ریاض:امریکی صدر جو بائیڈن جمعے کی شام سعودی عرب پہنچ گئے ہیں جہاں انہوں نے جدہ میں السلام شاہی محل میں سعودی فرمانروا شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز سے ملاقات کی ہے۔

شاہ سلمان اور ولی عہد شہزادہ محمد بن سلمان سے براہ راست ملاقات کے بعد امریکی صدر کل ہفتے کے روز جدہ میں خلیجی ممالک کی قیادت، عراق، اردن اور مصر کے رہ نماؤں پر مشتمل’خلیجی پلس 3‘ سربراہ کانفرنس سے خطاب کریں گے۔

دوسری طرف امریکی حکام نے کہا ہے کہ وہ سعودی عرب اور دیگر خلیجی رہ نماؤں کے ساتھ توانائی کے تحفظ سمیت متعدد امور پر بات چیت کریں گے۔

سعودی فرمانروا شاہ سلمان بن عبدالعزیز کی دعوت پر امریکی صدر کا طیارہ اسرائیل سے براہ راست جدہ کے شاہ عبدالعزیز ایئرپورٹ پر اترا جہاں مکہ کے گورنر شہزادہ خالد الفیصل اور امریکا میں مملکت کی سفیر شہزادی ریما بنت بندر بن سلطان سمیت دیگر اعلیٰ حکام نے استقبال کیا۔

وائٹ ہاؤس کے مطابق صدربائیڈن سعودی قیادت سے یمن کے بحران، ایران کے جوہری پروگرام اور توانائی کی قیمتوں کے معاملے پر بات کریں گے۔

امریکی صدر کا طیارہ کچھ دیر قبل سرکاری دورے پر تل ابیب سے مغربی سعودی عرب کے شہر جدہ کے لیے روانہ ہوا جہاں وہ سعودی فرمانروا اور ولی عہد محمد بن سلمان سے بات چیت کریں گے۔

سعودی عرب ۔ امریکا مذاکرات میں دونوں ممالک کے درمیان تعاون کے پہلوؤں پر بات کی جائے گی اور خطے اور دنیا کو درپیش چیلنجز سے نمٹنے کے طریقوں پر تبادلہ خیال کیا جائے گا۔

سعودی عرب کے دورے کے دوسرے روز صدر بائیڈن جدہ میں علاقائی کانفرنس میں شرکت کریں گے جہاں وہ مصر، اردن اور عراق سمیت خلیجی ممالک کی قیادت سے موجودہ حالات کے تناظر میں علاقائی اور بین الاقوامی پیش رفت،خطے کے شراکت داروں کے ساتھ تعاون اور مسلسل ہم آہنگی کی کوششوں کی حمایت کو فروغ دینے پر بات کریں گے۔

وائٹ ہاؤس نے کہا ہے کہ صدر بائیڈن سعودی ولی عہد سے دو طرفہ اجلاس میں ملاقات کریں گے۔ مملکت میں صدر بائیڈن کی بات چیت میں دونوں ممالک کے درمیان تعاون کے پہلوؤں پر بات کی جائے گی اور خطے اور دنیا کو درپیش چیلنجوں کا مقابلہ کرنے کے طریقوں پر تبادلہ خیال کیا جائے گا۔

اس تناظر میں صدر بائیڈن نے کل جمعرات کو کہا تھا کہ ان کے سعودی عرب کے دورے کا مقصد دونوں ممالک کے درمیان مشترکہ تعلقات کو مضبوط بنانا ہے۔

مشرق وسطیٰ کے دورے پر آئے امریکی صدر نے مزید کہا کہ ان کے مملکت کے دورے کی وجہ امریکی مفادات سے بڑھ کر ہے۔ یہ دورہ خطے سے انخلاء کر کے سابقہ غلطیوں کو درست کرنے کا ایک موقع ہے۔

قابل ذکر ہے کہ سعودی عرب اور امریکا خطے اور دنیا کی سلامتی اور استحکام کے لیے ایران کے غیر مستحکم رویے کا مقابلہ کرنے اور تہران کی حمایت یافتہ ملیشیاؤں کے خطرے کو بے اثر کرنے کی اہمیت پر متفق ہیں۔ امریکا نے یمن میں ایک جامع سیاسی حل تلاش کرنے کے لیے سعودی عرب کی کوششوں کی بھی حمایت کی اور ان کوششوں کو یمن کی سلامتی اور استحکام کے حصول کی ضمانت قرار دیا ہے۔

انتہا پسندی اور دہشت گردی کے خلاف جنگ سعودی عرب اور امریکا کے درمیان سٹریٹجک پارٹنرشپ کے اہم ترین پہلوؤں میں سے ایک ہے اور اس میدان میں دونوں ممالک کے درمیان دوطرفہ تعاون نے انتہا پسند تنظیموں کے خلاف کھڑے ہونے اور ان کے خطرے کو بے اثر کرنے میں کئی اہم کامیابیاں حاصل کرنے میں اہم کردار ادا کیا ہے۔

