Category: شوبز

عالمی شہرت یافتہ گلوکار علی ظفر نے گلوکارہ میشا شفیع کے خلاف ہتکِ عزت کا مقدمہ جیتنے کے بعد اپنی پہلی انسٹاگرام پوسٹ میں اللّٰہ تعالیٰ کا شکر ادا کرتے ہوئے جذباتی پیغام جاری کیا ہے۔

علی ظفر نے اپنی پوسٹ میں لکھا کہ وہ خدا کے بے حد شکر گزار ہیں اور اُن تمام افراد کے بھی ممنون ہیں جنہوں نے اُن کی زندگی کے مشکل ترین دور میں اُن کا اور سچ کا ساتھ دیا۔ اُن کا کہنا تھا کہ بالآخر انصاف ہو گیا ہے، تاہم انہیں کسی قسم کی فتح کا احساس نہیں بلکہ دل میں صرف عاجزی اور شکرگزاری کے جذبات ہیں۔گلوکار نے مزید کہا کہ وہ کسی کے خلاف منفی جذبات نہیں رکھتے اور ان کے نزدیک یہ باب اب مکمل طور پر بند ہو چکا ہے۔ انہوں نے دعا کی کہ سب لوگ وقار اور سکون کے ساتھ اپنی زندگی میں آگے بڑھیں۔ علی ظفر نے واضح کیا کہ وہ اس فیصلے کو جشن کے طور پر نہیں دیکھتے بلکہ اسے ایک آزمائش کے اختتام کے طور پر لیتے ہیں۔

واضح رہےکہ لاہور کی عدالت نے منگل کے روز فیصلہ سناتے ہوئے میشا شفیع کو 50 لاکھ روپے ہرجانہ ادا کرنے کا حکم دیا۔ کیس کی سماعت کے دوران میشا شفیع عدالت میں پیش نہ ہوئیں اور نہ ہی اپنے الزامات کے حق میں مؤثر شواہد فراہم کر سکیں، جبکہ علی ظفر نے اپنے گواہان عدالت کے سامنے پیش کیے۔

یاد رہے کہ یہ مقدمہ 2018 میں اس وقت سامنے آیا تھا جب میشا شفیع نے علی ظفر پر ہراسانی کے الزامات عائد کیے تھے، جس کے بعد علی ظفر نے ان کے خلاف ہتکِ عزت کا دعویٰ دائر کیا۔ یہ کیس پاکستان میں ‘می ٹو’ تحریک کے نمایاں مقدمات میں شمار کیا جاتا ہے اور طویل عرصے تک عوامی اور قانونی حلقوں کی توجہ کا مرکز بنا رہا۔

سیشن عدالت لاہور نے گلوکار علی ظفر کے میشا شفیع کے خلاف ہتک عزت کیس کا فیصلہ سنا دیا

میشا شفیع ہار گئیں، علی ظفر کیس جیت گئے،عدالت نے میشا شفیع کے خلاف ڈگری جاری کرتے 50 لاکھ روپے جرمانہ عائد کردیا۔ علی ظفر نے جنسی ہراسانی کے الزامات لگانے پر میشا شفیع پر 100 کروڑ روپے کا دعویٰ کیا تھا۔ علی ظفر نے میشا شفیع کے خلاف 2018 میں ہتک عزت کا دعویٰ دائر کیا تھا،میشا شفیع نے علی ظفر پر ہراساں کرنے کا الزام عائد کیا

ایڈیشنل سیشن جج آصف حیات نے کیس کا فیصلہ سنایا۔کیس میں مجموعی طور پر بیس گواہوں کے بیانات کو قلمبند کیا گیا۔علی ظفر نے میشا شفیع کے خلاف ایک ارب روپے ہرجانے کا دعویٰ دائر کیا تھا۔میشہ شفیع نے علی ظفر پر جنسی ہراساں کرنے کا الزام عائد کیا تھا۔مجموعی طور پر 284 پیشیاں ہوئی اور نو ججز کے تبادلے ہوئے۔عدالت نے میشا شفیع کے خلاف دعویٰ کو ڈگری کردیا۔عدالت نے میشا شفیع کو پچاس لاکھ روپے جرمانہ کیا۔

ہالی ووڈ کی معروف اداکارہ سشمیتا سین کی زندگی میں متعدد رشتے آئے، تاہم 50 سال کی عمر کے قریب پہنچنے کے باوجود وہ اب تک شادی نہیں کر سکیں۔

