Category: کھیل

ایشیا رگبی کی جانب سے رگبی چیمپئن شپ مینز ڈویژن ون کے لیے مقرر کیے گئے میچز کھیلنے کے لیے متحدہ عرب امارات کی ٹیم لاہور پہنچ گئی، پاکستان دو میچوں کی دلچسپ سیریز میں متحدہ عرب امارات (یو اے ای) کی میزبانی کرے گا، دونوں ٹیموں کے درمیان میچز 4 اور 8 جولائی کو لاہور کے مشہور پنجاب اسٹیڈیم میں ہوں گے۔
مہمان ٹیم کے لاہور پہنچنے پر پاکستان رگبی یونین کے عہدیداران نے انکا استقبال کیا، ٹیم کو ایئرپورٹ سے ہوٹل پہنچا دیا گیا۔ یواے ای کی ٹیم میں 26 کھلاڑی اور چار آفیشلز شامل ہیں۔ایشین رگبی چیمپیئن شپ ڈویژن ون کو سپر وائز کرنے کے لیے ہانگ کانگ، سنگاپور اور ملائشیا کے میچ آفیشلز بھی لاہور پہنچ گئے ہیں۔
میچز رات 8 بجے کھیلے جائیں گے، 4 جولائی کو ہونے والے میچ میں ہانگ کانگ کے مورگن وائٹ میچ ریفری ہوں گے، سنگا پور رگبی فیڈریشن کے جسٹ وانگ اور ملائشیا کے عبد المنیم میچ میں انکے نائب ہوں گے۔

پسندیدہ کھیل کرکٹ کا ایشیائی ایونٹ ایک بار پھر تاخیر کا شکار ہو گیا کولمبو میں بارشوں کی وجہ سے وینیوز بھی بدلے جا سکتے ہیں ، روایتی حریف پاکستان اور بھارت کے درمیان سرد جنگ کے بعد ایشیا کپ ہائبرڈ ماڈل پر کرانے کا فیصلہ ہوا ، سیکنڈ وینیو کے طور پر میزبانی سری لنکا کو ملی جہاں ستمبر میں ہونے والے مون سون بارشیں منتظمین کے لیے درد سر بن گئی ہیں دنیائے کرکٹ کا سب سے زیادہ دیکھا جانے والا میچ کولمبو سے دمبولا کھیلا جا سکتا ہے ، حتمی فیصلے رواں ہفتے جاری شیڈول میں کیے جائیں گے

دس پاکستانیوں سمیت 40 سے زائد غیرملکی کوہ پیماؤں نے نانگا پربت کو سر کرنے کی مہم میں حصہ لیا، جن میں ثمینہ بیگ، نائلہ کیانی، واجد اللہ نگری کے علاوہ رضوان داد، عید محمد، احمد بیگ، وقار علی، سعید کریم، لیاقت کریم، سوزین اور شاہ دولت اپنی مہم میں کامیاب رہے۔
الپائن کلپ آف پاکستان کے مطابق آج صبح 11 بجے تمام کوہ پیماؤں نے نانگا پربت کو سر کیا۔
مشہور خاتون کو پیماہ ثمینہ بیگ آج صبح 11 بجکر 8 منٹ پر نانگا پربت پہاڑ کی بلندی پر پہنچیں وہ اس سے قبل کے ٹو اور ماؤنٹ ایوریسٹ بھی سر کر چکی ہیں۔ثمینہ بیگ کو 8 ہزار میٹر بلند پہاڑ سر کرنے والی پہلی پاکستانی خاتون کوہ پیماہ ہونے کا اعزاز حاصل ہے۔اس کے علاوہ نائلہ کیانی نے بھی نانگا پربت کی چوٹی پر کامیابی سے پہنچ کر ناقابل یقین کارنامہ سر انجام دیا۔
نائلہ دنیا کی سات بلند ترین چوٹیوں کو سر کرنے والی پاکستانی خاتون بھی ہیں۔
کوہ پیما نائلہ کیانی کا کہنا ہے کہ اس مہم کے حوالے سے وہ تھوڑی خوفزدہ تھیں، تاہم پھر بھی اپنے اس مشن کو مکمل کرنے کیلئے پرعزم تھی۔
نائلہ کیانی کی اس مہم میں بارڈ فاؤنڈیشن نے مکمل طور پر معاونت فراہم کی ہے۔
مینیجنگ ڈائریکٹر بارڈ فاؤنڈیشن مہرین داؤد نے کہا کہ کوہ پیمائی میں خواتین کیلئے محدود مواقعوں کے باوجود نائلہ ایک بہترین مثال بن کر سامنے آئیں، ہم ایسے باصلاحیت افراد کی معاونت اور ہمت افزائی کرتے رہیں گے۔