Tag: پاکستان

کراچی :آفتاب صدیقی نے کہا ہے کہ بلاول زرداری سیاسی بونے ہیں، اپنے قد سے بڑی باتیں کرتے ہیں۔تفصیلات کے مطابق سینئر رہنما پی ٹی آئی اور سابق رکنِ قومی اسمبلی آفتاب صدیقی نے بلاول زرداری کی عمران خان کے خلاف ہرزہ سرائی پر ردِ عمل دیتے ہوئے کہا کہ بلاول زرداری سیاسی بونے ہیں، اپنے قد سے بڑی باتیں کرتے ہیں۔

انہوں نے کہا کہ بلاول زرداری دھاندلی سے جیتی ہوئی سیٹ کا جشن ایسے منانے دیہی ملیر پہنچے ہیں جیسے ملیر کو پیرس بنایا ہو جبکہ شہری ملیر سمیت ديہی ملیر نے بھی بلاول زرداری اور پیپلز پارٹی کے منہ پر کالک ملی ہے۔

آفتاب صدیقی نے کہا کہ منی لانڈر کی سیاسی نابالغ اولاد اور پاکستان کو لوٹنے والے زرداری ڈاکو کے برخودار اب عمران خان پر ہرزہ سرائی کرنے لگے ہیں انہیں شرم آنی چاہئے۔انہوں نے کہا کہ بلاول جیسا نکما وزیرِ خارجہ آج تک نہیں دیکھا، سیاسی مخالفین کو گالیاں دینے کے بجائے ہمت کریں اور امریکہ کو جواب دیں جس نے ایٹمی اثاثوں پر اُنگلیاں اٹھائی ہیں۔

ان کا کہنا تھا کہ عمران خان کے لیول کا اس ملک میں کوئی سیاست دان نہیں ہے، عمران خان قوم کی آخری اُمید اور چوروں کے لئے خوف و دہشت کی علامت ہیں۔سینئر رہنما پی ٹی آئی اور سابق رکنِ قومی اسمبلی آفتاب صدیقی نے مزید کہا کہ عمران خان بہت جلد سندھ میں دورے شروع کریں گے اور پیپلز پارٹی کو آئندہ بلدیاتی اور عام انتخابات میں عبرت ناک شکست دیں گے۔

کراچی :پاکستان پیپلزپارٹی کے چیئرمین و وزیر خارجہ بلاول بھٹو زرداری نے سابق وزیراعظم و پاکستان تحریک انصاف کے چیئرمین عمران خان کو سیاسی دجال قرار دے دیا۔

بلاول بھٹو زرداری بہن آصفہ بھٹو کے ہمراہ کراچی سے ضمنی انتخاب میں عمران خان کو شکست دینے والے پی پی امیدوار عبدالحکیم بلوچ کو مبارکباد دینے ملیر پہنچے۔

اس سے پہلے بلاول نے کہا تھا کہ عمران خان کو ریٹائرمنٹ پر بھیجیں گے،اطلاعات کے مطابق چیئرمین پیپلزپارٹی بلاول بھٹو زرداری کا کہنا ہے کہ عمران خان سیاست چھوڑ کر بنی گالا میں بیٹھ جائیں۔ ہم عمران جیسے سیاستدانوں کو ریٹائرمنٹ پر بھیجیں گے۔

کراچی کے علاقے ملیر میں ضمنی الیکشن میں کامیابی کے بعد عوامی اجتماع سے خطاب میں بلاول بھٹو کا کہنا تھا کہ وقت ثابت کرے گا پاکستان نوجوان قیادت کیلئے تیار ہے۔

چیئرمین پی پی کا کہنا تھا کہ 2018 میں ہمارے حق پر ڈاکا ڈالا گیا تھا مگر ضمنی انتخاب میں ملیر کے عوام نے کٹھ پتلی کو تاریخی شکست دی۔ تبدیلی کا نعرہ تبدیلی نہیں تباہی ہے، عمران کی سیاست نفرت اور پی پی کی سیاست محبت کی سیاست ہے۔بلاول بھٹو کا کہنا تھا کہ عمران خان جھوٹا اور منافق آدمی ہیں ہم نے مل کر سلیکٹڈ حکومت کو شکست دی۔

چیئرمین پی پی نے کہا کہ ملیر کے عوام نے ہر دور کے ظالم، آمر، فرعون کاڈٹ کر مقابلہ کیا ہے، ملیر کے عوام نے ایک بار پھر پیپلزپارٹی کا ساتھ دیا، ملیر کے عوام نے ایک بار پھر پیپلزپارٹی کا ساتھ دیا ہے۔

وزیرخارجہ کا کہنا تھا کہ میں عمران کو کٹھ پتلی کہتا تھا آج وہ خود مان گیا، ہر کسی کو چور کہنے والا خود چندہ چور نکلا، انہوں نے مزید کہا کہ عمران خان تو اپنا کیچن شوکت خانم اسپتال سے چلاتا ہے۔

