Category: سکھر

میرپورماتھیلو (باغی ٹی وی،نامہ نگارمشتاق لغاری) ڈپٹی کمشنر گھوٹکی منظور احمد کنرانی نے ضلع میں متوقع شدید بارشوں کے پیشِ نظر ہنگامی صورتحال کا اعلان کرتے ہوئے متعلقہ محکموں کے تمام افسران اور عملے کی چھٹیاں فوری طور پر منسوخ کر دی ہیں۔ یہ فیصلہ محکمہ موسمیات کی اس پیشگوئی کے بعد کیا گیا ہے جس میں آئندہ چند دنوں میں گھوٹکی اور اس کے گرد و نواح میں تیز اور مسلسل بارشوں کا امکان ظاہر کیا گیا ہے۔

جاری کیے گئے نوٹیفکیشن کے مطابق، محکمہ آبپاشی، لوکل گورنمنٹ، صحت، پبلک ہیلتھ انجینئرنگ، زراعت، اور سوشل ویلفیئر کا تمام عملہ اپنی ڈیوٹی پر موجود رہے گا اور کسی کو بھی ہیڈ کوارٹر سے غیر حاضر رہنے کی اجازت نہیں ہوگی۔

ڈی سی گھوٹکی منظور احمد کنرانی نے واضح کیا ہے کہ بارش ایمرجنسی کے دوران کسی بھی افسر یا ملازم کی لاپرواہی کو سخت بدانتظامی سمجھا جائے گا۔ انہوں نے کہا کہ عوامی مسائل کے حل میں کسی قسم کی کوتاہی برداشت نہیں کی جائے گی اور ذمہ داری سے گریز کرنے والوں کے خلاف نہ صرف انتظامی بلکہ قانونی کارروائی بھی کی جائے گی۔

ضلعی انتظامیہ کی جانب سے مختلف محکموں کو خصوصی ہدایات جاری کی گئی ہیں تاکہ ممکنہ نقصانات سے بچا جا سکے۔

آبپاشی محکمہ کو حفاظتی بندوں اور نہروں کے پشتوں کی کڑی نگرانی کرنے کا حکم دیا گیا ہے تاکہ ممکنہ سیلاب سے بچاؤ یقینی ہو۔

لوکل گورنمنٹ کو نکاسی آب، صفائی ستھرائی اور مشینری کی دستیابی یقینی بنانے کی ہدایت دی گئی ہے۔

محکمہ صحت کو تمام اسپتالوں اور ڈسپنسریوں میں ایمرجنسی میڈیکل سہولیات، ادویات اور عملہ ہر وقت تیار رکھنے کا کہا گیا ہے۔

پبلک ہیلتھ انجینئرنگ کو پینے کے صاف پانی کی فراہمی اور متاثرہ علاقوں میں فوری ٹیمیں تعینات کرنے کی ہدایت دی گئی ہے۔

محکمہ زراعت کو فصلوں کو نقصان سے بچانے اور سوشل ویلفیئر کو متاثرین کی بحالی اور ریلیف سرگرمیوں کے لیے تیار رہنے کا ٹاسک دیا گیا ہے۔

ضلعی انتظامیہ نے شہریوں سے بھی احتیاطی تدابیر اختیار کرنے کی اپیل کی ہے اور کہا ہے کہ کسی بھی ہنگامی صورتحال میں فوری طور پر مقامی انتظامیہ اور ریسکیو اداروں کو اطلاع دی جائے۔

میرپور ماتھیلو (باغی ٹی وی،نامہ نگار مشتاق علی لغاری) میرپور ماتھیلو کے شہر داد لغاری میں بڑھتی ہوئی بدامنی کے خلاف پتافی نوجوان اتحاد نے پولیس تھانے کے سامنے احتجاجی مظاہرہ کیا۔ مظاہرے کی قیادت خان زمان پتافی، شوکت پتافی، فدا حسین پتافی، عالی شاہ اور فہد پتافی نے کی۔

مظاہرین کا کہنا تھا کہ داد لغاری اور اس کے گردونواح میں روزانہ بدامنی کے واقعات بڑھ رہے ہیں، اور پولیس انہیں روکنے میں ناکام ہو چکی ہے۔ احتجاج کے دوران مظاہرین نے ایس ایچ او داد لغاری ذوالفقار مہر اور دیگر پولیس اہلکاروں کے خلاف شدید نعرے بازی کی۔

مظاہرین نے الزام لگایا کہ پولیس امن و امان قائم کرنے میں سنجیدہ نہیں ہے۔ انہوں نے ایس پی گھوٹکی سے مطالبہ کیا کہ موجودہ ایس ایچ او کو فوری طور پر ہٹا کر کسی ایماندار افسر کو تعینات کیا جائے۔

