Category: سکھر

میرپور ماتھیلو (باغی ٹی وی، نامہ نگار: مشتاق علی لغاری) میرپور ماتھیلو میں ابرار کولاچی کے قتل کے خلاف لواحقین اور قریبی رشتہ داروں نے ایس ایس پی آفس کے سامنے احتجاجی مظاہرہ کیا اور شفاف و منصفانہ انکوائری کا مطالبہ کیا۔

مظاہرے کے دوران ابرار کولاچی کے ایک قریبی رشتہ دار نے میڈیا سے گفتگو کرتے ہوئے کہا کہ وہ اصل قاتل بھاءُ کوڑا کولاچی کو بے نقاب کرنا چاہتے ہیں اور پولیس کی جانب سے بے گناہ افراد کو غلط طور پر ملوث کرنے کی کسی بھی کوشش کو قبول نہیں کیا جائے گا۔

مظاہرین نے قرآنِ پاک ہاتھ میں اٹھا کر نعرے بازی کی اور مطالبہ کیا کہ پولیس اور عدالتی ادارے غیرجانبدار تحقیقات کو یقینی بنائیں۔ ان کا کہنا تھا کہ اگر حقائق سامنے نہ لائے گئے تو احتجاج کا دائرہ مزید وسیع کیا جائے گا اور تمام قانونی راستے اختیار کیے جائیں گے۔

احتجاج میں خواتین بھی شریک تھیں، جنہوں نے جذباتی انداز میں انصاف کی اپیل کی اور کیس میں جانبداری ختم کرنے کا مطالبہ کیا۔ مقامی شہریوں نے بھی زور دیا کہ اصل ملزم کو قانون کے مطابق سزا دی جائے اور بے گناہوں کی گرفتاری کا عمل فوری طور پر روکا جائے۔

میرپورماتھیلو (باغی ٹی وی، نامہ نگار مشتاق علی لغاری)ضلع گھوٹکی کے کچہ ایریا میں امن و امان کی بحالی کے لیے جاری بڑے اور فیصلہ کن ٹارگیٹڈ آپریشن کے دوران سکھر رینج پولیس، وفاقی سول انٹیلیجنس ایجنسی اور سندھ رینجرز نے مشترکہ کارروائی کرتے ہوئے کوش گینگ کے دو انتہائی خطرناک اور بدنام زمانہ ڈاکوؤں کو ہلاک کر دیا، جبکہ 12 سے زائد جرائم پیشہ عناصر کو گرفتار کر لیا گیا۔ آپریشن کے دوران 8 سے 10 ڈاکوؤں کے زخمی ہونے کی بھی اطلاعات موصول ہوئی ہیں۔

یہ آپریشن ڈی آئی جی لاڑکانہ/سکھر ناصر آفتاب، ایس ایس پی گھوٹکی محمد انور کھیتران، ایس ایس پی خیرپور ڈاکٹر سمیع اللہ سومرو اور ایس ایس پی سکھر اظہر مغل کی براہِ راست قیادت میں کیا گیا، جس میں سکھر رینج پولیس اور سندھ رینجرز نے پیشہ ورانہ مہارت اور مؤثر حکمتِ عملی کے تحت اہم کامیابی حاصل کی۔

پولیس کے مطابق ہلاک ہونے والے ڈاکوؤں کی شناخت ملاؤ ولد جوت علی کوش اور محمد مراد عرف ڈاڈو ولد جوت علی کوش کے طور پر ہوئی ہے۔ دونوں ڈاکو کچہ ایریا میں طویل عرصے سے سرگرم اور قانون نافذ کرنے والے اداروں کو مطلوب تھے۔ ہلاک ڈاکو ملاؤ کوش کے خلاف سندھ اور پنجاب کے مختلف اضلاع میں 40 سے زائد جبکہ محمد مراد عرف ڈاڈو کوش کے خلاف 16 سے زائد سنگین مقدمات درج تھے، جن میں اغوا برائے تاوان، قتل، ڈکیتی، اقدامِ قتل، بھتہ خوری اور سہولت کاری جیسے سنگین جرائم شامل ہیں۔

پولیس حکام کے مطابق دونوں ڈاکو موٹر وے پر حملوں، اغوا کی وارداتوں اور پولیس افسران کو براہِ راست دھمکیاں دینے میں بھی ملوث رہے، جس کے باعث کچہ ایریا اور ملحقہ علاقوں میں خوف و ہراس کی فضا قائم تھی۔

