Category: سکھر

میرپورماتھیلو (باغی ٹی وی، نامہ نگار مشتاق علی لغاری) آئی جی سندھ غلام نبی میمن نے ضلع گھوٹکی کا دورہ کیا، جہاں ایس ایس پی آفس آمد پر انہیں پولیس کے چاک و چوبند دستے نے گارڈ آف آنر پیش کیا۔

آئی جی سندھ نے کندھ کوٹ-گھوٹکی پل کے تعمیراتی کام اور سیکیورٹی انتظامات کا جائزہ لیتے ہوئے ایس ایس پی گھوٹکی کو مزید اقدامات کی ہدایات دیں۔ انہیں گھوٹکی کے کچے اور دیگر علاقوں میں امن و امان کے حوالے سے پولیس حکمت عملی پر تفصیلی بریفنگ دی گئی۔

اجلاس میں ڈی آئی جی سکھر، اے ایس پی میرپور ماتھیلو، ڈی ایس پیز گھوٹکی، ڈہرکی، اباوڑو، رونتی اور دیگر پولیس افسران شریک ہوئے۔ آئی جی سندھ نے فرائض کی عمدہ ادائیگی پر 14 پولیس اہلکاروں، 7 آئی ٹی ڈرون ٹیم ممبران، ایس ایچ اوز ڈہرکی، اباوڑو، کھمبڑا اور ہیڈ محرران کو سی سی ون سرٹیفکیٹ اور نقد انعام دینے کا اعلان کیا۔

آئی جی سندھ کے احکامات:
ڈکیتوں اور اغوا میں ملوث ملزمان کے خلاف سخت کارروائی کی جائے
کچے اور پکے علاقوں میں جرائم پیشہ عناصر کے خلاف آپریشن تیز کیا جائے
پولیس کو جدید ہتھیاروں اور گاڑیاں جلد فراہم کی جائیں گی۔
ہائی ویز پر ڈکیتی کی وارداتوں کو روکنے کے لیے مؤثر اقدامات کیے جائیں
کچے میں رہنے والے عام شہریوں کی حفاظت کو یقینی بنایا جائے
سی ٹی ڈی کو اسلحہ کی ترسیل روکنے کے لیے ٹاسک دے دیا گیا ہے
ملزمان کے سہولت کاروں کے خلاف سخت کارروائی کی جائے گی

آئی جی سندھ غلام نبی میمن نے ڈاکوؤں کو خبردار کرتے ہوئے کہا کہ وہ ہتھیار ڈال کر قانون کے دائرے میں آجائیں، بصورت دیگر سخت کارروائی کی جائے گی۔

دورے کے اختتام پر ڈی آئی جی سکھر اور ایس ایس پی گھوٹکی نے آئی جی سندھ کو تحائف پیش کیے۔

سکھر، باغی ٹی وی (نامہ نگار) سکھر پولیس نے ایک اور کامیاب کارروائی کرتے ہوئے لاکھوں روپے مالیت کے گمشدہ اور چوری شدہ 50 قیمتی موبائل فونز کو ٹریس کر کے اصل مالکان کے حوالے کر دیے۔

ایس ایس پی سکھر، اظہر خان کے احکامات پر انچارج ڈیجیٹل انویسٹیگیشن سیل سکھر اور سکھر پولیس کے مختلف تھانہ جات نے مختلف اوقات میں چوری اور گمشدہ موبائل فونز کو ٹریس کر کے ان کی برآمدگی کی کارروائیاں کیں۔ ایس ایس پی سکھر نے تمام برآمد موبائل فونز مالکان کے حوالے کردیے اور اس عمل کو سراہا۔

اس موقع پر ایس ایس پی سکھر نے ڈیجیٹل انویسٹیگیشن سیل کی ٹیم کی کاوشوں کو سراہتے ہوئے انہیں تعریفی اسناد اور نقد انعام دینے کی ہدایت کی۔ انہوں نے مزید ہدایت کی کہ چوری اور گمشدہ موبائل فونز کی روزانہ کی بنیاد پر ٹریسنگ کی جائے اور زیادہ سے زیادہ موبائل فونز برآمد کرکے اصل مالکان تک پہنچائے جائیں۔

