پاکستان کے سابق کپتان شاہد آفریدی نے آسٹریلیا کے خلاف سیریز جیتنے پر قومی کرکٹ ٹیم کو مبارکباد دیتے ہوئے کپتان سلمان علی آغا کی خصوصی تعریف کی ہے۔
شاہد آفریدی کا کہنا تھا کہ سلمان آغا نے بطور کپتان فرنٹ سے لیڈ کیا اور ان کی حالیہ فارم اور مثبت انداز ٹیم کے لیے ایک بڑا اثاثہ ہے۔ انہوں نے امید ظاہر کی کہ یہی تسلسل ٹی ٹوئنٹی ورلڈ کپ تک برقرار رہے گا۔
سابق کپتان نے کہا کہ آنے والے اہم اور دباؤ والے مقابلوں میں اسپنرز کا کردار نہایت اہم ہوگا اور ان پر بڑی ذمہ داری عائد ہوگی۔
شاہد آفریدی نے گرین شرٹس کی شاٹس سلیکشن کو بھی سراہتے ہوئے کہا کہ ٹیم نے مجموعی طور پر سمجھداری اور اعتماد کے ساتھ کھیل پیش کیا، جو کامیابی کی بڑی وجہ بنا۔
Category: کھیل
آسٹریلیا کے خلاف سیریز جیتنے پر شاہد آفریدی کی قومی ٹیم کو مبارکباد، سلمان آغا کی قیادت کی تعریف
تیسرا ٹی20: پاکستان کا آسٹریلیا کو جیت کے لیے 208 رنز کا ہدف
پاکستان نے ٹی20 سیریز کے آخری میچ میں آسٹریلیا کو جیت کے لیے 208 رنز کا ہدف دیا ہے۔
آج کا میچ لاہور کے قذافی اسٹیڈیم میں کھیلا جا رہا ہے جہاں قومی ٹی20 کرکٹ ٹیم کے کپتان سلمان آغا نے ٹاس جیت کر پہلے بیٹنگ کا فیصلہ کیا آسٹریلیا کے خلاف پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 207 رنز بنائے۔
ابتدائی اوورز میں فخر زمان 7 گیندوں پر 10 رنز بنا کر آؤٹ ہوئے۔ سلمان آغا صرف 3 گیندوں پر 5 رنز بنا سکے، تاہم صائم ایوب نے شاندار جارحانہ بیٹنگ کرتے ہوئے 37 گیندوں پر 56 رنز بنائے، جس میں 6 چوکے اور 2 چھکے شامل تھے،بابراعظم نے 36 گیندوں پر 50 رنز بنائے اور ناٹ آؤٹ رہے خواجہ نافے نے 12 گیندوں پر 21 رنز بنائے شاداب خان نے 19 گیندوں پر 46 رنز کی جارحانہ اننگز کھیل کر پاکستان کو 200 رنز کے قریب پہنچایا فہیم اشرف نے 4 گیندوں پر 10 رنز بنا کر اننگز کا اختتام کیا۔
آسٹریلوی بولرز میں بین دوروشوئیس نے سب سے زیادہ 2 وکٹیں حاصل کیں، جبکہ میتھیو کوہن مین، میتھیو شارٹ، کوپر کونوولی اور کیمرون گرین نے ایک ایک وکٹ حاصل کی۔
انڈر 19ورلڈ کپ: بھارت کی پاکستان کیخلاف بیٹنگ جاری
انڈر 19ورلڈ کپ کے انتہائی اہم میچ میں پاکستان نے بھارت کیخلاف ٹاس جیت کر فیلڈنگ کا فیصلہ کیا ہے۔
پاکستان ٹیم کی قیادت فرحان یوسف کررہے ہیں اور بھارتی ٹیم ایوش مہاترے کی کپتانی میں میدان میں اتری ہے،اس موقع قومی ٹیم کے کپتان فرحان یوسف نے بات کرتے ہوئے کہا کہ پچ پر نمی کی وجہ سے فیلڈنگ کا فیصلہ کیا ، یہ نیا گراؤنڈ ہے لیکن ہماری تیاری پوری ہے، اچھی کرکٹ کھیلنے کی کوشش کریں گے۔
