Tag: تازہ ترین

بھارت میں دماغی طور پر مردہ قرار دیے گئے شخص نے 4 افراد کو نئی زندگی دے دی-

باغی ٹی وی: بھارتی میڈیا کے مطابق مدھیہ پردیش سے تعلق رکھنے والے 32 سالہ شہری کو 25 فروری کو نئی دہلی میں ایک حادثے میں شدید زخمی ہونے کی وجہ سے انتہائی نازک حالت میں اسپتال منتقل کیا گیا تاہم دماغ میں خون جمع ہونے کے باعث ڈاکٹروں کی جانب سے اسے پیر کو دماغی طور پر مردہ قرار دے دیا گیا تھا۔

بعد ازاں مشورے کے بعد مریض کے اہلخانہ نے دوسرے مریضوں کی جان بچانے کے لیے اس کا دل، جگر اور دونوں گردے عطیہ کرنے کا فیصلہ کیا۔

ڈاکٹروں کے مطابق دماغی طور پر مردہ قرار دیئے گئے مریض کے اعضاء 4 مختلف مریضوں میں کامیابی کے ساتھ ٹرانسپلانٹ کر دیے گئے ہیں، جنہیں ان اعضاء کی اشد ضرورت تھی۔

آپریشن کرنے والے ایک ڈاکٹر نے کہا کہ میں اعضاء عطیہ کرنے والے مریض کے اہل خانہ کو سلام پیش کرتا ہوں کہ کیوںکہ ان کی وجہ سے 4 مریضوں کو دوسری زندگی مل گئی اس عمل سے دوسرے افراد کو بھی ترغیب ملنی چاہیے کہ وہ بھی اعضاء عطیہ کرنے کے لیے خود کو رجسٹر کریں۔

امریکی پارلیمانی کمیٹی برائے خارجہ امور نے صدر جو بائیڈن کو چینی سوشل میڈیا ایپ ٹک ٹاک پر پابندی کے اختیارات دینے کا بل منظور کر لیا۔

باغی ٹی وی : "روئٹرز” کے مطابق صدر بائیڈن کو حاصل ہونے والے اختیارات کے تحت وہ ٹک ٹاک سمیت کسی بھی سوشل میڈیا ایپ پر پابندی لگا سکیں گے۔

امریکی قانون سازوں نے 16 کے مقابلے میں 24 ووٹوں سے ٹک ٹاک پر پابندی کے صدارتی اختیار کا بل منظور کر لیا جس کے تحت صدر بائیڈن کو 100 ملین سے زائد امریکیوں کی جانب سے استعمال کی جانے والی چینی ایپلی کیشن پر پابندی لگانے کا اختیار حاصل ہو گیا۔

امریکی پارلیمانی کمیٹی برائے خارجہ امور کے ریپبلکن چیئرمین مائیکل مک کال نے ٹک ٹاک کو قومی سلامتی کیلئے ایک خطرہ قرار دیتے ہوئے کہا کہ یہی وقت ہے کہ اس کے خلاف عملی اقدامات اٹھائے جائیں، کوئی بھی شخص جو اپنے ڈیوائس پر ٹک ٹاک ایپ انسٹال کرتا ہے دراصل وہ چین کی کمیونسٹ پارٹی کو اپنی نجی معلومات تک رسائی کیلئے ایک بیک ڈور مہیا کر رہا ہے، یہ آپ کے موبائل فون میں ایک جاسوس غبارہ ہے۔

"کسی بھی شخص نے اپنے ڈیوائس پر ٹِک ٹاک ڈاؤن لوڈ کیا ہے جس نے سی سی پی (چین کی کمیونسٹ پارٹی) کو اپنی تمام ذاتی معلومات کا بیک ڈور دیا ہے۔ یہ ان کے فون میں جاسوسی غبارہ ہے۔”

دوسری جانب ڈیموکریٹ اراکین نے بل کی مخالفت کرتے ہوئےموقف اختیار کیا کہ ماہرین کی رائے لیے بغیر اور بحث کیے بغیر جلد بازی میں یہ بل منظور کیا گیا ہے، بل میں واضح نہیں ہے کہ پابندی کس طرح عمل میں لائی جائے گی بلکہ یہ بل صدر کو یہ اختیار دے دیتا ہے کہ وہ ٹک ٹاک کے ساتھ امریکا میں کسی بھی ایپلی کیشن کو اپنے موبائل فون پر ڈاؤن لوڈ کرنے پر پابندی عائد کر سکیں-

انہوں نے بل پر اعتراض کرتے ہوئے کہا کہ یہ بل صدر بائیڈن کو یہ اختیار دے دیتا ہے کہ کسی بھی ایسی چیز پر پابندی عائد کر دیں جس سے انہیں یہ محسوس ہوتا ہو کہ یہ چین کے زیر اثر ہونے کے باعث خطرہ بن سکتی ہے۔

وائٹ ہاؤس نے اس ہفتے سرکاری ایجنسیوں کو یہ یقینی بنانے کے لیے 30 دن کا وقت دیا کہ ٹک ٹاک کسی بھی وفاقی ڈیوائسز اور سسٹم پر نہیں ہے۔ 30 سے ​​زیادہ امریکی ریاستوں، کینیڈا اور یورپی یونین کے پالیسی اداروں نے بھی ٹک ٹاک کو سرکاری ڈیوائسز پر لوڈ کرنے پر پابندی لگا دی ہے۔

واضح رہے کہ اس سے قبل وائٹ ہاؤس کی جانب سے تمام وفاقی ایجنسیوں کو ہدایات جاری کرتے ہوئے وفاقی حکومت کے تمام ڈیوائسز اور سسٹمز پر ٹک ٹاک کے استعمال پر پابندی عائد کردی گئی تھی۔

امریکی پیروی کرتے ہوئے یورپی یونین اور کینیڈا کے پالیسی ساز اداروں کی جانب سے بھی سرکاری ڈیوائسز پر ٹک ٹاک انسٹال کرنے پر پابندی عائد کی گئی تھی۔

امریکا کی جانب سے سوشل میڈیا ایپ ٹک ٹاک پر پابندیاں عائد کرنے پر چین نے شدید تنقید کرتے ہوئے کہا تھا کہ ٹک ٹاک پر عائد پابندیوں سے امریکی حکومت کے عدم تحفظ اور ریاستی اختیار کے غلط استعمال کا انکشاف ہوتا ہے، امریکی حکومت نے قومی سلامتی کے تصور کو بہت زیادہ بڑھا چڑھا کر پیش کیا ہے اور ریاستی اختیار کو دیگر ممالک کی کمپنیوں کو دبانے کیلیے استعمال کیا ہے۔