Category: سکھر

میرپورماتھیلو،باغی ٹی وی(نامہ نگارمشتاق لغاری) رونتی کچے میں پولیس کے کامیاب آپریشن کے ردعمل میں ڈاکوؤں نے بیلو میرپور تھانے کی حدود میں پولیس چیک پوسٹ پر حملہ کر دیا۔ تاہم، مستعد پولیس اہلکاروں نے بہادری سے حملہ ناکام بنا دیا۔

ڈی آئی جی سکھر کیپٹن (ر) فیصل عبداللہ چاچڑ کی ہدایت پر کیے گئے آپریشن میں چار خطرناک ڈاکو زخمی ہوئے، جس کے بعد ڈاکوؤں نے جوابی کارروائی کی۔ پولیس چیک پوسٹ پر تعینات اہلکاروں نے بھرپور مزاحمت کی، جبکہ گشت پر مامور پولیس موبائل کے پہنچنے پر دو طرفہ فائرنگ کا تبادلہ ہوا۔ فائرنگ کے نتیجے میں پولیس موبائل کو گولیاں لگیں، مگر تمام اہلکار محفوظ رہے۔ مزید ڈاکوؤں کے زخمی ہونے کی اطلاعات ہیں، اور اضافی نفری طلب کر لی گئی ہے تاکہ ملزمان کو فرار ہونے کا موقع نہ ملے۔

ڈی آئی جی سکھر نے بہادری سے مقابلہ کرنے والے پولیس جوانوں اور کمانڈوز کی جرات کو سراہتے ہوئے انہیں شاباش دی۔

میرپورماتھیلو،باغی ٹی وی (نامہ نگار مشتاق لغاری)اوباڑو سے کمسن مزدور بچہ اغوا، ڈاکوؤں کا 50 لاکھ تاوان کا مطالبہ

تفصیل کے مطابق اوباڑو امن کا گہوارہ سمجھے جانے والا اوباڑو اب جرائم کی آماجگاہ بن چکا ہے، جہاں روزی کمانے والا بھی محفوظ نہیں۔ گاؤں قالو خان رند کا رہائشی کمسن وسیم عباس رند، جو اپنے گھر کا واحد کفیل تھا، اغوا کاروں کے ہتھے چڑھ گیا۔ اطلاعات کے مطابق ملزمان اسے کشمور کے کچے میں لے گئے اور رہائی کے بدلے 50 لاکھ روپے تاوان طلب کر رہے ہیں۔

عوامی حلقوں نے ایس ایس پی گھوٹکی سمیع اللّٰہ سومرو سے فوری کارروائی کا مطالبہ کیا ہے۔ مقامی شہریوں کا کہنا ہے کہ اگر چند دن میں مغوی کو بازیاب نہ کرایا گیا تو تحصیل اوباڑو کے بچے بھی ایس ایس پی دفتر کے سامنے احتجاج میں شریک ہوں گے۔

میرپور ماتھیلو،باغی ٹی وی (نامہ نگارمشتاق لغاری) پولیس کی کارروائی، چوری شدہ گائے برآمد، مالک کے حوالے

میرپور ماتھیلو پولیس نے چوری شدہ گائے برآمد کر کے اصل مالک کے حوالے کر دی۔ ایس ایس پی گھوٹکی ڈاکٹر سمیع اللہ سومرو کی ہدایت پر ایس ایچ او تھانہ میرپور ماتھیلو عبدالرزاق انصاری اور ان کی ٹیم نے بہترین کارروائی کرتے ہوئے مسروقہ گائے بازیاب کر لی۔

گزشتہ رات نامعلوم چوروں نے کوری کوہ کے علاقے سے سھراب مھر کی ایک بھینس اور ایک گائے چوری کر لی تھی۔ مالک کی جانب سے بروقت اطلاع ملتے ہی میرپور ماتھیلو پولیس متحرک ہوئی اور بھاری نفری کے ساتھ چوروں کا تعاقب شروع کر دیا۔ کارروائی کے دوران پولیس نے تھانہ شہید دین محمد لغاری کی حدود میں کماد کی فصل کے قریب سے چوروں سے ایک گائے بازیاب کر لی۔

ایس ایچ او میرپور ماتھیلو کا کہنا ہے کہ چوری شدہ بھینس کی برآمدگی کے لیے بھی پولیس ٹیم متحرک ہے اور جلد اسے بھی بازیاب کر لیا جائے گا۔ مسروقہ گائے واپس ملنے پر مالک سھراب مھر نے پولیس کی فوری کارروائی کو سراہتے ہوئے شکریہ ادا کیا۔

میرپور ماتھیلو ،باغی ٹی وی(نامہ نگارمشتاق لغاری) گھوٹکی پولیس نے جرائم پیشہ عناصر کے خلاف بھرپور کارروائی کرتے ہوئے سنگین مقدمات میں مطلوب اشتہاری ملزمان کی گرفتاری کے لیے آپریشن کیا۔ ڈی ایس پی گھوٹکی رانا نصراللہ کی سربراہی میں متعدد تھانوں کی پولیس نے تھانہ بی کی حدود لعل پیر بیلہ میں چھاپے مارے، تاہم ملزمان پولیس کو دیکھتے ہی فائرنگ کرتے ہوئے فرار ہوگئے۔

