Category: کھیل

پاکستان کرکٹ بورڈ نے سیزن 26-2025 کے لیے میچ آفیشلز پینل کا اعلان کردیا ہے۔

پی سی بی کے سیزن 26-2025 کے لیے انٹرنیشنل پینل میں میچ ریفری علی نقوی جبکہ امپائرز آصف یعقوب، فیصل آفریدی، راشد ریاض اور سلیمہ امتیاز شامل ہیں،پی سی بی کے ایلیٹ پینل آفیشلز میں مجموعی طور پر 18 امپائرز اور 10 میچ ریفریز کو شامل کیا گیا ہے جب کہ امپائرز کی کارکردگی کو باریکی سے جانچنے کے لیے سپلیمنٹری پینل کو دو حصوں میں تقسیم کیا گیا ہے، جن میں سپلیمنٹری پینل 1 میں 14 جبکہ سپلیمنٹری پینل 2 میں 24 امپائرز شامل ہیں،اسی طرح میچ ریفریز کے سپلیمنٹری پینل میں 10 ریفریز کو شامل کیا گیا ہے جبکہ پی سی بی ایمرجنگ پینل میں ملک بھر سے 40 امپائرز کو شامل کیا گیا ہے۔

میچ آفیشلز پینل میں 13 خواتین امپائرز کو بھی شامل کیا گیا ہے، جن میں نمایاں نام سلیمہ امتیاز کا ہے،پی سی بی کے مطابق نئے پینلز کی تشکیل کا مقصد ملک بھر میں امپائرنگ اور میچ ریفریز کی کارکردگی بہتر بنانا ہے۔

پاکستان کرکٹ بورڈ (پی سی بی) نے منگل 7 اکتوبر کو 2025-26 کرکٹ سیزن کے لیے امپائرز اور میچ ریفریز کے مختلف پینلز کا اعلان کردیا۔ اس اعلان کے مطابق پاکستان سے تعلق رکھنے والے پانچ آفیشلز انٹرنیشنل کرکٹ کونسل (آئی سی سی) کے انٹرنیشنل پینل میں شامل کیے گئے ہیں جن میں میچ ریفری علی نقوی جبکہ امپائرز میں آصف یعقوب، فیصل خان آفریدی، راشد ریاض وقار اور سلیمہ امتیاز شامل ہیں۔

انٹرنیشنل پینل
پی سی بی کے اعلامیے کے مطابق علی نقوی میچ ریفری کی حیثیت سے جبکہ امپائرز آصف یعقوب (اسلام آباد)، فیصل خان آفریدی (سرگودھا)، راشد ریاض وقار (لاہور) اور سلیمہ امتیاز (کراچی) پاکستان کی نمائندگی کریں گے۔

🔸 نیشنل ایلیٹ پینل آف میچ ریفریز
اس پینل میں دس میچ ریفریز شامل ہیں جن میں علیم خان موسیٰ (کراچی)، علی نقوی (لاہور)، اطہر لائق (کراچی)، بلال معین الحق خلجی (لاہور)، افتخار احمد (کراچی)، کامران چوہدری (لاہور)، محمد اسلم (کوئٹہ)، محمد اقبال شیخ (حیدرآباد)، ندیم ارشد (فیصل آباد) اور سہیل ادریس (لاہور) شامل ہیں۔

🔸 نیشنل ایلیٹ پینل آف امپائرز
پاکستان کے مختلف شہروں سے تعلق رکھنے والے 18 امپائرز کو نیشنل ایلیٹ پینل میں شامل کیا گیا ہے۔ ان میں عبدالمقیط (لاہور)، علی حیدر (کراچی)، آصف یعقوب (اسلام آباد)، فاروق علی خان (ایبٹ آباد)، فیصل خان آفریدی (سرگودھا)، غلام سرور (سبی)، عمران جاوید (کراچی)، عمران اللہ اسلم (بہاولپور)، کاشف سہیل (خانیوال)، خالد محمود سنیئر (کراچی)، محمد ساجد (چارسدہ)، ناصر حسین (لاہور)، قیصر خان (لاہور)، راشد ریاض وقار (لاہور)، ثاقب خان (ایبٹ آباد)، سید امتیاز اقبال (کراچی)، طارق رشید (لاہور) اور ظلفقار جان (چارسدہ) شامل ہیں۔