رپورٹس کے مطابق سشمیتا سین نے اپنے کیریئر کے دوران کئی معروف شخصیات کو ڈیٹ کیا، جن میں بزنس مین، ماڈلز اور شوبز سے وابستہ افراد شامل ہیں۔ ان کے مبینہ طور پر 11 افیئرز کا ذکر بھی سامنے آتا رہا ہے، جس کی وجہ سے وہ اکثر میڈیا کی توجہ کا مرکز بنی رہیں۔اداکارہ نے 1994 میں مس یونیورس کا اعزاز حاصل کر کے عالمی شہرت حاصل کی اور بعد ازاں فلمی دنیا میں قدم رکھا۔ انہوں نے بیوی نمبر 1، میں ہوں نا، آنکھیں اور میں نے پیار کیوں کیا جیسی کامیاب فلموں میں اداکاری کے جوہر دکھائے۔ذاتی زندگی کے حوالے سے خبروں میں رہنے کے باوجود سشمیتا سین نے ایک مضبوط اور خودمختار خاتون کے طور پر اپنی پہچان بنائی۔ انہوں نے کم عمری میں ایک بچی کو گود لے کر ماں بننے کا فیصلہ کیا، جسے ان کے مداحوں نے خوب سراہا۔

ان کے ماضی کے تعلقات میں پاکستانی کھلاڑی وسیم اکرم سمیت کئی نامور شخصیات کا ذکر کیا جاتا ہے، تاہم اداکارہ نے ہمیشہ اپنی ذاتی زندگی کو اپنی شرائط پر جینے کو ترجیح دی،اداکارہ کے مبینہ طور پر امتیاز کھتری، بنٹی سجدیہہ، رتک بھسین، مدثر عزیز اور للت مودی کے ساتھ بھی تعلقات کی باز گشت سنائی دیتی رہی ہے،ماہرین کے مطابق سشمیتا سین کی غیر شادی شدہ زندگی کو ان کی ذاتی پسند اور خودمختاری سے جوڑ کر دیکھا جا رہا ہے، اور وہ آج بھی شوبز انڈسٹری میں متحرک اور بااعتماد شخصیت کے طور پر جانی جاتی ہیں۔

بالی ووڈ کی ماضی کی مقبول اداکارہ ممتا کلکرنی ایک بار پھر خبروں کی زینت بن گئی ہیں۔ نوے کی دہائی میں شہرت کی بلندیوں کو چھونے والی اداکارہ کی زندگی فلمی کہانی سے کم نہیں، جس میں محبت، تنازعات، روحانیت اور گلیمر سب کچھ شامل ہے۔

رپورٹس کے مطابق ممتا کلکرنی نے اپنے کیریئر کے عروج پر ایسی زندگی گزارنے کا فیصلہ کیا جس نے سب کو حیران کر دیا۔ انہوں نے ایک ایسے شخص سے محبت کی جسے وہ کبھی دنیا کے سامنے “بھائی” کہتی رہیں، مگر بعد میں وہی ان کا محبوب قرار پایا۔ یہ شخص کوئی اور نہیں بلکہ مبینہ ڈرگ مافیا سے وابستہ وکی گوسوامی تھا،ممتا کلکرنی نے 1991 میں تامل فلم سے کیریئر کا آغاز کیا اور 1992 میں فلم ترنگا سے بالی ووڈ میں قدم رکھا۔ اس کے بعد انہوں نے کرن ارجن، سب سے بڑا کھلاڑی، چائنا گیٹ اور دیگر سپر ہٹ فلموں میں کام کر کے اپنی پہچان بنائی۔

اداکارہ کی زندگی میں سب سے بڑا موڑ اس وقت آیا جب ان کی ملاقات وکی گوسوامی سے ہوئی۔ بتایا جاتا ہے کہ وہ ان کے لیے اپنی کامیاب فلمی زندگی چھوڑ کر بیرون ملک چلی گئیں۔ دلچسپ بات یہ ہے کہ مختلف مواقع پر انہوں نے وکی کو کبھی بھائی، کبھی شوہر اور کبھی محض دوست قرار دیا، جس سے ان کی ذاتی زندگی مسلسل تنازعات کا شکار رہی۔کئی سالوں تک گلیمر سے دور رہنے کے بعد ممتا کلکرنی نے روحانیت کا راستہ اختیار کیا اور سادھوی بننے کا اعلان کیا۔ انہوں نے دعویٰ کیا کہ وہ طویل عرصے تک تپسیا کرتی رہی ہیں اور دنیاوی زندگی سے کنارہ کش ہو چکی ہیں۔تاہم حالیہ دنوں میں اداکارہ ایک بار پھر تنازع کا شکار ہو گئی ہیں جب انہوں نے سادھوی کا چولا اتار کر دوبارہ گلیمرس زندگی اپنائی۔ سوشل میڈیا پر ان کی جدید طرزِ زندگی، پارٹیوں اور ویکیشنز کی ویڈیوز سامنے آنے کے بعد صارفین نے سخت ردعمل دیا۔اداکارہ نے تنقید کا جواب دیتے ہوئے کہا کہ ان کی زندگی کے فیصلے ذاتی ہیں اور وہ اپنی مرضی کے مطابق جینے کا حق رکھتی ہیں۔

