Category: سندھ

سندھ پولیس نے کراچی میں قتل ہونے والے نوجوان میر رضا کے کیس میں تحقیقات کے حوالے سے پہلی پریس ریلیز جاری کی گئی ہے-

سندھ پولیس کی جانب سے جاری میر رضا قتل کیس پر پہلی پریس ریلیز میں بتایا گیا ہے کہ تاجر میر رضا کیس میں سندھ پولیس کی اعلیٰ سطح کی ٹیم کی تحقیقات جاری ہے اور تحقیقاتی ٹیم طبی رپورٹس، ڈیجیٹل شواہد اور سابقہ تحقیقاتی کارروائی کا باریک بینی سے جائزہ لے رہی ہے۔

پریس ریلیز میں کہا گیا ہے کہ مقتول کے اہل خانہ، حلقہ احباب اور دیگر متعلقہ ذرائع سے حاصل معلومات کو بھی تحقیقات کا حصہ بنایا جا رہا ہے، تحقیقاتی ٹیم کو اب تک دو پوسٹ مارٹم، ایک حتمی اور تین کیمیائی تجزیاتی رپورٹس موصول ہوچکی ہیں، آخری کیمیائی تجزیاتی رپورٹ 17 اگست کو موصول ہوئی، رپورٹس کا تقابلی اور تنقیدی جائزہ جاری ہے۔

ترجمان سندھ پولیس نے بتایا کہ رپورٹس کے جائزے میں بعض نکات پر مزید وضاحت اور باہمی مطابقت کی ضرورت محسوس ہوئی ہے، متعلقہ حکام اور اداروں سے مطلوبہ معلومات اور مزید تصدیق کا عمل جاری ہے موبائل فون اور اسمارٹ واچ کے ڈیٹا کے تجزیے کے لیے پنجاب فرانزک سائنس ایجنسی اور ڈیجیٹل کرنسی سے متعلق امور کی تحقیقات کے لیے این سی سی آئی اے سے رابطہ کیا گیا، اسی طرح موبائل فون ان لاک کرنے کے لیے ایپل حکام سے بھی رابطہ کیا گیا ہے۔

ترجمان نے بتایا کہ کیمیائی تجزیاتی رپورٹ کے غیر واضح نکات کی وضاحت سے تحقیقات میں اہم پیش رفت متوقع ہے، تحقیقاتی ٹیم تکنیکی، ڈیجیٹل، فرانزک اور دیگر قابل اعتماد شواہد کی بنیاد پر روزانہ تحقیقات آگے بڑھا رہی ہے۔

درندہ صفت ملزمان نے ٹنڈوالہ یار میں12 سالہ بچی کو ہوس کا نشانہ بنا ڈالا۔

پولیس کے مطابق ٹنڈو الہ یار میں گزشتہ شب لاپتا ہونے والی 12 سالہ بچی رومی شہباز کالونی کے ایک مکان سے بازیاب کرالی گئی، پولیس کا کہنا ہے کہ بچی کو مبینہ طور پر نشہ آور چیز کھلا کر زیادتی کا نشانہ بنایا گیا،واقعے میں دو نوجوانوں کو گرفتار کرلیا گیا ہے جبکہ بچی کو طبی معائنے کے لیے سول اسپتال منتقل کردیا گیا۔

ٹنڈو الہ یار میں 12 سالہ بچی کے لاپتا ہونے کے بعد پولیس نے کارروائی کرتے ہوئے اسے شہباز کالونی کے ایک مکان سے بازیاب کرلیا،پولیس کے مطابق اہل محلہ نے مکان سے بچی کی چیخ وپکار کی آوازیں سن کر پولیس کو اطلاع دی، جس پر پولیس فوری طور پر موقع پر پہنچی اور بچی کو بازیاب کرلیا۔

اہل محلہ کا کہنا ہے کہ ملزمان بچی کو کسی دوسری جگہ منتقل کرنے کی کوشش کررہے تھے تاہم بچی کے ہوش میں آنے کے بعد چیخ وپکار سے اہل محلہ جمع ہوگئے،پولیس نے مکان میں موجود دو نوجوان ایاز لوند اور عارف زرداری کو گرفتار کرکے مزید تفتیش کا آغاز کر دیا ہے، ایس ایس پی ٹنڈو الہ یار سلیم شاہ کے مطابق واقعے میں ملوث ملزمان کے خلاف سخت قانونی کارروائی کی جائے گی۔