موبائل فونز کے مالکان نے ان کی قیمتی چیزیں واپس ملنے پر ایس ایس پی سکھر اور ان کی ٹیم کا تہہ دل سے شکریہ ادا کیا اور پولیس کی کامیاب کارروائی پر خوشی کا اظہار کیا۔

میرپور ماتھیلو ،باغی ٹی وی(باغی ٹی وی ،نامہ نگارمشتاق لغاری) گھوٹکی پولیس نے روپوش اور اشتہاری ملزمان کے خلاف کارروائیاں تیز کر دی ہیں۔ ایس ایس پی گھوٹکی ڈاکٹر سمیع اللہ سومرو کی ہدایات پر پولیس نے بڑی کامیابی حاصل کرتے ہوئے خطرناک ملزمان کو گرفتار کر لیا۔

ایس ایچ او تھانہ کچو بنڈی 1 میر حسن بلو نے پولیس ٹیم کے ہمراہ سنیپ چیکنگ کے دوران کارروائی کرتے ہوئے نزد سکندر دم دموں سے مقدمہ نمبر 12/2023 دفعہ 324، 114، 148، 149 ت پ میں روپوش معشوق عرف فقیر محمد ولد صاحب ڈنو طلائی، حاکم علی ولد محمد بخش طلائی اور اللہ ودھایو ولد صوبھو طلائی کو گرفتار کر لیا۔

گرفتار ملزمان کا تعلق گوٹھ دائود طلائی سے ہے اور وہ سنگین جرائم میں ملوث تھے۔ ایس ایس پی گھوٹکی ڈاکٹر سمیع اللہ سومرو نے پولیس ٹیم کی کامیاب کارروائی پر شاباشی کا پیغام دیا۔

میرپور ماتھیلو ،باغی ٹی وی(نامہ نگارمشتاق لغاری) گھوٹکی پولیس نے بروقت کارروائی کرتے ہوئے دو دن قبل اغوا ہونے والے فدا حسین ولد بھادر چاچڑ کو بحفاظت بازیاب کروا لیا۔

ایس ایس پی گھوٹکی ڈاکٹر سمیع اللہ سومرو کی ہدایت پر پولیس نے اہم مقامات پر نگرانی بڑھائی، جس کے نتیجے میں ایس ایچ او آندل سندرانی محمد اسلم چاچڑ کو خفیہ ذرائع سے اطلاع ملی کہ اغوا کار مغوی کو منتقل کرنے والے ہیں۔ پولیس نے فوری کارروائی کرتے ہوئے لڈھڑ بیلو کچے کے علاقے میں چھاپہ مارا، جہاں اغوا کاروں نے گرفتاری کے خوف سے پولیس پر فائرنگ کر دی۔ پولیس نے جوابی فائرنگ کی، جس پر اغوا کار مغوی کو چھوڑ کر فرار ہو گئے۔

پولیس نے مغوی کو بحفاظت بازیاب کروا کر قانونی کارروائی مکمل کرنے کے بعد ورثاء کے حوالے کر دیا۔ بازیاب ہونے والے فدا حسین نے بتایا کہ اسے دو روز قبل قادر پور کے قریب سی پیک روٹ سے اغوا کیا گیا تھا۔

میرپورماتھیلو،باغی ٹی وی(نامہ نگارمشتاق لغاری) رونتی کچے میں پولیس کے کامیاب آپریشن کے ردعمل میں ڈاکوؤں نے بیلو میرپور تھانے کی حدود میں پولیس چیک پوسٹ پر حملہ کر دیا۔ تاہم، مستعد پولیس اہلکاروں نے بہادری سے حملہ ناکام بنا دیا۔

