Category: سکھر

میرپور ماتھیلو(باغی ٹی وی ،نامہ نگارمشتاق علی لغاری( ایس ڈی او کی غفلت سے جروار اور مضافات 8 روز سے اندھیرے میں ڈوب گئے

تفصیلات کے مطابق ضلع گھوٹکی کی تحصیل میرپور ماتھیلو میں محکمہ بجلی کے افسران کی مبینہ غفلت اور نااہلی کے باعث شہر جروار اور اس کے گرد و نواح کے درجنوں دیہات گزشتہ ایک ہفتے سے زائد عرصے سے بجلی سے محروم ہیں، جس نے عوامی زندگی کو مفلوج کر کے رکھ دیا ہے۔ آٹھ روز گزرنے کے باوجود بجلی کی بحالی کے لیے کوئی ٹھوس اقدامات نہ کیے جانے پر شہریوں اور دیہاتیوں کا پیمانہ صبر لبریز ہو چکا ہے اور علاقے میں شدید اضطراب کی لہر دوڑ گئی ہے۔ بجلی کی طویل بندش کے باعث جروار شہر کی مارکیٹیں ویران اور کاروباری مراکز بند ہو چکے ہیں، جبکہ دیہاتوں میں پانی کی شدید قلت اور زرعی سرگرمیاں معطل ہونے سے کسانوں کو بھاری مالی نقصان کا سامنا ہے۔ رات کے وقت مکمل اندھیرے کے باعث عوام میں عدم تحفظ کا احساس بڑھ رہا ہے، مگر ایس ڈی او میرپور ماتھیلو اور دیگر متعلقہ حکام نے اس سنگین صورتحال پر مجرمانہ خاموشی اختیار کر رکھی ہے۔

علاقہ مکینوں اور تاجر برادری نے ضلعی انتظامیہ گھوٹکی اور بجلی حکام کے خلاف سخت احتجاج کا انتباہ دیتے ہوئے کہا ہے کہ افسران کی ناکامی کی سزا عوام کو دی جا رہی ہے۔ مظاہرین کا مطالبہ ہے کہ تحصیل میرپور ماتھیلو سے جروار کو آنے والی بجلی کی فراہمی فوری بحال کی جائے اور آٹھ روز تک عوام کو اذیت میں رکھنے والے ذمہ دار افسران کے خلاف سخت تادیبی کارروائی عمل میں لائی جائے۔ شہریوں نے خبردار کیا ہے کہ اگر چوبیس گھنٹوں کے اندر بجلی بحال نہ ہوئی تو وہ ضلعی ہیڈکوارٹر گھوٹکی میں مرکزی شاہراہوں پر دھرنا دیں گے اور احتجاج کا دائرہ کار وسیع کر دیا جائے گا۔ عوامی حلقوں نے حکومتِ سندھ، چیف سیکریٹری اور صوبائی وزیر توانائی سے اپیل کی ہے کہ وہ اس سنگین بحران کا فوری نوٹس لیں اور میرپور ماتھیلو کے بجلی افسران کو عوام کی جان بوجھ کر تذلیل کرنے پر جوابدہ ٹھہرائیں۔

میرپور ماتھیلو (باغی ٹی وی، نامہ نگار: مشتاق علی لغاری):جروار تھانے پر بالادستی کے دعوؤں نے علاقے کی صورتحال کو تشویشناک حد تک کشیدہ بنا دیا ہے، جہاں بوزدار اور گبول برادری آمنے سامنے آ گئی ہیں اور دونوں جانب سے تھانے پر اپنی اپنی “حکومت” قائم ہونے کے دعوے سامنے آ رہے ہیں۔ اس غیر معمولی صورتحال نے نہ صرف پولیس کی غیر جانبداری بلکہ ریاستی رٹ پر بھی سنگین سوالات کھڑے کر دیے ہیں۔

