وزیر اعلیٰ مریم نوازشریف کی عافیت(دارلامان) میں مقیم 10خواتین کو حج پر بھیجنے سے پہلے ملاقات ہوئی ہے
پاکستان مسلم لیگ کے قائد محمد نوازشریف بھی بزرگ خواتین کی خواہش پر ملنے کے لئے آگئے۔وزیراعلیٰ مریم نوازشریف سے عید پر عافیت میں رہائش پذیر بزرگ خواتین نے حج کی خواہش کی تھی۔وزیر اعلیٰ مریم نوازشریف کی ہدایت پر 10بزرگ خواتین کے لئے حج کا انتظامات کیے گئے۔بزرگ خواتین نےوزیر اعلیٰ مریم نوازشریف اور صدر پاکستان مسلم لیگ (ن) سے ملاقات میں اظہار تشکر کیا بہت سے دعائیں دیں
وزیراعلیٰ پنجاب مریم نواز کا کہنا تھا کہ بزرگ خواتین ہماری ماؤں جیسی ہیں، ان کا بہت خیال رکھا جائے، کوئی تکلیف نہ ہو، آپ نے پاکستان کے لئے بہت سی دعائیں کرنی ہیں، اللّٰہ تعالیٰ وطن عزیز کی خیر کرے۔اللّٰہ نے وعدہ پورے کرنے کی توفیق دی،مجھے آپ کے حج پر جانے کی بہت خوشی ہے۔
مزدور کومعاشی طور پر اوپر اٹھائیں گے، غریب کا اچھا وقت آگیا ہے۔نواز شریف
اس موقع پر نواز شریف کا کہنا تھا کہ حج پر جانے والوں سے ملنا ایک اعزاز ہے بہت خوشی ہوئی۔ مزدور کومعاشی طور پر اوپر اٹھائیں گے، غریب کا اچھا وقت آگیا ہے۔ہماری حکومت میں خلل نہ آتا تو غربت اور بے روزگاری ختم ہوجاتی۔حج پر جانے والے پاکستان کے لئے دعائیں کریں، اللہ ملک کی خیر کرے۔
کبھی سوچا بھی نہیں تھا کہ حج پر جا سکوں گی،بزرگ زینت بی بی آبدیدہ ہوگئیں ،”میں گلیاں دا روڑا کوڑا…… محل چڑھایا سائیاں“: زینت بی بی نے میاں محمد بخش کا شعر سنایا، فریدہ رحمت علی کا کہنا تھا کہ ہمارا کوئی سہارا نہیں تھا، اللہ تعالیٰ نے آپ کو وسیلہ بنا کر بھیج دیا۔امیر جہاںکا کہنا تھا کہ اللّٰہ وہاں لیکر جارہا ہے، باقی اسباب بھی اللہ بنائے گا اور حفاظت کرے گا۔ بخت مینا کا کہنا تھا کہ مریم نوازشریف نے ایسے برتاؤ کیا جیسے ہماری بیٹی ہیں۔ نسیم اختر کا کہنا تھا کہ محمد نوازشریف ہمارے ملک کے معمار ہیں ملنے کی بہت خواہش تھی۔عفت سلطانہ کا کہنا تھا کہ آپ ہمارے سر پر چادر کی مانند ہیں، یہ چادر پہلے سرک گئی تھی۔ یاسمین ملک کا کہنا تھا کہ نماز کے بعد حج کے لئے روزانہ دعا کیا کرتے تھے۔عابدہ سراج کا کہنا تھا کہ اللّٰہ ہر ماں کو مریم نوازشریف جیسی بیٹی دے۔بشیراں بی بی کا کہنا تھا کہ خوشی ہے کہ بلا وا آگیا اللہ نے مریم نوازشریف کو وسیلہ بنا دیا۔
وزیر اعلیٰ مریم نوازشریف کی طرف سے تمام خواتین کو احرام، سوٹ اور ذادراہ پیش کیا گیا۔عافیت میں رہائش پذیر 10 خواتین اور انچارج سمیرا اسلم اور معاون 21روز کے لئے سعودی عرب روانہ ہورہی ہیں۔فریدہ رحمت علی، امیر جہاں، بخت مینا، نسیم اختر، نور جہاں، عفت سلطانہ، یاسمین ملک، عابدہ سراج، زینت بی بی اور بشیراں بی بی حج کرنے والوں میں شامل۔سینیٹر پرویز رشید، سینئر صوبائی وزیر مریم اورنگزیب، صوبائی وزیر اطلاعات عظمیٰ زاہد بخاری، صوبائی وزیر مواصلات صہیب احمد ملک، ایم پی اے ثانیہ عاشق، معاون خصوصی راشد نصراللّٰہ، پرنسپل سیکرٹری ساجد ظفر ڈال، سیکرٹری سوشل ویلفیئر اور دیگر موجود تھے۔
