Category: سکھر

میرپور ماتھیلو (باغی ٹی وی ،نامہ نگار مشتاق علی لغاری)خانپور مہر کے قریب لِنڈی ٹوڑی کے علاقے میں پرانے خاندانی (سگاوَتی/خونی رشتہ داری) اور زمینی تنازع کے باعث مسلح افراد نے فائرنگ کر کے پتافی برادری کے تین افراد کو قتل اور تین کو شدید زخمی کر دیا۔

رپورٹس کے مطابق واقعہ گزشتہ رات دیر گئے پیش آیا، جس میں دودو پتافی، حضور بخش پتافی اور اصغر پتافی موقع پر ہی جاں بحق ہو گئے، جبکہ زبیر پتافی، حبیب اللہ پتافی اور علی نواز پتافی فائرنگ سے زخمی ہوئے۔

اطلاع ملتے ہی خانپور مہر پولیس جائے وقوعہ پر پہنچی اور جاں بحق افراد کی لاشوں اور زخمیوں کو تحصیل اسپتال شیخ حمدان بن محمد، خانپور مہر منتقل کیا۔ بعد ازاں زخمیوں کی حالت تشویشناک ہونے پر انہیں سکھر اسپتال ریفر کر دیا گیا۔

پولیس ذرائع کے مطابق مقتولین اور زخمیوں کا تعلق پنجاب کے مختلف علاقوں لاہور، رحیم یار خان اور صادق آباد سے بتایا جا رہا ہے۔ لاشوں کا پوسٹ مارٹم مکمل ہونے کے بعد انہیں ورثاء کے حوالے کر دیا گیا، جنہوں نے ایمبولینسوں کے ذریعے لاشیں اپنے آبائی علاقوں کو منتقل کر دیا۔

آخری اطلاعات تک واقعے کا مقدمہ درج نہیں ہو سکا تھا، تاہم پولیس کا کہنا ہے کہ واقعے کی تحقیقات جاری ہیں اور ملزمان کی گرفتاری کے لیے چھاپے مارے جا رہے ہیں۔

میرپور ماتھیلو(باغی ٹی وی ،نامہ نگارمشتاق علی لغاری)ڈی آئی جی سکھر رینج کی جانب سے سیاہ کاری کے نام پر منعقدہ غیر قانونی جرگے کا نوٹس لیے جانے کے بعد ایس ایس پی گھوٹکی محمد انور کھیتران کی ہدایت پر پولیس نے فوری کارروائی کرتے ہوئے ایک ملزم کو گرفتار کر کے مقدمہ درج کر لیا ہے۔ تفصیلات کے مطابق تھانہ میرپور ماتھیلو کی حدود میں واقع گاؤں سمندر بھیو میں وڈیرے شاہنواز بھیو، جانب بھیو، معشوق بھیو، احمد بھیو، محمد علی بھیو اور غلام حسین بھیو کی جانب سے ایک غیر قانونی جرگہ منعقد کیا گیا تھا، جس کا مقصد مبینہ طور پر سیاہ کاری کے معاملے کا فیصلہ کرنا تھا۔ اس سنگین صورتحال کا علم ہوتے ہی ایس ایس پی گھوٹکی نے ایس ایچ او میرپور ماتھیلو کو سخت احکامات جاری کیے کہ اس غیر قانونی عمل میں ملوث تمام افراد کو فوری طور پر گرفتار کر کے قانون کے کٹہرے میں لایا جائے۔

جرگے کے حوالے سے موصول ہونے والی تفصیلات کے مطابق نامزد ملزمان نے وسیم بھیو نامی نوجوان پر ثانیہ بھیو نامی لڑکی کے ساتھ سیاہ کاری کا جھوٹا الزام عائد کیا تھا اور اس کے بدلے میں دو لڑکیوں، شمیلا اور انیسہ بھیو کو بطور ‘عیوضہ’ دینے سمیت 10 لاکھ روپے جرمانہ ادا کرنے کا غیر انسانی فیصلہ سنایا تھا۔ ایس ایس پی گھوٹکی محمد انور کھیتران نے اس معاملے پر سخت برہمی کا اظہار کرتے ہوئے واضح کیا کہ ضلع میں کسی کو بھی متوازی عدالتی نظام چلانے یا انسانی حقوق کی پامالی کرنے کی ہرگز اجازت نہیں دی جائے گی اور جرگہ کرنے والے افراد کے خلاف سخت ترین قانونی کارروائی عمل میں لائی جائے گی۔