علاقائی ذرائع کے مطابق، بوزدار برادری کا مؤقف ہے کہ جروار تھانے پر ان کا اثر و رسوخ تسلیم کیا جائے، جبکہ گبول برادری بھی یہی دعویٰ کر رہی ہے کہ تھانے کا کنٹرول ان کے پاس ہونا چاہیے۔ اس کشمکش نے علاقے میں بے چینی کو جنم دے دیا ہے اور عوام میں شدید اضطراب پایا جا رہا ہے۔

شہریوں کا کہنا ہے کہ یہ صورتحال اس امر کی عکاس ہے کہ آیا تھانے قانون کے ماتحت ہیں یا قبائلی جاگیروں میں تبدیل ہو چکے ہیں؟ اگر ہر برادری اپنی مرضی کا نظام نافذ کرے گی تو قانون کی حکمرانی کہاں باقی رہے گی؟

دوسری جانب، گاؤں میر خان گبول کے رہائشیوں، سیاسی و سماجی کارکنوں نے جروار کے مین چوک پر کئی گھنٹوں سے دھرنا دے رکھا ہے۔ مظاہرین کا واضح اور دوٹوک مؤقف ہے کہ جب تک متعلقہ پولیس اہلکار دھرنے کی جگہ پر آ کر عوام سے معافی نہیں مانگتے، اس وقت تک احتجاج ختم نہیں کیا جائے گا۔

دھرنے کے باعث جروار مین چوک پر ٹریفک مکمل طور پر جام ہو چکی ہے، جبکہ کاروباری سرگرمیاں معطل اور روزمرہ زندگی شدید متاثر ہو رہی ہے۔ حالات میں مسلسل کشیدگی بڑھ رہی ہے، جس کے باعث کسی بھی وقت ناخوشگوار واقعے کا خدشہ ظاہر کیا جا رہا ہے۔

علاقے کے باشعور شہریوں، وکلا اور سماجی حلقوں نے آئی جی سندھ، ڈی آئی جی، ایس ایس پی گھوٹکی اور ضلعی انتظامیہ سے فوری اور سخت نوٹس لینے کا مطالبہ کیا ہے۔ شہریوں کا کہنا ہے کہ اگر بروقت مداخلت نہ کی گئی تو صورتحال قابو سے باہر ہو سکتی ہے۔

عوامی حلقوں نے زور دیا ہے کہ تھانے کو ہر قسم کے قبائلی اور سیاسی اثر و رسوخ سے آزاد کر کے قانون کی بالادستی قائم کی جائے، تاکہ عوام کا اعتماد بحال ہو اور ریاستی رٹ پر اٹھنے والے سوالات کا عملی جواب دیا جا سکے۔

میرپور ماتھیلو (باغی ٹی وی ،نامہ نگار مشتاق علی لغاری)خانپور مہر کے قریب لِنڈی ٹوڑی کے علاقے میں پرانے خاندانی (سگاوَتی/خونی رشتہ داری) اور زمینی تنازع کے باعث مسلح افراد نے فائرنگ کر کے پتافی برادری کے تین افراد کو قتل اور تین کو شدید زخمی کر دیا۔

رپورٹس کے مطابق واقعہ گزشتہ رات دیر گئے پیش آیا، جس میں دودو پتافی، حضور بخش پتافی اور اصغر پتافی موقع پر ہی جاں بحق ہو گئے، جبکہ زبیر پتافی، حبیب اللہ پتافی اور علی نواز پتافی فائرنگ سے زخمی ہوئے۔

اطلاع ملتے ہی خانپور مہر پولیس جائے وقوعہ پر پہنچی اور جاں بحق افراد کی لاشوں اور زخمیوں کو تحصیل اسپتال شیخ حمدان بن محمد، خانپور مہر منتقل کیا۔ بعد ازاں زخمیوں کی حالت تشویشناک ہونے پر انہیں سکھر اسپتال ریفر کر دیا گیا۔

پولیس ذرائع کے مطابق مقتولین اور زخمیوں کا تعلق پنجاب کے مختلف علاقوں لاہور، رحیم یار خان اور صادق آباد سے بتایا جا رہا ہے۔ لاشوں کا پوسٹ مارٹم مکمل ہونے کے بعد انہیں ورثاء کے حوالے کر دیا گیا، جنہوں نے ایمبولینسوں کے ذریعے لاشیں اپنے آبائی علاقوں کو منتقل کر دیا۔