آپریشن کے دوران مشترکہ فورسز نے کوش گینگ کے متعدد ٹھکانوں تک رسائی حاصل کی، جہاں سے اسلحہ، سہولت کاری کے شواہد اور دیگر مشتبہ مواد برآمد کیا گیا۔ بعد ازاں جرائم پیشہ عناصر کے زیرِ استعمال ٹھکانوں کو نذرِ آتش کر کے مسمار کر دیا گیا تاکہ مستقبل میں انہیں دوبارہ جرائم کے لیے استعمال نہ کیا جا سکے۔

ترجمان گھوٹکی پولیس کے مطابق کچہ ایریا میں ٹارگیٹڈ آپریشن پوری شدت کے ساتھ جاری ہے اور یہ کارروائیاں اس وقت تک جاری رہیں گی جب تک ڈاکوؤں کا مکمل خاتمہ یا ان کا غیر مشروط سرنڈر ممکن نہیں ہو جاتا۔ پولیس اور رینجرز نے واضح کیا ہے کہ ریاستی رٹ پر کوئی سمجھوتہ نہیں کیا جائے گا اور شہریوں کے جان و مال کا تحفظ ہر صورت یقینی بنایا جائے گا۔

علاقہ مکینوں اور سول سوسائٹی حلقوں نے سکیورٹی فورسز کی اس کامیاب کارروائی کو خوش آئند قرار دیتے ہوئے امید ظاہر کی ہے کہ ان مسلسل آپریشنز کے نتیجے میں کچہ ایریا ایک بار پھر امن کا گہوارہ بن سکے گا۔

گہوٹکی (باغی ٹی وی نامہ نگار مشتاق علی لغاری) اوباڑو کے مرید شاخ میں گنے سے بھری ایک ٹرالی الٹنے کے باعث مرکزی سڑک مکمل طور پر بند ہو گئی، جس سے شہر بھر میں آمد و رفت متاثر ہو گئی ہے۔کئی گھنٹے گزرنے کے باوجود ٹرالی کو سڑک سے نہیں ہٹایا جا سکا، جس کے باعث کاروباری مراکز بند، مزدور بے روزگار اور مریض، خواتین، بزرگ اور سکول جانے والے بچے سڑکوں پر پھنس گئے ہیں۔

علاقہ مکینوں کا کہنا ہے کہ تعلقہ اوباڑو میں چار شوگر ملیں موجود ہونے کے باوجود گنے کی بھاری ٹرالیاں متبادل راستے استعمال نہیں کر رہیں، جس سے شہری شدید مشکلات کا سامنا کر رہے ہیں۔

شہریوں نے الزام لگایا کہ شہر لاوارث بن چکا ہے، نہ ٹریفک پولیس موقع پر موجود ہے اور نہ انتظامیہ کی کوئی کارروائی نظر آ رہی ہے۔ انہوں نے اعلیٰ حکام، ضلعی انتظامیہ اور شوگر مل مالکان سے فوری طور پر ٹرالی ہٹا کر ٹریفک بحال کرنے اور آئندہ ایسے واقعات کی روک تھام کے لیے علیحدہ راستوں کا بندوبست کرنے کا مطالبہ کیا ہے۔

میرپورماتھیلو(باغی ٹی وی،نامہ نگارمشتاق لغاری)ضلع گھوٹکی میں جرائم پیشہ عناصر کے خلاف پولیس نے مؤثر کارروائیاں کرتے ہوئے تین مختلف مقامات پر الگ الگ مقابلوں کے دوران تین ملزمان کو زخمی حالت میں گرفتار کر لیا، جبکہ ان کے متعدد ساتھی فرار ہونے میں کامیاب ہو گئے۔

