Category: شوبز

اداکار بابر علی کی جانب سے حال ہی میں اپنی بیٹی کے ساتھ اپنے پرانے گانے پر بنائی گئی ویڈیو شئیر کی گئی ہے جو انٹرنیٹ پر خوب وائرل وہ رہی ہے-

باغی ٹی وی : بابر علی نے بیٹی زینب علی کے ہمراہ اپنے انسٹاگرام اکاؤنٹ پر اپنی پہلی فلم ’جیوا‘ کے معروف گانے ’جانو سن ذرا‘ پر بنائی گئی ویڈیو کو شیئر کیا، جسے صارفین کی جانب سے کافی پسند کیاجا رہا ہے –

ویڈیو کو شیئر کرتے ہوئے بابر علی نے لکھا کہ ان کی پہلی فلم کے پہلے گانے ’جانو سن ذرا‘ پر وہ اپنی بیٹی کے ہمراہ پرفارمنس کر رہے ہیں۔

انہوں نے بتایا کہ ’جانو سن ذرا‘ کو انہوں نے اداکارہ ریشم کے ساتھ فلمایا تھا اور انہیں پرانے گانے پر دوبارہ پرفارمنس کا مزہ آگیا۔

بعد ازاں بابر علی نے بیٹی کے ہمراہ ’جانو سن ذرا‘ کی ویڈیو بنانے کی ریہرسل کی ویڈیو بھی شیئر کی اور اسے بھی مداحوں نے کافی سراہا۔

واضح رہے کہ بابر علی نے پی ٹی وی کے معروف ڈرامے ’لبیک‘ سے کیریئر کا آغاز کیا تھا، جس میں انہوں نے مسلم سپہ سالار محمد بن قاسم کا کردار ادا کیا تھا۔اس کے بعد بابر علی ’بابر‘ ڈرامے میں مغل بادشاہ کے کردار میں دکھائی دیئے، جس کے بعد انہوں نے پی ٹی وی پر متعدد ڈرامے کرنے کے بعد 1995 میں سید نور کی فلم ’جیوا‘ سے فلمی سفر کا آغاز کیا تھا۔’جیوا‘ میں بابر علی کے ہمراہ ریشم نے مرکزی کردار ادا کیا تھا اور ان کی اسی فلم کے گانے ’جانو سن ذرا‘ نے مقبولیت کے نئے ریکارڈز بنائے تھے۔

بابر علی ان دنوں چھوٹی اسکرین پر دکھائی دیتے ہیں اور حال ہی میں ریلیز ہونے والے ڈرامے ’عشق ہے‘ میں ان کی پرفارمنس کو سراہا جا رہا ہے امکان ہے کہ جلد ہی سید نور کی پنجابی فلم ’تیرے باجرے دی راکھی‘ میں دکھائی دیں گے مذکورہ فلم میں ان کے ہمراہ ٹک ٹاک اسٹار جنت مرزا بھی دکھائی دیں گی علاوہ ازیں بابر علی لولی وڈ فلم ’دی لیجنڈ آف مولا جٹ‘ میں بھی ماہرہ خان، فواد خان اور حمزہ علی عباسی کے ہمراہ ایکشن میں دکھائی دیں گے۔

اداکارہ و میزبان ریما خان کا کہنا ہے کہ خلیل الرحمان قمرکے لہجے میں کڑواہٹ ہے لیکن یہ اپنے قلم سے ایماندارہیں فلم کی کہانی لکھوانے کے لیے 4 سال سے انتظارکررہی ہوں۔

باغی تی وی : معروف مصنف اورہدایتکارخلیل الرحمان قمرکے ہمراہ ایک انٹرویومیں ریما نے کہا کہ لمبا دھاگا اورلمبی زبان ہمیشہ الجھ جاتی ہے اس لئے دھاگا لپیٹ کراورزبان سمیٹ کررکھنی چاہیے، خلیل الرحمان قمرکی زبان سمیٹ دی گئی توان کے قلم سے نکلنے والے خزانے اس اندازسے ہم تک نہیں پہنچیں گے جیسا ہم دیکھنا چاہتے ہیں۔