پولیس حکام کے مطابق ایس ایس پی کے احکامات پر عملدرآمد کرتے ہوئے ایس ایچ او تھانہ میرپور ماتھیلو بدر دین برڑو نے پولیس نفری کے ہمراہ فوری کارروائی کی اور جرگے کے مرکزی ملزم شاہنواز ولد غلام محمد بھیو کو گرفتار کر لیا۔ پولیس نے جرگے میں ملوث 6 نامزد ملزمان کے خلاف کرائم نمبر 268/2025 کے تحت دفعہ 310A، 120B، 506/2 اور دیگر سنگین دفعات کے تحت مقدمہ درج کر لیا ہے۔ پولیس کا کہنا ہے کہ گرفتار ملزم سے تفتیش جاری ہے جبکہ جرگے میں ملوث دیگر مفرور ملزمان کی گرفتاری کے لیے مختلف مقامات پر چھاپے مارے جا رہے ہیں تاکہ انہیں جلد از جلد گرفتار کر کے عبرت کا نشان بنایا جا سکے۔

میرپورماتھیلو(باغی ٹی وی،نامہ نگارمشتاق علی لغاری)ضلع گھوٹکی کے شہر میرپور ماتھیلو سے یارو لنڈ، جروار، گھوٹکی، خیرپور اور رِشتي گھوٹکی کے مختلف روٹس پر چلنے والی ٹرانسپورٹ گاڑیوں میں ٹریفک قوانین کی کھلے عام خلاف ورزی کی جا رہی ہے، جہاں ویگنوں اور ہائیس گاڑیوں کی چھتوں پر مسافروں کو بٹھا کر سفر کروانا ایک معمول بن چکا ہے۔ یہ خطرناک عمل کسی بھی وقت کسی بڑے جانی سانحے کا سبب بن سکتا ہے، مگر انتظامیہ اس سنگین صورتحال سے چشم پوشی اختیار کیے ہوئے ہے۔ ان روٹس پر سفر کرنے والے مسافر اپنی زندگیوں کو داؤ پر لگا کر سفر کرنے پر مجبور ہیں، جو کہ ضلعی انتظامیہ اور ٹریفک پولیس کی کارکردگی پر ایک بڑا سوالیہ نشان ہے۔

واضح رہے کہ یہ کوئی نیا معاملہ نہیں ہے بلکہ ماضی میں بھی رِشتي گھوٹکی، جروار اور گھوٹکی–خیرپور روٹس پر گاڑیوں کی چھتوں سے گرنے اور حادثات کے نتیجے میں کئی قیمتی انسانی جانیں ضائع ہو چکی ہیں اور درجنوں افراد عمر بھر کے لیے معذور ہو چکے ہیں۔ ان المناک حادثات کے باوجود نہ تو ٹریفک پولیس نے ان جان لیوا خلاف ورزیوں کو روکنے کے لیے کوئی مؤثر ناکہ بندی کی ہے اور نہ ہی ٹرانسپورٹ ڈیپارٹمنٹ کی جانب سے ٹرانسپورٹرز کے خلاف کوئی تادیبی کارروائی عمل میں لائی گئی ہے۔ متعلقہ اداروں کی یہ مجرمانہ خاموشی اور غفلت شہریوں کے لیے تشویش کا باعث بنی ہوئی ہے، کیونکہ ہر گزرتے دن کے ساتھ حادثات کا خطرہ بڑھتا جا رہا ہے۔