وزیر اعلیٰ مریم نواز سے تھیلیسیمیا کے مریض بچے کی ملاقات، پانچ لاکھ روپے کا چیک دیا،گھر دلوانے کا وعدہ
وزیر اعلیٰ پنجاب مریم نوازشریف سے تھیلیسیمیا کے مریض بچے محمد رضوان نے ملاقات کی۔وزیر اعلیٰ مریم نواز نے محمد رضوان کو پانچ لاکھ روپے کا امدادی چیک دیا۔ وزیراعلی مریم نوازشریف نے محمد رضوان کی اپنے گھر کی خواہش پوری کرنے کا وعدہ کیا۔وزیراعلی مریم نوازشریف نے تھیلیسیمیا کے دیگر بچوں کا بھی خیال رکھنے کا عزم کا اظہار کیا۔وزیر اعلیٰ مریم نواز شریف نے محمد رضوان کا گرمجوشی سے خیر مقدم کیا۔وزیر اعلیٰ مریم نواز شریف نے محمد رضوان کو ساتھ بٹھایااور صحت کے بارے میں دریافت کیا۔محمد رضوان نے وزیراعلی مریم نواز شریف سے ملاقات پر دلی مسرت کا اظہار کیا۔ محمد رضوان نے کہا کہ یقین نہیں آرہا وزیر اعلیٰ سے مل رہا ہوں۔ وزیر اعلیٰ مریم نواز شریف شریف نے کہا کہ مجھے بھی یقین نہیں آرہا۔ محمد رضوان بہت اچھا نام ہے، ملکر بہت خوشی ہوئی۔تھیلیسیمیا کاہر مریض معاشرے کی خصوصی توجہ کے مستحق ہیں۔ تھیلیسیمیا کے مریضوں کیلئے خون کی تبدیلی کے عمل سے گزرنا تکلیف دہ ہے۔ سینٹر پرویز رشید بھی اس موقع پر موجود تھے
پنجاب حکومت کی پلاسٹک بیگزکے استعمال، پروڈکشن، فروخت اور تجارت پر پابندی
وزیراعلیٰ پنجاب مریم نوازشریف نے کہا کہ ماحولیاتی آلودگی پاکستان سمیت دنیا بھر کے لئے چیلنج ہے۔اقوام عالم کو مل کر قدرتی ماحول پر اثرانداز ہونے والے عوامل پر قابو پانا ہوگا۔عوام کرہ ارض کی حفاظت کے مشن میں ہمارا ساتھ دیں۔ وزیر اعلیٰ مریم نوازشریف نے ماحولیاتی تحفظ کے عالمی دن کے موقع پر اپنے پیغام میں کہاہے کہ پنجاب حکومت نے پلاسٹک بیگزکے استعمال، پروڈکشن، فروخت اور تجارت پر پابندی عائد کر دی ہے۔ پلاسٹک کے استعمال سے ماحول اور انسانی صحت پر مضر اثرات مرتب ہو رہے ہیں۔ ”نو ٹو پلاسٹک“مہم کا مقصد ماحولیاتی آلودگی کو کم کرنا اور ماحول دوست اقدامات کا فروغ ہے۔ پلاسٹک بیگزپر پابندی کی پالیسی کو سختی سے نافذ کیا جائے گا۔ہوٹلوں، ریستورانوں اور کھانے پینے کی جگہوں پر پلاسٹک کے تھیلوں کے استعمال پر پابندی ہوگی۔ پلاسٹک بیگ کی جگہ ماحول دوست متبادل جیسے کاٹن بیگ کو استعمال میں لایا جائے۔ پلاسٹک کی آلودگی کے مضر اثرات سے عوام کو آگاہ کرنے کے لیے خصوصی آگاہی مہم کا آغاز کررہے ہیں۔انہو ں نے کہاکہ فوسل فیول کے استعمال میں کمی اور قابل تجدید توانائی پر انحصار بڑھانا ہوگا۔ ماحولیاتی آلودگی میں تیزی سے اضافے کی ایک بڑی وجہ جنگلات کی مسلسل کٹائی بھی ہے۔ فطرتی خوبصورتی کو محفوظ رکھنے کے لیے مل کر اقدامات کرنے کی ضرورت ہے۔ ماحولیاتی آلودگی کی وجہ سے کرہ ارض کی 40فیصد سطح ارض انحطاط کا شکار ہے۔آج نہیں سوچا تو 2050 تک خشک سالی دنیا کی تین چوتھائی آبادی کوشدید متاثر کر سکتی ہے۔ پنجاب حکومت کے مثبت اقدامات ماحولیات کے تحفظ کے عزائم ظاہر کرتے ہیں۔ ہرفرد اپنا کردار ادا کرکے نئی نسل کے ماحولیاتی مستقبل کو یقینی بنا سکتا ہے۔