اجتماع سے خطاب میں بلاول بھٹو کا مزید کہنا تھا کہ اگر اختیار نہیں تھا تو استعفیٰ دیتا 4 سال حکمرانی کیوں کی؟ جدوجہد کر رہا ہے کہ ایک بار پھر سلیکٹ ہوجائے۔

چیئرمین پیپلزپارٹی کا کہنا تھا کہ حکیم بلوچ نے آپ کے سارے مسائل بتادیے، وزیراعلیٰ 90 دن میں مطالبات پر کام شروع کریں، ملیرمیں میں ترقیاتی کاموں کے مطالبات پورے کیے جائیں گے۔ان کا کہنا تھا کہ اس وقت سیاست نہیں سیلاب متاثرین کا مسئلہ اہم ہے مگر پاکستان کے خلاف سیاسی دجال سازشیں کررہاہے، اپنی سیاست چمکا کر توجہ سیلاب متاثرین سے ہٹانا چاہتے ہیں۔

کراچی :گورنر سندھ کامران ٹیسوری نے بھی پنجاب کی طرز پر نکاح نامے میں ختم نبوت کا حلف نامہ شامل کرنے کیلئے وزیراعلیٰ سندھ مراد علی شاہ کو خط لکھ دیا۔

گورنر سندھ کامران ٹیسوری نے صوبہ بھر میں نکاح نامہ میں نبی کریم ﷺ کے خاتم النبیینؐ ہونے کے اقرار کو لازمی شامل کرنے کی تجویز دی ہے۔اپنے خط میں ان کا کہنا ہے کہ نکاح نامہ میں اس اندراج سے ہم نبی کریم ﷺ سے محبت و عقیدت کا اظہار کرسکیں گے۔

گورنر سندھ کا مزید کہنا ہے کہ ختم نبوتؐ ہر مسلمان کے ایمان کا بنیادی جزو ہے، وزیراعلیٰ سندھ اس ضمن میں ضروری اقدامات کریں۔کامران ٹیسوری نے خط میں یہ بھی کہا ہے کہ نبی کریم ﷺ کے خاتم النبیینؐ ہونے کا اقرار نکاح نامہ میں شامل کرنے کا پابند کیا جائے۔

یاد رہے کہ اس سے پہلے پنجاب لوکل گورنمنٹ اینڈ کمیونٹی ڈیولپمنٹ ڈپارٹمنٹ نے نکاح نامہ کے لیے نیا فارم 2 جاری کردیا ہے اور یونین کونسلز (یو سیز) کے سیکریٹریز کو ہدایت کی ہے کہ وہ اپنے اپنے دائرہ اختیار میں نکاح کے لیے نئے فارم کا استعمال یقینی بنائیں۔

رپورٹ کے مطابق ایک ہینڈ آؤٹ میں کہا گیا کہ نکاح نامے کا فارم 2 مسلم فیملی لا آرڈیننس 1961 کے تحت پنجاب مسلم فیملی رولز میں شامل کر دیا گیا ہے جس میں ختم نبوت ﷺ کے حلف کو شامل کرنے کے حوالے سے ترمیم کی گئی ہے۔ہینڈ آؤٹ میں مزید کہا گیا کہ لہٰذا اس بات کو یقینی بنایا جائے کہ صرف نیا نکاح نکامہ ہی نکاح کے لیے استعمال کیا جائے۔

نکاح رجسٹراروں کو بھی ہدایت کی گئی ہے کہ وہ نکاح کے لیے نئے فارم 2 کا استعمال کریں، ایسا نہ کرنے کی صورت میں متعلقہ یو سی سیکریٹری کے خلاف سخت تادیبی کارروائی کی جائے گی۔

اس میں متنبہ کیا گیا کہ اگر کوئی نکاح رجسٹرار نیا فارم 2 استعمال کرتا نہیں پایا گیا تو اس کے خلاف مسلم فیملی لاز آرڈیننس 1961 کے تحت پنجاب مسلم فیملی رولز کے رول 7 کے ذیلی قاعدہ (4) کے تحت کارروائی کی جائے گی۔اس میں کہا گیا کہ دولہا اور دلہن دونوں پر نکاح کے وقت ختم نبوت ﷺ کے حلف پر دستخط کرنا لازم ہوگا۔

قانون کے مطابق نیا فارم استعمال نہ کرنے والے نکاح رجسٹرار کو ایک ماہ قید یا 200 روپے تک جرمانہ یا دونوں سزائیں دی جاسکتی ہے۔

واضح رہے کہ ختم نبوت ﷺ کے حلف کو نکاح نامہ میں شامل کرنے کا اقدام نئے وزیراعلیٰ پنجاب چوہدری پرویز الٰہی کی جانب سے بطور اسپیکر پنجاب اسمبلی اٹھایا گیا تھا اور اس میں قانون سازی کے ذریعے ترمیم کی گئی تھی۔