پہلا مقابلہ تھانہ اوباوڑو کی حدود میں پیش آیا، جہاں پولیس کو اطلاع ملی کہ چار نامعلوم مسلح ملزمان لنک روڈ راجنپور پر واردات کے ارادے سے موجود ہیں۔ پولیس پارٹی موقع پر پہنچی تو مسلح ملزمان نے فائرنگ شروع کر دی، جس کے نتیجے میں پولیس اور ملزمان کے درمیان مقابلہ ہوا۔ دورانِ مقابلہ ایک ملزم زخمی حالت میں گرفتار کر لیا گیا، جس کی شناخت بخت علی ولد مومن شر سکنہ دیہہ دب، تعلقہ اوباوڑو کے نام سے ہوئی۔ گرفتار ملزم کے قبضے سے پسٹل برآمد کیا گیا، جبکہ اس کے تین ساتھی فرار ہو گئے۔ ابتدائی تفتیش کے مطابق گرفتار ملزم قتل، چوری، رہزنی، پولیس مقابلہ اور دیگر سنگین جرائم میں ملوث رہا ہے۔ ملزم کے خلاف پہلے سے کرائم نمبر 50/2025 دفعہ 302 اور کرائم نمبر 55/2025 دفعہ 379، 435، 427 تعزیراتِ پاکستان تھانہ ماچھکہ میں درج ہیں۔

دوسرا مقابلہ تھانہ اے سیکشن میرپورماتھیلو کی حدود میں حسین بیلی لنک روڈ پر پیش آیا، جہاں پولیس کو چھ نامعلوم مسلح ملزمان کی موجودگی کی اطلاع ملی۔ پولیس کے پہنچنے پر فائرنگ کا تبادلہ ہوا، جس کے دوران ایک ملزم زخمی حالت میں گرفتار کر لیا گیا۔ گرفتار ملزم کی شناخت گلاب ولد جنگو پتافی سکنہ سومر موری تعلقہ میرپورماتھیلو کے نام سے ہوئی، جبکہ اس کے پانچ ساتھی فرار ہو گئے۔ گرفتار ملزم کے قبضے سے بھی پسٹل برآمد ہوا۔ ابتدائی معلومات کے مطابق ملزم چوری، رہزنی اور دیگر سنگین جرائم میں ملوث تھا۔ اس حوالے سے کرائم نمبر 12/2026 دفعہ 324، 353، 399، 402 تعزیراتِ پاکستان اور کرائم نمبر 13/2026 دفعہ 25 سندھ آرمز ایکٹ کے تحت مقدمات درج کیے گئے۔

تیسرا مقابلہ تھانہ بی سیکشن میرپورماتھیلو کی حدود میں کندھ کوٹ کشمور روڈ پر ہوا، جہاں چار نامعلوم مسلح ملزمان واردات کے ارادے سے موجود تھے۔ پولیس کے پہنچنے پر فائرنگ کے تبادلے کے دوران ایک ملزم اپنے ہی ساتھی کی گولی لگنے سے زخمی ہو گیا، جسے پولیس نے حکمتِ عملی کے تحت گرفتار کر لیا۔ زخمی ملزم کی شناخت شاہ بخش ولد لیاقت علی پتافی سکنہ سومر موری تعلقہ میرپورماتھیلو کے نام سے ہوئی، جبکہ اس کے تین ساتھی فرار ہو گئے۔ گرفتار ملزم کے قبضے سے پسٹل برآمد کیا گیا۔ مقدمہ کرائم نمبر 05/2026 دفعہ 324، 353، 398، 401 تعزیراتِ پاکستان اور کرائم نمبر 06/2026 دفعہ 25 سندھ آرمز ایکٹ کے تحت درج کیا گیا۔

تمام زخمی ملزمان کو طبی امداد کے لیے مقامی ہسپتال منتقل کر دیا گیا ہے، جبکہ فرار ملزمان کی گرفتاری کے لیے چھاپے مارے جا رہے ہیں۔ ایس ایس پی گھوٹکی محمد انور کھیتران نے کامیاب کارروائیوں پر پولیس ٹیموں کو شاباش دیتے ہوئے جرائم کے خلاف سخت کارروائی جاری رکھنے کے عزم کا اظہار کیا۔

میرپورماتھیلو(باغی ٹی وی ،نامہ نگار مشتاق علی لغاری)میرپور ماتھیلو کے قریب یارو لنڈ کے گاؤں واحد بخش لنڈ کے مکینوں نے 14 سالہ معصوم جنید احمد لنڈ کے قاتلوں کی عدم گرفتاری پر جروار تھانے کے خلاف شدید احتجاج کیا۔ مظاہرین نے پولیس کی مبینہ غفلت اور ملزمان کو تحفظ دینے کے خلاف نعرے بازی کی۔

تفصیلات کے مطابق ایک ماہ قبل جروار تھانے کی حدود میں واقع گاجی مائنر کے قریب معصوم جنید احمد لنڈ کو اس کے والد کے سامنے بے رحمی سے فائرنگ کر کے قتل کر دیا گیا تھا، تاہم ایک ماہ گزرنے کے باوجود پولیس قاتلوں کو گرفتار کرنے میں ناکام رہی ہے۔

