Category: شوبز

اداکارہ صبا قمر زمان نے اپنے خلاف مقدمے کی درخواست کے بعد پہلی بار خاموشی توڑ دی۔

میڈیا رپورٹس کے مطابق صبا قمر کے خلاف لاہور کی سیشن کورٹ میں ایک درخواست دائر کی گئی ہے جس میں الزام عائد کیا گیا ہے کہ اداکارہ نے بغیر اجازت پولیس کی وردی پہنی،یہ معاملہ اس وقت سوشل میڈیا پر زیرِ بحث آیا جب ایک زیر گردش ویڈیو میں صبا قمر کو ڈریسنگ روم میں ایس پی کی وردی پہنے دیکھا گیا، اس کے بعد اداکارہ نے میگزین کی ایک پوسٹ ری شیئر کی جس میں انہوں نے صبا قمر کا دفاع کیا،میگزین کے ایڈیٹر ان چیف نے نے طنزیہ انداز میں لکھا کہ ڈیئر کیا آپ توقع کر رہے تھے کہ وہ پولیس افسر کا کردار دلہن کے لباس یا لان کے سوٹ کے ساتھ ادا کریں گی، کیونکہ کردار ہمیشہ رول کے مطابق لباس پہنتے ہیں، نہ کہ آپ کی بے وقوفانہ تخلیق کے مطابق۔

اس بیان پر ردِعمل دیتے ہوئے صبا قمر نے مزاحیہ انداز اپناتے ہوئے لکھا کہ اوہ خدایا! آج کل میں بہت زیادہ مشہور ہوگئی ہوں،جس کے ساتھ انہوں نے مسکراتے ہوئے ایموجیز بھی شامل کیے۔

واضح رہے کہ یہ درخواست وکیل آفتاب باجوہ نے شہری وسیم زوار کی جانب سے دائر کی ہے جس میں مؤقف اختیار کیا گیا ہے کہ کسی بھی فرد کو سرکاری اجازت کے بغیر پولیس کی وردی یا ایس پی کے عہدے کا بیج استعمال کرنے کی اجازت نہیں۔

مغربی بنگال کی معروف بنگالی گلوکارہ لگنجیتا چکرورتی کو ایک کنسرٹ کے دوران مبینہ طور پر ہراساں کیے جانے کا واقعہ پیش آیا، جس کے بعد سوشل میڈیا اور عوامی حلقوں میں شدید ردِعمل دیکھنے میں آیا ہے۔

یہ واقعہ مشرقی مدناپور کے بھگوان پور علاقے میں واقع ایک نجی اسکول میں پیش آیا، جہاں لگنجیتا چکرورتی اپنی لائیو پرفارمنس دے رہی تھیں۔ اطلاعات کے مطابق، ایک شخص نے اس وقت اسٹیج پر چڑھ کر ہنگامہ کیا جب گلوکارہ نے اپنا مشہور گانا "جاگو ماں” پیش کیا۔پولیس نے واقعے کے بعد فوری کارروائی کرتے ہوئے ایک شخص کو گرفتار کر لیا ہے۔ الزام ہے کہ اس شخص نے گلوکارہ کو اس بنیاد پر نشانہ بنایا کہ انہوں نے ایک "سیکولر” گانا گانے کے بجائے مبینہ طور پر "مذہبی” گانا پیش کیا۔عینی شاہدین کے مطابق، ملزم نے نہ صرف اسٹیج پر چڑھ کر بدتمیزی کی بلکہ گلوکارہ کو دھمکانے کی بھی کوشش کی۔

اس واقعے کے بعد گانے کے موضوع پر بھی بحث شروع ہو گئی۔ خود لگنجیتا چکرورتی اور گیت کے نغمہ نگار ریتم سین نے وضاحت پیش کی ہے کہ "جاگو ماں” کسی دیوی یا مذہبی عقیدے پر مبنی گانا نہیں ہے۔”لگنجیتا کے ساتھ جو کچھ ہوا وہ مکمل طور پر ناقابلِ قبول ہے۔ اس گانے کے بول کسی دیوی کے بارے میں نہیں ہیں بلکہ یہ ماں اور مادریت کے تصور پر مبنی ہے، جو نسوانی طاقت کی علامت ہے۔” یہ گانا آنے والی بنگالی فلم "دیوی چودھورانی” کی تشہیر کے لیے تیار کیا گیا ہے اور یہ فلمی کردار پر مبنی ہے، نہ کہ دیوی درگا پر۔

