سابق آسٹریلوی کرکٹر اور 2003 کے ورلڈ کپ جیتنے والی ٹیم کے رکن ڈیمین مارٹن کو تشویشناک حالت کے باعث برسبین کے ایک اسپتال میں داخل کرا دیا گیا ہے، جہاں وہ اس وقت کوما کی حالت میں زیر علاج ہیں۔
غیر ملکی میڈیا رپورٹس کے مطابق 54 سالہ ڈیمین مارٹن گردن توڑ بخار میں مبتلا ہیں، جس کے باعث ان کی طبیعت اچانک بگڑ گئی۔میڈیا رپورٹس میں بتایا گیا ہے کہ ڈیمین مارٹن کرسمس ڈے کے موقع پر شدید بیمار ہونے کے بعد گر پڑے تھے، جس کے فوراً بعد انہیں اسپتال منتقل کیا گیا۔ ڈاکٹروں کی ٹیم ان کی حالت پر مسلسل نظر رکھے ہوئے ہے اور انہیں انتہائی نگہداشت کے وارڈ میں رکھا گیا ہے۔
ڈیمین مارٹن کی اچانک اور سنگین بیماری کی خبر سامنے آنے کے بعد کرکٹ آسٹریلیا سمیت کرکٹ حلقوں میں تشویش کی لہر دوڑ گئی ہے۔ کرکٹ آسٹریلیا کے چیف ایگزیکٹو ٹوڈ گرین برگ نے اپنے بیان میں کہا ہے کہ ڈیمین مارٹن کی بیماری کا سن کر بے حد افسوس ہوا ہے اور پوری کرکٹ کمیونٹی ان کی جلد صحتیابی کے لیے دعاگو ہے۔
سابق آسٹریلوی وکٹ کیپر بیٹر ایڈم گلکرسٹ نے بھی ڈیمین مارٹن کی صحت سے متعلق بات کرتے ہوئے کہا ہے کہ برسبین کے اسپتال میں انہیں بہترین طبی سہولیات فراہم کی جا رہی ہیں اور ڈاکٹرز ان کے علاج کے لیے بھرپور کوشش کر رہے ہیں۔
واضح رہے کہ ڈیمین مارٹن آسٹریلیا کے کامیاب کرکٹرز میں شمار ہوتے ہیں۔ انہوں نے اپنے کیریئر میں 67 ٹیسٹ، 208 ون ڈے انٹرنیشنل اور 4 ٹی ٹوئنٹی میچز میں آسٹریلیا کی نمائندگی کی۔ وہ اپنی شاندار بیٹنگ اور میدان میں ذمہ دارانہ کھیل کے باعث مداحوں میں خاص مقام رکھتے ہیں۔کرکٹ شائقین اور سابق کھلاڑیوں کی جانب سے سوشل میڈیا پر بھی ڈیمین مارٹن کے لیے نیک تمناؤں اور دعاؤں کا سلسلہ جاری ہے
