل ہیں۔ انہوں نے یہ بھی ذکر کیا کہ چونڈہ کے محاذ پر پاک بھارت جنگ میں سیالکوٹ کے بہادر شہریوں اور پاک فوج نے دشمن کو شکست دی، جس کے باعث سیالکوٹ کو ہلال استقلال کا اعزاز حاصل ہوا۔

ڈپٹی کمشنر نے سیالکوٹ بزنس کمیونٹی کی تعریف کی جنہوں نے اپنی مدد آپ کے تحت سیالکوٹ انٹرنیشنل ایئرپورٹ، ڈرائی پورٹ اور ایئر لائن بنانے کا اعزاز حاصل کیا۔ انہوں نے بتایا کہ بزنس کمیونٹی نے 25 سال قبل پبلک پرائیویٹ پروجیکٹ کے تحت سیالکوٹ کی سڑکوں، سیوریج اور نالیوں کی تعمیر کا کامیاب منصوبہ بنایا جس کی ملک کے کسی اور شہر میں نظیر نہیں ملتی۔

وفد میں شامل افسران کی قیادت ایڈیشنل ڈائریکٹرنگ اسٹاف (NIM) حنا خالد اور ڈاکٹر جاوید طارق اعوان کر رہے تھے، جن میں کوآرڈینیٹر ان لینڈ اسٹڈی ٹور رافعیہ حیدر، کوآرڈینیٹر ہما کنول اور دیگر افسران شامل تھے۔ اس موقع پر ایڈیشنل ڈپٹی کمشنر ریونیو محمد اقبال سنگھیڑا، ایڈیشنل ڈپٹی کمشنر فنانس اینڈ پلاننگ مظفر مختار، اسسٹنٹ کمشنر سیالکوٹ انعم بابر، سی ای او ایجوکیشن جاوید اقبال بابر، سی او ہیلتھ ڈاکٹر اسلم، ڈپٹی ڈائریکٹر لوکل گورنمنٹ عمر امجد بیگ اور ڈی ڈی ڈویلپمنٹ محمد آصف نے وفد کو اپنے محکموں کے بارے میں بریفنگ دی اور شرکاء کے سوالات کے جوابات دیئے۔

سیالکوٹ (باغی ٹی وی، سٹی رپورٹر مدثر رتو)پنجاب لینڈ ریکارڈ اتھارٹی کے چیئرمین چودھری طارق سبحانی نے اعلان کیا ہے کہ وزیر اعلیٰ پنجاب مریم نواز شریف کے وژن کے تحت دیہی اور شہری علاقوں میں یکساں صفائی کا نظام نافذ کیا جا رہا ہے، جس کے تحت پورے صفائی کے نظام کو آؤٹ سورس کر دیا گیا ہے۔ آئندہ دو ہفتوں میں دیہات میں ڈور ٹو ڈور کوڑا کلیکشن کا باقاعدہ آغاز ہوگا اور کوڑے کو حفظانِ صحت کے اصولوں کے مطابق ڈمپ کیا جائے گا تاکہ بیماریوں سے بچا جا سکے۔

چودھری طارق سبحانی نے یہ بات یوسی سیداں والی کے موضع بال میں بلک ویسٹ لفٹنگ اور گلیوں و نالیوں کی صفائی کا جائزہ لینے کے دوران کہی۔ ان کے ساتھ ڈپٹی ڈائریکٹر لوکل گورنمنٹ عمر امجد بیگ، سی او ضلع کونسل فدا میر، اے ڈی ایل جی محمد جمیل گل اور دیگر معززین بھی موجود تھے۔

انہوں نے کہا کہ ستھرا پنجاب پروگرام کے تحت ہر یونین کونسل میں سینٹری ورکرز، لوڈر رکشے، اور ہیوی مشینری فراہم کی جائے گی اور ضلع سیالکوٹ کے 1485 دیہات میں صفائی کا مربوط نظام متعارف کرایا جائے گا، جس میں ہر گاؤں کے لیے عارضی ویسٹ کلیکشن پوائنٹس بھی قائم کیے جائیں گے۔

طارق سبحانی نے کہا مریم نواز کا مشن عوام کے معیارِ زندگی کو بہتر بنانا ہے۔ انہوں نے اپنی چھت اپنا گھر، ہمت کارڈ، اور ستھرا پنجاب جیسے منصوبوں کو عوامی خدمت کا منہ بولتا ثبوت قرار دیا۔

انہوں نے واضح کیا کہ مسلم لیگ ن کی سیاست کا محور ہمیشہ عوامی مسائل کا حل اور ان کی زندگیوں میں آسانیاں پیدا کرنا رہا ہے۔ انہوں نے کہا ہماری جماعت نے کبھی سیاسی مخالفین کے خلاف غیر اخلاقی زبان استعمال نہیں کی جبکہ دوسری جانب پی ٹی آئی انتشار اور دھمکیوں کی سیاست کر رہی ہے جو نوجوانوں کی اخلاقیات پر منفی اثرات ڈال رہی ہے۔”

