واشنگٹن :پاکستان اور امریکہ کے درمیان مضبوط تعلقات قائم ہیں ،اطلاعات کے مطابق امریکی وزیر خارجہ نے کہا ہے کہ پاکستان اور امریکہ کا بہت سے شعبوں میں مضبوط تعاون پر مبنی تعلقات قائم ہیں۔

تفصیلات کے مطابق امریکی وزیر خارجہ انتھونی جے بلنکن نے یوم آزادی پر اپنے ایک پیغام میں کہا کہ امریکہ کی طرف سے میں پاکستانی عوام کو ان کے 75 واں یوم آزادی کے موقع پر دل کی گہرائیوں سے مبارکباد پیش کرتا ہوں۔

انہوں نے کہا کہ آزادی کے 75 سال کے ساتھ ساتھ اس سال پاکستان اور امریکہ کے درمیان سفارتی تعلقات کے 75 سال بھی منائے جا رہے ہیں،پاکستان اور امریکہ کا بہت سے شعبوں میں مضبوط تعاون پر مبنی تعلقات قائم ہیں۔

انتھونی جے بلنکن نے یہ بھی کہا کہ پاکستان کے دسیوں ہزار طلباء اور طالبات امریکہ میں زیر تعلیم ہیں ،امریکہ نے کوویڈ 19 سے بچاؤ کے لیے 77 ملین ویکسین کی خوراکیں پاکستان کو دی ہیں۔ان کا کہنا تھا کہ امریکہ بدستور پاکستان کا سب سے بڑا برآمدی شراکت دار ہے،مجھے یقین ہے کہ ہمارے تعلقات بڑھتے رہیں گے۔

امریکی وزیر خارجہ انتھونی جے بلنکن کا مزید کہنا تھا کہ جب ہم اپنے سفارتی تعلقات کی 75 ویں سالگرہ منا رہے ہیں، آئیے ہم اگلے 75 سالوں اور اس سے آگے کے لیے اپنی شراکت کی تجدید اور مضبوطی کا عزم کریں، ہم آپ کو اس اہم سنگ میل پر مبارکباد پیش کرتے ہیں اور آپ کو یوم آزادی کی مبارکباد دیتے ہیں۔

دوسری طرف پاکستان کے 75 ویں یوم آزادی پر پاکستان میں امریکی سفیر ڈونلڈ بلوم نے ویڈیو پیغام جاری کیا جس میں انہوں نے پاکستان میں امریکی مشن اور امریکی عوام کی جانب سے پاکستان کو یوم آزادی کی مبارکباد دی۔

انہوں نے کہا کہ پاکستان میں امریکی مشن اور امریکی عوام کی جانب سے ہم پاکستان کو یوم آزادی کی مبارکباد پیش کرتے ہیں،گذشتہ 75 برسوں میں دونوں ممالک نے امریکی اور پاکستانی عوام کے درمیان ایک پائیدار شراکت داری اور مظبوط تعلقات قائم کئے۔

امریکی سفیر نے کہا کہ ہم نے ہزاروں پاکستانی ایکسچینج طلبہ کو امریکہ بھیجا، جو اب پاکستان میں 37 ہزار سبق طلبا پر مشتعمل ایلومنائی نیٹ ورک کا حصہ ہیں۔

ڈونلڈ بلوم نے یہ بھی کہا کہ گذشتہ 2 برسوں میں ہم نے کوویڈ 19 کی موثر ترین ویکسین کی 77ملین خوراکیں عطیہ کی ہیں، ہمیں اس بات پرفخر ہے کہ اس تعلق نے ہم دونوں اقوام کے درمیان کاروباری اور معاشی بہبود کے تعلقات کو مظبوط کیا ہے۔ان کا کہنا تھا کہ امریکہ بدستور پاکستان کی سب سے بڑی برآمدہ منڈی ہے، گذشتہ مالی سال کے دوران پاکستان میں امریکی براہ راست سرمایہ کاری میں 50 فیصد اضافی ہوا اور یہ اس دہائی میں اب سب سے بلند شرح پر ہے۔

