Category: سکھر

سکھر(باغی ٹی وی ،مشتاق لغاری کی رپورٹ) ڈی آئی جی پولیس کیپٹن (ر) فیصل عبداللہ چاچڑ کا ڈسٹرکٹ بار کا دورہ

ڈپٹی انسپکٹر جنرل پولیس سکھر رینج، کیپٹن (ر) فیصل عبداللہ چاچڑ نے ڈسٹرکٹ بار کا دورہ کیا۔ سابق صدر اور ممبر سندھ بار کونسل ایڈووکیٹ شفقت رحیم، جنرل سیکرٹری سندر خان چاچڑ، اور دیگر عہدیداران نے ان کا پرتپاک استقبال کیا۔

ڈی آئی جی سکھر نے بار کے اراکین سے ملاقات کے دوران متعدد اہم امور پر گفتگو کی۔ انہوں نے ہدایت کی کہ وکلا کی جانب سے درج کی گئی ایف آئی آرز میں ملوث ملزمان کو فوری گرفتار کیا جائے اور تمام متاثرین کی ایف آئی آر بلا تاخیر درج کی جائے۔ انہوں نے تفتیشی عمل کو میرٹ کی بنیاد پر شفاف بنانے اور تھانوں و دفاتر میں وکلا کے ساتھ بہتر رویہ اپنانے کی بھی تاکید کی۔

ڈی آئی جی نے واضح کیا کہ وکلا کے خلاف جھوٹی یا بوگس ایف آئی آر درج کرنے والے افسران کے خلاف سخت کارروائی کی جائے گی۔

انہوں نے سکھر رینج میں امن و امان کی بہتر ہوتی صورتحال پر اطمینان کا اظہار کیا اور کہا کہ ڈاکوؤں کے خلاف جاری آپریشن میں تیزی سے کامیابیاں حاصل ہو رہی ہیں۔

کیپٹن (ر) فیصل عبداللہ چاچڑ نے ایڈووکیٹ شفقت رحیم، ایڈووکیٹ سندر خان چاچڑ، ایڈووکیٹ مختیار کٹپر، ایڈووکیٹ لالا آصف ذیشان، اور دیگر وکلا کا شکریہ ادا کیا جنہوں نے ان کے استقبال کے ساتھ بہترین ماحول میں وکلا کے مسائل سننے اور بار کی جدید لائبریری کا دورہ کرنے کا موقع فراہم کیا۔

انہوں نے اُمید ظاہر کی کہ ڈسٹرکٹ بار اور پولیس مل کر مظلوم عوام کو انصاف فراہم کرنے میں اپنا کردار ادا کریں گے۔

میرپور ماتھیلو (نامہ نگار) باغی ٹی وی کی 13ویں سالگرہ کے موقع پر میرپور ماتھیلو میں ایک شاندار کیک کٹنگ تقریب کا انعقاد کیا گیا۔ اس موقع پر باغی ٹی وی کے نامہ نگار مشتاق علی لغاری، سید رحم شاہ، سید مظہر شاہ، حاجی شہزادو خان ،محمد لغاری، مہربان لغاری اور جبار لغاری نے شرکت کی اور سالگرہ کا کیک کاٹا۔

تقریب کے شرکاء نے باغی ٹی وی کے سی ای او اور مشہور اینکر مبشر لقمان، ایڈیٹر ممتاز حیدر اعوان، انچارج نمائندگان ڈاکٹر غلام مصطفیٰ بڈانی اور ہیڈ آفس کی پوری ٹیم کی صحافتی خدمات کو سراہا۔ مقررین نے کہا کہ باغی ٹی وی نے ہمیشہ کٹھن حالات میں عوامی مسائل کو اجاگر کرنے میں اہم کردار ادا کیا اور اپنی صحافتی ذمہ داریوں کو احسن طریقے سے نبھایا ہے۔

تقریب کے اختتام پر باغی ٹی وی کی جانب سے تحصیل رپورٹر مشتاق علی لغاری کو بہترین کارکردگی پر سرٹیفکیٹ دیا گیا جو مہربان لغاری کے ہاتھوں وصول کیا گیا۔ شرکاء نے باغی ٹی وی کی کامیابیوں پر خوشی کا اظہار کیا اور مزید ترقی کی دعا کی۔

میرپور ماتھیلو ،باغی ٹی وی( نامہ نگار مشتاق علی لغاری)گھوٹکی،اسٹیشن روڈ اور مہر بازار میں ٹریفک مسائل، حل کے لیے تجاویز پیش

تفصیل کے مطابق گھوٹکی کے اسٹیشن روڈ اور مہر بازار میں ٹریفک کے بڑھتے مسائل کے حل کے لیے شہریوں اور دکانداروں کی جانب سے قابل عمل تجاویز پیش کی گئی ہیں۔

ون وے روڈ کے نفاذ کے ذریعے ٹریفک کے بہتر بہاؤ کے لیے اسٹیشن روڈ اور مہر بازار کو ون وے روڈ میں تبدیل کرنے کی تجویز دی گئی ہے۔ واضح نشانات اور ہدایات فراہم کرنے کی ضرورت ہے تاکہ عوام آسانی سے اس نظام کی پابندی کر سکیں۔

