Baaghi TV

Tag: مشرق وسطیٰ

  • امریکہ نے اپنےبچاوکےلیےمشرق وسطیٰ میں 14 خفیہ پراکسی وار آپریشن کیئے

    امریکہ نے اپنےبچاوکےلیےمشرق وسطیٰ میں 14 خفیہ پراکسی وار آپریشن کیئے

    واشنگٹن:امریکہ نے اپنےبچاوکےلیےمشرق وسطیٰ میں 14 خفیہ پراکسی وار آپریشن کیئے،اطلاعات کے مطابق انٹرسیپٹ نامی ادارے نے دعویٰ کیا ہے کہ اس کے پاس اس بات کے قوی ثبوت ہیں کہ امریکہ نے 2020 کے اوائل میں مشرق وسطیٰ اور ایشیا پیسیفک خطے میں کم از کم 14 پراکسی وار آپریشنز کرنے کے لیے "127E” کے نام سے ایک خفیہ اتھارٹی کا استعمال کیا ہے، انٹرسیپٹ نے اپنے حاصل کردہ دستاویزات کے ساتھ ساتھ محکمہ دفاع کے اعلیٰ حکام کا حوالہ دیتے ہوئےکہا ہے کہ اس سارے معاملے کی نگرانی پینٹا گان نے کی تھی

    انٹرسیپٹ کی طرف سے جاری رپورٹ میں کہا گیا کہ امریکہ "127E” اتھارٹی کا استعمال کرتا رہا ہے تاکہ امریکی کمانڈوز کو دنیا بھر میں غیر ملکی اور بے قاعدہ پارٹنر فورسز کے ذریعے نام نہاد ‘انسداد دہشت گردی آپریشنز’ کرنے کی اجازت دی جا سکے۔

    رپورٹ میں مزید کہا گیا کہ طریقہ کار یہ ہے کہ امریکہ، اتھارٹی کے ذریعے، پھر غیر ملکی افواج کو اسلحہ، تربیت اور انٹیلی جنس فراہم کرنے کے قابل ہو جاتا ہے، جو پھر امریکی دشمنوں کو نشانہ بنانے والے امریکی ہدایت پر بھیجے گئے مشنز پر بھیجے جاتے ہیں۔

    ریٹائرڈ فور سٹار آرمی جنرل جوزف ووٹل کا حوالہ دیتے ہوئے، رپورٹ میں بتایا گیا کہ امریکہ نے مصر، لبنان، شام اور یمن میں انسداد دہشت گردی کی "127E” کوششیں کیں۔ایک اور سابق سینئر دفاعی اہلکار نے انٹرسیپٹ کے اس دعوے کی تصدیق کی کہ عراق میں "127E” آپریشن ہوا اور حاصل کردہ دستاویزات سے پتہ چلتا ہے کہ تیونس میں بھی ایسا ہی ایک اور "127E” آپریشن ہوا۔

    رپورٹ میں کہا گیا ہے کہ ان خفیہ کارروائیوں پر 2017 اور 2020 کے درمیان امریکہ کو 310 ملین ڈالر کا نقصان ہوا ہے۔رپورٹ میں مزید کہا گیا کہ محکمہ دفاع اور سپیشل آپریشنز کمانڈ "127E” اتھارٹی پر تبصرہ کرنے سے انکار کرتے ہیں کیونکہ یہ درجہ بند ہے اور وائٹ ہاؤس اس معاملے کو حل کرنے میں ناکام رہا ہے۔

    اس کے علاوہ، یہ معلوم نہیں ہے کہ "127E” آپریشنز کے دوران کتنے عام شہری اور غیر ملکی افواج مارے گئے ہیں، لیکن رپورٹ میں کہا گیا ہے کہ امریکی جانی نقصان ہوا ہے۔رپورٹ میں پروگرام سے واقف امریکی حکومت کے ایک اہلکار کا حوالہ دیتے ہوئے مزید کہا گیا ہے کہ کانگریس کی انٹیلی جنس کمیٹیوں کے قانون سازوں کی صرف ایک چھوٹی سی تعداد "127E” آپریشنزسے واقف ہے جبکہ اکثرسے یہ معاملہ چھپایا گیاہے

