Category: شوبز

ممبئی کی ایک عدالت نے اداکارہ ملائیکہ اروڑا کے خلاف جاری قابل ضمانت وارنٹ منسوخ کر دیا، جو کہ 2012 میں ہونے والے ایک ہوٹل جھگڑے کے مقدمے میں ثبوت پیش کرنے والی گواہ تھیں۔ یہ مقدمہ بالی وڈ اسٹار سیف علی خان سے متعلق ہے۔ وارنٹ اس وقت جاری کیا گیا تھا جب ملائیکہ عدالت میں پیش نہیں ہوئیں۔

عدالت نے ملائیکہ کو گواہ کی حیثیت سے مقدمے سے خارج کر دیا کیونکہ استغاثہ نے کہا کہ اداکارہ ان کے کیس کی حمایت نہیں کر رہیں۔یہ مقدمہ 13 سال پرانا ہے جس میں سیف علی خان پر الزام ہے کہ انہوں نے ممبئی کے ایک پانچ ستارہ ہوٹل میں ایک غیر ملکی تاجر پر حملہ کیا تھا۔ملائیکہ اروڑا اس گروپ کا حصہ تھیں جو اس رات سیف علی خان کے ساتھ ہوٹل میں کھانے کے لیے گئی تھیں۔ یہ واقعہ 22 فروری 2012 کو پیش آیا تھا۔اپریل میں عدالت نے ملائیکہ کے پیش نہ ہونے پر ان کے خلاف قابل ضمانت وارنٹ جاری کیا تھا۔

بدھ کو اداکارہ ملائیکہ اروڑا نے چیف جسٹس میجسٹریٹ (ایسپلانڈ کورٹ) کے سامنے پیش ہو کر وارنٹ منسوخی کی درخواست دی، جسے عدالت نے منظور کر لیا۔

سیف علی خان اور دو دیگر افراد کو اس واقعے کے بعد گرفتار کیا گیا تھا۔ یہ گرفتاری ایک تاجر اقبال میر شرما کی شکایت پر ہوئی تھی۔ گرفتار تینوں کو بعد میں ضمانت پر رہا کر دیا گیا تھا۔سیف علی خان کے ساتھ اس رات ان کی اداکارہ اہلیہ کرینہ کپور، ان کی بہن کرشمہ، ملائیکہ اروڑا، ان کی بہن امرتا اروڑا اور کچھ مرد دوست بھی موجود تھے۔پولیس کے مطابق، جب تاجر اقبال میر شرما نے فلمی ستارے اور ان کے دوستوں کی شور شرابے کی شکایت کی تو سیف علی خان نے تاجر کو دھمکی دی اور ان کی ناک پر مکا مار،نہ صرف اقبال میر شرما، بلکہ ان کے سسر رمن پٹیل کو بھی سیف علی خان اور ان کے دوستوں کی جانب سے مارا گیا تھا۔سیف علی خان کا موقف ہے کہ تاجر نے ان خواتین پرتوہین آمیز الفاظ استعمال کیے اور ان کی توہین کی، جس کی وجہ سے جھگڑا ہوا۔عدالت میں اس معاملے کی اگلی سماعت 22 اگست کو ہوگی۔

کراچی کے پوش علاقے ڈیفنس فیز 6 کے ایک فلیٹ سے معروف اداکارہ حمیرا اصغر کی لاش برآمد ہونے کے بعد تحقیقات کا دائرہ وسیع کر دیا گیا ہے، اور اب تک سامنے آنے والی معلومات نے اس واقعے کو مزید پراسرار بنا دیا ہے۔

ڈی آئی جی ساؤتھ اسد رضا کے مطابق، ابتدائی شواہد اور فارنزک جائزے سے ظاہر ہوتا ہے کہ اداکارہ کی لاش تقریباً چھ ماہ پرانی ہے۔ ان کا کہنا تھا کہ فلیٹ میں موجود کھانے پینے کی اشیاء پر درج ایکسپائری تاریخ 2024 کی ہے، جس سے عندیہ ملتا ہے کہ فلیٹ کئی مہینوں سے بند پڑا تھا۔تحقیقات کے دوران اداکارہ کے موبائل فون کا ڈیٹا بھی حاصل کیا گیا ہے، جس سے معلوم ہوا ہے کہ آخری پیغام اکتوبر 2024 میں بھیجا گیا تھا۔ اس آخری رابطے میں ایک آن لائن ٹیکسی ڈرائیور شامل ہے، جس سے مزید تفتیش کی جا رہی ہے۔ پولیس کا کہنا ہے کہ فلیٹ کی بجلی بھی طویل عرصے سے منقطع تھی، اور اداکارہ کا فلیٹ کے مالک سے آخری رابطہ بھی 2024 میں ہی ہوا تھا۔پولیس حکام کے مطابق، اداکارہ کے اہلخانہ آج لاش وصول کرنے کے لیے سرد خانے پہنچیں گے۔ اس موقع پر پولیس کی موجودگی کو بھی یقینی بنایا جائے گا تاکہ مزید تفتیش میں کوئی رکاوٹ نہ آئے۔

پولیس کا کہنا ہے کہ واقعے کی ہر پہلو سے تحقیقات جاری ہیں اور جلد ہی حمیرا اصغر کی موت کے اسباب سے متعلق مزید حقائق سامنے لائے جائیں گے۔

