Category: کھیل

اینڈی مرے کو بڑی کامیابی مل گئی
واشنگٹن (اے پی پی) اینڈی مرے اور فیلسیانو لوپیز سنسناٹی ماسٹرز ٹینس مینز ڈبلز کوارٹر فائنل میں پہنچ گئے.
تفصیلات کے مطابق انگلینڈ کے معروف کھلاڑی اینڈی مرے اور انکے ہسپانوی جوڑی دار فیلسیانو لوپیز فتوحات کو برقرار رکھتے ہوئے سنسناٹی ماسٹرز ٹینس ٹورنامنٹ مینز ڈبلز کوارٹر فائنل میں پہنچ گئے۔ انہوں نے پری کوارٹر فائنل راﺅنڈ میں ریان ہیرسن اور جیک سوک پر مشتمل امریکی جوڑی کو شکست دیکر ایونٹ سے باہر کر دیا۔ جمعہ کو امریکا میں جاری ایونٹ میں کھیلے گئے مینز ڈبلز پری کوارٹر فائنل میں اینڈی مرے اور فیلسیانو لوپیز نے سخت مقابلے کے بعد ریان ہیرسن اور جیک سوک پر مشتمل امریکی جوڑی کو پہلے سیٹ میں 2-6 کی شکست کے باوجود اگلے سٹریٹ سیٹس میں 6-3 اور 10-7 سے ہرا کر ایونٹ کے کوارٹر فائنل کے لئے کوالیفائی کرلیا۔
اگست 16, 2019
راجر فیڈرر کو اپ سیٹ شکست کا سامنا
واشنگٹن (اے پی پی) سنسناٹی ماسٹرز ٹینس میں راجر فیڈرر کو پری کوارٹر فائنل میں اپ سیٹ شکست کا سامنا کرنا پڑگیا.
تفصیلات کے مطابق سربیا کے شہرہ آفاق ٹینس سٹار اور عالمی نمبر ایک نوویک جوکووچ، لیوکاس پاﺅلی اور آندرے روبلو فتوحات برقرار رکھتے ہوئے سنسناٹی ماسٹرز ٹینس ٹورنامنٹ مینز سنگلز کوارٹر فائنل میں پہنچ گئے جبکہ سوئس سٹار اور ایونٹ کے تھرڈ سیڈڈ کھلاڑی راجر فیڈرر پری کوارٹر فائنل میں اپ سیٹ شکست کے بعد ایونٹ سے با ہر ہوگئے۔ جمعہ کو امریکا میں جاری ایونٹ میں کھیلے گئے مینز سنگلز پری کوارٹر فائنل راﺅنڈ میچز میں نوویک جوکووچ نے انتہائی شاندار کارکردگی کا مظاہرہ کرتے ہوئے حریف ہسپانوی کھلاڑی باٹسٹا ایگٹ کو سٹریٹ سیٹس میں 6-3 اور 6-4 سے شکست دے کر کوارٹر فائنل میں جگہ بنا لی، فرانسیسی کھلاڑی لیوکاس پاﺅلی نے سخت مقابلے کے بعد روسی کھلاڑی کیرن خچانووف کو 6-7(3-7)، 6-4 اور 6-2 سے ہرا کر کوارٹر فائنل میں پہنچنے کا اعزاز حاصل کیا۔
ایک اور میچ میں روسی کھلاڑی آندرے روبلو نے شاندار کھیل کا مظاہرہ کرتے ہوئے سب سے زیادہ گرینڈ سلام کے فاتح اور ایونٹ کے تھرڈ سیڈڈ سوئس سٹار راجر فیڈرر کو سٹریٹ سیٹس میں 6-3 اور 6-4 سے اپ سیٹ شکست دیکر ایونٹ سے باہر کر دیا۔ کوارٹر فائنل میچ انکا مقابلہ ہم وطن کھلاڑی ڈینیل مڈویڈیو سے ہوگا۔
اگست 16, 2019
سری لنکا کیخلاف ٹیسٹ میچ، اہم ترین خبر آگئی
گال (اے پی پی) آئی سی سی ورلڈ ٹیسٹ چیمپئن شپ کے سلسلے میں نیوزی لینڈ اور سری لنکا کے درمیان جاری پہلا ٹیسٹ میچ دلچسپ مرحلے میں داخل ہوگیا ہے.