ریما خان کا کہنا تھا کہ ایک اداکارہ کی حیثیت سے خلیل الرحمان قمر کے ساتھ کام کیا ہے، خلیل الرحمان سے انہیں سیکھنے کا موقع ملا ہے، ان کی سب سے اچھی بات یہ ہے کہ وہ بہت اچھا لکھتے ہیں اور سب سے بُری بات یہ ہے کہ پرفیکشنسٹ ہیں، جب تک مطمئن نہیں ہوتے اسے چھوڑتے نہیں-

ریما نے کہا کہ خلیل الرحمان دل سے کام کرتے ہیں اس لئے کبھی کبھی ان کی زبان سے کوئی بات نکل جائے تو اسے نظر انداز کردینا چاہیے کیونکہ کوئی بھی کامل نہیں، یہ صفت صرف اللہ کی ہے۔

اداکارہ نے کہا کہ خلیل الرحمان قمرسے میری لڑائیاں بھی ہوتی ہیں لیکن ہمارے درمیان ایک تعلق ہمیشہ رہتا ہے میں ان کے انداز کو سمجھ گئی ہوں یہ منہ کے بڑبولے ہیں لیکن ان کی بڑبڑاہت معیوب نہیں لگتی۔

انہوں نے کہا کہ خلیل الرحمان قمرکے لہجے میں کڑواہٹ ہے لیکن یہ اپنے قلم سے ایماندارہیں خلیل الرحمان قمر سے 17 سال کا تعلق ہے میں ان کا 4 سال سے انتظار کررہی ہوں میں نے انہیں کہہ رکھا ہے کہ اپنی فلم کی کہانی ان ہی سے لکھواؤں گی-

پاکستانی اداکارہ و تمغۂ امتیاز مہوش حیات نے وزیراعظم عمران خان کے خواتین کے لباس کے حوالے سے بیان کے خلاف بولتے ہوئے کہا ہے کہ مسئلہ خواتین کے لباس میں نہیں بلکہ مردوں کے دماغ میں ہے۔

باغی ٹی وی :سوشل میڈیا پر مہوش حیات کے ایک انٹرویو کی ویڈیو کلپ وائرل ہورہی ہے وائرل ہونے والی ویڈیو کلپ میں مہوش حیات وزیراعظم عمران خان کے خواتین کے لباس کے حوالے سے بیان کے خلاف بولتے ہوئے کہتی ہیں کہ ’مسئلہ خواتین کے لباس میں نہیں ہے بلکہ ہمارے مردوں کی سوچ اور دماغ میں ہے۔

مہوش حیات نے کہا کہ ’ہمیں جس پر کام کرنے کی ضرورت ہے وہ مردوں کی ذہنی سوچ کو تبدیل کرنا ہے مغربی ممالک میں خواتین ہر طرح کا لباس زیب تن کرتی ہیں اور وہاں وہ محفوظ بھی ہیں میں مغربی ممالک میں خود کو محفوظ سمجھتی ہوں کیونکہ وہاں کوئی مرد گُھور گُھور کر نہیں دیکھتا۔

مہوش حیات نے اپنی ایک فلم کا حوالہ دیتے ہوئے کہا کہ میں نے اور میرے ساتھی اداکار نے فلم کے ایک سین میں برقع پہنا ہوا تھا اور ہم بازار میں تھے جہاں مرد ہمیں دیکھ رہے تھےاُس سین کے بعد واضح ہوا کہ حقیقت میں مسئلہ خواتین کے لباس کا نہیں ہے بلکہ مردوں کی سوچ کا ہے جو ہمیں ٹھیک کرنے کی ضرورت ہے۔

واضح رہے کہ وزیر اعظم عمران خان کا خواتین پر جنسی تشدد سے متعلق کہنا تھا کہ مرد کوئی روبوٹ نہیں، اگر عورت کپڑے کم پہنے گی تو اس کا اثر تو ہو گا اس سوال پر کہ کیا واقعی خواتین کے لباس کا چناؤ اُن پر جنسی تشدد کی وجہ ہے؟ وزیر اعظم کا کہنا تھا کہ اس کا انحصار اس بات پر ہے کہ آپ کس معاشرے میں رہتے ہیں۔