🔸 سپلیمنٹری I پینل آف امپائرز
اس پینل میں 14 امپائرز شامل ہیں جن میں احمد شہاب (لاہور)، آصف فاروق اعوان (گوجرانوالہ)، اسلم بریچ (کوئٹہ)، حسن محمود (لاہور)، عرفان حیدر (اسلام آباد)، مجید حسین (آزاد کشمیر)، محمد آصف (لاہور)، محمد باسط (لاہور)، محمد فیاض (پشاور)، محمد عمران (سرگودھا)، قیصر وحید (لاہور)، رانا محمد ارشد (فیصل آباد)، سید فہیم احمد بخاری (کراچی) اور ولید یعقوب (لاہور) شامل ہیں۔

🔸 سپلیمنٹری II پینل آف امپائرز
اس پینل میں 24 امپائرز شامل ہیں، جن میں عبد الکریم (نصیرآباد)، احمد ندیم (پشاور)، انصر محمود (پتوکی)، عقیل عادل خان (کراچی)، دلشاد علی (ملتان)، ہارون ملک (سرگودھا)، ہاشم علی (لودھراں)، ہدایت اللہ (پشین)، جمشید اقبال (پشاور)، کامران خلیل (لاہور)، مقبول احمد (فیصل آباد)، محمد عرفان دلشاد (لاہور)، محمد کلیم (لاہور)، محمد شفیق الحی (ڈی آئی خان)، محمد وقاص (لاہور)، ممتاز علی (لورالائی)، نصیر احمد (چکوال)، نورالاحکم (بونیر)، رفیق احمد (دادو)، رضا اصغر (شیخوپورہ)، سلیم بٹ (راولپنڈی)، سلطان محمود (لورالائی)، وقار احمد (اسلام آباد) اور ذیشان عارف (آزاد کشمیر) شامل ہیں۔

پی سی بی کے مطابق گزشتہ سیزن میں شاندار کارکردگی دکھانے والے نورالاحکم، ہدایت اللہ، مقبول احمد، ممتاز علی اور محمد شفیق الحی کو اب ابھرتے ہوئے پینل سے ترقی دے کر سپلیمنٹری II پینل میں شامل کیا گیا ہے۔

🔸 سپلیمنٹری پینل آف میچ ریفریز
10 میچ ریفریز پر مشتمل اس پینل میں ابوالحسنات راؤ (لاہور)، احمر سعید (کراچی)، علی گوہر (کراچی)، فضل اکبر شاہ (پشاور)، غلام مصطفیٰ (قصور)، انعام اللہ خان (لاہور)، محمد عامرالدین انصاری (کراچی)، سمیع الحق (فیصل آباد)، ثمن ظلفقار (شیخوپورہ) اور سہیل خان (لاہور) شامل ہیں۔

🔸 ایمرجنگ پینل آف امپائرز
پی سی بی کے 2025-26 سیزن کے لیے ابھرتے ہوئے امپائرز کا پینل 40 ارکان پر مشتمل ہے۔ اس میں ملک کے تقریباً تمام علاقوں سے باصلاحیت امپائرز کو شامل کیا گیا ہے جن میں عامر عطا (ڈی جی خان)، عبدالباسط (راولپنڈی)، عبد القیوم (کراچی)، ابرار احمد (قصور)، عدنان رشید (لاہور)، اجمل خان (سوات)، عاصم علوی (کراچی)، فاروق انور بجوہ (فیصل آباد)، فاروق جان (چارسدہ)، فرقان بٹ (لاہور) سمیت دیگر شامل ہیں۔

🔸 خواتین امپائرز پینل
پاکستان کرکٹ بورڈ نے خواتین امپائرز کے لیے بھی 13 ارکان پر مشتمل پینل برقرار رکھا ہے۔ اس میں عافیہ امین، عائشہ فاروق، فخیرہ کاظم سیدہ، حمیرہ فراح، نازیہ نذیر، رفعت مصطفیٰ، صباحت رشید، سلیمہ امتیاز، ثانیہ اشرف، شکیلہ رفیق، سخن فیض، سمیرا ساجد اور ذکیہ گل شامل ہیں۔

پی سی بی کے مطابق ان پینلز کی تشکیل کارکردگی، قابلیت، تربیت اور ماضی کے سیزنز میں امپائرنگ کے معیار کو مدنظر رکھتے ہوئے کی گئی ہے۔ بورڈ کا کہنا ہے کہ اس جامع نظام کا مقصد پاکستان میں امپائرنگ کے معیار کو بہتر بنانا اور نئے ٹیلنٹ کو بین الاقوامی سطح پر متعارف کروانے کے مواقع فراہم کرنا ہے۔

ویسٹ انڈیز کے معروف سابق آل راؤنڈر برنارڈ جولین 75 برس کی عمر میں انتقال کر گئے۔ ان کے انتقال کی خبر نے کرکٹ کے شائقین اور سابق کھلاڑیوں کو گہرے صدمے میں مبتلا کر دیا ہے۔