تفصیلات کے مطابق سری لنکن ٹیم اپنی پہلی اننگز میں کیویز اننگز کے سکور 249 رنز کے جواب میں 267 رنز بناکر آﺅٹ ہوگئی، کیویز ٹیم نے دوسری اننگز میں میچ کے تیسرے روز کھیل ختم ہونے تک 7 وکٹوں کے نقصان پر 195 رنز بناکر سری لنکا کے خلاف 177 رنز کی برتری حاصل کرلی۔ سری لنکا کی طرف سے نیروشن 61، کوسل مینڈس 53 اور میتھیوز 50 رنز بنا کر نمایاں رہے، اعجاز پٹیل نے 5 وکٹیں لیں۔ کیویز کی طرف سے دوسری اننگز میں وکٹ کیپر بلے باز واٹلنگ ناقابل شکست 63 رنز کے ساتھ نمایاں بلے باز رہے۔ لیستھ نے چار کھلاڑیوں کو آﺅٹ کیا۔ میچ کے تیسرے روز کے 6 اوورز ابھی باقی تھے کے بارش کا سلسلہ شروع ہوگیا اور میچ روک دیا گیا۔ لیستھ ایمبولڈنیا سری لنکا کے آخری آﺅٹ ہونے والے کھلاڑی تھے جو 5 رنز بناکر سومر ویلی کی گیند پر ایل بی ڈبلیو آﺅ ٹ ہوگئے۔ کمارا بغیرکوئی رن بنائے ناٹ آﺅٹ رہے۔ نیوزی لینڈ کی جانب سے اعجاز پٹیل نے پانچ، سومر ویلی نے تین جبکہ ٹرینٹ بولٹ نے دو کھلاڑیوں کو پویلین کی راہ دکھائی۔ نیوزی لینڈ کی طرف سے دوسری اننگز کا آغاز جیت روال ٹام لیتھم نے کیا۔ جیت روال 4 رنز بناکر ڈی سلوا کی گیند پر کرونارتنے کے ہاتھوں کیچ آﺅٹ ہوگئے۔ کین ولیمسن بھی کوئی خاص کارکردگی کا مظاہرہ نہ کر پائے اور محض 4 رنز بناکر پویلین لوٹ گئے انکو لیستھ نے پریرا کے ہاتھوں کیچ آﺅٹ کیا۔ راس ٹیلر 3 رنز بناکر لیستھ کی گیند پر دوسلوا کے ہاتھوں کیچ آﺅٹ ہوگئے۔ ٹام لیتھم 45 رنز بناکر اکیلا کی گیند پر ڈی سلوا کے ہاتھوں کیچ آﺅٹ ہوگئے۔ ہنری نیکولس کیویز ٹیم کے پانچویں آﺅٹ ہونے والے کھلاڑی تھے جو 26 رنز بناکر ڈی سلوا کی گیند پر مینڈس کے ہاتھوں کیچ آﺅٹ ہوگئے۔ مچل سانٹنر 12 رنز بناکر لیستھ کی گیند پر لکمل کے ہاتھوں کیچ آﺅٹ ہوگئے۔
تیسرے روز کے ابھی 6 اوورز باقی تھے کے بارش شروع ہوگئی اور میچ روک دیا گیا۔ اسطرح تیسرے روز جب کھیل ختم ہوا تو کیویز ٹیم نے اپنی دوسری اننگز میں 7 وکٹوں پر 195 رنز بنا لئے تھے اور اسے آئی لینڈرز کے خلاف مجموعی طور پر 177 رنز کی برتری حاصل ہوگئی تھی جبکہ اسکی 3 وکٹیں ابھی باقی تھیں۔ بی جے واٹلنگ 63 اور سومر ویلی 5 رنز کے ساتھ وکٹ پر موجود تھے۔ لیستھ نے 4 اور ڈی سلوا نے 2 کھلاڑیوں کو آﺅٹ کیا.