کپتان قومی ٹیم فرحان یوسف نے کہا کہ ہرارے اور اس گراؤنڈ میں زیادہ فرق نہیں ، ہم اچھا کھیلیں گے،گزشتہ 3سے 4میچز میں کھلاڑیوں نے اچھی پرفارمنس دکھائی ہےہمارے کھلاڑیوں نے اچھا کھیلا ہے،علی رضا اور سبحان نے بہت اچھی بالنگ کی ہے۔
پاکستان کو سیمی فائنل میں رسائی کیلئے بڑے مارجن سے میچ جیتنا ہوگا جبکہ اگر بھارت پاکستان انڈر 19 ٹیم کو کسی بھی مارجن سے مات دیتا ہے تو سیدھا سیمی فائنل میں پہنچ جائے گا۔ انگلینڈ، افغانستان اور آسٹریلیا پہلے ہی فائنل 4 کا ٹکٹ کٹوا چکے ہیں۔
پاکستان ورلڈ کپ کھیلے گا یا نہیں، فیصلہ آج ہونے کا امکان ، پلان بی بھی تیار
پاکستان آئی سی سی ٹی ٹوئنٹی ورلڈ کپ کھیلے گا یا نہیں، فیصلہ آج ہونے کا امکان ہے۔
ذرائع کے مطابق پاکستان کرکٹ ٹیم کا ورلڈ کپ میں شرکت کرنے یا نہ کرنے کا فیصلہ آج متوقع ہے چیئرمین پی سی بی محسن نقوی کی آج شام وزیر اعظم شہباز شریف سے ملاقات ہونے کی توقع ہےچیئرمین پی سی بی کی وزیر اعظم سے ملاقات کے بعد آج فیصلہ ہونے کا امکان ہے اگر پاکستان ورلڈ کپ میں شرکت نہیں کرتا تو پلان بی بھی تیار کر لیا گیا ہے۔
ذرائع کے مطابق پاکستان کرکٹ ٹیم شاہینز اور انڈر 19 ٹیم کو چار ٹیموں میں تقسیم کر کے لاہور میں ٹورنامنٹ کروانے کی تجویز دی گئی ہے اگر پاکستان آئی سی سی ٹی ٹوئنٹی ورلڈ کپ میں شرکت کرتا ہے تو اس کے بعد آفیشل کٹ کی رونمائی تقریب ہو گی۔
ترکیہ، پاک سعودی کسی بھی مشترکہ دفاعی معاہدے میں شامل نہیں ہوگا، اے ایف پی
پاکستان میں دہشت گردی: عالمی برادری کی خاموشی اور خطے کو لاحق خطرات،تجزیہ شہزاد قریشی
دہشتگردی پاکستانی قوم کے عزم کو متزلزل نہیں کر سکتی،سہیل آفریدی
آسٹریلیا کیخلاف تاریخی فتح ،چئیرمین پی سی بی ،صدر اور وزیراعظم کی قومی ٹیم کومبارکباد
آسٹریلیا کے خلاف ٹی 20 سیریز میں شاندار فتح پر چئیر مین پی سی بی محسن نقوی، صدرِ مملکت آصف علی زرداری اور وزیراعظم شہباز شریف نے قومی کرکٹ ٹیم کو دل کی گہرائیوں سے مبارکباد دی ہے۔
صدر مملکت نے اپنے پیغام میں کھلاڑیوں کی بہترین کارکردگی، عمدہ حکمت عملی اور ٹیم ورک کو سراہتے ہوئے کہا کہ قومی ٹیم نے پوری قوم کے دل جیت لیے ہیں،انہوں نے چیئرمین پاکستان کرکٹ بورڈ محسن نقوی کی قیادت کو بھی سراہا اور کوچز، کھلاڑیوں اور تمام سپورٹنگ اسٹاف کی محنت اورعزم کوخراجِ تحسین پیش کیا، صدر آصف زرداری نے آئندہ میچزمیں بھی قومی ٹیم کی کامیابیوں کیلئے نیک تمناؤں کا اظہار کیا۔