ٹک ٹاکر حریم شاہ نے ترکی کے ایک کیفے میں اپنی شیشہ پینے کی ویڈیو سوشل میڈیا پر شئیر کی ہے جو تیزی سے وائرل ہو رہی ہے ۔

باغی ٹی وی : ٹک ٹاکر حریم شاہ سوشل میڈیا پر کافی متحرک رہتی ہیں اپنی نئی نئ تصویریں اور ویڈیوز مداحوں کے ساتھ شئیر کرتی رہتی ہیں جہان ان کی ویڈیوز اور تصویروں کوسراہا جاتا ہے وہیں کئی صارفین تنقید کا نشانہ بھی بناتے ہیں-

تاہم حریم شاہ نے اپنے آفیشل انستاگرام اکاؤنٹ پر ایک نئی ویڈیو شئیر کی ہے جس میں 29سالہ حریم شاہ اپنے ہنی مون پر ترکی میں موجود ہیں ، سرخ لباس پر سفید اور سیاہ دھاری دار ڈیزائن کا سوٹ زیب تن کئے ہوئے خوبصورت نظر آرہی ہیں اور شیشہ پی رہی ہیں ۔

حریم شاہ کی اس ویڈیو کو جہاں پسند کیا جا رہا ہے وہیں کچھ مداح ان کے شیشہ پینے پر خفا بھی ہیں اور عمل کو شرمناک قرار دے رہے ہیں ۔

واضح رہے کہ حریم شاہ نے گزشتہ دنوں اپنی شادی سندھ کے ایک وزیر سے ہونے کا دعویٰ کیا تھا جس کے بعد یہ معاملہ سوشل میڈیا کی زینت بن گیا اور حریم شاہ کا نام سندھ کے ہر وزیر کے ساتھ لیا جانے لگا ، معاملہ اس قدر بڑھ گیا کہ خود چیئرمین پاکستان پیپلزپارٹی کو بیان دینا پڑ گیا-

انہوں نے اسلما آبد میں پریس کانفرنس کے بعد اس حوالے سے پوچھے گئے سوال پر مسکراتے ہوئے کہا تھا کہ یہ شوشہ ہے شوشہ، مسائل سے توجہ ہٹانے کیلئے اس قسم کی باتیں لے آتے ہیں، یہ سب ایسے ہی ہے ایسی حرکتوں کی کوئی حیثیت نہیں ہے اور نہ ہی اسی قسم کی کوئی بات ہوئی ہے۔

نامور کامیڈین اطہر شاہ خان عرف جیدی کے مداح آج ان کی سالگرہ منا رہے ہیں۔

باغی ٹی وی : اطہر شاہ خان عرف جیدی 26 جولائی 1943 کو بھارتی شہر رامپور میں پیدا ہوئے تھے ۔ آپ 1947 میں خاندان کے ساتھ لاہور اور 1957 میں کراچی منتقل ہوئے۔

ابتدائی تعلیم لاہور سے حاصل کرنے کے بعد سیکنڈری تک پشاور میں زیر تعلیم رہے جبکہ کراچی کے اُردو سائنس کالج سے گریجویشن کیا اور بعد ازاں انہوں نے پنجاب یونیورسٹی سے صحافت میں ماسٹرز کیا۔

اطہر شاہ خان جیدی کا شمار ٹیلی ویژن کے ابتدائی ڈرامہ نگاروں اور فن کاروں میں کیا جاتا ہے۔ اطہر شاہ شاعر بھی تھے اور اپنی مزاحیہ شاعری میں بھی ان کا تخلص جیدی تھا ڈرامہ سیریل انتظار فرمائیے میں جیدی کے کردار نے انہیں شہرت کی بلندیوں تک پہنچا دیا اور لوگ انہیں جیدی کے نام سے ہی پکارنے لگے-

اطہر شاہ خان کی سپرہٹ ڈرامہ سیریلز میں انتظار فرمائیے، ہیلو ہیلو، جانے دو، برگر فیملی، آشیانہ، آپ جناب، جیدی اِن ٹربل، پرابلم ہائوس، ہائے جیدی، کیسے کیسے خواب، بااَدب با ملاحظہ ہوشیار اور دیگر ڈرامے شامل ہیں۔

