Tag: بریکنگ

کیف :یوکرین نےروس سے اہم شہر واپس چھین لیا،اطلاعات کے مطابق یوکرین نے دارالحکومت کئیف کے قریبی شہر ارپن کو روس سے واپس چھین لیا ہے جو 24 فروری کے حملے کے بعد روسی فوجیوں کے قبضے میں چلا گیا تھا۔ خبر رساں ادارے اے روئٹرز کے مطابق شہر کے میئر اولیکسینڈر مارکشائن نے بیان جاری کیا ’آج ہمارے پاس ایک اچھی خبر ہے، ارپن کو آزاد کرا لیا گیا ہے۔‘ ایک سینیئر امریکی فوجی افسر کا کہنا ہے کہ ’سرزمین واپس لینے کی جدوجہد جاری ہے اور مشرقی شہر ٹروسٹیانیٹس، جنوبی سمے ہمارے پاس واپس آ چکے ہیں۔‘

دوسری جانب آج استنبول میں آمنے سامنے بات چیت کا سلسلہ بحال ہونے جا رہا ہے جو کہ 10 مارچ کو وزرائے خارجہ کی ملاقات کے بعد پہلی بار ہو رہا ہے۔ یوکرینی حکام کی جانب سے کسی ٹھوس پیش رفت کا امکان کم ظاہر کیا گیا ہے تاہم یہ حقیقت ہے کہ وہ، وہ سب کچھ کر رہے ہیں جو روسی حملے کے بعد اس کو پیچھے دھکیلے جانے کی علامات ہیں۔ اسی طرح ابھی تک کسی فریق نے روس کے علاقائی مطالبات بشمول کریمیا کے حوالے سے کوئی بات نہیں کی ہے، جس پر روس نے 2014 میں قبضہ کرتے ہوئے اپنے ساتھ الحاق کر لیا تھا۔

اسی طرح دوسرا علاقہ دونبس کا ہے جس کے بارے میں روس کا مطالبہ ہے کہ اس کو علیحدگی پسندوں کے حوالے کیا جائے۔ یوکرینی وزارت داخلہ کے مشیر وادیم ڈینائسنکوف کا کہنا ہے کہ ’میرا نہیں خیال کہ کلیدی معاملے پر کوئی ٹھوس پیش رفت ہو سکے گی۔‘ اس صورت حال میں روس کے زیرنگیں جانے والے یوکرینی شہروں میں پھنسے لوگوں کے لیے کسی ریلیف کا امکان بھی دکھائی نہیں دیتا، جن میں مارپول خصوصی طور پر قابل ذکر ہے۔

ماریوپول کے میئر کا کہنا ہے کہ ایک لاکھ 60 ہزار کے قریب لوگ اب بھی وہاں پھنسے ہوئے ہیں اور روس ان کو نکلنے نہیں دے رہا۔ روسی فوج کی جانب سے پچھلے ہفتے کہا گیا تھا علیحدگی پسندوں کے قبضے میں آنے والے علاقوں کا دائرہ بڑھانے پر توجہ دی جائے گی، دوسری جانب یوکرین کا کہنا ہے اسے ابھی تک ایسے کوئی آثار دکھائی نہیں دیے جس سے ظاہر ہو کہ روس نے دارالحکومت کو قبضے میں لینے کا ارادہ ترک کر دیا ہو۔

کیئف کے میئر ویٹالی کلٹسکوف نے کہا ہے کہ 100 افراد کو قتل کیا جا چکا ہے جن میں چار بچے بھی شامل ہیں جبکہ 82 کثیرمنزلہ عمارتوں کو ملیامیٹ کیا جا چکا ہے تاہم اس کے باوجود ہمارا شہر ہتھیار نہیں ڈالے گا۔ ان کے مطابق ’ہم روسی فوج کے خود کو ناقابل تسخیر سمجھنے کے افسانے کو تباہ کر دیا ہے۔‘ ان کا مزید کہنا تھا کہ ہم دنیا کی مضبوط ترین فوجوں میں سے ایک کی جارحیت کے خلاف مزاحمت کر رہے ہیں اور کامیابی کے ساتھ اس کو اپنے اہداف تبدیل کرنے پر مجبور کر دیا ہے۔

ماسکو:مغربی پابندیاں:روسی فضائی حدود سے باہر طویل دورانیے کی پرواز،دنیا مشکلات کا شکارہوگئی،اطلاعات کے مطابق ہانگ کانگ کی بین الاقوامی فضائی کمپنی کیتھی پیسیفک ایئر ویز نے اپنی نیو یارک سے ہانگ کانگ کے لیے پرواز کا نیا روٹ جاری کرنے کا منصوبہ تیار کیا ہے۔

بلومبرگ میڈیا کے مطابق روس کی فضائی حدود سے دور رہتے ہوئے بین الاقوامی فضائی کمپنیاں نئے راستے اختیار کر رہی ہیں۔ نیو یارک سے ہانگ کانگ کے لیے پرواز کا دورانیہ 17 گھنٹے ہوگا جو دنیا میں سب سے طویل دورانیے کی کمرشل پرواز ہو گی۔

کیتھی پیسیفک ایئر ویز کے نئے روٹ کے منصوبے کے مطابق پرواز نیو یارک کے جان ایف کینیڈی ایئرپورٹ سے اڑان بھرنے کے بعد بحر اوقیانوس کے اوپر پرواز کرتے ہوئے برطانیہ، جنوبی یورپ اور وسطی ایشیا سے ہوتے ہوئے ہانگ کانگ پہنچے گی۔یہ پرواز نیو یارک سے ہانگ کانگ تک 16 ہزار 618 کلومیٹر کا فاصلہ طے کرے گی۔