بیجنگ:چین کے قومی ترقیاتی و اصلاحاتی کمیشن نے کہا ہےکہ ملک کی صنعتی چین اور سپلائی چین مجموعی سلامتی اور استحکام کو برقرار رکھے ہوئے ہے، اور ہائی ٹیک صنعتیں اور تکنیکی تبدیلی سرمایہ کاری کے لیے ترقی کے نئے نکات بن چکے ہیں۔

جمعرات کے روز چینی میڈ یا کے مطا بق رواں سال کی پہلی ششماہی میں معاشی صورتحال پر میڈیا بر یفنگ میں کمیشن کے شعبہ ہائی ٹیک کے اہلکار نے کہا کہ ہائی ٹیک مینوفیکچرنگ کی اضافی قدر میں سالانہ بنیادوں پر 9.9 فیصد اضافہ ہوا، جو کہ 2019 کی اسی مدت کی سطح سے تجاوز کر چکا ہے۔ کئی بڑی اختراعی کامیابیاں حاصل کی گئی ہیں، اور ہائی ٹیک انڈسٹریز اور تکنیکی تبدیلی سرمایہ کاری کے نئے گروتھ پوائنٹس بن چکے ہیں، جو صنعتی اور سپلائی چینز کی اصلاح اور اپ گریڈنگ کو مضبوط قوت فراہم کریں گے۔چین نیٹ ورک کی سہولیات اور ایپلی کیشنز کے اعتبار سے دنیا بھر میں سرفہرست ہے۔ ڈسپلے انڈسٹری کا پیمانہ دنیا میں پہلے نمبر پر ہے۔ فوٹو وولٹک ماڈیولز کی عالمی پیداوار تین چوتھائی سے زیادہ ہے، اور مجموعی نصب شدہ صلاحیت دنیا میں پہلے نمبر پر ہے۔ پاور ٹرانسمیشن ، ٹرانسفارمیشن آلات اور ریل ٹرانزٹ آلات کی تکنیکی سطح عالمی معیار پر انتہائی جدید ہے۔

جاپان کی جانب سے جوہری آلودہ پانی کے سمندر میں اخراج پر بحرالکاہل جزائر ممالک فورم کے وزرائے خارجہ اجلاس میں تشویش ظاہر کی گئی ہے۔ چین نے جاپان کی جانب سے جوہری آلودہ پانی کے سمندر میں اخراج کو انتہائی غیر ذمہ دارانہ قرار دیا ہے

جمعرات کے روز چینی میڈ یا کے مطا بق اس حوالے سے چینی وزارت خارجہ کے ترجمان وانگ وین بین نے یومیہ میڈیا بریفنگ میں کہا کہ چین کے بھی یہی احساسات ہیں ۔ یہ جاپانی فیصلے پر عالمی برادری کی شدید تشویش کی عکاسی کرتا ہے اور ایک بار پھر ظاہر کرتا ہے کہ یہ مسئلہ عالمی سمندری ماحول اور متعلقہ ممالک کی صحت عامہ کے لیے تشویش کا باعث ہے، اس مسئلے کا تعلق محض جاپان سے نہیں ہے۔

ترجمان نے واضح کیا کہ ایک سال سے زائد عرصے میں، جاپانی حکومت نے جوہری آلودہ پانی کو صاف کرنے والے آلات کی تاثیر، اور ماحولیاتی اثرات کی غیر یقینی صورتحال جیسے اہم مسائل پر سائنسی اور قابل اعتبار وضاحتیں نہیں پیش کی ہیں ، بلکہ اس منصوبے کو زبردستی فروغ دیا ہے۔ جوہری آلودہ پانی کے اخراج کے حوالے سے تمام فریقوں کے تحفظات کو نظر انداز کرنا انتہائی غیر ذمہ دارانہ ہے۔

واشنگٹن :امریکا میں افراطِ زر کی وجہ سے گیس اور خوراک کی قیمتیں اور کرائے 1981ء کے بعد سے سب سے تیزی سے بڑھ رہے ہیں۔ امریکی خاندانوں پر پڑنے والے دباؤ کی وجہ سے فیڈرل ریزرو شرحِ سود میں ایک بار پھر اضافہ کر سکتا ہے۔