اگست 16, 2019
ورلڈ کپ فائنل: اوور تھرو واقع پر نظرثانی کرنے کا اعلان
لندن (اے پی پی) میلبورن کرکٹ کلب نے آئندہ ماہ ورلڈ کپ فائنل میں اوور تھرو واقع پر نظرثانی کرنے کا اعلان کردیا ہے.
تفصیلات کے مطابق میلبورن کرکٹ کلب (ایم سی سی) نے اس بات کا اعلان کیا ہے کہ حال ہی میں انگلینڈ میں منعقدہ آئی سی سی ون ڈے ورلڈ کپ فائنل میں اوور تھرو واقع پر نظرثانی کی جائے گی۔ انگلینڈ اور نیوزی لینڈ کے درمیان کھیلے گئے ورلڈ کپ فائنل میں گپٹل کے اوور تھرو پر ایمپائر نے 5 کی بجائے 6 رنز دیئے تھے جس پر تحفظات کا اظہار کیا گیا تھا۔ ایم سی سی کی طرف سے جاری کردہ بیان کے مطابق ورلڈ کرکٹ کمیٹی اوور تھرو سے متعلق آئی سی سی کے قانون 19.8 پر تبادلہ خیال کر چکی ہے اور انہوں نے اس قانون کو کلیئر قرار دیتے ہوئے کہا تھا کہ لاز سب کمیٹی آئندہ ماہ میں اس معاملے پر نظرثانی کرے گی۔
واضح رہے کہ سری لنکن ایمپائر دھرما سینا بھی فائنل میں 5 کی بجائے 6 رنز دینے کے فیصلے پر اپنی غلطی کا اعتراف کر چکے ہیں۔
اگست 16, 2019
ویسٹ انڈیز کیخلاف سیریز: بھارتی ٹیم کے حوالے سے بڑی خبر آگئی
کنگسٹن (اے پی پی) ویسٹ انڈیز کے خلاف دو ٹیسٹ میچوں کی سیریز سے قبل بھارتی ٹیم تین روزہ ٹور میچ میں ہفتے کو ایکشن میں نظر آئے گی.
بھارت اور ویسٹ انڈیز کی ٹیموں کے درمیان دو ٹیسٹ میچوں کی سیریز سے قبل تین روزہ ٹور میچ ہفتہ سے شروع ہوگا۔ اس سے قبل بھارتی ٹیم نے میزبان ویسٹ انڈیز کی ٹیم کو تین ٹی ٹونٹی انٹرنیشنل اور تین ون ڈے انٹرنیشنل میچوں کی سیریز میں مکمل شکست دی تھی۔ بھارتی ٹیم نے کالی آندھی کو تین ٹی ٹونٹی میچوں کی سیریز میں 3-0 سے وائٹ واش کیا جبکہ تین ون ڈے انٹرنیشنل میچوں کی سیریز میں 2-0 سے وائٹ واش کیا۔ دونوں ٹیموں کے درمیان تین ون ڈے میچوں کی سیریز کا پہلا میچ بارش کی نذر ہوگیا تھا۔ دو ٹیسٹ میچوں کی سیریز سے قبل بھارتی ٹیم 17 سے 19 اگست تک ایک ٹور میچ میں شرکت کریگی۔
