Category: کھیل

پی ایس ایل کا شیڈول جاری کر دیا گیا،ایچ بی ایل پی ایس ایل 10 کا آغاز 11 اپریل کو ہوگا۔ پشاور 8 اپریل کو نمائشی میچ کی میزبانی کرے گا۔

ایچ بی ایل پی ایس ایل 10 کا آغاز 11 اپریل کو ہوگا۔ راولپنڈی کرکٹ اسٹیڈیم دفاعی چیمپئن اسلام آباد یونائیٹڈ اور لاہور قلندرز کے درمیان افتتاحی میچ سمیت 11 میچوں کی میزبانی کرے گا۔ قذافی اسٹیڈیم 18 مئی کو فائنل سمیت 13 میچوں کی میزبانی کرے گا۔ کراچی اور ملتان پانچ پانچ میچوں کی میزبانی کریں گے۔

نوٹ، اس خبر کو اپڈیٹ کیا جا رہا ہے

پاکستان کرکٹ ٹیم کے سینئر کھلاڑیوں نے چیمپئنز ٹرافی میں ناقص کارکردگی کے بعد اگلی سیریز میں بریک لینے کے لیے مشاورت کا آغاز کر دیا ہے۔ ذرائع کا کہنا ہے کہ پاکستان کرکٹ بورڈ (پی سی بی) کے اعلیٰ عہدیدار قومی کرکٹرز کی حالیہ کارکردگی سے سخت ناخوش ہیں اور اس وجہ سے بعض کھلاڑیوں کو اگلے میچز میں جگہ سے محروم ہونے کا خدشہ ہے۔

پاکستان کی کرکٹ ٹیم کی اگلی اسائنمنٹ نیوزی لینڈ میں 16 مارچ سے 5 اپریل تک کھیلی جانے والی وائٹ بال سیریز ہے، جس میں پانچ ٹی ٹوئنٹی اور تین ون ڈے میچز شامل ہیں۔ یہ سیریز پاکستان کرکٹ ٹیم کے لیے انتہائی اہمیت کی حامل ہے، لیکن اس دوران کھلاڑیوں کی ناقص کارکردگی کی بنیاد پر بورڈ کے اعلیٰ عہدیداروں کی طرف سے سخت ناراضگی کا سامنا ہے۔

نجی ٹی وی کے مطابق ذرائع نے بتایا ہے کہ بعض سینئر کھلاڑی چیمپئنز ٹرافی میں ناقص کارکردگی کی بنا پر سیریز سے دستبردار ہونے کا ارادہ رکھتے ہیں تاکہ انہیں ڈراپ ہونے کے لیبل سے بچایا جا سکے۔ بعض کھلاڑیوں کے بارے میں یہ چہ میگوئیاں کی جا رہی ہیں کہ وہ نیوزی لینڈ کے دورے سے خود کو باہر کر سکتے ہیں تاکہ ان کی کارکردگی پر مزید سوالات نہ اٹھیں۔خاص طور پر شاہین شاہ آفریدی، حارث رؤف، نسیم شاہ اور بابر اعظم کے نام ان کھلاڑیوں میں شامل ہیں جنہیں ڈراپ کیے جانے کی بازگشت سنی جا رہی ہے۔ ان کھلاڑیوں کی چیمپئنز ٹرافی میں کارکردگی خاصی مایوس کن رہی تھی، اور اسی وجہ سے ان کے بارے میں شکوک و شبہات کا سامنا ہے۔

چیمپئنز ٹرافی کے پہلے میچ میں نیوزی لینڈ نے پاکستان کو 60 رنز سے شکست دی تھی، جبکہ دوسرے میچ میں بھارت نے پاکستان کو 6 وکٹوں سے ہرا دیا تھا۔ تیسرا میچ بارش کے باعث منسوخ کر دیا گیا تھا۔ اس دوران پاکستان کی ٹیم نے ان دونوں میچز میں اپنی ناقص کارکردگی کے باعث شائقین کرکٹ کو مایوس کیا ہے۔اب تک یہ فیصلہ نہیں ہو سکا کہ کون سے کھلاڑی اگلے دورے کے لیے دستیاب ہوں گے، لیکن یہ واضح ہے کہ پاکستان کرکٹ ٹیم کی قیادت اور بورڈ میں اس حوالے سے سخت فیصلے کرنے کی تیاری کی جا رہی ہے۔

ایشیا کپ 2025 بھارت کے بجائے متحدہ عرب امارات میں کرانے کی تجویز

کرکٹ کی عالمی ویب سائٹ کی رپورٹ کے مطابق، ایشیا کپ 2025 کی میزبانی بھارت کے بجائے متحدہ عرب امارات میں کروانے کی تجویز سامنے آئی ہے۔ مجوزہ طور پر یہ ٹورنامنٹ ستمبر 2025 میں یو اے ای میں کرانے کا قوی امکان ہے۔رپورٹ کے مطابق بھارت اور پاکستان کے درمیان بڑھتے ہوئے سیاسی تناؤ کی وجہ سے ایشیا کپ کا انعقاد نیوٹرل وینیو پر کرنے کی تجویز پر غور کیا جا رہا ہے۔ اس حوالے سے حتمی فیصلہ ایشین کرکٹ کونسل (ACC) کرے گی۔اس وقت ایشیا کپ کے ممکنہ وینیوز کے طور پر سری لنکا اور متحدہ عرب امارات پر بات چیت ہو رہی ہے، لیکن ابھی تک ان میں سے کسی ایک کو حتمی شکل نہیں دی جا سکی۔

مزید یہ کہ ایشیا کپ 2025 میں میچوں کا فارمیٹ ٹی20 ہو گا، اور اس سال ہونے والے ایشیا کپ میں 19 میچز کھیلے جائیں گے۔ اس ٹورنامنٹ میں پاکستان اور بھارت سمیت 8 ٹیمیں شرکت کریں گی، جو اس ایونٹ کو مزید دلچسپ اور مسابقتی بنائیں گی۔ایشیا کپ کے نئے وینیو اور فارمیٹ پر غور کرنے سے قبل، کرکٹ کی عالمی کمیونٹی کی نظریں ایشین کرکٹ کونسل کے فیصلوں پر مرکوز ہوں گی، کیونکہ یہ ٹورنامنٹ جنوبی ایشیاء کے کرکٹ شائقین کے لئے ہمیشہ خاص اہمیت کا حامل رہا ہے۔