وومن تھانے میں بچی کے والد ساجد علی کی مدعیت میں مقدمہ درج کر لیا گیا ہے، دو ملزمان عارف زرداری، ایاز لوند اور ایک نامعلوم خاتون کے خلاف مقدمہ درج کیا گیا ہے، ملزمان کے خلاف اغواء، تشدد اور زیادتی کی متعدد دفعات کے تحت مقدمہ درج کیا گیا ہے،ایس ایس پی ٹنڈوالہیار سید سلیم شاہ کی ہدایت پر واقعے کی شفاف تحقیقات کے لیے JIT تشکیل دے دی گئی۔

سندھ کابینہ نے وزیراعلیٰ سید مراد علی شاہ کی قیادت میں مؤثر، شفاف اور جدید پبلک پرائیویٹ پارٹنرشپ (پی پی پی) فریم ورک کے قیام کی جانب اہم پیش رفت کرتے ہوئے پی پی پی یونٹ کی تنظیمِ نو کی منظوری دے دی۔

کابینہ نے پی پی پی یونٹ کو مکمل سرکاری ملکیت کی پرائیویٹ لمیٹڈ کمپنی میں تبدیل کرنے کی بھی منظوری دی، جس کا مقصد ادارہ جاتی صلاحیت، منصوبوں پر عملدرآمد اور مالیاتی پائیداری کو مضبوط بنانا ہےوزیراعلیٰ سندھ کے مطابق نئی کمپنی کمپنیز ایکٹ 2017ء کے تحت قائم کی جائے گی اور موجودہ پی پی پی یونٹ کی جانشین ہوگی نئی کمپنی پی پی پی پالیسی سازی، گورننس، منصوبوں کی سہولت کاری اور پورٹ فولیو مینجمنٹ کی ذمہ دار ہوگی، جبکہ تنظیمِ نو کے ذریعے پی پی پی منصوبوں کی نگرانی کو مزید مؤثر اور جدید بنایا جائے گا۔

سندھ کابینہ نے نئی پی پی پی کمپنی کے لیے 8 ارب روپے مجاز سرمایہ، 2 ارب روپے ادا شدہ سرمایہ اور کمپنی کے قیام کے لیے 50 کروڑ روپے بطور ابتدائی سرمایہ فراہم کرنے کی منظوری بھی دے دی کابینہ نے کمپنی کے قیام سے متعلق تمام قانونی اور انتظامی مراحل مکمل کرنے کا اختیار محکمہ خزانہ کو سونپ دیا، جبکہ موجودہ ڈائریکٹر جنرل پی پی پی یونٹ نئی کمپنی کے پہلے چیف ایگزیکٹو آفیسر (سی ای او) ہوں گے۔

کابینہ نے سندھ پبلک پرائیویٹ پارٹنرشپ ایکٹ میں مجوزہ ترامیم کی بھی منظوری دے دی وزیراعلیٰ سندھ کا کہنا ہے کہ ان ترامیم سے پی پی پی نظامِ حکمرانی کو مزید مضبوط قانونی بنیاد ملے گی، صوبے بھر میں پی پی پی منصوبوں کی نگرانی اور شفافیت مزید مؤثر ہوگی، نجی سرمایہ کاری کو فروغ ملے گا اور ترقیاتی منصوبوں کی رفتار تیز ہوگی،سندھ حکومت پبلک پرائیویٹ پارٹنرشپ کے نظام کو مزید مؤثر، پائیدار اور سرمایہ کار دوست بنا رہی ہے، جبکہ ان اصلاحات سے انفراسٹرکچر اور دیگر ترقیاتی منصوبوں کی بروقت تکمیل میں بھی مدد ملے گی۔

سندھ حکومت نے یلو لائن بی آر ٹی منصوبے کی بروقت تکمیل کے لیے کام کی رفتار بڑھانے کی ہدایات جاری کردیں۔