واضح رہے کہ دونوں ٹیموں کے درمیان دو ٹیسٹ میچوں کی سیریز کا پہلا میچ 22 سے 26 اگست تک کھیلا جائے گا جبکہ دوسرا اور آخری کرکٹ ٹیسٹ میچ 30 اگست سے شروع ہوگا۔
اگست 16, 2019
فیفا ورلڈ کپ اسی سال کروانے کا اعلان
برازیل (اے پی پی) فٹ بال کی عالمی تنظیم فیفا کے زیر اہتمام انڈر۔17 فٹ بال ورلڈ کپ کا 18 واں ایڈیشن رواں سال اکتوبر میں برازیل میں شروع ہوگا۔
تفصیلات کے مطابق فیفا انڈر۔17 فٹ بال ورلڈ کپ ٹورنامنٹ کے کامیاب انعقاد کے لئے تیاریاں شروع ہو چکی ہیں۔ میگا ایونٹ میں مختلف ممالک کی 24 ٹیمیں ٹائٹل کے حصول کے لئے پنجہ آزمائی کرینگی۔ میگا ایونٹ میں میزبان برازیل، کینیڈا، نیوزی لینڈ، انگولا، نائیجیریا، ہنگری، ایکواڈور، آسٹریلیا، ساﺅتھ کوریا، ہیٹی، فرانس، چلی، امریکا، سینیگال، جاپان، ہالینڈ، سپین، ارجنٹائن، تاجکستان، کیمرون، سولومن جزائر، پیراگوئے اور میکسیکو شامل ہیں۔ انگلینڈ کی ٹیم انڈر۔17 فٹ بال ورلڈ کپ ٹورنامنٹ میں اپنے اعزاز کا دفاع کریگی۔
دوسری جانب میگا ایونٹ میں شرکت کرنے والی 24 ٹیموں کو 6 مختلف گروپوں میں تقسیم کیا گیا ہے۔
اگست 16, 2019
سٹورٹ براڈ نے وارنر کو اپنا شکار بنالیا
لارڈز (اے پی پی) سٹورٹ براڈ نے ٹیسٹ کرکٹ میں 8 ویں مرتبہ وارنر کو اپنا شکار بنایا.
تفصیلات کے مطابق انگلش فاسٹ باﺅلر سٹورٹ براڈ نے آسٹریلوی ٹیم کے مایہ ناز اوپننگ بیٹسمین ڈیوڈ وارنر کو اپنے نشانے پر رکھ لیا اور آٹھویں مرتبہ انہیں اپنا شکار بنا ڈالا۔ اس طرح براڈ ٹیسٹ کرکٹ میں وارنر کو زیادہ مرتبہ آﺅٹ کرنے والے دوسرے انگلش باﺅلر بن گئے ہیں۔ انہوں نے آسٹریلیا کے خلاف جاری دوسرے ایشز ٹیسٹ میچ کی پہلی اننگز میں وارنر کو آﺅٹ کر کے یہ کارنامہ انجام دیا۔ جیمز اینڈرسن کو سب سے زیادہ 9 مرتبہ وارنر کو آﺅٹ کرنے کا اعزاز حاصل ہے۔
اگست 16, 2019
بریٹ لی کا بڑا ریکارڈ خطرے میں پڑ گیا
لارڈز (اے پی پی) نیتھن لیون نے ٹیسٹ کرکٹ میں مجموعی طور پر 355 وکٹیں حاصل کرکے بریٹ لی کا ریکارڈ برابر کردیا.