غیر ملکی میڈیا رپورٹس کے مطابق برنارڈ جولین کی موت کی وجوہات سے متعلق کوئی تفصیلات سامنے نہیں آئیں، تاہم ویسٹ انڈین کرکٹ بورڈ اور سابق ساتھی کھلاڑیوں نے ان کے انتقال پر گہرے دکھ کا اظہار کیا ہے۔برنارڈ جولین نے 1973 سے 1977 کے دوران ویسٹ انڈیز کی جانب سے 24 ٹیسٹ میچز اور 12 ون ڈے میچز میں نمائندگی کی۔ وہ 1975 کے افتتاحی ورلڈکپ میں ویسٹ انڈیز کی فاتح ٹیم کا حصہ تھے، جہاں ان کی آل راؤنڈ کارکردگی نے ٹیم کی کامیابی میں اہم کردار ادا کیا۔ان کے کیریئر میں ایک افسوسناک موڑ 1982 میں آیا، جب وہ جنوبی افریقہ کا دورہ کرنے والی باغی ٹیم کا حصہ بنے، جس کے بعد ویسٹ انڈیز کرکٹ بورڈ نے ان پر تاحیات پابندی عائد کر دی۔

پابندی کے بعد برنارڈ جولین نے کرکٹ سے کنارہ کشی اختیار کر لی اور خاموش زندگی گزارتے رہے۔ ان کے انتقال پر ویسٹ انڈیز کرکٹ حلقوں میں سوگ کی فضا ہے، جبکہ شائقین انہیں ایک نڈر آل راؤنڈر اور ورلڈکپ ہیرو کے طور پر یاد کر رہے ہیں۔کرکٹ ماہرین کا کہنا ہے کہ برنارڈ جولین کا شمار اُن کھلاڑیوں میں ہوتا ہے جنہوں نے 1970 کی دہائی میں ویسٹ انڈین ٹیم کو عالمی سطح پر طاقتور بنانے میں نمایاں کردار ادا کیا۔

نئی دہلی: بھارتی کرکٹ بورڈ (بی سی سی آئی) نے قومی ون ڈے ٹیم کی قیادت میں بڑی تبدیلی کرتے ہوئے تجربہ کار بلے باز روہت شرما کو کپتانی سے ہٹا دیا ہے۔ ان کی جگہ نوجوان اوپنر شبمن گل کو بھارت کی ون ڈے ٹیم کا نیا کپتان مقرر کردیا گیا ہے۔

بورڈ کی جانب سے جاری اعلامیے کے مطابق شبمن گل اب ون ڈے ٹیم کے ساتھ ساتھ ٹیسٹ ٹیم کی قیادت بھی سنبھالیں گے۔ شبمن گل کی بطور کپتان تقرری کو بھارتی کرکٹ میں نسلِ نو کی قیادت کی شروعات قرار دیا جارہا ہے۔

واضح رہے کہ روہت شرما بھارتی ٹیم کے مختلف فارمیٹس میں قیادت کرتے آرہے تھے اور ان کی کپتانی میں بھارت نے کئی اہم کامیابیاں حاصل کیں، تاہم حالیہ عرصے میں کارکردگی میں تسلسل نہ رہنے اور نئے ٹیلنٹ کو قیادت کے مواقع فراہم کرنے کے فیصلے کے تحت بی سی سی آئی نے یہ تبدیلی کی ہے۔بی سی سی آئی نے اس موقع پر آسٹریلیا کے خلاف آنے والی ون ڈے سیریز کے لیے 15 رکنی اسکواڈ کا بھی اعلان کیا ہے۔ اسکواڈ میں اگرچہ روہت شرما اور ویرات کوہلی کو شامل رکھا گیا ہے، مگر دونوں سینئر کھلاڑیوں کو بطور کھلاڑی میدان میں اتارا جائے گا، نہ کہ قیادت کے کردار میں۔