  • مشرقِ وسطیٰ میں نیٹو طرز کے عسکری اتحاد کی حمایت کرتےہیں :شاہ عبداللہ

    مشرقِ وسطیٰ میں نیٹو طرز کے عسکری اتحاد کی حمایت کرتےہیں :شاہ عبداللہ

    اردن :مشرقِ وسطیٰ میں نیٹو طرز کے عسکری اتحاد کی حمایت کرتےہیں :اطلاعات کے مطابق اردن کے فرمانروا نے خطے میں بدلتے ہوئے حالات کے پیش نظر ایک فوجی اتحاد کی ضرورت پر زور دیا ہے اور کہا کہوہ نیٹو کی طرز پر مشرق وسطیٰ میں فوجی اتحاد قائم کرنے کی حمایت کا اعلان کرتےہیں

    اردن کے فرمانروا شاہ عبداللہ نے گزشتہ روز سی این بی سی کو دیے گئے انٹرویو میں کہا کہ اگر نیٹو جیسا فوجی اتحاد بنایا جاتا ہے تو وہ سب سے پہلے اس کی تائید کریں گے تاہم ضروری ہے کہ یہ پوری دنیا پر محیط ہو، واضح ہو کہ ہم اس میں کیسے شریک ہوں گے، یہ ہمارے لیے کیا اور کیسے کرے گا، بصورت دیگر یہ سب کے لیے پریشان کن ہوگا۔

    خیال رہے کہ امریکا نے کئی سال پہلے اسرائیل اور عرب دنیا کے درمیان فوجی تعاون کا تصور پیش کیا تھا تاکہ ایران کے منفی عزائم کا مقابلہ مل کر کیا جا سکے۔ اب رواں ماہ امریکی قانون سازوں نے کانگریس کے دونوں ایوانوں میں اس طرح کے بل پیش کیے ہیں جو مشرق وسطیٰ میں عرب ممالک اور اسرائیل کے مشترکا فضائی دفاعی نظام کی تشکیل کا سبب بن سکیں اور ایران کے بڑھتے ہوئے خطرے کا مقابلہ کیا جاسکے۔

    کانگریس کے دونوں ایوانوں میں یہ بل الگ الگ پیش کیے گئے ہیں مگر ان کا مقصد ایک ہی ہے۔ ایوان نمائندگان میں ڈیمو کریٹ اور ری پبلکن دونوں طرف کے قانون سازوں نے مشترکا طور پر یہ بل پیش کیا ہے۔ ایک اسرائیلی عہدیدار کے مطابق امریکا، اسرائیل اور عرب ممالک کے درمیان کسی نام کے بغیر پہلے سے ہی ایک بے نامی قسم کا دفاعی تعاون موجود ہے جو ایرانی حملوں کو ناکام بھی بنا چکا ہے۔

    امریکی صدر جو بائیڈن اگلے ماہ مشرق وسطیٰ کے دورے پر آرہے ہیں۔ وہ اسرائیل سے ہوتے ہوئے سعودی عرب جائیں گے۔ صدر بائیڈن مغربی کنارے میں فلسطینی اتھارٹی کے سربراہ محمود عباس سے بھی ملاقات کریں گے۔معاہدہء ابراہام کی وجہ سے اسرائیل، متحدہ عرب امارات اور بحرین کے درمیان تعلقات میں کافی تبدیلی آ چکی ہے اس لیے عرب اسرائیل قربت اور تعاون کی راہیں کھولنے کے لیے معاہدہء ابراہیم کو کافی اہم سمجھا جا رہا ہے۔

  • "ڈیل آف دی سنچری یا امریکی صدر ڈونلڈ ٹرمپ کا مشرق وسطیٰ امن پلان 2020 حقیقت میں کیا ہے؟

    "ڈیل آف دی سنچری یا امریکی صدر ڈونلڈ ٹرمپ کا مشرق وسطیٰ امن پلان 2020 حقیقت میں کیا ہے؟