امریکی سفیر ڈونلڈ بلوم کا مزید کہنا تھا کہ تیزی سے بدلتی دنیا میں ہم درپیش ان تمام بڑے چلینجز سے نمٹنے کے لئے شانہ بشانہ مل کر کام کرتے رہیں گے

اسلام آباد:ڈپٹی گورنر اسٹیٹ بینک مرتضیٰ سید نے کہا ہے کہ سب سے مشکل مرحلے سے نکل آئے ہيں۔جشن آزادی کے موقع پر پرچم کشائی کی تقريب سے خطاب کرتے ہوئے ڈپٹی گورنراسٹيٹ بينک ڈاکٹر مرتضٰی سید کا کہنا تھا کہ ملکی معيشت مشکل مرحلے سے نکل آئی ہے۔

ڈپٹی گورنراسٹيٹ بينک نے کہا کہ مشکلات ہيں ليکن سب سےمشکل مرحلےسےنکل آئے ہيں، پاکستان کو ترقی يافتہ بنانے کيلئے تعليم پر زور اور خواتين کو بااختيار بنانے پر توجہ دينا ہوگی۔

واضح رہے کہ ملک بھر میں آج پاکستان کا 75 جشن آزادی منایا جارہا ہے، ہر طرف سبز ہلالی قومی پرچموں کی بہار ہے، عمارتوں کو خوبصورت روشنیوں سے سجایا گیا ہے، بچے بڑے سب ہی مختلف انداز میں وطن سے اپنی محبت کا اظہار کررہے ہیں۔

پاکستان کا قیام 14 اگست 1947ء کو عمل میں آیا تھا، قوم ہر سال اس دن کو ملی جوش و جذبے کے ساتھ مناتی ہے، اس موقع پر مختلف تقریبات کا انعقاد کیا جاتا ہے، اہم عمارتوں پر چراغاں کے ساتھ قومی پرچم سربلند ہوتے ہیں، شہری بھی اپنی املاک اور گاڑیوں پر قوم پرچم آویزاں کرتے ہیں۔

یاد رہے کہ ایک طرف ڈپٹی گورنراسٹیٹ بینک یہ دعوے کررہے ہیں تو دوسری طرف پاکستانی قیادت سعودی عرب ، عرب امارات ، چین اور آئی ایم ایف سے مالی امداد کی درخواست کرچکی ہے ، یہ بھی کہا جارہا ہے کہ اگرآئی ایم ایف نے وقت پر پاکستان کو گرانٹ جاری نہ کی توحالات بہت زیادہ خراب ہوجائین گے

وزیر اعظم شہباز شریف نے اسلام آباد میں راول چوک فلائی اوور کا افتتاح کر دیا، وزیر اعظم کو منصوبے سے متعلق بریفنگ بھی دی گئی۔
مسلح افواج کی جانب سے عظیم پاکستانیوں کو ڈائمنڈ جوبلی خوشیاں مبارک

یوم آزادی کے موقع پر اسلام آباد میں راول چوک فلائی اوور کی افتتاحی تقریب سے خطاب کرتے ہوئے وزیر اعظم شہباز شریف نےکہا کہ گزشتہ 4 سال سے یہ منصوبہ التوا کا شکار تھا، جسے چند ماہ میں مکمل کیا، امید ہے بھارہ کہو کا منصوبہ 4 ماہ میں مکمل ہو جائے گا۔

75 واں جشن آزادی ملی جوش و جذبے کے ساتھ منایا جا رہا ہے،وزیراعظم نے پرچم کشائی کی

وزیراعظم نے اپنے خطاب میں کہا کہ ہم نے یہ ملک بےپناہ قربانیوں سے حاصل کیا ہے، ہم دن رات محنت کرکے ملک کی تقدیر بدلیں گے۔انہوں نے کہا کہ پاکستان کو اپنا کھویا ہوا مقام واپس دلائیں گے۔

اس سے قبل وزیر اعظم محمد شہباز شریف نے کہا ہے کہ پاکستان ہمارے آبائواجداد کی عظیم قربانیوں کا ثمر ہے،قائد اعظم نے ایمان،اتحاد اور نظم وضبط کی تعلیم دی،قیام پاکستان کی ولولہ انگیز داستان ہمارے لئے مشعل راہ ہے،پاکستان اگر جوہری قوت بن سکتا ہے تو معاشی قوت بھی بن سکتا ہے،ملک کو اس وقت قومی مکالمے کی اشد ضرورت ہے،ہمیں امانت و دیانت کواپنا شعار بنانا ہوگا.