پولیس کے مطابق گرفتار کیے جانے والے ملزمان میں مصری ولد لعل بلو، نظام الدین ولد مصری بلو، پرویز ولد بنبھور بلو، قربان بلو، ظہور میرانی، شہزادو کلہوڑو، راحب عرف آصف ولد خدا بخش میرانی سمیت دیگر شامل تھے، جو قتل، اغواء برائے تاوان، رہزنی، چوری اور پولیس مقابلے جیسے سنگین مقدمات میں مطلوب تھے۔ پولیس پارٹی کے پہنچنے پر ملزمان نے اندھا دھند فائرنگ شروع کر دی، جس پر پولیس نے بھی اپنے دفاع میں جوابی کارروائی کی، تاہم تمام ملزمان موقع سے فرار ہونے میں کامیاب ہوگئے۔

پولیس نے آپریشن کے دوران ملزمان کے ٹھکانوں سے چوری شدہ دو عدد ٹریکٹر برآمد کر لیے، جنہیں مالکان کی شناخت کے بعد ان کے حوالے کیا جائے گا۔ اس پولیس مقابلے کا مقدمہ تھانہ بی سیکشن میں کرائم نمبر 10/2025 کے تحت دفعہ 324، 353، 147، 148، 149 ت پ کے تحت درج کر لیا گیا ہے۔

ڈی ایس پی گھوٹکی رانا نصراللہ کی قیادت میں کیے گئے اس آپریشن میں 03 اے پی سی چینز، 08 ایس ایچ اوز، اور 12 پولیس موبائلز حصہ لے رہی تھیں۔ پولیس حکام کا کہنا ہے کہ ملزمان کی گرفتاری کے لیے مزید کارروائیاں جاری رہیں گی اور جلد ہی قانون کی گرفت میں لے آئیں گے۔

گھوٹکی پولیس نے عوام سے اپیل کی ہے کہ وہ جرائم پیشہ عناصر کی نشاندہی میں مدد کریں تاکہ علاقے کو امن کا گہوارہ بنایا جا سکے۔

میرپورماتھیلو،باغی ٹی وی (نامہ نگارمشتاق لغاری)سانگھڑ، چوٹیاریوں میں خونریزی، سردار عبدالرحیم کا ملزمان کی فوری گرفتاری کا مطالبہ

تفصیل کے مطابق پاکستان مسلم لیگ فنکشنل سندھ کے سیکریٹری جنرل سردار عبدالرحیم نے سانگھڑ ڈسٹرکٹ کے علاقے چوٹیاریوں میں فائرنگ کے افسوسناک واقعے کی شدید مذمت کرتے ہوئے ملزمان کی فوری گرفتاری کا مطالبہ کیا ہے۔ اس واقعے میں سروری جماعت سے تعلق رکھنے والے افراد جانبحق جبکہ خواتین سمیت 20 سے زائد افراد زخمی ہوئے۔

سردار عبدالرحیم نے کہا کہ سانگھڑ کے قریب پیش آنے والا یہ واقعہ سندھ میں بگڑتی ہوئی امن و امان کی صورتحال کی نشاندہی کرتا ہے۔ انہوں نے کہا کہ حکومت امن و امان قائم رکھنے میں مکمل طور پر ناکام ہوچکی ہے اور اس واقعے میں ملوث عناصر کو گرفتار کر کے عبرتناک سزائیں دی جائیں۔

انہوں نے حکومت پر زور دیا کہ سانگھڑ چوٹیاریوں میں منافقانہ سیاست کو ترک کرتے ہوئے اصل ملزمان کو انصاف کے کٹہرے میں لایا جائے۔ سردار عبدالرحیم نے معصوم شہریوں اور خواتین پر فائرنگ کو غیر انسانی عمل قرار دیتے ہوئے کہا کہ ایسے درندے کسی رعایت کے مستحق نہیں ہیں۔

انہوں نے زخمیوں کو مکمل طبی سہولیات فراہم کرنے کا بھی مطالبہ کیا اور کہا کہ علاقے میں بدامنی پھیلانے والے عناصر کے خلاف سخت کارروائی عمل میں لائی جائے۔

میرپور ماتھیلو،باغی ٹی وی (نامہ نگار مشتاق علی لغاری) گھوٹکی پولیس کا منشیات فروشوں کے خلاف کریک ڈاؤن، تین ملزمان گرفتار

ڈاکٹر سمیع اللہ سومرو کی ہدایت پر گھوٹکی پولیس نے منشیات فروشوں اور دیگر جرائم پیشہ افراد کے خلاف کارروائی کرتے ہوئے میرپور ماتھیلو میں تین ملزمان کو گرفتار کر لیا۔

ایس ایچ او تھانہ میرپور ماتھیلو عبدالرزاق انصاری نے دوران گشت خفیہ اطلاع پر لنک روڈ باگو ڈرھ نزد شیخ پمپ پر کارروائی کی۔ اس دوران تین ملزمان فیاض عرف باڈو بوزدار، شکیل عرف کاکو بوزدار، اور فیصل بوزدار کو مجموعی طور پر 500 گرام چرس سمیت گرفتار کیا گیا۔

پولیس نے گرفتار ملزمان کو برآمد شدہ چرس سمیت تھانہ منتقل کر دیا اور ان کے خلاف کرائم نمبر 30/2025 درج کر لیا گیا ہے۔

پولیس حکام کا کہنا ہے کہ منشیات فروشی کے خاتمے کے لیے علاقے میں گشت اور خفیہ کارروائیاں مزید تیز کی جائیں گی تاکہ نوجوان نسل کو منشیات جیسی لعنت سے محفوظ رکھا جا سکے۔