"دیوی چودھورانی” ایک تاریخی ڈرامہ فلم ہے جس کی ہدایت کاری سبھرجیت مترا نے کی ہے۔ فلم میں معروف اداکار پروسن جیت چٹرجی اور سربانتی چٹرجی مرکزی کردار ادا کر رہے ہیں۔ یہ فلم بنکم چندر چٹرجی کے مشہور ناول پر مبنی ہے۔

واقعے کو یاد کرتے ہوئے لگنجیتا چکرورتی نے بتایا "میں اپنا ساتواں گانا ختم کر چکی تھی اور آٹھواں شروع کرنے سے پہلے سامعین سے بات کر رہی تھی۔ میں نے ابھی ‘جاگو ماں’ گایا تھا اور اس کے بارے میں وضاحت دے رہی تھی کہ اچانک ایک شخص دوڑتا ہوا اسٹیج پر آیا۔ اس کے چہرے سے لگ رہا تھا کہ وہ مجھے مارنا چاہتا ہے۔””جب اسے اندازہ ہوا کہ وہ مجھے نقصان نہیں پہنچا سکتا تو اسے پیچھے کھینچا گیا۔ اسی دوران وہ چیختے ہوئے بولا، ‘بس بہت ہو گیا جاگو ماں، اب کوئی سیکولر گانا گاؤ’۔”

اس واقعے کے بعد فنکاروں، دانشوروں اور عام شہریوں نے اس حرکت کی شدید مذمت کی ہے۔ کئی لوگوں نے اسے فنکاروں کی آزادی اور اظہارِ رائے پر حملہ قرار دیا ہے اور مطالبہ کیا ہے کہ ایسے واقعات کے خلاف سخت کارروائی کی جائے۔

بالی وڈ کے معروف اداکار سیف علی خان نے حال ہی میں ایک انٹرویو کے دوران اپنی ذاتی زندگی سے متعلق ایک اہم اور کھلا اعتراف کرتے ہوئے بتایا ہے کہ اہلیہ کرینہ کپور کے ساتھ تعلقات کے ابتدائی دنوں میں وہ عدم تحفظ اور حسد جیسے جذبات کا شکار رہے۔

سیف علی خان کا کہنا تھا کہ اس دور میں ان کے لیے اس صورتحال کو سمجھنا آسان نہیں تھا، خاص طور پر اس وجہ سے کہ کرینہ کپور اُس وقت اپنے کیریئر کے عروج پر تھیں۔سیف علی خان نے بتایا کہ کرینہ کپور کے ساتھ ڈیٹنگ ان کے لیے ایک بالکل نیا اور مختلف تجربہ تھا۔ ماضی کے تعلقات کے برعکس کرینہ نہ صرف بالی وڈ کی سب سے بڑی اسٹارز میں شمار ہوتی تھیں بلکہ وہ مسلسل فلموں میں مصروف رہتی تھیں، جہاں انہیں مختلف اداکاروں کے ساتھ کام کرنا پڑتا تھا۔ کامیابی، شہرت اور عوامی توجہ کا یہ دباؤ سیف کے لیے ابتدا میں خاصا مشکل ثابت ہوا۔

اداکار نے اعتراف کیا کہ جب کرینہ دوسرے مرد اداکاروں کے ساتھ فلموں میں کام کرتی تھیں تو وہ اندرونی طور پر حسد اور عدم تحفظ محسوس کرتے تھے۔ سیف علی خان کے مطابق، اُس وقت یہ جذبات ان کے لیے الجھن کا باعث بنے رہے کیونکہ وہ اس قسم کے تعلقات کے عادی نہیں تھے، جہاں ان کی ساتھی زندگی کے ہر پہلو میں اس قدر نمایاں اور عوامی شخصیت ہو۔سیف علی خان نے انکشاف کیا کہ ایک موقع پر انہیں مشورہ دیا گیا کہ وہ اس صورتحال کو اس طرح دیکھیں جیسے وہ خود کسی ہیرو کو ڈیٹ کر رہے ہوں۔ ان کے بقول، یہ جملہ ان کے ذہن میں نقش ہو گیا۔ انہوں نے کہا کہ اس سوچ کے ساتھ انہیں یہ سمجھنے میں مدد ملی کہ فلمی دنیا میں کام کے دوران حریف اداکار بھی دراصل دوست بن جاتے ہیں، اور یہ ایک پیشہ ورانہ تقاضا ہے۔