وزیر اعظم محمد شہباز شریف نے کنونشن سنٹر میں پرچم کشائی کی،اس موقع پر قومی ترانہ بھی پڑھا گیا۔ تقریب میں چیئرمین سینٹ صادق سنجرانی،سپیکر قومی اسمبلی راجہ پرویز اشرف،وزیر خارجہ بلاول بھٹو زرداری،وزیر اطلاعات ونشریات مریم اورنگ زیب،وزیر قانون اعظم نذیر تارڑ،ریاض پیرزادہ،شاہ زین بگٹی،شیری رحمان،مرتضی جاوید عباسی،مولانا اسعد محمود،خالد مگسی،انجنئیر امیر مقام،عسکری قیادت، اراکین پارلیمنٹ،غیر ملکی سفارت کاروں اور مختلف شعبوں سے تعلق رکھنے والے افراد بڑی تعداد میں شریک ہوئے۔وزیر اعظم محمد شہباز شریف نے خطاب کے دوران پاکستانیوں کو جشن آزادی کی مبارک دیتے ہوئے کہا کہ اس نعمت پر ہم اپنے رب کے حضور سجدہ شکر بجا لاتے ہیں

عمران خان نے قومی اسمبلی کے 9 حلقوں میں ضمنی انتخاب کیلئے کاغذات نامزدگی جمع کرادیئے۔پاکستان تحریک انصاف کے سربراہ عمران خان نے بیک وقت 9 حلقوں سے انتخابات میں حصہ لینے کیلئے اغذات نامزدگی جمع کرا کر تاریخ رقم کردی۔

پاکستان تحریک انصاف کی حکومت کے 9 اپریل کو خاتمے کے بعد عمران خان سمیت پی ٹی آئی کے تمام اراکین قومی اسمبلی نے استعفیٰ دیدیا تھا، موجودہ اسپیکر راجہ پرویز اشرف کی جانب سے 2 مخصوص نشستوں سمیت 11 اراکین کے استعفے منظور کرنے کے بعد الیکشن کمیشن آف پاکستان نے 25 ستمبر کو 9 حلقوں پر ضمنی انتخاب کا اعلان کیا تھا۔

پاکستان تحریک انصاف کے سربراہ اور سابق وزیراعظم عمران خان نے تمام 9 حلقوں پر خود الیکشن لڑنے کا اعلان کیا تھا۔

قومی اسمبلی کے 9 حلقوں میں ضمنی انتخابات کیلئے عمران خان نے تمام 9 حلقوں سے کاغذاتِ نامزدگی جمع کرادیئے ہیں، یہ ملک تاریخ میں پہلی بار ہے کہ ایک امیدوار بیک وقت 9 حلقوں سے انتخاب لڑے گا۔

عمران خان نے جن حلقوں سے الیکشن لڑنے کیلئے کاغذات نامزدگی جمع کرائے ہیں ان میں این اے 22 مردان، این اے 24 چارسدہ، این اے 31 پشاور، این اے 45 کرم، این اے 108 فیصل آباد، این اے 118 ننکانہ صاحب، این اے 237 ملیر کراچی، این اے 239 کورنگی کراچی اور این اے 246 کراچی جنوبی شامل ہیں۔

واضح رہے کہ اس سے قبل عمران خان نے 2018ء کے عام انتخابات میں بھی بیک وقت 5 حلقوں سے الیکشن جیت کر تاریخ رقم کی تھی۔