ڈی آئی جی سکھر کیپٹن (ر) فیصل عبداللہ چاچڑ کی ہدایت پر کیے گئے آپریشن میں چار خطرناک ڈاکو زخمی ہوئے، جس کے بعد ڈاکوؤں نے جوابی کارروائی کی۔ پولیس چیک پوسٹ پر تعینات اہلکاروں نے بھرپور مزاحمت کی، جبکہ گشت پر مامور پولیس موبائل کے پہنچنے پر دو طرفہ فائرنگ کا تبادلہ ہوا۔ فائرنگ کے نتیجے میں پولیس موبائل کو گولیاں لگیں، مگر تمام اہلکار محفوظ رہے۔ مزید ڈاکوؤں کے زخمی ہونے کی اطلاعات ہیں، اور اضافی نفری طلب کر لی گئی ہے تاکہ ملزمان کو فرار ہونے کا موقع نہ ملے۔

ڈی آئی جی سکھر نے بہادری سے مقابلہ کرنے والے پولیس جوانوں اور کمانڈوز کی جرات کو سراہتے ہوئے انہیں شاباش دی۔

میرپورماتھیلو،باغی ٹی وی (نامہ نگار مشتاق لغاری)اوباڑو سے کمسن مزدور بچہ اغوا، ڈاکوؤں کا 50 لاکھ تاوان کا مطالبہ

تفصیل کے مطابق اوباڑو امن کا گہوارہ سمجھے جانے والا اوباڑو اب جرائم کی آماجگاہ بن چکا ہے، جہاں روزی کمانے والا بھی محفوظ نہیں۔ گاؤں قالو خان رند کا رہائشی کمسن وسیم عباس رند، جو اپنے گھر کا واحد کفیل تھا، اغوا کاروں کے ہتھے چڑھ گیا۔ اطلاعات کے مطابق ملزمان اسے کشمور کے کچے میں لے گئے اور رہائی کے بدلے 50 لاکھ روپے تاوان طلب کر رہے ہیں۔

عوامی حلقوں نے ایس ایس پی گھوٹکی سمیع اللّٰہ سومرو سے فوری کارروائی کا مطالبہ کیا ہے۔ مقامی شہریوں کا کہنا ہے کہ اگر چند دن میں مغوی کو بازیاب نہ کرایا گیا تو تحصیل اوباڑو کے بچے بھی ایس ایس پی دفتر کے سامنے احتجاج میں شریک ہوں گے۔

میرپور ماتھیلو،باغی ٹی وی (نامہ نگارمشتاق لغاری) پولیس کی کارروائی، چوری شدہ گائے برآمد، مالک کے حوالے

میرپور ماتھیلو پولیس نے چوری شدہ گائے برآمد کر کے اصل مالک کے حوالے کر دی۔ ایس ایس پی گھوٹکی ڈاکٹر سمیع اللہ سومرو کی ہدایت پر ایس ایچ او تھانہ میرپور ماتھیلو عبدالرزاق انصاری اور ان کی ٹیم نے بہترین کارروائی کرتے ہوئے مسروقہ گائے بازیاب کر لی۔

گزشتہ رات نامعلوم چوروں نے کوری کوہ کے علاقے سے سھراب مھر کی ایک بھینس اور ایک گائے چوری کر لی تھی۔ مالک کی جانب سے بروقت اطلاع ملتے ہی میرپور ماتھیلو پولیس متحرک ہوئی اور بھاری نفری کے ساتھ چوروں کا تعاقب شروع کر دیا۔ کارروائی کے دوران پولیس نے تھانہ شہید دین محمد لغاری کی حدود میں کماد کی فصل کے قریب سے چوروں سے ایک گائے بازیاب کر لی۔

ایس ایچ او میرپور ماتھیلو کا کہنا ہے کہ چوری شدہ بھینس کی برآمدگی کے لیے بھی پولیس ٹیم متحرک ہے اور جلد اسے بھی بازیاب کر لیا جائے گا۔ مسروقہ گائے واپس ملنے پر مالک سھراب مھر نے پولیس کی فوری کارروائی کو سراہتے ہوئے شکریہ ادا کیا۔