انہوں نے مزید کہا کہ ملک میں 17 ممالک کے سربراہان اور اعلیٰ قیادت کا دورہ متوقع ہے لیکن سیاسی مخالفین کو یہ ترقی ہضم نہیں ہو رہی کیونکہ وہ ملک کو ترقی کرتا ہوا نہیں دیکھ سکتے۔

طارق سبحانی نے عوام سے اپیل کی کہ وہ دونوں جماعتوں کا موازنہ کریں اور فیصلہ کریں کہ کون سی جماعت ملک و قوم کی خدمت کرنے کی صلاحیت رکھتی ہے۔

سیالکوٹ (باغی ٹی وی، سٹی رپورٹر مدثر رتو) دفتر ڈسٹرکٹ پبلک پراسیکیوٹر سیالکوٹ میں کانسٹیبل محمد اکرم کی ریٹائرمنٹ کے موقع پر ایک پروقار الوداعی تقریب کا اہتمام کیا گیا۔ اس تقریب کا مقصد ان کی کئی دہائیوں پر محیط محکمانہ خدمات کو خراج تحسین پیش کرنا اور انہیں بہترین انداز میں رخصت کرنا تھا۔

تقریب سے خطاب کرتے ہوئے ڈسٹرکٹ پبلک پراسیکیوٹر جناب عابد حسین کاہلوں نے محمد اکرم کی خدمات کو سراہا اور کہا کہ انہوں نے اپنے پورے کیریئر میں انتہائی محنت اور دیانتداری سے اپنے فرائض انجام دیے۔ انہوں نے مزید کہا کہ محمد اکرم جیسے قابل اور فرض شناس افراد کا ادارے سے رخصت ہونا ایک خلا پیدا کرتا ہے، تاہم ان کی خدمات کا ادارہ ہمیشہ معترف رہے گا۔

اس موقع پر جناب صہیب مختار (ڈی ایس پی لیگل سیالکوٹ) نے بھی خصوصی طور پر شرکت کی اور محمد اکرم کی پیشہ ورانہ کارکردگی کی تعریف کی۔ دیگر معززین میں جناب رانا عابد حسین، جناب عمران انور، جناب میاں لقمان (ڈپٹی ڈسٹرکٹ پبلک پراسیکیوٹر) سمیت دفتر ڈسٹرکٹ پبلک پراسیکیوٹر کے دیگر پراسیکیوٹر صاحبان اور ملازمین بھی موجود تھے۔

تقریب کے اختتام پر محمد اکرم کانسٹیبل کو دفتر کی جانب سے خصوصی تحائف پیش کیے گئے۔ شرکاء نے ان کے لیے نیک تمناؤں کا اظہار کیا اور دعا کی کہ وہ ریٹائرمنٹ کے بعد کی زندگی میں بھی خوشحال اور صحت مند رہیں۔ تقریب ایک جذباتی ماحول میں اختتام پذیر ہوئی، جہاں ساتھیوں نے محمد اکرم کو پرخلوص دعاؤں کے ساتھ رخصت کیا۔

یہ تقریب نہ صرف ان کی خدمات کا اعتراف تھی بلکہ ایک مثال بھی کہ سرکاری ادارے اپنے محنتی اور دیانتدار ملازمین کو قدر کی نگاہ سے دیکھتے ہیں اور ان کی خدمات کو ہمیشہ یاد رکھتے ہیں۔

سیالکوٹ (باغی ٹی وی،بیوروچیف شاہدریاض) بین الاقوامی شہرت یافتہ صوفی عبدالجلیل المعروف چاچا کرکٹ، سماجی رہنما مرزا عبدالشکور، چوہدری محمد یونس پرنسپل گورنمنٹ بوائز ہائر سیکنڈری اسکول گھوئنیکی دانش اور زاہد شریف نے خصوصی طور پر جی آر ڈی ہسپتال گھوئنیکی کا دورہ کیا۔

دورے کے دوران معزز مہمانوں نے ہسپتال میں جاری کاموں پر اطمینان کا اظہار کیا اور کہا کہ یہ منصوبہ اپنی مدد آپ کے تحت کامیابی سے جاری ہے۔ انہوں نے ان تمام افراد کو بھرپور خراجِ تحسین پیش کیا جنہوں نے اپنی استطاعت کے مطابق اس منصوبے کو کامیاب بنانے میں اپنا کردار ادا کیا۔

مہمانوں نے ہسپتال کی انتظامیہ اور معاونین کی کاوشوں کو سراہتے ہوئے امید ظاہر کی کہ یہ ہسپتال عوام کو بہترین طبی سہولیات فراہم کرنے میں اہم کردار ادا کرے گا۔