وزیراعظم شہباز شریف نے بھی آسٹریلیا کے خلاف ٹی 20 سیریز جیتنے پرقومی ٹیم کو مبارکباد دیتے ہوئے کہا کہ کھلاڑیوں نے شاندارکھیل پیش کرکے شائقین کرکٹ کے دل جیت لیے ہیں،وزیراعظم نے چیئرمین پی سی بی محسن نقوی، ٹیم مینجمنٹ اورکھلاڑیوں کی اجتماعی کاوشوں کو سراہتے ہوئے امید ظاہر کی کہ قومی ٹیم کی کامیابیوں کا یہ سلسلہ مستقبل میں بھی جاری رہے گا۔
دوسری جانب لاہور میں چیئرمین پاکستان کرکٹ بورڈ محسن نقوی نے قومی کرکٹ ٹیم کے کھلاڑیوں سے ملاقات کی اور آسٹریلیا کیخلاف ٹی 20 سیریز میں فتح پرانہیں مبارکباد دی،انہوں نے کہا کہ یہ کامیابی پوری ٹیم کی محنت اور نظم و ضبط کا نتیجہ ہے، جس پر پوری قوم فخر کرتی ہے پاکستانی کھلاڑیوں نے شاندار ٹیم ورک کا مظاہرہ کرکے آسٹریلیا کے خلاف سیریز میں ناقابل شکست برتری حاصل کی،ہیڈ کوچ مائیک ہیسن، کپتان سلمان آغا اور تمام کھلاڑیوں نے اچھی کارکر دگی دکھائی، آسٹریلیا جیسی مضبوط ٹیم کے خلاف سیریز جیتنے کا کریڈٹ کھلاڑیوں کی محنت اور پروفیشنل ازم کا نتیجہ ہے ٹیم کے اچھے کمبینیشن نے فتح میں اہم کردار ادا کیا امید ہے کہ قومی ٹیم آئندہ بھی ایسی ہی کارکردگی کے ذریعے شائقین کرکٹ کی توقعات پر پورا اترے گی۔
عثمان خان کی صلاحیت پر پورا بھروسہ تھا،سلمان علی آغا
سلمان علی آغا نے کہا کہ ہم نے پاور پلے، مڈل اوورز میں اچھی بیٹنگ کی اور بولنگ میں بھی غیر معمولی کارکردگی دکھائی-
قومی کرکٹ ٹیم کے کپتان سلمان علی آغا نے آسٹریلیا کے خلاف ٹی20 سیریز کے دوسرے میچ میں شاندار کارکردگی پر اطمینان کا اظہار کرتے ہوئے کہا کہ ’یہ ہمارے لیے ایک پرفیکٹ گیم تھی، ہم نے پاور پلے، مڈل اوورز میں اچھی بیٹنگ کی اور بولنگ میں بھی غیر معمولی کارکردگی دکھائی، سلما ن علی آغا نے اسے اپنی ٹیم کے لیے ایک مکمل اور مثالی میچ قرار دیا انہوں نے کہا کہ ہم جانتے ہیں کہ عثمان خان اسپن کے خلاف ہماری ٹیم کے بہترین کھلاڑیوں میں سے ایک ہیں، ہمیں اس کی صلاحیت پر پورا بھروسہ تھا اور ہمیں یقین تھا کہ اس کی اننگز جلد سامنے آئے گی-
اپنے نمبر 3 پر بیٹنگ کے فیصلے پر بات کرتے ہوئے سلمان آغا نے کہا کہ ’میں نے خود کو اوپر اس لیے بھیجا کیونکہ مجھے معلوم ہے کہ میں اسپن اچھا کھیل سکتا ہوں، اور یہی پلان ہم مستقبل میں بھی رکھنا چاہتے ہیں، خاص طور پر سری لنکا میں، ہم چاہتے ہیں کہ 2-0 کو بھلا کر ہر میچ کو نیا میچ سمجھا جائے اور اسی انداز میں کرکٹ کھیلی جائے، امید ہے کہ کل ہم لاہور کے شائقین کو ایک بار پھر بہترین کرکٹ سے محظوظ کریں گے-
پاکستان کے ہاتھوں بھاری شکست کے بعد آسٹریلوی کپتان مچل مارش نے اعتراف کیا ہے کہ اس میچ میں پاکستان نے ان کی ٹیم کو ہر شعبے میں آؤٹ کلاس کیا-
