کراچی: وزیر اطلاعات سندھ شرجیل میمن نے کہا ہے کہ یہ لگ رہا ہے کہ عمران خان کو ریلیف دیا جارہا ہے، عمران خان کو ملنے والے ریلیف کے پیچھے ان کی سابقہ اہلیہ اور سابقہ سالے زیک گولڈ اسمتھ کا ہاتھ ہے۔
باغی ٹی وی: وزیر اطلاعات سندھ شرجیل میمن نے ییلو لائن بی آر ٹی کا دورہ کیا جہاں انہوں نے میڈیا سے گفتگو کرتے ہوئے کراچی میں 100 ارب روپے کی لاگت سے ییلو لائن بی آر ٹی بنانے کا اعلان کردیا اور کہا کہ جام صادق پل کے ساتھ دوسرا پل 18 ماہ میں مکمل ہوجائے گا، سندھ حکومت شہریوں کو سفری سہولیات فراہم کررہی ہے، شہریوں کے لیے صرف ایک منصوبے پر 100 ارب خرچ کررہے ہیں، پیپلزپارٹی سندھ کی عوام کی خدمت کررہی ہے، ییلو لائن بی آرٹی منصوبہ 21 کلو میٹر پر محیط ہے،ساتھ ہی کراچی میں مزید الیکٹرک بسیں لانے کا بھی اعلان کیا۔
شرجیل میمن نے کہا کہ ایک بات تو واضح ہے کہ عمران خان کے لیے اسرائیلی لابی سنجیدگی کے ساتھ کام کررہی ہے، جس میں گولڈ اسمتھ فیملی کا خصوصی کردار ہے، اس وقت امریکا میں بھی گولڈ اسمتھ لابی سرگرم عمل ہے، حال ہی میں امریکی قانون دانوں نے عمران خان کے حق میں دستخط کیے ہیں اور وہ عمران خان کے حق میں قرار داد لانا چاہ رہے ہیں۔
انہوں نے مزید کہا کہ یہ وہی عمران خان ہیں جو کہا کرتے تھے کہ ہم کوئی غلام ہیں، غیرملکی مداخلت نامنظور، بقول ان کے انہیں سازش کے تحت نکالا گیا اور جن ممالک پر وہ سازش کا الزام عائد کرتے تھے آج پی ٹی آئی کی قیادت انہی ممالک کے پیروں پر گری ہوئی ہے، ان کے لابسٹ اور یہودی لابی آج انہی ممالک کے پیروں پرگری ہوئی ہے کہ عمران خان اور اس کی فیملی کو ریلیف دیا جائے۔
انہوں نے کہا کہ لابیز عمران خان کو ریلیف دلوانے کے لیے کام کررہی ہیں، عمران خان کی جیل میں ملاقاتوں پر پابندی بھی ختم ہوگئی ہے اور یہ لگ رہا ہے کہ عمران خان کو ریلیف دیا جارہا ہے، انہوں نے کہاکہ عمران خان کو ملنے والے ریلیف کے پیچھے ان کی سابقہ اہلیہ اور سابقہ سالے زیک گولڈ اسمتھ کا ہاتھ ہے، جو پوری دنیا میں یہ لابنگ کررہے ہیں کہ جیسے وہ بہت بڑا قومی ہیرو تھا جس کے ساتھ کوئی ظلم ہوا ہے، حالانکہ قطعاً ایسا نہیں ہے۔
شرجیل میمن نے مزید کہاکہ جو اسرائیل آج فلسطین، لبنان اور ایران پر حملے کررہا ہے، وہی اسرائیل آج عمران خان کو بچانے کے لیے محنت کررہا ہے، ان ساری چیزوں کا پس منظر دیکھا جائے تو ڈاکٹر اسرار احمد کا وہ خطاب صحیح ثابت ہورہا ہے کہ عمران خان اسرائیلی لابی کی جانب سے ہم پر مسلط کیا گیا ہے۔
انہوں نے کہا کہ جو اسرائیل فلسطین، لبنان اور ایران میں حملے اور نسل کشی کررہا ہے، انسانوں کے وجود کو ختم کررہا ہے، اسے کہیں انسانی حقوق کی پامالی نظر نہیں آتی لیکن عمران خان کی گرفتاری پر ایک بین الاقوامی کانفرنس میں اسرائیل کا نمائندہ کہتا ہے کہ پاکستان میں انسانی حقوق پامال ہورہے ہیں، اگر عمران خان کی گرفتاری پر اسرائیل کی چیخیں نکل رہی ہیں تو اس کا مطلب ہے کہ یہ ان کا پودا ہے ، یہ ان کا بے بی ہے، یہ ان کی پروڈکٹ ہے، یہ پاکستان میں ان کا پیدا کیا ہوا فتنہ ہے، کیونکہ انہیں پتہ ہے کہ پاکستان کو شہید ذوالفقار علی بھٹو نے ایٹمی طاقت بنایا ہوا ہے اس لیے اس سے ایسے نہیں لڑا جاسکتا۔
شرجیل میمن نے کہا کہ اسرائیل کو پتہ ہے کہ پاکستان سے لڑنے کے لیے یہاں پر فتنہ اور فساد ہونا چاہیے، یہاں ایسا پودا اگایا جائے جو ملک کو اندرونی طور پر کھوکھلا کرے، اس لیے عمران خان کو لانچ کیا گیا عمران خان پاکستان کے خلاف اسرائیل کا ایٹمی ہتھیار ہے جو اس وقت گرفت میں ہے اور اس کو ریلیف دینا اسرائیلی مقاصد کو پورا کرنے کے مترادف ہے۔
اس سوال پر کہ اگر عمران خان کا اسرائیل سے گٹھ جوڑ ہے تو 26 ویں آئینی ترمیم کے لیے پی ٹی آئی سے بات چیت کیوں کی گئی؟ جس پر شرجیل میمن نے کہا کہ میں یہ نہیں کہتا کہ پی ٹی آئی کا اسرائیل سے گٹھ جوڑ ہے، مجھے پتہ ہے کہ بیرسٹر گوہر اور اسد قیصر یہ نہیں جانتے ہوں گے کیونکہ خفیہ ایجنٹ کسی کو یہ نہیں بتاتے کہ میں کس کے لیے کام کررہا ہوں، میں پوری پی ٹی آئی کو برا بھلا نہیں کہوں گا، پی ٹی آئی کے ورکر تو معصوم ہیں۔