انٹرویو کے دوران ایک سوال کے جواب میں سیف علی خان نے مزید کہا کہ اُس وقت ان تمام جذبات سے نمٹنے کے لیے پختگی، اعتماد اور وقت کی ضرورت تھی۔ ان کے مطابق، یہ تمام خوبیاں صرف سچی وابستگی، باہمی سمجھ بوجھ اور مضبوط رشتے کے ذریعے ہی پروان چڑھتی ہیں، جو وقت کے ساتھ ساتھ مضبوط ہوتا جاتا ہے۔

واضح رہے کہ کرینہ کپور اور سیف علی خان نے 2012 میں شادی کی تھی۔ آج یہ جوڑا بالی وڈ کے مقبول ترین اور مضبوط رشتوں میں شمار ہوتا ہے۔ ان کے دو بیٹے ہیں، جن میں بڑے بیٹے تیمور علی خان اور چھوٹے بیٹے جہانگیر علی خان شامل ہیں۔

ممبئی: بھارتی ڈرامہ انڈسٹری کے معروف اداکار انوج سچ دیوا اور ان کے پالتو کتے کے ساتھ پارکنگ تنازع کے دوران ایک شخص نے حملہ کر دیا ہے۔ یہ واقعہ بھارتی سوسائٹی میں پیش آیا، جس کی تصدیق اداکار نے خود انسٹاگرام پر ایک ویڈیو شیئر کر کے کی۔

انسٹاگرام پر پوسٹ کی گئی ویڈیو میں دیکھا جا سکتا ہے کہ ایک شخص غیر اخلاقی زبان استعمال کرتے ہوئے کہہ رہا ہے: "تو مجھے کتے سے کٹوائے گا؟” ویڈیو کے پس منظر میں کتے کے بھونکنے کی آوازیں بھی مسلسل سنائی دے رہی ہیں۔ویڈیو میں یہ بھی واضح ہے کہ حملہ آور شخص ایک ڈنڈا اٹھا کر انوج سچ دیوا کے سر پر مارتا ہے اور ساتھ ہی اداکار کو جان سے مار دینے کی دھمکیاں دے رہا ہے۔

اس ویڈیو کے وائرل ہونے کے بعد سوشل میڈیا صارفین نے انوج سچ دیوا کو قانونی کارروائی کرنے کی فوری ہدایت دی ہے۔ صارفین نے حملہ آور کے خلاف سخت قانونی کارروائی کرنے کے حق میں رائے دی ہے تاکہ آئندہ ایسے واقعات سے بچا جا سکے۔واضح رہے کہ انوج سچ دیوا بھارتی ڈراموں "یہ رشتہ کیا کہلاتا ہے” اور "نبھانا ساتھیا” میں اداکاری کے جوہر دکھا چکے ہیں اور بھارتی ٹی وی کی مشہور شخصیات میں شمار ہوتے ہیں۔

لاہور: فلم انڈسٹری کی معروف ہدایتکارہ سنگیتا سے بھتہ طلب کرنے، دھمکیاں دینے اور شوٹنگ کے دوران ہنگامہ آرائی پر شیراکوٹ تھانے میں مقدمہ درج کر لیا گیا ہے۔

پولیس کے مطابق ایک نامزد ملزم سمیت آٹھ افراد نے نہ صرف بھتہ طلب کیا بلکہ دھمکیاں دینے کے بعد شوٹنگ کا عمل بھی زبردستی رکوا دیا۔ یہ واقعہ اُس وقت پیش آیا جب سنگیتا اپنی پروڈکشن کی شوٹنگ میں مصروف تھیں۔ اسی دوران متعدد افراد وہاں پہنچے، عملے کو خوف و ہراس کا نشانہ بنایا، شوٹنگ کروانے سے منع کیا اور موقع پر توڑ پھوڑ بھی کی۔ اس ہنگامہ آرائی کے نتیجے میں نہ صرف قیمتی آلات متاثر ہوئے بلکہ پروڈکشن کو مالی نقصان بھی اٹھانا پڑا۔پولیس حکام کا کہنا ہے کہ واقعے کا مقدمہ درج کر کے تفتیش شروع کر دی گئی ہے جبکہ نامزد اور نامعلوم ملزمان کی گرفتاری کے لیے چھاپے مارے جا رہے ہیں۔ تھانے کے مطابق ملزمان کو جلد از جلد گرفتار کیا جائے گا تاکہ ہدایتکارہ اور ان کی ٹیم کو انصاف فراہم کیا جا سکے۔