عوامی و سماجی حلقوں اور مسافروں نے ضلع گھوٹکی کے اعلیٰ حکام اور بالخصوص ڈی آئی جی اور ایس ایس پی گھوٹکی سے پُرزور مطالبہ کیا ہے کہ انسانی جانوں سے کھیلنے والے ان ٹرانسپورٹرز کے خلاف فوری اور بلاامتیاز قانونی کارروائی کی جائے۔ شہریوں کا کہنا ہے کہ گاڑیوں کی چھتوں پر مسافر بٹھانے کے عمل پر مکمل پابندی عائد کی جائے اور خلاف ورزی کرنے والوں کے خلاف سخت جرمانے اور گاڑیوں کی ضبطگی جیسے اقدامات کیے جائیں۔ انہوں نے خبردار کیا ہے کہ اگر فوری طور پر عملی اقدامات نہ کیے گئے تو مستقبل میں ہونے والے کسی بھی بڑے حادثے کی تمام تر ذمہ داری متعلقہ حکام اور انتظامیہ پر عائد ہوگی۔

سکھر (باغی ٹی وی ،نامہ نگار مشتاق علی لغاری)ڈی آئی جی سکھر رینج کیپٹن (ر) فیصل عبداللہ چاچڑ کی سربراہی میں سندھ پنجاب بارڈر پر ڈاکوؤں کے خلاف جاری آپریشن کے دوران ایک اور بڑی کامیابی حاصل کر لی گئی، جس میں چار اغوا شدہ افراد کو بحفاظت بازیاب کرا لیا گیا۔

یاد رہے کہ چند روز قبل پنجاب کے علاقے سے تعلق رکھنے والے چار افراد کو دھوکے سے بلا کر اغوا کر لیا گیا تھا، جن کی ویڈیو بھی ڈاکوؤں کی جانب سے سوشل میڈیا پر وائرل کی گئی تھی اور ان سے تاوان طلب کیا جا رہا تھا۔ اغوا ہونے والے افراد کا ذریعہ معاش کھوجی کتوں کے ذریعے مجرموں کی نشاندہی کرنا بتایا جاتا ہے، جبکہ ان کے اغوا کا مقدمہ صادق آباد میں درج تھا۔

ڈی آئی جی سکھر رینج کی نگرانی میں ہونے والی اس ٹارگٹڈ کارروائی میں ایس ایس پی گھوٹکی انور کھیتراں کی قیادت میں پنجاب پولیس، ڈی پی او راجن پور، ایس ایس پی کشمور اور سندھ رینجرز کے باہمی تعاون سے پولیس مقابلے کے دوران مغویوں کو بحفاظت بازیاب کروا لیا گیا۔

پولیس حکام کے مطابق جرائم پیشہ ڈاکوؤں کے گروہوں کے خلاف جاری آپریشن منطقی انجام تک جاری رکھا جائے گا اور علاقے میں امن و امان کو یقینی بنانے کے لیے کسی قسم کی رعایت نہیں برتی جائے گی۔

شکارپور (نامہ نگار مشتاق علی لغاری)شکارپور کے منچھر شاہ قبرستان میں پولیس مقابلے میں جاں بحق ہونے والے صابر شیخ کے ورثاء اور اہلِ خانہ نے زبردست احتجاج کیا۔ مظاہرین نے الزام عائد کیا کہ صابر شیخ کو جعلی پولیس مقابلے میں قتل کیا گیا اور واقعے کی حقیقت چھپائی جا رہی ہے۔

ورثاء کے مطابق صابر شیخ موٹر سائیکل پر پیٹرول ڈالنے کے لیے پمپ آیا تھا، جہاں پولیس اہلکاروں نے اسے بغیر کسی وضاحت کے گرفتار کر لیا اور بعد ازاں موت کے گھاٹ اتار دیا۔ اہلِ خانہ نے الزام لگایا کہ پولیس نے لاش دینے سے انکار کیا اور صابر شیخ کو مجرم کے طور پر درج کرنے پر زور دیا، جسے انہوں نے قطعی طور پر مسترد کیا۔