امریکی حکومت نے گزشتہ روز بتایا کہ ملک میں جون میں افراط زر کی شرح پچھلے چار دہائیوں میں سب سے اونچی سطح پر پہنچ گئی ہے جبکہ اشیاء کی قیمتیں گزشتہ برس کے مقابلے میں 9.1 فیصد بڑھ گئی ہیں۔ 1981ء میں کنزیومر قیمتوں میں اضافے کے بعد سے یہ سب بڑا اضافہ ہے۔ صرف مئی میں ہی قیمتوں میں 8.6 فیصد کا اضافہ ہوا۔ مئی سے جون کے درمیان ہر ماہ قیمتوں میں 1.3 فیصد کا اضافہ ہوتا رہا حالآنکہ اپریل سے مئی تک قیمتوں میں صرف ایک فیصد اضافہ ہوا تھا۔

آمدنی کے مقابلے ضروری اشیاء کی قیمتیں تیزی سے بڑھ رہی ہیں۔ کم آمدنی والے طبقے اس سے بالخصوص متاثر ہورہے ہیں کیونکہ ان کی آمدنی کا بہت بڑا حصہ لازمی اشیاء مثلاً خوراک، ٹرانسپورٹیشن اور مکان کے کرائے ادا کرنے پر خرچ ہو جاتے ہیں۔ اگرچہ گیس کی قیمتوں میں گراوٹ آئی ہے اور یہ جون کے وسط میں تقریباً 5 ڈالر سے 4.66 فی گیلن ڈالر تک پہنچ گئی ہیں تاہم یہ مثبت پیش رفت بعض ماہرین اقتصادیات کی امیدوں کے مطابق نہیں ہے۔

افراط زر کی وجہ سے صارفین کا اعتماد بری طرح متزلزل ہوا ہے جس کے امریکی صدر جو بائیڈن اور اُن کی پارٹی دی ڈیموکریٹس دونوں کے لیے سیاسی مضمرات ہو سکتے ہیں۔ امریکا میں نومبر کے وسط مدتی پارلیمانی انتخابات میں افراط زر ایک اہم مسئلہ ہو سکتا ہے۔

وزارت حج و عمرہ نے اعلان کیا ہے کہ سعودی حکام نے عمرہ کے لیے تیاریاں مکمل کر لی ہیں –

باغی ٹی وی : سعودی وزارت کے مطابق تمام ممالک سے عمرے کے لیے آنے کے خواہش مند مسلمان ویزے کے لیے آج 14 جولائی سے ہی متعلقہ سفارت خانوں میں درخواستیں دینا شروع کر سکتے ہیں حج کے بعد عمرہ کا سیزن شروع ہونے میں اب کوئی تاخیر نہیں ہے ، سب تیاریاں مکمل ہیں۔

رواں سال کا دوسرا ائیربس 320 طیارہ شارجہ سے پاکستان پہنچ گیا

ان لوگوں کے لیے جو حج اور عمرے کے سلسلے میں نجی طور پر کاروبار کرتے ہیں اور لوگوں کو اس سلسلے میں سہولت فراہم کرتے ہیں انہیں متوجہ کیا گیا ہے کہ وہ ایک حج یا عمرہ ایجنٹ کے طور پر خدمات کا لائسنسن حاصل کرنے کے لیے (https://umralicense.haj.gov.sa) کے ذریعے درخواستیں دے سکتے ہیں۔

اس ضمن میں تحریری طور پر ایک جاری کردہ بیان میں کہا گیا ہے کہ عمرہ کی درخواستیں مملکت سعودیہ کے اندر اور باہر ہر جگہ وصول کی جائیں گی۔ عمرہ کی ادائیگی کے لیے آنے والے لوگوں کے قافلے یکم محرم 1444 سے آنا شروع ہو جائیں گے۔

جاری کیے گئے بیان میں کہا گیا ہے کہ سعودی عرب کے اندر سے موصول ہونے والی درخواستوں پر عمرہ ادائیگی کے لیے خصوصی اجازت نامہ جاری کیا جائے گا۔

حج آپریشن کا آج سے باقاعدہ آغاز ہو گیا

دوسری جانب بعد از حج آپریشن کا آج سے باقاعدہ آغاز ہوگیا ہے،جس کے تحت پی آئی اے کی پہلی پرواز پی کے 732 جمعرات کو علی الصبح ایک بجے جدہ سے کراچی اور دوسری پی کے 739 جدہ سے لاہور صبح 2 بجے پہنچیں۔

ترجمان کے مطابق 14 جولائی کو قومی ائرلائن کی 5 پروازیں جدہ سے کراچی، لاہور، ملتان، اسلام آباد اور پشاور کے لیے شیڈول ہیں پی آئی اے کا حج آپریشن 154 پروازوں پر مشتمل ہوگا، جس کے ذریعے 28 ہزار 80 حجاج کرام وطن واپس پہنچیں گے بعد از حج آپریشن 13 اگست تک جاری رہے گا۔

چینی کمپنی کا سندھ میں پبلک ٹرانسپورٹ پلانٹ لگانے کا اعلان