میچ کے بعد گفتگو کرتے ہوئے آسٹریلیا کے کپتان مچل مارش نے کہا کہ ’پاکستان کو کریڈٹ جاتا ہے، انہوں نے ہمیں آؤٹ پلے کیا آج سے پہلے سیریز ابھی زندہ تھی، امید ہے کہ ہم کل واپسی کریں گے پاور پلے میں انہوں نے ہمیں شدید دباؤ میں رکھا، یہ پچ شاید 160 سے 170 رنز کی تھی۔ ہمارے پاس تجربہ کار کھلاڑی ہیں جو جانتے ہیں کہ رن چیز میں پارٹنرشپس کتنی اہم ہوتی ہیں، مگر آج ہم ایسا نہ کر سکے۔ یہ ہمارے لیے ایک بڑا سبق ہے‘۔
یاد رہے کہ پاکستان نے ٹی20 سیریز کے دوسرے میچ میں آسٹریلیا کو 90 رنز سے شکست دے کر تین میچوں کی سیریز میں فیصلہ کن برتری حاصل کرلی ہے، بہترین کاکردگی پر کپتان سلمان علی آغا کو مین آف دی میچ قرار دیا گیا ہے۔
دوسرا ٹی ٹوئنٹی: پاکستان کی آسٹریلیا کو 90 رنز سے شکست،سیریز اپنے نام کرلی
لاہور: دوسرے ٹی 20 میچ میں پاکستان نے آسٹریلیا کو 90 رنز سے شکست دے کر 3 میچز کی سیریز 0-2 سے اپنے نام کرلی۔
قذافی اسٹیڈیم لاہور میں کھیلے جارہے دوسرے میچ میں پاکستان نے پہلے اوور سے ہی جارحانہ کھیل کا آغاز کیا دوسرے ہی اوور میں صاحبزادہ فرحان کی وکٹ گرنے کے باجود کپتان سلمان علی آغا اور صائم ایوب نے آسٹریلوی بولرز کی دھلائی جاری رکھی،صائم ایوب چھٹے اوور میں 11 گیندوں پر 23 رنز بناکر آؤٹ ہوئے پاکستان نے پاور پلے میں 3 چھکوں اور 10 چوکوں کی مدد سے 2 وکٹوں کے نقصان پر 72 رنز بنائے،صاحبزادہ فرحان5 اور بابر اعظم 2 رنز پر آؤٹ ہوگئے۔
بعد ازاں بابر اعظم 2 رنز بناکر ایڈم زیمپا کا شکار بن گئے تاہم کپتان سلمان علی آغا نے جارحانہ کھیل جاری رکھا اور 25 گیندوں پر نصف سنچری اسکور کی،یہ محمد حفیظ کی 23 گیندوں پر نصف سنچری کے بعد کسی بھی پاکستانی کپتان کی جانب سے ٹی ٹوئنٹی انٹرنیشنل میچز میں دوسری تیز ترین نصف سنچری ہے۔
عثمان خان نے ذمہ دارانہ اور جارحانہ بیٹنگ کرتے ہوئے 35 گیندوں پر 52 رنز بنائے، جن میں 4 چوکے اور 2 چھکے شامل تھے۔ شاداب خان 29 رنز بنا کر ناٹ آؤٹ رہے جبکہ محمد نواز نے صرف 3 گیندوں پر 9 رنز بنا کر اسکور کو مزید مضبوط کیا،آخری 5 اوورز میں پاکستان نے 59 رنز اسکور کیے اور صرف ایک وکٹ گری۔
آسٹریلیا کی جانب سے ایڈم زمپا، میتھیو کوہنیمن، کوپر کونولی، شان ایبٹ اور زیویئر بارٹلیٹ نے ایک ایک وکٹ حاصل کی-
ہدف کے تعاقب میں آسٹریلیا کی پوری ٹیم 15.4 اوورز میں 108 رنز پر ڈھیر ہوگئی،آسٹریلوی اننگز کا آغاز انتہائی مایوس کن رہا۔ کپتان مچل مارش 18 اور ٹریوس ہیڈ 4 رنز بنا کر جلد آؤٹ ہو گئے۔ جوش انگلس 5 اور میٹ رینشا 2 رنز کے مہمان ثابت ہوئے، جس کے باعث آسٹریلیا کی بیٹنگ لائن دباؤ کا شکار رہی۔