احتجاج میں خواتین نے بھی بھرپور حصہ لیا اور پاک کتاب لے کر انصاف کے لیے مظاہرہ کیا، جس سے مظاہرے کا پیغام مزید پراثر اور جذباتی انداز میں سامنے آیا۔ ورثاء اور خواتین نے واضح کیا کہ وہ صابر شیخ کے قتل کی آزادانہ اور شفاف تحقیقات کے حق میں ہیں اور چاہتے ہیں کہ ذمہ داران کے خلاف فوری قانونی کارروائی کی جائے۔

مظاہرین نے شکارپور انتظامیہ اور اعلیٰ حکام سے فوری نوٹس لینے اور انصاف فراہم کرنے کا بھی مطالبہ کیا۔ واقعے کے فوری بعد علاقے میں کشیدگی پھیل گئی تھی اور مقامی پولیس کی جانب سے کسی بھی قسم کی وضاحت سامنے نہیں آئی۔ ورثاء کا کہنا تھا کہ صابر شیخ ایک عام شہری تھا اور اس کے قتل سے مقامی کمیونٹی میں شدید غم و غصہ پایا جاتا ہے۔

اس دوران مقامی میڈیا نے بھی واقعے کی کوریج شروع کر دی ہے اور شہریوں کی جانب سے پولیس کے رویے پر سخت سوالات اٹھائے جا رہے ہیں۔ ورثاء نے یقین دلایا کہ وہ صابر شیخ کے قتل کے معاملے کو انصاف تک پہنچانے کے لیے ہر ممکن جدوجہد کریں گے۔

گھوٹکی (نامہ نگار مشتاق علی لغاری) گھوٹکی پولیس نے منشیات اور غیر قانونی شراب کے خلاف بڑی کارروائی کرتے ہوئے بھاری مقدار میں شراب کی کھیپ برآمد کر لی۔ یہ کارروائی پولیس سربراہ محمد انور کھیتران کی ہدایت اور حساس ادارے کی نشاندہی پر انجام دی گئی۔

ڈی ایس پی اوباوڑو عبدالقادر سومرو اور ایس ایچ او تھانہ ڈھرکی منظور احمد چانڈیو کی قیادت میں پولیس بمہ اسٹاف نے مٹھا خان مارکیٹ میں ایک گھر ماڑی پر چھاپہ مار کر شراب کی بڑی مقدار برآمد کی۔ اس موقع پر ایک ملزم بیشم ولد کرشن لعل کو گرفتار کر لیا گیا۔

پولیس کے مطابق برآمد ہونے والی شراب کی تفصیل درج ذیل ہے:03 کارٹون بیئر سائے رنگ کے (ہر کارٹون میں 60 عدد بیئر)،03 کارٹون ملینیم بیئر نیلے رنگ کے (ہر کارٹون میں 60 عدد بیئر)،01 کارٹون بیئر (20 عدد بیئر)
،45 آدھیہ شراب ڈرائیجن کے،55 پوے شراب ڈرائیجن کے،10 آدھیہ شراب واٹ ون کے،25 پوے شراب واٹ ون کے،10 بڑی بوتلیں رائیل ایمبسٹر شراب کی،03 بڑی بوتلیں مریئرس ایمپئر شراب کی،ایک بڑی بوتل نیلے رنگ کی

گرفتار ملزم نے شراب کی یہ بڑی مقدار فروخت کرنے کے لیے گھر میں چھپا رکھی تھی۔ پولیس نے برآمد شدہ شراب کو تھانے منتقل کر دیا اور ملزم کے خلاف کرائم نمبر 233/2025، دفعہ 3/4 منشیات حدود آرڈیننس کے تحت مقدمہ درج کر دیا۔

ایس ایس پی گھوٹکی محمد انور کھیتران نے اس کامیاب کارروائی پر پولیس پارٹی کو شاباشی دی اور تعریفی سرٹیفکیٹ کا اعلان کیا۔