اس موقع پر تھانے کے منشی عباس لنڈ نے میڈیا سے بات کرتے ہوئے کہا کہ پولیس اپنی کوششیں جاری رکھے ہوئے ہے۔ انہوں نے بتایا کہ سی سی ٹی وی کیمروں کی فوٹیج کی جانچ بھی کی گئی ہے، لیکن فوٹیج واضح نہ ہونے کی وجہ سے ملزمان کی شناخت نہیں ہو سکی۔ ان کا کہنا تھا کہ جیسے ہی ملزمان کو پکڑا جائے گا، انہیں مقدمے میں نامزد کر کے کارروائی کی جائے گی۔

میرپور ماتھیلو (نامہ نگار،مشتاق لغاری) ایس ایس پی گھوٹکی محمد انور کھیتران کی ہدایات پر گھوٹکی پولیس نے بڑی کارروائی کرتے ہوئے بھتہ خوری اور موٹر سائیکل چوری میں ملوث ایک بڑے گینگ کا پردہ فاش کر دیا۔ پولیس نے کارروائی کے دوران 5 مرکزی ملزمان کو گرفتار کرکے ان کے قبضے سے 9 چوری شدہ موٹر سائیکلیں برآمد کر لیں۔

ڈی ایس پی گھوٹکی انور علی شیخ اور ایس ایچ او تھانہ اے سیکشن محمد قابل بھیو کی قیادت میں پولیس ٹیم نے مختلف سنگین مقدمات میں مطلوب ملزمان وزیر ولد عطا محمد گھوٹو، سرور ولد امین گھوٹو، ریاض ولد در محمد گھوٹو، اسداللہ ولد خدا بخش گھوٹو، اور پرویز ولد محمد بچل گھوٹو کو گرفتار کیا۔

ابتدائی تفتیش کے مطابق، گرفتار ملزمان ریاض گھوٹو اور اسد اللہ گھوٹو کا تعلق جاگیرانی گینگ کے ڈاکوؤں لطف جاگیرانی، ندیم جاگیرانی اور شوکت جاگیرانی سے ہے۔ یہ ملزمان نہ صرف جاگیرانی گینگ کے سہولت کار ہیں بلکہ بھتہ خوری میں بھی ملوث ہیں۔ گرفتار ملزمان نے حال ہی میں گھوٹکی کی شوگر مل سے چار موٹر سائیکلیں چوری کرنے کا بھی اعتراف کیا ہے جو برآمد کر لی گئی ہیں۔

یاد رہے کہ کچھ دن قبل ڈاکو ندیم جاگیرانی اور اس کے ساتھیوں نے گھوٹکی شہر کے رحمو محلہ میں رشید لنجار کے گھر پر فائرنگ کی تھی جس کے نتیجے میں ایک مرد اور ایک عورت زخمی ہوئے تھے۔

پولیس کا کہنا ہے کہ گرفتار ملزمان نے مختلف علاقوں میں متعدد سنگین وارداتوں میں ملوث ہونے کا انکشاف کیا ہے۔ یہ ملزمان کچے کے علاقے میں جاگیرانی گینگ سے ملاقات کرتے تھے اور انہیں شہروں میں وارداتوں کے لیے معلومات فراہم کرتے تھے۔ ملزمان کا کرمنل ریکارڈ چیک کیا جا رہا ہے اور مزید تفتیش جاری ہے۔ ایس ایس پی گھوٹکی نے اس کامیاب کارروائی پر پولیس پارٹی کے لیے شاباشی کا پیغام دیا ہے۔

میرپور ماتھیلو (باغی ٹی وی،نامہ نگارمشتاق لغاری): ایس ایس پی گھوٹکی محمد انور کھیتران کی ہدایات پر گھوٹکی پولیس نے روپوش، اشتہاری اور دیگر جرائم پیشہ افراد کے خلاف کاروائیوں کو تیز کر دیا ہے۔ اس سلسلے میں تھانہ جروار کے ایس ایچ او صفدر عباس پھلپوٹو نے اپنی ٹیم کے ہمراہ اہم کامیابی حاصل کی ہے۔

دورانِ گشت، خفیہ اطلاع پر کاروائی کرتے ہوئے پولیس نے سکھر کے تھانہ کندھرہ میں درج کرائم نمبر 101/2024 کے تحت دفعہ 302 اور 201 تعزیراتِ پاکستان کے ایک قتل کے مقدمے میں مطلوب ایک اشتہاری ملزم اور ایک ملزمہ کو گرفتار کر لیا ہے۔

گرفتار ہونے والوں میں اسحاق ولد مبارک جکھرانی اور مسمات حلیمہ عرف ذلی جکھرانی شامل ہیں، جو میرپور ماتھیلو کے نواحی علاقے گڑھی چاکر کے رہائشی ہیں۔ پولیس نے ملزم اور ملزمہ کو مزید قانونی کاروائی کے لیے متعلقہ اداروں کے حوالے کر دیا ہے