    "ڈیل آف دی سنچری یا مشرق وسطیٰ امن پلان 2020 کیا ہے؟
    تحریر: محمد عبداللہ
    مسئلہ فلسطین دنیا کے بڑے اور تاریخی تنازعات میں سے ایک ہے، دوسری جنگ عظیم کے بعد بالخصوص برطانیہ و دیگر ممالک نے جیوش ایجنسی کے ساتھ مل کر نام نہاد "ہولو کاسٹ” میں بچ جانے والے اور دنیا کے بیشتر حصوں میں بکھرے ہوئے یہودیوں کو اکٹھا کرکے ایک جگہ پر بسانے کھ منصوبے پر کام شروع ہوا جس کے لیے بیت المقدس(یروشلم) اور اس کے گرد و نواح کے علاقے کا انتخاب کیا گیا کہ یہودی بیت المقدس پر ہیکل سلیمانی کا دعویٰ کرتے ہیں. اس پلان کی وجہ سے ایک تو یہودیوں کو کوئی دیس مل جاتا اور دوسرا مستقل عرب دنیا کو ایک خطرے سے دوچار رکھا جاسکتا تھا تاکہ وہ آگے چل کر دنیا میں کوئی موثر کردار نہ ادا کرپائیں.
    اس کے لیے چودہ مئی 1948 کو یروشلم کو عالمی نگرانی کے تحت چلانے ، اس کے گرد و نواح میں یہودیوں کی آبادکاری اور اسرائیل کے قیام کا منصوبہ پیش کیا گیا جس کو گیارہ مئی 1949 کو منظور کرکے اسرائیل کے قیام باقاعدہ عمل میں لایا گیا.جس کو عرب لیگ اور عرب ہائی کمیٹی نے مسترد کیا اور اس خطے میں جنگ چھڑ گئی جو تاحال جاری ہے جس میں بڑی جنگیں بھی شامل ہیں جن میں عرب ممالک بھی شامل ہوتے رہے اور اسرائیل کو عالمی طاقتوں کی حمایت حاصل ہوتی رہی لیکن ان سب جھڑپوں اور جنگوں کا نتیجہ یہ نکلا کہ فلسطینیوں کی بہت بڑی تعداد بے گھر ہوتی چلی گئی اور اسرائیل یکے بعد دیگرے فلسطین کے علاقوں پر قبضہ کرتا چلا گیا.
    بین الاقوامی اداروں اور ملکوں کی مداخلت کے باوجود مسئلہ فلسطین لاینحل مسئلہ رہاہے اور مشرق وسطیٰ میں جنگ و جدل کی ایک وجہ بھی یہی مسئلہ فلسطین ہے.ابھی امریکی صدر ڈونلڈ ٹرمپ نے مشرق وسطیٰ میں قیام امن کے لیے ایک پلان پیش کی ہے جس کو دی ڈیل آف سنچری کا نام دیا جا رہا ہے کہ یہ منصوبہ مشرق وسطیٰ کے لیے اس صدی کا سب سے بڑا منصوبہ ہوگا. اس منصوبے کے مین نکات یہ ہیں.

    مشرقی یروشلم پر مکمل اسرائیلی قبضہ تسلیم کیا جائے گا اور شہر کے ایک حصے میں فلسطین کا دارالحکومت بنایا جائے گا.
    چار سال کے لیے یہودی بستیوں کی آبادکاری پر پابندی عائد ہوگی جبکہ مغربی کناروں سمیت اب تک جو یہودی بستیاں قائم ہوچکی ہیں وہ اسرائیل کا حصہ ہوں گی.
    اپنی بستیوں سے نکالے گئے فلسطینی جو غزہ کی پٹی میں محصور ہوچکے ہیں وہ اپنے گھروں کو واپس نہیں جاسکیں گے.
    اسرائیل اردن کے بادشاہ کے ساتھ مل کر اس بات کو یقینی بنائے گا کہ یروشلم کے مقدس مقامات کی انتظامیہ کا موجودہ نظام برقرار رہے گا
    فلسطینیوں کے لیے مختص کیے گئے علاقے آئندہ چار سال آمد و رفت کے لیے کھلے رہیں گے اور وہاں کوئی تعمیراتی کام نہیں کیا جائے گا۔
    اس وقت کے دوران فلسطینیوں کے پاس موقع ہوگا کہ وہ اس پلان کا جائزہ لیں، اسرائیل کے ساتھ مذاکرات کریں اور ’خود مختار ریاست کے لیے تعین شدہ پیمانے پر پورا اتریں.

