Category: کھیل


پاکستان کرکٹ ٹیم کے سابق کپتان شعیب ملک نے پاکستان سپر لیگ (پی ایس ایل) سے ریٹائرمنٹ کا اعلان کر دیا ہے۔
اپنے سوشل میڈیا اکاؤنٹ پر جاری بیان میں شعیب ملک نے کہا کہ پی ایس ایل کے 10 سالہ کیریئر میں آن اور آف دی فیلڈ ہر لمحے سے لطف اندوز ہوا ہوں، اور اب وقت آ گیا ہے کہ اس سفر کو یہاں ختم کروں۔ انہوں نے مزید کہا کہ کرکٹ کی بہتری کے لیے مستقبل میں بھی میری خدمات ہمیشہ حاضر رہیں گی۔
‎خیال رہے کہ شعیب ملک نے 2015 میں ٹیسٹ کرکٹ اور 2019 میں ون ڈے کرکٹ سے ریٹائرمنٹ کا اعلان کیا تھا۔ اگرچہ ٹی ٹوئنٹی انٹرنیشنل سے انہوں نے باقاعدہ ریٹائرمنٹ کا اعلان نہیں کیا، تاہم 44 سالہ آل راؤنڈر نے 2021 کے بعد قومی ٹیم کی نمائندگی نہیں کی، مگر وہ پی ایس ایل اور دیگر ٹی ٹوئنٹی لیگز میں کھیلتے رہے۔
‎شعیب ملک نے پی ایس ایل کے اب تک کے تمام 10 سیزنز میں حصہ لیا اور چار ٹیموں کراچی کنگز، ملتان سلطانز، پشاور زلمی اور کوئٹہ گلیڈی ایٹرز کی نمائندگی کی۔ 2025 میں ان کا آخری سیزن کوئٹہ گلیڈی ایٹرز کی جانب سے رہا۔


پاکستان اور آسٹریلیا کے درمیان ہونے والی ٹی 20 سیریز سوشل میڈیا پر ٹرینڈ کر رہی ہے، تاہم سیریز شروع ہونے سے قبل ہی آسٹریلیا کو بڑا دھچکا لگا ہے۔
آسٹریلیا کے کپتان اور فاسٹ بولر پیٹ کمنز کو کمر کی انجری کے باعث پاکستان کے خلاف وارم اپ ٹی ٹوئنٹی میچز سے باہر رکھنے کا فیصلہ کیا گیا ہے۔ آسٹریلوی سلیکٹرز نے کہا کہ کمنز کی صحت کے معاملے میں کوئی رسک نہیں لیا جائے گا۔
‎پیٹ کمنز ایشز سیریز کے دوران واپسی کر چکے تھے، مگر انگلینڈ کے خلاف آخری دو میچز نہیں کھیل سکے اور اب وہ پاکستان کے خلاف ٹی ٹوئنٹی وارم اپ میچز بھی نہیں کھیلیں گے۔
‎آسٹریلیا کے چیف سلیکٹر جارج بیلی کے مطابق صرف کمنز ہی نہیں بلکہ جوش ہیزل ووڈ، نیتھن ایلس، گلین میکسویل اور ٹم ڈیوڈ کو بھی لاہور میں ہونے والی تین میچوں کی سیریز سے آرام دیا گیا ہے، جو 29 جنوری سے شروع ہو رہی ہے۔
‎ہیزل ووڈ ہیمسٹرنگ اور ایچیلس انجری سے نبٹ رہے ہیں، جبکہ ٹم ڈیوڈ بھی ہیمسٹرنگ انجری کا شکار ہیں۔ بیلی کا کہنا ہے کہ یہ کھلاڑی ورلڈ کپ کے آغاز تک فٹ ہو جائیں گے۔
‎بیلی نے مزید بتایا کہ پیٹ کمنز ورلڈ کپ سکواڈ کو بعد میں جوائن کریں گے اور ممکنہ طور پر تیسرے یا چوتھے میچ کے آس پاس ٹیم کا حصہ بنیں گے۔

چیئرمین پاکستان کرکٹ بورڈ (پی سی بی) محسن نقوی نے ٹی ٹوئنٹی ورلڈ کپ کے لیے پاکستان ٹیم سے متعلق تمام جاری تیاریاں عارضی طور پر رکوانے کی ہدایت جاری کر دی ہے۔