احتجاج کے دوران مقتول کے والد طالب حسین لنڈ نے میڈیا سے گفتگو کرتے ہوئے بتایا کہ نامزد ملزمان اختر لنڈ اور دیگر افراد بااثر ہونے کے باعث یارو لنڈ شہر میں کھلے عام گھوم رہے ہیں، جبکہ گھوٹکی پولیس خاموش تماشائی بنی ہوئی ہے اور گرفتاری سے گریز کر رہی ہے۔

اس موقع پر جمعیت علمائے اسلام (جے یو آئی) کے رہنما خیر محمد لنڈ، جو خیرپور میرس سے تعلق رکھتے ہیں، نے مظاہرین کے ہمراہ میڈیا سے بات کرتے ہوئے کہا کہ ایک معصوم بچے کا قتل گھوٹکی کے سرداروں اور ایس ایس پی گھوٹکی کے منہ پر طمانچہ ہے۔ انہوں نے واضح کیا کہ معصوم جنید کا خون ہرگز رائیگاں نہیں جانے دیا جائے گا۔

خیر محمد لنڈ نے خالد خان لنڈ، ایس ایس پی گھوٹکی اور دیگر بااثر افراد کو سات دن کا الٹی میٹم دیتے ہوئے مطالبہ کیا کہ قاتلوں کو فوری طور پر گرفتار کیا جائے۔ انہوں نے خبردار کیا کہ اگر مقررہ مدت میں انصاف فراہم نہ کیا گیا تو مولانا راشد محمود سومرو کی قیادت میں ایس ایس پی گھوٹکی کے دفتر کے سامنے بڑا دھرنا دیا جائے گا اور نیشنل ہائی وے کو مکمل طور پر بند کر دیا جائے گا، جس کی تمام تر ذمہ داری انتظامیہ پر عائد ہو گی۔

میرپورماتھیلو (باغی ٹی وی، نامہ نگار مشتاق علی لغاری) اوباڑو سندھ بینک کے آپریشن منیجر اصغر ڈھر کے خلاف کرپشن، رشوت خوری اور تشدد کے سنگین الزامات سامنے آئے ہیں۔ متاثرہ ہاری خان محمد لاڑک نے احتجاج کرتے ہوئے میڈیا کو بتایا کہ سندھ حکومت کی جانب سے ہاری کارڈ کے اجرا کا پیغام موصول ہونے کے بعد انہوں نے اوباڑو سندھ بینک سے رجوع کیا۔

خان محمد لاڑک کے مطابق بینک کے آپریشن منیجر اصغر ڈھر نے ہاری کارڈ کی رقم دلوانے کے عوض 15 ہزار روپے رشوت طلب کی۔ متاثرہ ہاری نے غربت اور مجبوری کا واسطہ دیا، تاہم منیجر نے واضح الفاظ میں کہا کہ رشوت دیے بغیر رقم نہیں ملے گی۔

انہوں نے بتایا کہ مجبوری کے تحت ادھار لے کر پہلے 10 ہزار روپے ادا کیے، مگر منیجر مطمئن نہ ہوا اور مزید رقم کا مطالبہ کیا۔ بعد ازاں مزید 4 ہزار روپے دینے پر کام ہونے کی یقین دہانی کرائی گئی، لیکن رشوت لینے کے باوجود ایک ماہ تک بینک کے چکر لگوائے گئے۔

متاثرہ ہاری کا کہنا ہے کہ جب تاخیر کی وجہ پوچھی گئی تو اصغر ڈھر نے سیکیورٹی گارڈ کو بلا کر انہیں دھکے دے کر بینک سے باہر نکلوا دیا، جس سے وہ زخمی بھی ہوئے۔

خان محمد لاڑک نے سندھ حکومت، اعلیٰ حکام، بینک انتظامیہ، نیب اور اینٹی کرپشن اداروں سے مطالبہ کیا ہے کہ اوباڑو سندھ بینک میں جاری مبینہ کرپشن کا فوری نوٹس لیا جائے، آپریشن منیجر کے خلاف سخت قانونی کارروائی کی جائے اور اسے فوری طور پر برطرف کیا جائے، بصورت دیگر احتجاج کا دائرہ مزید وسیع کیا جائے گا۔