سینئر صوبائی وزیر شرجیل انعام میمن کی زیر صدارت محکمہ ٹرانسپورٹ کا اہم اجلاس منعقد ہوا، جس میں سیکریٹری ٹرانسپورٹ اسد ضامن، یلو لائن بی آر ٹی کے پراجیکٹ ڈائریکٹر کمال دایو اور دیگر متعلقہ حکام نے شرکت کی،اجلاس میں یلو لائن بی آر ٹی منصوبے کےتعمیراتی کام کا تفصیلی جائزہ لیا گیا اور منصوبے پر پیش رفت مزید تیز کرنے کا فیصلہ کیا گیا۔

اجلاس میں یلو لائن منصوبے کے حکام نے شرجیل انعام میمن کو مختلف حصوں پر جاری تعمیراتی کام سے متعلق تفصیلی بریفنگ دی، جس میں بتایا گیا کہ تعمیراتی سرگرمیاں منصوبہ بندی کے مطابق جاری ہیں اور توقع ہے کہ آئندہ سال کی پہلی سہ ماہی میں منصوبے کے ڈپوز مکمل ہو جائیں گے۔

شرجیل میمن نے سندھ حکومت کی جانب سے منصوبے کی بروقت تکمیل کے لیے تمام یوٹیلٹی رکاوٹیں پیشگی بنیادوں پر دور کرنے کے احکامات جاری کیے انہوں نے متعلقہ اداروں کو ہدایت کی کہ تاخیر سے بچنے کے لیے یوٹیلٹی شفٹنگ، ری لوکیشن اور اس سے متعلق تمام اقدامات فوری اور ترجیحی بنیادوں پر مکمل کیے جائیں، منصوبے کی رفتار ہر صورت برقرار رکھی جائے اور تمام رکاوٹیں فوری طور پر دور کی جائیں تاکہ تکمیل میں کسی قسم کی تاخیر نہ ہو۔

انہوں نے تمام متعلقہ اداروں کو باہمی تعاون اور مؤثر رابطہ کاری کے ذریعے درپیش مسائل فوری حل کرنے کی بھی ہدایت دی، شرجیل انعام میمن نے عوام کو دشواریوں سے بچانے کے لیے تاج حیدر پل کے دوسرے حصے کا کام بھی جلد مکمل کرنے کے احکامات جاری کیے یلو لائن بی آر ٹی کراچی کے عوام کے لیے ایک اہم عوامی منصوبہ ہے اور اس کی بروقت تکمیل سندھ حکومت کی اولین ترجیحات میں شامل ہے۔

دادو: ضلع دادو کے شہر میہڑ میں اسکول جانے والی تین طالبات سمیت مجموعی طور پر پانچ لڑکیاں غائب،ہوگئیں،جس کے بعد علاقے میں تشویش کی لہر دوڑ گئی۔

پولیس ذرائع کے مطابق لاپتا ہونے والی طالبات میں فاطمہ جانوری، روشنی تیونو اور تنزیلہ پنہور شامل ہیں، جو آٹھویں جماعت کی طالبات اور گورنمنٹ گرلز ہائر سیکنڈری اسکول کی طالبات ہیں میہڑ سے بروہی برادری کی دو مزید نوجوان لڑکیوں کے بھی لاپتا ہونے کی اطلاعات موصول ہوئی ہیں جس کے بعد شہر سے مجموعی طور پر پانچ لڑکیوں کی گمشدگی سامنے آئی ہے۔

پولیس ذرائع کے مطابق تمام واقعات کی تحقیقات جاری ہیں اور مختلف پہلوؤں سے شواہد اکٹھے کیے جا رہے ہیں،واقعے کا آئی جی سندھ جاوید عالم اوڈھو نے سخت نوٹس لیتے ہوئے متعلقہ حکام سے فوری رپورٹ طلب کر لی ہے۔ پولیس ذرائع کے مطابق تمام پہلوؤں کا جائزہ لیا جا رہا ہے اور خصوصی ٹیمیں بچیوں کی تلاش میں مصروف ہیں۔

دوسری جانب ایس ایس پی دادو نے کہا ہے کہ معصوم بچیوں کی گمشدگی میں ملوث عناصر کو جلد قانون کی گرفت میں لایا جائے گا اور واقعے کی مکمل تحقیقات کی جا رہی ہیں۔