خیال رہے کہ پروازوں کی معلومات دینے والی معروف ویب سائٹ فلائٹ ریڈار 24 کے ڈیٹا کے مطابق اس سے قبل سنگاپور ایئر لائنز کی نیو یارک سروس 15 ہزار 349 کلومیٹر کا فاصلہ ساڑھے 17 گھنٹے کے وقت میں طے کرتی ہے۔

کیتھی پیسیفک ایئر ویز کی ترجمان نے بتایا ہے کہ کمپنی کی ایئر بس اے 350 نئے روٹ پر پرواز کی صلاحیت رکھتی ہے۔

گزشتہ دنوں ایئر نیوزی لینڈ نے بھی آک لینڈ اور نیو یارک کے درمیان 17 گھنٹے 35 منٹ دورانیے کی پروازیں شروع کرنے کا اعلان کیا تھا تاہم اِن پروازوں کا آغاز 17 ستمبر سے کیا جائے گا۔

واضح رہے کہ یوکرین پر حملے کی پاداش میں عالمی طاقتوں نے روس پر ہر طرح کی پابندیاں عائد کر رکھی ہیں جن میں روس پر فضائی حدود کی پابندیاں بھی شامل ہیں۔ اِن پابندیوں کے بعد ایشیا کی متعدد ایئر لائنز روس کی فضائی حدود سے دور رہتے ہوئے پروازیں آپریٹ کر رہی ہیں

خارکیف:روس یوکرین کو دو حصوں میں تقسیم کرنا چاہتا ہےاور اس کے قوی ثبوت موجود ہیں ، ادھر اس حوالے سے یوکرین کے انٹیلی جنس سربراہ کائرلوبدانوونے کہا ہے کہ روسی حملے کا مقصد یوکرین کوشمالی اورجنوبی کوریا کی طرح دوحصوں میں تقسیم کرنا تھا۔

تاہم وہ دارالحکومت کیف اوردیگربڑے شہروں پرکنٹرول حاصل کرنے میں ناکامی کی وجہ سے اپنے اس ارادے کو عملی جامہ نہیں پہنا سکا۔

غیرملکی خبررساں ایجنسی رائٹرز کے مطابق یوکرین کے مشرق میں واقع روس نوازخود ساختہ لیوہانسک عوامی جمہوریہ کا کہنا ہے کہ وہ جلد ہی روس میں شمولیت کے لیے ریفرینڈم کروانے والے ہیں۔

اس بابت یوکرینی وزیر خارجہ کا کہنا ہے کہ روس کے زیرقبضہ کسی بھی یوکرینی خطے میں کسی بھی قسم کے ریفرینڈم کو کالعدم اوربے بنیاد قراردیا جائے گا۔

یوکرینی ریڈ کراس کے رضا کاروں نے بھی خبر رساں ایجنسی کوبتایا ہے کہ جنوبی یوکرین میں جنگ کی وجہ سے بے گھر ہونے والے افراد کوزبردستی روس کے زیرتسلط علاقوں میں فرارپرمجبورکیا جارہا ہے۔واضح رہے کہ یوکرین پرروسی حملے کوایک ماہ سے زائد ہوچکا ہے۔

جب کہ لڑائی کا مرکزسمجھے جانے والے مغربی شہرلیویومیں مزید شدت آگئی ہے، روس کی جانب سے آج اس پر راکٹوں سے ایک بار پھر شدید حملہ کیا گیا ہے۔

چیرنیہیوشہرکے میئر کا کہنا ہے کہ روسی فوجیوں نے اس جنوبی شہرکو چاروں طرف سے گھیرلیا ہے۔

دوسری طرف یوکرینی صدر ولادیمیر زیلنسکی نے مغرب سے ہتھیاروں کی فراہمی کا مطالبہ کردیا ہے۔

غیر ملکی خبر رساں ادارے کے مطابق یوکرین کے صدر ولادیمیر زیلنسکی نے مغربی حکومتوں پر زور دیا ہے کہ وہ ان کے ملک کو طیارے، ٹینک اور میزائل دفاعی نظام فراہم کریں۔

ایک ویڈیو خطاب میں انہوں نے کہا کہ بھاری ہتھیار جو یورپ میں آزادی کا دفاع کر سکتے ہیں، ذخیروں میں خاک جمع کر رہے ہیں۔

یوکرینی صدر زیلینسکی نے شکایت کی کہ روسی طیارے کو مشین گنوں سے نہیں مارا جا سکتا۔

انہوں نے مزید کہا کہ “نیٹو کیا کر رہا ہے؟ کیا اسے روس چلا رہا ہے؟ وہ کس چیز کا انتظار کر رہے ہیں؟ 31 دن ہو گئے ہیں۔ ہم نیٹو سے صرف 1 فیصد مانگ رہے ہیں، اس سے زیادہ کچھ نہیں”۔

سلوواکیہ کے وزیر اعظم کا کہنا ہے کہ اگر متبادل فراہم کیا جائے تو ان کا ملک سوویت ساختہ ایس-300 ایئرڈیفنس میزائلوں کے ہتھیار یوکرین بھیجنے کے لیے تیار ہے۔