ممتا کلکرنی کی زندگی کے مختلف رنگ،شہرت، محبت، روحانیت اور دوبارہ گلیمرنے مداحوں کو حیرت میں ڈال رکھا ہے۔ جہاں کچھ لوگ ان کی واپسی کو سراہ رہے ہیں، وہیں کئی افراد ان کے بدلتے بیانات اور طرزِ زندگی پر سوالات اٹھا رہے ہیں۔

بالی وڈ اداکارہ ملائیکہ اروڑا نے سہراب بیدی کے ساتھ مبینہ افیئر کی خبروں پر پہلی بار کھل کر بات کرتے ہوئے ان افواہوں کو بے بنیاد اور پریشان کن قرار دے دیا ہے۔

52 سالہ اداکارہ، جو اپنی فٹنس اور اسٹائل کی وجہ سے مشہور ہیں، حالیہ دنوں میں سوشل میڈیا پر وائرل ہونے والی ایک ویڈیو کے بعد خبروں کی زینت بنیں۔ اس ویڈیو میں انہیں ایک شخص کے ساتھ دیکھا گیا جس کے بعد ان کے نئے تعلق سے متعلق قیاس آرائیاں شروع ہوگئیں۔ایک حالیہ انٹرویو میں ملائیکہ اروڑا نے کہا کہ ان کی ذاتی زندگی کے حوالے سے پھیلائی جانے والی باتیں اب انہیں متاثر نہیں کرتیں بلکہ وہ انہیں ہنسی مذاق میں اڑا دیتی ہیں۔ انہوں نے بتایا کہ وہ اور ان کا بیٹا ارہان خان بھی ان خبروں پر ہنستے ہیں۔ملائیکہ نے کہا "یہ سب اب بہت زیادہ ہو گیا ہے، لیکن میں نے سیکھ لیا ہے کہ ان باتوں کو سنجیدہ نہ لوں۔ میں اور ارہان اکثر ان خبروں پر ہنستے ہیں۔”

یاد رہے کہ ملائیکہ اروڑا کی شادی ارباز خان سے تقریباً 19 سال تک قائم رہی، تاہم 2017 میں دونوں کی طلاق ہوگئی۔ بعد ازاں ان کا نام ارجن کپور کے ساتھ جوڑا گیا، لیکن 2024 میں ان کی راہیں جدا ہوگئیں۔اپنی ذاتی زندگی اور مستقبل کے حوالے سے بات کرتے ہوئے ملائیکہ نے واضح کیا کہ وہ کسی نئے رشتے میں آنے کے لیے جلدی میں نہیں ہیں۔ ان کا کہنا تھا میں چیزوں کی منصوبہ بندی نہیں کرتی، اگر کچھ ہونا ہوگا تو خود ہی ہو جائے گا۔ اس وقت میں اپنی زندگی سے خوش ہوں اور یہی چیز مجھے آگے بڑھنے کا حوصلہ دیتی ہے۔ اگرچہ ایک ساتھی کا ہونا اچھا لگتا ہے، لیکن یہ ان کے لیے لازمی نہیں اور اگر وہ کسی رشتے میں آئیں گی تو اپنی شرائط پر آئیں گی۔

دوسری جانب سوشل میڈیا پر گزشتہ سال بھی ایک ویڈیو وائرل ہوئی تھی جس میں ملائیکہ کو ممبئی میں ایک کنسرٹ کے دوران ایک نامعلوم شخص کے ساتھ دیکھا گیا۔ کچھ سوشل میڈیا اکاؤنٹس نے دعویٰ کیا تھا کہ وہ شخص ہیروں کا تاجر ہرش مہتا ہے، تاہم اس حوالے سے کوئی مستند تصدیق سامنے نہیں آئی۔اسی طرح رواں سال فروری میں بھی ایک تصویر وائرل ہوئی جس کے بعد یہ قیاس آرائیاں شروع ہوئیں کہ ملائیکہ نے ویلنٹائن ڈے اٹلی میں کسی خاص شخصیت کے ساتھ منایا، تاہم اداکارہ نے ان خبروں پر کوئی باضابطہ ردعمل نہیں دیا۔