تفصیلات کے مطابق مایہ ناز آسٹریلوی سپنر نیتھن لیون نے ٹیسٹ کرکٹ میں سابق ہم وطن باﺅلر بریٹ لی کی زیادہ وکٹوں کا ریکارڈ برابر کر دیا۔ اسطرح وہ زیادہ وکٹیں لینے والے مشترکہ طور پر تیسرے آسٹریلوی باﺅلر بن گئے ہیں۔ انہوں نے انگلینڈ کے خلاف شروع ہونے والے دوسرے ایشز ٹیسٹ میچ کی پہلی اننگز میں بین سٹوکس، جونی بیئرسٹو اور سٹورٹ براڈ کو آﺅٹ کر کے یہ اعزاز حاصل کیا۔ دونوں باﺅلرز نے یکساں 355 وکٹیں لے رکھی ہیں۔ آسٹریلیا کی جانب سے شین وارن 708 وکٹیں لیکر پہلے اور گلین میگراتھ 563 وکٹیں لیکر دوسرے نمبر پر موجود ہیں۔
اگست 16, 2019
بھارت کیخلاف سیریز، جنوبی افریقہ نے اسکواڈ کا اعلان کردیا
کیپ ٹاؤن (اے پی پی) جنوبی افریقہ نے دورہ بھارت کیلئے ٹیسٹ اور ٹی ٹونٹی سکواڈز کا اعلان کردیا۔
تفصیلات کے مطابق جنوبی افریقہ نے بھارت کیخلاف سیریز کا اعلان کردیا. اینرچ نورٹج، روڈی سیکنڈ اور سینوران موتھوسیمی کو پہلی مرتبہ ٹیسٹ سکواڈ کا حصہ بنایا گیا ہے جبکہ ڈی کوک کو ٹی ٹونٹی ٹیم کی قیادت کی ذمہ داری سونپی گئی ہے۔ سابق کپتان ڈوپلیسی ٹیم میں جگہ بنانے میں ناکام رہے البتہ وہ ٹیسٹ ٹیم کی قیادت جاری رکھیں گے۔ ایڈن مرکرم، تھیونس ٹی بروئن، لونگی نگیڈی اور ڈیل سٹین کو بھی ٹی ٹونٹی سکواڈ میں شامل نہیں کیا گیا۔ اعلان کردہ ٹیسٹ سکواڈ کپتان فاف ڈوپلیسی، نائب کپتان ٹیمبا باووما، تھیونس ڈی بروئن، ڈی کوک، ڈین ایلگر، زبیر حمزہ، کیشو مہاراج، ایڈن مرکرم، سینوران موتھوسیمی، لونگی نگیڈی، اینرچ نورٹج، ورنن فلینڈر، ڈین پائیڈت، کگیسوربادا اور روڈی سیکنڈ پر مشتمل ہے۔
دوسری جانب ٹی ٹونٹی سکواڈ میں کپتان ڈی کوک، نائب کپتان ریسی وانڈر ڈوسن، ٹیمبا باووما، جونیئر ڈیلا، بوجرن فورٹوئن، بیورن ہینڈرکس، ریزا ہینڈرکس، ڈیوڈ ملر، اینرچ نورٹج، اینڈائل فیلک وایو، ڈیوائن پریٹوریس، کگیسوربادا، تبریز شمسی اور جان جان سمٹس شامل ہیں۔
اگست 16, 2019
سابق بھارتی کرکٹر نے کی خودکشی
سابق بھارتی کرکٹر وی بی چندرشیکھر مائیلاپور میں خودکشی کرلی۔ بھارتی میڈیا نے پولیس ذرائع کے حوالے سے بتایا کہ چندر شیکھر کی نعش اپنے کمرہ میں پنکھے سے لٹکی ہوئی پائی گئی۔ تحقیقاتی ٹیم آفیسر انسپکٹر سنتی مروگن کے مطابق 57سالہ کرکٹر نے خود کشی کی کوئی وجہ تحریر نہیں کی۔
دوسری جانب متوفی کی اہلیہ سومیا نے پولیس کو بتایا کہ جب اس نے کمرہ کا دروازہ کھٹکھٹایا تو کوئی جواب نہیں آیا۔پھر انہوں نے کمرہ کی کھڑکی سے اندر دیکھا تو چندر شیکھر کی نعش لٹکی ہوئی تھی۔
پولیس انسپکٹر مروگن کے مطابق چندر شیکھر نے اپنے افراد خاندان کے ساتھ شام تقریبا 6بجے چائے پی۔
پولیس عہدیدا ر نے مزید بتایا کہ چندر شیکھر کرکٹ میں ہارنے کے سبب کافی تناو کا شکار تھا۔ چندرشیکھر ٹامل ناڈو پریمیئر لیگ ٹیم کا صدر جبکہ اس کا اپنا کرکٹ کوچنگ سنٹر بھی تھا۔
لاش کو پوسٹ مارٹم کے لیے سرکاری دواخانہ منتقل کیا گیا ہے۔ انڈین کرکٹ بورڈ نے بھی ان کے موت کی تصدیق کردی ہے۔
اگست 16, 2019