آئی سی سی ویمن ورلڈکپ کے تیسرے میچ میں بنگلادیش ویمن ٹیم نے پاکستان ویمن ٹیم کو 7 وکٹوں سے ہرادیا۔
سری لنکا کے شہرکولمبو میں کھیلےگئے میچ میں پاکستانی کپتان فاطمہ ثنا نے ٹاس جیت کر پہلے بیٹنگ کا فیصلہ کیا جو کہ غلط ثابت ہوا۔ پاکستان کی پوری ٹیم 39 ویں اوور میں صرف 129 رنز بنا کر آؤٹ ہوگئی،گرین شرٹس کی اننگ کا آغاز ہی تباہ کن تھا، معروفہ اختر نے پہلے اوور میں ہی عمیمہ سہیل اور سدرہ امین کو صفر پر آؤٹ کر دیا،اس کے بعد منیبہ علی اور رامین شمیم نے 42 رنز کی محتاط شراکت قائم کی، لیکن دونوں جلد ہی آؤٹ ہو گئیں اور پاکستان کا اسکور 13.4 اوورز میں 4 وکٹ کے نقصان پر 47 ہوگیا،رامین شمیم 39 گیندوں پر 2 چوکوں کی مدد سے 23 رنز کے ساتھ پاکستان کی ٹاپ اسکورر رہیں جب کہ منیبہ نے 35 گیندوں پر 17 رنز بنائے،ان کے بعد عالیہ ریاض 13، سدرہ نواز 15 اور کپتان فاطمہ 22 رنز بناسکیں اور اسکور 29.3 اوورز میں7 وکٹوں کے نقصان پر 100 ہوگیا،نمبر 9 پر آنے والی بیٹر ڈیانا بیگ نے ناقابل شکست 16 رنز کی اننگ کھیل کر پاکستان کا اسکور 129 تک پہنچایا۔

بنگلا دیش کی جانب سے نشیتا اختر نے شاندار بولنگ کرتے ہوئے 3.3 اوورز میں صرف 5 رنز دے کر 3 وکٹیں حاصل کیں۔ معروفہ اختر اور ناہیدہ اختر نے 2،2 وکٹیں حاصل کیں جب کہ ربیعہ خان نے بھی ایک وکٹ لی۔

پاکستان کی جانب سے دیےگئے 130 رنز کے آسان ہدف کو بنگلا دیش نے صرف 3 وکٹوں کے نقصان پر پورا کرلیا،بائیں ہاتھ کی اوپنر روبیہ حیدر نے 77 گیندوں پر 8 چوکوں کی مدد سے ناقابل شکست 54 رنز بنا کر ٹیم کی جیت کو یقینی بنایا،کپتان نگار سلطانہ نے 44 گیندوں پر 5 چوکوں کی مدد سے 23 رنز اسکور کیے۔ دونوں کے درمیان تیسری وکٹ کے لیے 62 رنز کی میچ وننگ شراکت بنی،اس کے علاوہ، مڈل آرڈر بیٹر سوبھانا موستاری نے بھی 19 گیندوں پر 6 چوکوں کی مدد سے 24 رنز بنا کر ٹیم کی جیت میں اہم کردار ادا کیا،پاکستان کی جانب سے رامین شمیم، ڈیانا بیگ اور کپتان فاطمہ ثنا نے ایک، ایک وکٹ حاصل کی۔

اسلام آباد: پاکستان ہاکی فیڈریشن (پی ایچ ایف) نے بھارت میں شیڈول جونیئر ہاکی ورلڈکپ میں قومی ٹیم کے میچز دوسرے ملک منتقل کرنے کا مطالبہ کر دیا ہے۔

ذرائع کے مطابق پی ایچ ایف نے انٹرنیشنل ہاکی فیڈریشن (ایف آئی ایچ) کو ایک باضابطہ خط ارسال کیا ہے جس میں پاکستان ٹیم کے لیے بھارت میں سکیورٹی خدشات کو نمایاں کرتے ہوئے کہا گیا ہے کہ قومی جونیئر ٹیم کے میچز بھارت کے بجائے کسی غیر جانبدار مقام پر کرائے جائیں۔پی ایچ ایف حکام کا کہنا ہے کہ بھارت میں حالیہ سیاسی اور سکیورٹی صورتحال کے باعث پاکستانی کھلاڑیوں کو شدید خطرات لاحق ہو سکتے ہیں، اس لیے بین الاقوامی فیڈریشن کو چاہیے کہ کھلاڑیوں کے جان و مال کے تحفظ کو ترجیح دے اور میچز کا انعقاد کسی ایسے ملک میں کرے جہاں غیر جانبدار ماحول میسر ہو۔

جونیئر ہاکی ورلڈکپ رواں برس 28 نومبر سے بھارت میں شروع ہوگا اور 11 دسمبر تک جاری رہے گا۔ پاکستان کی شرکت اس بار بھی غیر یقینی نظر آ رہی ہے کیونکہ اس سے قبل قومی ٹیم نے بھارت میں ہونے والا ایشیا کپ بھی سکیورٹی وجوہات کی بنا پر نہیں کھیلا تھا۔ذرائع کا کہنا ہے کہ پی ایچ ایف کی جانب سے بھیجے گئے خط پر ایف آئی ایچ غور کرے گی اور آئندہ چند روز میں اس حوالے سے فیصلہ متوقع ہے۔