    اس منصوبے کے بارے میں امریکی صدر ڈونلڈ ٹرمپ کا کہنا ہے کہ اس پلان کے تحت فلسطینیوں کے پاس ایک موقع ہے کہ وہ مستقبل میں اپنی ایک آزاد ریاست قائم کر لیں. ڈونلڈ ٹرمپ کا مزید کہنا تھا کہ ان کے پلان سے فلسطینی علاقہ دوگنا ہو جائے گا اور مشرقی یروشلم دارالحکومت بن جائے گا جہاں امریکہ اپنا سفارتخانہ کھولے گا۔
    اسرائیل نے اس منصوبے کا خیر مقدم کیا ہے اسرائیلی وزیراعظم نیتن یاہو نے ڈونلڈ ٹرمپ کو سراہتے ہوئے انھیں ‘وائٹ ہاؤس میں اسرائیل کا بہترین دوست’ قرار دیا ہے.
    نیتن یاہو نے مزید کہا کہ ‘منصوبہ اس صدی کا ایسا موقع ہے جسے ہم ضائع نہیں کریں گے۔
    جبکہ فلسطینی اتھارٹی اس منصوبے کو مکمل طور پر مسترد کرچکی ہے ان کا کہنا ہے کہ یہ منصوبہ غرب اردن پر اسرائیلی حاکمیت کو مستقل طور پر مسلط کرنے کے مترادف ہے۔
    فلسطین کے صدر محمود عباس نے کہا کہ یہ منصوبہ ایک ’سازش‘ ہے میں ٹرمپ اور نتن یاہو کو کہتا ہوں یروشلم برائے فروخت نہیں ہے۔ ہمارے حقوق برائے فروخت نہیں ہیں اور نہ ہی سودے کے لیے ہیں۔ آپ کا منصوبہ، آپ کی سازش منظور نہیں ہوگی۔‘
    حماس نے مشرقی بیت المقدس کو اسرائیل کے حوالے کرنے کے اس منصوبے کو اشتعال انگیز اور فضول قرار دیا ہے۔ ایران نے بھی ڈونلڈ ٹرمپ کے منصوبے کو یکطرفہ اور اسرائیل نواز کہہ کر مسترد کر دیا ہے۔
    پاکستانی وزارت خارجہ کا کہنا ہے کہ پاکستان نے ہمیشہ مسئلہ فلسطین کے دوریاستی حل کی حمایت کی ہے، پاکستان فلسطینیوں کو جائز حقوق اور حق خود ارادیت دینے کا حامی ہے اور پاکستان ایسی فلسطینی ریاست کا قیام چاہتا جو 1967 کی عرب اسرائیل جنگ سے قبل کی سرحدی حدود پر مشتمل ہو اور القدس جس کا دارالحکومت ہو.
    امریکی صدر ٹرمپ کے منصوبے پر غور کے لیے عرب لیگ کا اجلاس ہفتے کے روز طلب کیا گیا ہے۔

  • "عالمی ہدایت کار(عالمی اسٹیبلیشمنٹ) اور مڈل ایسٹ کا اسٹیج” تحریر: محمد عبداللہ

    "عالمی ہدایت کار(عالمی اسٹیبلیشمنٹ) اور مڈل ایسٹ کا اسٹیج” تحریر: محمد عبداللہ

    گرین شیٹ اور لائٹس سے مزین یہ روم اسٹوڈیو کہلاتا ہے. بالی ووڈ سے لے کر نیوز چینلز اور حتیٰ کہ یوٹیوب چینلز تک سبھی اس کو حسب اسطاعت استعمال کرتے ہیں. یہاں تک کہ بالی ووڈ کی کئی اقساط پر مشتمل سیریز اور موویز اس ایک کمرے میں بنتی ہیں. ان گرین ، بلیو یا دیگر شیٹس کو بنیادی طور پر کروما شیٹس کہا جاتا ہے اور ویڈیو ریکارڈ کرنے کے بعد ایڈیٹنگ میں اس کروما کو کٹ کرکے رنگ بھرنگے ساکن اور متحرک بیک گراؤنڈز وغیرہ سیٹ کیے جاتے ہیں. جن کرداروں کو حقیقت سے ہٹ کر دکھانا ہو تو ان کو بھی ان کروما شیٹس میں کچھ اسطرح سے کیمرے کے سامنے لایا جاتا جس میں بعد از ایڈیٹنگ ان کی ہیئت ہمیں عجیب و غریب دکھتی ہے.