رکشہ، کار، یا موٹر سائیکل چلانے والے جو ٹریفک قوانین کی خلاف ورزی کریں، ان پر بھاری جرمانے عائد کرنے کی سفارش کی گئی ہے۔ جرمانے سے حاصل ہونے والی رقم کو عوامی آگاہی مہمات پر خرچ کرنے کی تجویز دی گئی ہے۔

دکانداروں کو اپنی دکانوں کے سامنے پارکنگ یا غیر قانونی قبضے سے باز رکھنے کے لیے اقدامات کرنے کی ضرورت ہے۔ فٹ پاتھ کو عوام کے لیے خالی رکھنے کی تجویز دی گئی ہے تاکہ راہگیروں کو سہولت فراہم کی جا سکے۔

اہم چوراہوں اور بازاروں میں ٹریفک اہلکاروں کی تعیناتی کی سفارش کی گئی ہے تاکہ قوانین پر عملدرآمد یقینی بنایا جا سکے۔

شہریوں کو ون وے نظام اور دیگر ٹریفک قوانین کی اہمیت سے آگاہ کرنے کے لیے مہمات چلانے کی ضرورت ہے، تاکہ عوامی تعاون سے ٹریفک کے مسائل کو کم کیا جا سکے۔

شہریوں نے متعلقہ حکام سے مطالبہ کیا ہے کہ ان تجاویز کو عملی جامہ پہنایا جائے تاکہ گھوٹکی میں ٹریفک مسائل کا خاتمہ ممکن ہو سکے اور شہریوں کو ایک محفوظ اور آرام دہ سفر فراہم کیا جا سکے۔

گھوٹکی(باغی ٹی وی) بازار سکڑ گئے، ٹریفک پولیس غائب، شہری مشکلات کا شکار

میرپورماتھیلو سے باغی ٹی وی کے نامہ نگار مشتاق علی لغاری کی رپورٹ کے مطابق گھوٹکی کے بازار اور شاہراہیں بڑھتے ہوئے ٹریفک مسائل کے باعث شدید دباؤ کا شکار ہیں۔ ٹریفک پولیس کی غیر موجودگی اور ناقص انتظامات کی وجہ سے بازاروں میں خریداری اور گزرنا مشکل ہو گیا ہے۔

چوراہے اور اہم راستے گھنٹوں جام رہتے ہیں، جس سے پیدل چلنے والے، ایمرجنسی مریض، اور ملازمت پیشہ افراد شدید متاثر ہو رہے ہیں۔ شہریوں کا کہنا ہے کہ ٹریفک کے بہاؤ کو بہتر بنانے کے لیے فوری اقدامات کی ضرورت ہے، ورنہ صورتحال مزید بگڑ سکتی ہے۔

عوام نے مطالبہ کیا ہے کہ چوراہوں پر ٹریفک اہلکار تعینات کیے جائیں اور قوانین پر سختی سے عمل درآمد کرایا جائے تاکہ معمولات زندگی بحال ہو سکیں۔

میرپورماتھیلو،باغی ٹی وی (نامہ نگارمشتاق لغاری): مرتضیٰ کھوسو اغوا، بہمانہ تشدد، زندگی اور موت کی کشمکش میں مبتلا،مقدمہ درج نہ ہوسکا

تفصیل کے مطابق میرپورماتھیلوکی گل کالونی کے رہائشی مرتضی کہوسہ، جو بینک میں کام کرتے تھے، چند دن قبل ایک بااثر شخص کے ہاتھوں اغوا ہو گئے۔ اغوا کے بعد انہیں بے رحمی سے تشدد کا نشانہ بنایا گیا جس کے نتیجے میں ان کی ایک آنکھ ضائع ہوگئی اور آدھی زبان بھی کاٹ دی گئی۔

مرتضی کھوسو کو اغوا کے بعد شدید زخمی حالت میں کراچی کے آغا خان ہسپتال منتقل کیا گیا، جہاں وہ زندگی اور موت کی کشمکش میں مبتلا ہیں۔ ان کے علاج کے لئے میڈیکل لیٹر بھی فراہم کیا گیا ہے، لیکن گھوٹکی پولیس نے تاحال ان کے اغوا اور تشدد کے واقعے پر مقدمہ درج نہیں کیا۔

مقامی ذرائع کے مطابق مرتضی کھوسوپر ہونے والا یہ ظلم کسی ذاتی تنازعے یا کاروباری مخالفت کا نتیجہ ہو سکتا ہے، تاہم پولیس کی جانب سے مقدمہ درج نہ کرنا سوالات اٹھا رہا ہے۔

مرتضی کے اہل خانہ اور مقامی افراد نےاحتجاج کرتے ہوئے پولیس سے مطالبہ کیا ہے کہ فوری طور پر مقدمہ درج کیا جائے اور ملزمان کے خلاف سخت کارروائی کی جائے۔ اس واقعے نے علاقے میں خوف و ہراس پھیلا دیا ہے اور شہریوں کا کہنا ہے کہ ایسے واقعات میں انصاف کا حصول مشکل بن رہا ہے، خاص طور پر جب بااثر افراد اس طرح کے جرائم میں ملوث ہوں۔

مرتضی کھوسو کےلواحقین نے وزیراعلیٰ سندھ مراد علی شاہاور دیگر اعلیٰ حکام سے مطالبہ کیا ہے کہ اس سنگین واقعے کا فوری نوٹس لیا جائے اور متاثرہ شخص کو انصاف دلایا جائے۔