ذرائع کے مطابق یہ فیصلہ خطے میں پیدا ہونے والی غیر یقینی صورتحال اور بنگلا دیش کی جانب سے ورلڈ کپ کے لیے بھارت نہ جانے کے فیصلے کے تناظر میں کیا گیا ہے،ذرائع کا کہنا ہے کہ پی سی بی کی جانب سے ٹیم مینجمنٹ کو آئندہ کے لائحہ عمل سے متعلق بعد میں باقاعدہ طور پر آگاہ کیا جائے گا۔ اس کے ساتھ ہی ٹیم مینجمنٹ سے کہا گیا ہے کہ وہ ٹی ٹوئنٹی ورلڈ کپ میں ممکنہ عدم شرکت کی صورت میں ایک متوازی پلان (متبادل حکمتِ عملی) بھی تیار کرے تاکہ ہر ممکن صورتحال سے نمٹنے کے لیے بورڈ کے پاس واضح آپشنز موجود ہوں۔

ذرائع کے مطابق محسن نقوی اس معاملے پر ذاتی طور پر نظر رکھے ہوئے ہیں اور قومی ٹیم کے مفادات کے ساتھ ساتھ علاقائی کرکٹ کے مجموعی حالات کو مدنظر رکھتے ہوئے فیصلے کیے جا رہے ہیں۔ پی سی بی حکام کا ماننا ہے کہ کسی بھی بڑے ایونٹ میں شرکت سے قبل سکیورٹی، لاجسٹکس اور کھلاڑیوں کے تحفظ کے معاملات کو نظر انداز نہیں کیا جا سکتا۔یہاں یہ امر بھی قابلِ ذکر ہے کہ پاکستان کرکٹ بورڈ پہلے ہی بنگلا دیش کرکٹ بورڈ کو مکمل سپورٹ کی یقین دہانی کرا چکا ہے۔ بنگلا دیش نے ٹی ٹوئنٹی ورلڈ کپ کے لیے بھارت نہ جانے کا فیصلہ سکیورٹی خدشات کی بنیاد پر کیا ہے، جسے پاکستان نے معقول اور جائز قرار دیا ہے۔ پی سی بی حکام کے مطابق بنگلا دیش کے تحفظات کو سنجیدگی سے لینا ضروری ہے اور کسی بھی ٹیم کو ایسے حالات میں شرکت پر مجبور نہیں کیا جانا چاہیے۔

ذرائع کا مزید کہنا ہے کہ اگر بنگلا دیش کا سکیورٹی مسئلہ حل نہ ہوا تو پاکستان بھی ٹی ٹوئنٹی ورلڈ کپ میں اپنی شرکت کے فیصلے پر ازسرِنو غور کر سکتا ہے۔ اس حوالے سے پی سی بی کے اندر مشاورت کا عمل جاری ہے اور دیگر متعلقہ کرکٹ بورڈز کے ساتھ بھی رابطے کیے جا رہے ہیں۔


بنگلادیش کرکٹ ٹیم کے بھارت نہ جانے کے معاملے پر پاکستان نے بنگلادیش کو مکمل حمایت کی یقین دہانی کرا دی ہے۔
حکومتی ذرائع کے مطابق اس معاملے پر بنگلادیشی حکومت نے پاکستانی حکومت سے رابطہ کیا ہے۔ ذرائع کا کہنا ہے کہ اگر بنگلادیش کے تحفظات کو دور نہ کیا گیا تو پاکستان بھی ٹی ٹوئنٹی ورلڈ کپ میں شرکت کے اپنے فیصلے کا ازسرِنو جائزہ لے سکتا ہے۔
‎ذرائع کے مطابق پاکستانی حکام نے مؤقف اختیار کیا ہے کہ بنگلادیش کے پاس معقول اور درست وجوہات موجود ہیں، جنہیں سنجیدگی سے لیا جانا چاہیے۔ پاکستانی حکام کا کہنا ہے کہ بھارت کو کسی بھی ملک کو دھمکانے یا دباؤ میں لانے کی اجازت نہیں دی جا سکتی۔
‎ذرائع نے مزید بتایا کہ پاکستان نے اس معاملے پر بنگلادیش کے ساتھ کھڑے رہنے اور مکمل سفارتی و اخلاقی حمایت فراہم کرنے کی یقین دہانی کرائی ہے۔