کراچی: اداکارہ حمیرا اصغر کے گھر والوں نے کراچی پہنچ کر ان کی لاش وصول کرنے سے انکار کر دیا ہے، جس کے بعد پولیس تحقیقات میں تیزی آ گئی ہے۔ ایس ایس پی ساؤتھ مہزور علی نے بتایا کہ پولیس نے مالک مکان سے اداکارہ حمیرا کا نمبر حاصل کرکے سی ڈی آر نکالا اور متوفیہ کے والد اور بھائی سے رابطہ کیا، مگر ان کی جانب سے کراچی آنے سے انکار کیا گیا۔

ایس ایس پی مہزور علی نے بتایا کہ حمیرا کے والد نے تسلیم کیا ہے کہ وہ ڈیڑھ سے دو سال قبل اپنی بیٹی سے قطع تعلق کر چکے ہیں۔ پولیس کی جانب سے ان کو قائل کرنے کی کوشش کی گئی کہ وہ کراچی آئیں اور بیٹی کی لاش وصول کریں، لیکن والد نے اس حوالے سے کوئی تعاون نہیں کیا۔ اب پولیس دوبارہ رابطہ نہیں کر رہی، تاہم کوشش جاری ہے کہ گھر والے جلد از جلد کراچی پہنچیں تاکہ معاملے کی مزید قانونی کارروائی کی جا سکے۔

پولیس کو اداکارہ حمیرا کے دو موبائل فونز بھی مل چکے ہیں جن سے ڈیٹا حاصل کرنے کی کوشش کی جا رہی ہے تاکہ واقعے کی تفصیلات اور اس کے پس منظر کا پتہ چل سکے۔ ایس ایس پی مہزور علی نے بتایا کہ اگر پوسٹ مارٹم یا کیمیکل ایگزامینیشن رپورٹ میں کوئی مشکوک بات سامنے آئی تو مقدمہ درج کیا جائے گا اور موت کی وجوہات کا تعین اسی کے بعد ہو گا۔مہزور علی نے کہا کہ کوشش کی جائے گی کہ مقدمہ حمیرا کے اہلخانہ کی مدعیت میں درج ہو، مگر اگر وہ اس سے انکار کرتے ہیں تو پولیس اپنی مدعیت میں بھی مقدمہ درج کر سکتی ہے۔

ادھر شوبز انڈسٹری سے اب تک پولیس کو کسی قسم کا رابطہ موصول نہیں ہوا، اور پڑوسیوں نے بھی حمیرا کو آخری مرتبہ گھر سے آتے جاتے نہیں دیکھا۔ مزید یہ کہ حمیرا اصغر نے 2024 سے اپنے مالک مکان کو کرایہ ادا نہیں کیا تھا، جس پر مکان مالک نے ان کے خلاف قانونی کارروائی بھی شروع کر رکھی تھی۔

ممبئی: معروف بالی وڈ اداکارہ عالیہ بھٹ کے سابق ذاتی معاون ودیکا پرکاش شیٹی کو 77 لاکھ روپے کے فراڈ کے الزام میں گرفتار کر لیا گیا ہے۔

ودیکا پرکاش شیٹی (32 سال) پر عالیہ بھٹ کی پروڈکشن کمپنی "ایٹرنل سن شائن پروڈکشنز پرائیویٹ لمیٹڈ” اور اداکارہ کے ذاتی اکاؤنٹس میں 76.9 لاکھ روپے کی مالی بے ضابطگیوں کا الزام ہے،پولیس کے مطابق یہ فراڈ مئی 2022 سے اگست 2024 کے درمیان کیا گیا۔ یہ معاملہ اس وقت سامنے آیا جب عالیہ بھٹ کی والدہ اور اداکارہ-ڈائریکٹر سونی رضوان نے 23 جنوری کو جوہو پولیس میں شکایت درج کروائی۔ شکایت کے بعد پولیس نے فراڈ اور اعتماد کے خلاف مقدمہ درج کر کے ودیکا شیٹی کی تلاش شروع کر دی۔

پولیس ذرائع کے مطابق ودیکا شیٹی نے 2021 سے 2024 تک عالیہ بھٹ کی ذاتی معاون کے طور پر کام کیا۔ اس دوران وہ اداکارہ کے مالی دستاویزات، ادائیگیوں اور شیڈول کی منصوبہ بندی کی ذمہ دار تھی۔ تحقیقات سے پتہ چلا کہ ودیکا نے جعلی بل تیار کیے، جن پر عالیہ بھٹ نے دستخط کیے، اور پھر ان بلوں کی مد میں رقم اپنے دوست کے اکاؤنٹ میں منتقل کروائی، جو بعد میں ودیکا کو واپس بھیج دی جاتی تھی۔ودیکا نے جعلی بلوں کو مستند دکھانے کے لیے پیشہ ورانہ طریقے استعمال کیے۔ وہ عالیہ کو بتاتی تھی کہ یہ اخراجات ان کی سفری ضروریات، ملاقاتوں اور دیگر انتظامات کے لیے ہیں۔

سونی رضوان کی شکایت کے بعد ودیکا شیٹی فرار ہو گئی اور اپنی جگہ بار بار بدلتی رہی۔ پولیس نے اسے راجستھان، پھر کرناٹک، پھر پونے اور آخر کار بنگلور میں تلاش کر کے گرفتار کیا۔ ودیکا کو جوہو پولیس نے ممبئی لانے کے لیے ٹرانزٹ ریمانڈ پر لیا۔پولیس اب اس معاملے کی مزید تحقیقات کر رہی ہے تاکہ دیگر ممکنہ مالی بے ضابطگیوں اور ملوث افراد کا پتہ چلایا جا سکے۔