آخری اطلاعات تک واقعے کا مقدمہ درج نہیں ہو سکا تھا، تاہم پولیس کا کہنا ہے کہ واقعے کی تحقیقات جاری ہیں اور ملزمان کی گرفتاری کے لیے چھاپے مارے جا رہے ہیں۔

میرپور ماتھیلو(باغی ٹی وی ،نامہ نگارمشتاق علی لغاری)ڈی آئی جی سکھر رینج کی جانب سے سیاہ کاری کے نام پر منعقدہ غیر قانونی جرگے کا نوٹس لیے جانے کے بعد ایس ایس پی گھوٹکی محمد انور کھیتران کی ہدایت پر پولیس نے فوری کارروائی کرتے ہوئے ایک ملزم کو گرفتار کر کے مقدمہ درج کر لیا ہے۔ تفصیلات کے مطابق تھانہ میرپور ماتھیلو کی حدود میں واقع گاؤں سمندر بھیو میں وڈیرے شاہنواز بھیو، جانب بھیو، معشوق بھیو، احمد بھیو، محمد علی بھیو اور غلام حسین بھیو کی جانب سے ایک غیر قانونی جرگہ منعقد کیا گیا تھا، جس کا مقصد مبینہ طور پر سیاہ کاری کے معاملے کا فیصلہ کرنا تھا۔ اس سنگین صورتحال کا علم ہوتے ہی ایس ایس پی گھوٹکی نے ایس ایچ او میرپور ماتھیلو کو سخت احکامات جاری کیے کہ اس غیر قانونی عمل میں ملوث تمام افراد کو فوری طور پر گرفتار کر کے قانون کے کٹہرے میں لایا جائے۔

جرگے کے حوالے سے موصول ہونے والی تفصیلات کے مطابق نامزد ملزمان نے وسیم بھیو نامی نوجوان پر ثانیہ بھیو نامی لڑکی کے ساتھ سیاہ کاری کا جھوٹا الزام عائد کیا تھا اور اس کے بدلے میں دو لڑکیوں، شمیلا اور انیسہ بھیو کو بطور ‘عیوضہ’ دینے سمیت 10 لاکھ روپے جرمانہ ادا کرنے کا غیر انسانی فیصلہ سنایا تھا۔ ایس ایس پی گھوٹکی محمد انور کھیتران نے اس معاملے پر سخت برہمی کا اظہار کرتے ہوئے واضح کیا کہ ضلع میں کسی کو بھی متوازی عدالتی نظام چلانے یا انسانی حقوق کی پامالی کرنے کی ہرگز اجازت نہیں دی جائے گی اور جرگہ کرنے والے افراد کے خلاف سخت ترین قانونی کارروائی عمل میں لائی جائے گی۔

پولیس حکام کے مطابق ایس ایس پی کے احکامات پر عملدرآمد کرتے ہوئے ایس ایچ او تھانہ میرپور ماتھیلو بدر دین برڑو نے پولیس نفری کے ہمراہ فوری کارروائی کی اور جرگے کے مرکزی ملزم شاہنواز ولد غلام محمد بھیو کو گرفتار کر لیا۔ پولیس نے جرگے میں ملوث 6 نامزد ملزمان کے خلاف کرائم نمبر 268/2025 کے تحت دفعہ 310A، 120B، 506/2 اور دیگر سنگین دفعات کے تحت مقدمہ درج کر لیا ہے۔ پولیس کا کہنا ہے کہ گرفتار ملزم سے تفتیش جاری ہے جبکہ جرگے میں ملوث دیگر مفرور ملزمان کی گرفتاری کے لیے مختلف مقامات پر چھاپے مارے جا رہے ہیں تاکہ انہیں جلد از جلد گرفتار کر کے عبرت کا نشان بنایا جا سکے۔