کیمیرون گرین نے 20 گیندوں پر 35 رنز بنا کر کچھ مزاحمت کی، جبکہ میتھیو شارٹ نے 27 رنز اسکور کیے، تاہم کوئی بھی بیٹر وکٹ پر جم نہ سکا۔ دیگر کھلاڑیوں میں کوپر کونولی ایک، ژاویر بارٹلیٹ 10 اور ایڈم زمپا 3 رنز بنا سکے۔
ابرار احمد نے 3 اوورز میں صرف 14 رنز دے کر 3 وکٹیں حاصل کیں اور میچ کے بہترین بولر ثابت ہوئے شاداب خان نے بھی 4 اوورز میں 26 رنز دے کر 3 کھلاڑیوں کو آؤٹ کیا۔ عثمان طارق نے 2.4 اوورز میں 16 رنز کے عوض 2 وکٹیں حاصل کیں، جبکہ محمد نواز نے ایک وکٹ اپنے نام کی۔
دوسرے ٹی ٹوٹنٹی میچ کے لیے پاکستان کی پلیئنگ الیون میں تین تبدیلیاں کی گئی ہیں،عثمان طارق، فہیم اشرف اور نسیم شاہ کو پلیئنگ الیون میں شامل کیا گیا ہے جبکہ شاہین شاہ آفریدی، سلمان مرزا اور فخر زمان کو آرام دیا گیا ہےتین ٹی ٹوئنٹی میچوں کی سیریز میں پاکستان کو ایک صفر کی سبقت حاصل ہے، پہلے میچ میں پاکستان نے آسٹریلیا کو 26 رنز سے شکست دی تھی۔
آئی سی سی ٹی ٹوئنٹی ورلڈ کپ کے لیے پاکستان ٹیم کی کٹ کی رونمائی منسوخ
پاکستان کرکٹ بورڈ (پی سی بی) نے آئی سی سی ٹی ٹوئنٹی ورلڈ کپ کے لیے قومی ٹیم کی نئی کٹ کی متوقع رونمائی منسوخ کر دی ہے۔
ذرائع کے مطابق قومی ٹیم کی ورلڈ کپ کٹ آج آسٹریلیا کے خلاف دوسرے ٹی ٹوئنٹی انٹرنیشنل میچ کے ٹاس کے فوراً بعد پیش کی جانی تھی، تاہم آخری لمحات میں اس تقریب کو منسوخ کر دیا گیا۔ذرائع کا کہنا ہے کہ کٹ کی رونمائی ناگزیر وجوہات کی بنا پر منسوخ کی گئی ہے، تاہم ان وجوہات کی باضابطہ طور پر وضاحت نہیں کی گئی۔ پی سی بی کی جانب سے بھی اس حوالے سے تاحال کوئی سرکاری بیان جاری نہیں کیا گیا،
کرکٹ حلقوں میں یہ بات زیرِ گردش ہے کہ پاکستان کی ٹی ٹوئنٹی ورلڈ کپ میں شرکت یا ممکنہ بائیکاٹ سے متعلق حتمی فیصلہ نہ ہونا بھی کٹ کی رونمائی منسوخی کی ایک بڑی وجہ ہو سکتا ہے۔ ذرائع کے مطابق جب تک اس اہم معاملے پر واضح فیصلہ سامنے نہیں آتا، تب تک ورلڈ کپ سے متعلق کسی بھی تشہیری سرگرمی کو مؤخر رکھا جا رہا ہے۔
ذرائع کا مزید کہنا ہے کہ جیسے ہی پاکستان کی ورلڈ کپ میں شرکت کے حوالے سے صورتحال واضح ہوگی، نئی تاریخ کے ساتھ کٹ کی رونمائی کا اعلان کیا جا سکتا ہے۔ فی الحال تمام تر توجہ آسٹریلیا کے خلاف جاری ٹی ٹوئنٹی سیریز اور آئندہ فیصلوں پر مرکوز ہے۔
سیالکوٹ اسٹالینز نے کس مشہور کرکٹر کو ہیڈ کوچ مقرر کیا؟
پاکستان سپر لیگ (پی ایس ایل) 11 رواں برس پہلی بار 8 ٹیموں کے ساتھ کھیلی جائے گی، اور نئی ٹیم سیالکوٹ اسٹالینز نے بھی اپنی کوچنگ ٹیم کی تقرری شروع کر دی ہے۔ سیالکوٹ اسٹالینز نے اپنے ہیڈ کوچ کے لیے سابق آسٹریلوی کپتان ٹم پین کا انتخاب کیا ہے۔