    آپ بھی کہتے ہوں گے کہ عبداللہ نے یہ کیا بتانا شروع کردیا اور کوئی ان چیزوں کا ماہر مجھ سے ہزار درجہ بہتر یہ ساری چیزیں بیان کرے گا لیکن آج آفس میں اسٹوڈیو کی تصویر بنائی تو میرے ذہن میں بھی کوئی بات نہیں تھی بس فوٹو گرافی کی عادت کے تحت تصویر بنا لی لیکن ابھی سوشل میڈیا پر اور اس سے قبل بھی اکثر اوقات اپنے سوشل میڈیا ایکٹوسٹس کو مختلف حادثات و واقعات میں کنفیوز اور پھر اسی کنفیوزن میں مختلف تبصرے اور تجزیئے کرتے دیکھتے ہیں تو ہنسی بھی آتی اور دکھ بھی ہوتا کہ ہم لوگ کب سطحیت سے نکل کر بین السطور دیکھنا شروع کریں گے. ہم کب اس بات پر غور کریں گے دنیا کے اس اسٹوڈیو میں ہدایت کار کیسے مختلف واقعات کو کروما شیٹس پر سیٹ کرتے ہیں اور پھر ہمارے سامنے چیزیں آتی ہیں تو بالکل بدلی ہوئی اور ہم اسی کو حقیقت سمجھ رہے ہوتے ہیں( جیسے ارطغرل ڈرامے اور اردگان کی تقاریر کو ہمارا جذباتی نوجوان عمران خان کی تقاریر کی طرح سریئس لے کر جذباتی ہوجاتا ہے).
    حالیہ ایران و امریکہ تنازعے میں اور اس سے قبل کی شام و عراق کی بربادیوں کیفیت بھی ایسی ہی ہے. اس بات میں کوئی شبہ نہیں کہ جس طرح اردگان بہت اچھا لیڈر ہے مگر صرف ترکی کے لیے ترکی سے باہر دیگر مسلم ممالک اور اقوام کے لیے وہ دوسروں سے کم نہیں ہے جو فقط اپنے مفادات دیکھتے ہیں ایسے ہی اس بات میں بھی ذرہ برابر شک نہیں کہ ایران کے آنجہانی جنرل قاسم سلیمانی کی خدمات بے پناہ ہیں اس کی قابلیت اور لیاقت ایسی کہ ملڑی اکیڈمیز میں پڑھائی جائے لیکن اس کا سارا کچھ ایران کے لیے تھا امت مسلمہ کے لیے نہیں البتہ شام و عراق کے کھنڈرات میں بہت بڑا کردار اس جنرل قاسم سلیمانی اور اس کی تیار کردہ فورسز کا بھی ہے.
    میں نے دن میں بھی یہ بات کی تھی کہ مڈل ایسٹ میں پکی ہوئی کچھڑی کے معاملات کو آپ فقط فیسبک کی دو چار پوسٹس سے نہیں سمجھ سکتے اور جب سمجھ ہی نہیں سکتے تو ان پر تبصرہ کیسے کر سکتے ہیں کہ وہاں کے ٹوٹل کردار تو کروما شیٹس کے پیچھے چھپے ہوئے اور آپ کے سامنے اصل حیثیت میں موجود ہی نہیں ہے. فقط شام کو لیں تو شام میں ایران، روس، ترکی، امریکہ، داعش، فری سیرین آرمی و دیگر گروپس براہ راست موجود تھے اسکے علاوہ دیگر ممالک کے سپانسرڈ گروپس کی تعداد بیسیوں سے متجاوز تھی اور یہ سب کردار باہم دست و گریباں تھے اور ہیں. آپ جب تک ان سب کے مفادات، آپس کے تعلقات، آپس کی دشمنیوں کو نہیں سمجھتے تب تک آپ کیا سمجھیں گے.
    لہذا اپنے دوستوں کو کہوں گا کہ ہر موضوع اور ہر موقعہ پر تبصرے اور تجزیئے دینا ضروری نہیں ہے بلکہ حالات اور کرداروں کو پڑھنا اور سمجھنا چاہیے اور ان کے پیچھے چھپی حقیقت کو بھی تلاشنا چاہیے یہ نہ ہوکہ موویز اور ڈراموں کی طرح عالمی ہدایت کاروں کے اسٹیج کردہ یہ فکشن اور خون سے بھری یہ رئیل اسٹوریز میں مختلف لوگوں کا کردار آپ کو دھوکہ دے دے اور کوئی ولن آپ کی نظر میں ہیرو ٹھہر جائے.
    انتہائی ضروری نوٹ: یہ چند الفاظ میں نے انتہائی حد تک غیر جانبدار ہوکر لکھے ہیں میرے لیے بہت آسان تھا کہ جذباتی ہوکر الفاظ کا نوحہ لکھوں، شام و عراق میں شہید ہونے والے امت مسلمہ کے جواہرات کا ماتم لکھوں اور لوگوں کو بتاؤں آپ جن کو ہیروز سمجھتے ہیں ان کے کردار کی وجہ سے کتنے لاکھوں مسلمان بچے، عورتیں، بوڑھے شہید ہوئے اور کروڑوں آج جانوروں سے بدتر زندگی گزارنے پر مجبور ہیں.

    Muhammad Abdullah
    Muhammad Abdullah