بطور لکھاری، جیدی کے نام سے کئی فلمیں جڑی ہیں، ان کی پہلی فلم بازی، سپر ہٹ ثابت ہوئی، جس میں فلمسٹار ندیم اور محمد علی پہلی بار آمنے سامنے آئے اور اس میں اداکارہ نشو کو بھی متعارف کرایا گیا۔ جبکہ ان کی دیگر فلموں میں گونج اٹھی شہنائی، ماں بنی دلہن، منجی کتھے ڈھاواں شامل ہیں۔

ریڈیو پاکستان سے سفر کا آغاز کرنے والے اطہر علی شاہ عرف جیدی نے لگ بھگ بیس برسوں میں سات سو ڈرامے لکھے، 70 اور 80 کی دہائی میں پاکستان میں مزاح نگاری کی دنیا پر ان کا راج تھا۔ پی ٹی وی پر ان کے ڈرامے انتظار فرمائیے، با ادب باملاحظہ ہوشیار، لاکھوں میں تین، پہلے دیکھنے والوں کی زندگی اور پھر یادوں کا حصہ بن گئے۔

سال 2001 میں اطہر شاہ خان جیدی کو حکومت پاکستان کی جانب سے پرائیڈ آف پرفارمنس ایوارڈ سے نوازا گیا، پاکستان ٹیلی ویژن نے جب اپنی سلور جوبلی منائی تو اطہر شاہ خان جیدی کو گولڈ میڈل عطا کیا۔

اطہر شاہ گزشتہ سال 10 مئی کو 77 سال کی عمر میں طویل علالت کے بعد کراچی میں انتقال کر گئے تھے۔

پاکستانی اداکارہ کبریٰ خان نے انکشاف کیا ہے کہ اُنہیں ڈرامہ سیریل ’میرے پاس ہو تم‘ میں انہیں ‘ہانیہ ‘ کے کردار کی آفر ہوئی تھی-

باغی ٹی وی : حال ہی میں کبریٰ خان نے اداکار و میزبان احسن خان کے شو میں شرکت کی جس میں انہوں نے انکشاف کیا کہ انہیں بلاک بسٹر ڈرامہ سیریل ” میرے پاس تم ہو” میں کام کرنے کی آفر ہوئی تھی تاہم انہوں نے انکار کر دیا تھا-

احسن خان کی جانب سے پوچھے گئے سوال کہ کیا آپ نے ڈرامہ سیریل میرے پاس تم ہو کا ایک کردار ادا کرنے سے انکار کیا تھا جو کہ بعد میں حرا مانی کو آفر کیا گیا تھا؟ کا جواب دیتے ہوئے کبریٰ خان نے کہا کہ جس دوران اُنہیں اس کردار کی آفر ہوئی اُس دوران انہوں نے اداکاری سے تھوڑا بریک لیا ہوا تھا، وہ اُس دوران کام نہیں کر رہی تھیں اور وہ کام کرنا بھی نہیں چاہ رہی تھیں اس لیے انہوں نے اس کردار سے انکار کر دیا تھا۔

کبریٰ خان نے مزید کہا کہ ایک اور اہم وجہ یہ بھی تھی کہ انہیں اپنے اندر سے ہاں کی آواز ہی نہیں آئی تھی، اداکاروں کو جب کوئی کردار آفر ہوتا ہے تو وہ اُس کردار کو نبھانا چاہتے ہیں مگر انہیں آفر ہونے والے کردار کے لیے اپنے اندر سے کسی قسم کا کوئی سگنل ہی نہیں ملا تھا کہ وہ اس کردار کو ادا کرنے کی حامی بھرتیں۔

واضح رہے کہ اس سے قبل ادکارہ عروہ حسین نے بھی انکشاف کیا تھا کہ انہیں بھی مذکورہ کردار کی آفر ہوئی تھی جس کے انہوں نے چند مناظر قلمبند کروائے بھی تھے لیکن اپنی فلم کی شوٹنگ کی وجہ سے انہیں یہ کردار چھوڑنا پڑا جس کا انہیں زندگی بھر افسوس رہے گا-

خیال رہے کہ مذکورہ ڈرامے میں’ہانیہ’ کا کردار معروف اداکارہ حرا مانی نے ادا کیا تھا-