ٹم پین نے آسٹریلیا کی ٹیسٹ ٹیم کی قیادت کی اور اپنے کیریئر میں 35 ٹیسٹ، 35 ون ڈے اور 12 ٹی ٹوئنٹی میچز کھیل چکے ہیں۔ فرنچائز مالکان نے اعلان کرتے ہوئے کہا کہ انہیں فخر ہے کہ ٹم پین کو سیالکوٹ اسٹالینز کا ہیڈ کوچ مقرر کیا گیا ہے۔
یہ تقرری پی ایس ایل کے شائقین کے لیے دلچسپی کا باعث ہے اور توقع کی جا رہی ہے کہ سابق کپتان کی کوچنگ ٹیم کی کارکردگی میں نکھار لائے گی۔
بھارت میں فضائی آلودگی ، کھلاڑی ماسک پہن کر کھیلنے پر مجبور
بھارت میں بڑھتی ہوئی فضائی آلودگی نے نہ صرف عام شہریوں بلکہ پیشہ ور کھلاڑیوں کی صحت کو بھی سنگین خطرات سے دوچار کر دیا ہے
بھارتی میڈیا نے ٹی ٹوئنٹی ورلڈ کپ سے قبل ملک میں فضائی آلودگی کے مسئلے کو عالمی سطح پر اجاگر کرتے ہوئے انکشاف کیا ہے کہ کرکٹ کھلاڑیوں کو میدان میں ماسک پہن کر کھیلنا پڑ رہا ہے۔بھارتی میڈیا رپورٹس کے مطابق رانجی ٹرافی کے ایک میچ کے دوران ممبئی اور دہلی کی ٹیموں کے کھلاڑیوں نے شدید فضائی آلودگی کے باعث ماسک پہن کر کھیل میں حصہ لیا۔ یہ میچ ممبئی کے باندرا کُرلا کمپلیکس میں کھیلا گیا جہاں آلودہ فضا نے کھلاڑیوں کی کارکردگی اور صحت پر سوالیہ نشان کھڑا کر دیا،ذرائع کے مطابق گراؤنڈ کے اطراف جاری تعمیراتی سرگرمیوں کے باعث فضا میں دھول اور مضر ذرات کی مقدار میں غیر معمولی اضافہ ہوا، جس کے نتیجے میں کھلاڑیوں کو سانس لینے میں دشواری کا سامنا کرنا پڑا۔ اسی صورتحال کے پیش نظر ممبئی کے نمایاں بیٹرز سرفراز خان، مشیر خان اور ہمانشو سنگھ نے دورانِ میچ ماسک پہن کر کھیلنا ضروری سمجھا۔
بھارتی میڈیا کا کہنا ہے کہ ممبئی میں فضائی معیار اس حد تک خراب ہو چکا ہے کہ شہر کا ایئر کوالٹی انڈیکس (AQI) 160 ریکارڈ کیا گیا ہے، جو کہ ’’غیر تسلی بخش‘‘ کی کیٹیگری میں آتا ہے اور انسانی صحت کے لیے نقصان دہ سمجھا جاتا ہے۔ماہرین صحت کے مطابق اس سطح کی آلودگی میں طویل وقت تک کھیلنے سے کھلاڑیوں کو سانس، پھیپھڑوں اور دل کے مسائل لاحق ہو سکتے ہیں، جو مستقبل میں ان کی فٹنس اور کیریئر پر منفی اثر ڈال سکتے ہیں۔
واضح رہے کہ ممبئی میں آئندہ ٹی ٹوئنٹی ورلڈ کپ کے اہم میچز، جن میں سیمی فائنل اور گروپ میچز بھی شامل ہیں، شیڈول ہیں۔ ایسے میں فضائی آلودگی کا یہ مسئلہ نہ صرف کھلاڑیوں بلکہ عالمی کرکٹ ایونٹ کے انتظامات پر بھی سوالات اٹھا رہا ہے، جبکہ شائقین کرکٹ اور ماہرین کی جانب سے فوری اقدامات کا مطالبہ کیا جا رہا ہے۔
