Tag: پاکستان

کوئٹہ : چیف سیکرٹری بلوچستان عبدالعزیز عقیلی کی زیر صدارت صوبے میں بلدیاتی انتخابات میں سکیورٹی انتظامات کے حوالے سے اعلیٰ سطحی اجلاس کا انعقاد کوئٹہ میں ہوا۔ چیف سیکرٹری نے اجلاس کو بریفنگ دیتے ہوئے کہا کہ بلدیاتی انتخابات کے لئے تمام تیاریاں مکمل ہیں۔32 اضلاع میں انتخابات کرائے جائیں گے۔ پرامن اور شفاف انتخابات صوبائی حکومت کی اولین ترجیح ہے۔

چیف سیکرٹری بلوچستان نے حساس اضلاع میں سکیورٹی فورسز کی اضافی نفری تعینات کرنے کی ہدایت جاری کرتے ہوئے کہا کہ قانون نافذ کرنے والے ادارے مضبوط روابط قائم رکھیں۔ بلدیاتی انتخابات کے لئے سکیورٹی، کمیونیکیشن اور ٹرانسپورٹ پلان ترتیب دے دیا گیا ہے۔ انکا کہنا تھا کہ الیکشن کمیشن کی جانب سے جاری کردہ ضابطہ اخلاق پر عملدرآمد کو یقینی بنائیں گے۔ اس کے علاوہ آنے والے بلدیاتی انتخابات کے تناظر میں پورے صوبے میں امن و امان کی مجموعی صورتحال کا جائزہ لیا گیا۔

اجلاس کے دوران چیف سیکرٹری نے پورے صوبے میں سکیورٹی انتظامات میں اضافے کے لئے ڈویژنل کمشنرز اور ڈپٹی کمشنرز کو ہدایات بھی جاری کئے۔ انہوں نے مقامی انتظامیہ اور قانون نافذ کرنے والے اداروں کو ہدایات دیتے ہوئے کہا کہ سیاسی قیادت سے رابطہ مربوط بنایا جائے اور انہیں حکومت کی طرف سے کئے گئے سکیورٹی انتظامات کے بارے میں آگاہ کیا جائے۔ سیاسی قیادت اور انتظامیہ ایک دوسرے سے تعاون کو بڑھائے تاکہ کسی بھی ناخوشگوار واقعہ کو روکا جا سکے۔

چیف سیکرٹری نے آنے والے انتخابات کے پرامن اور احسن انداز میں انعقاد کو یقینی بنانے کی ہدایت دی اور کہا کہ اگر ضرورت پڑی تو وہ خود مختلف اضلاع کا دورہ کرکے سکیورٹی انتظامات کا جائزہ لیں گے۔ اجلاس میں ایڈیشنل چیف سیکرٹری داخلہ، آئی جی پولیس، سیکرٹری لوکل گورنمنٹ، جوائنٹ ڈائریکٹر جنرل آئی بی، صوبائی الیکشن کمشنر اور دیگر قانون نافذ کرنے والے اداروں کے نمائندوں نے شرکت کی۔

لاہور:سابق اسسٹنٹ ایڈووکیٹ جنرل پنجاب شہباز تتلہ قتل کیس کا فیصلہ سنا دیاگیا،اطلاعات کے مطابق نصیر آباد پولیس نے سابق اسسٹنٹ ایڈوکیٹ جنرل پنجاب شہباز تتلہ قتل کیس کی تفتیش مکمل کر کے چالان سیشن کورٹ لاہور میں جمع کرا دیا ہے۔چالان کے مطابق سابق ایس ایس پی مفخر عدیل نے اسد بھٹی کے ساتھ مل کر شہباز تتلہ کو قتل کیا۔

پولیس کے مطابق ایڈیشنل سیشن جج نے سابق ایس ایس پی مفخر عدیل کو عمر قید کی سزا سنا دی،عدالت نے 2 سال 3 ماہ بعد مفخر عدیل کے خلاف قتل کیس کا فیصلہ سنایا،عدالت نے شریک 2 ملزمان کو بری کر دیا

یاد رہے کہ عدالت میں جمع کرائے گئے چالان کے مطابق مفخر عدیل اور اسد بھٹی نے شہباز تتلہ کو کلمہ چوک سے سرکاری جیپ میں اغوا کیا۔ مفخر عدیل نے کولڈ ڈرنک میں نشہ آور چیز ملا کر شہباز تتلہ کو پلاٸی جس سے وہ بے ہوش ہو گیا۔

چالان میں بتایا گیا ہے کہ مفخر عدیل نے شہباز تتلہ کے منہ اور ناک پر ٹیپ لگاٸی اور اسٹور روم میں لے جا کر مقتول کے منہ پر تکیہ رکھ کر بیٹھ گیا۔ سانسیں بند ہونے سے شہباز دم توڑ گیا۔

چالان کے مطابق ملزمان نے شہباز کو نیلے ڈرم میں سر کے بل ڈالا، پھر ڈرم میں تیزاب بھی ڈال دیا، جس سےلاش کچھ دیر میں محلول بن گٸی۔ محلول کو گھر کے گٹر میں ڈال دیا گیا۔
پولیس چالان کے مطابق ملزمان نے ڈرم، تیزاب کا کین، کپڑے، تکیہ، تولیہ اور دیگر سامان گجومتہ نالا میں پھینک دیا تھا۔

خیال رہے کہ شہباز تتلہ کے اغوا کا مقدمہ تھانہ نصیرآباد میں رواں سال 7 فروری کو درج کیا گیا تھا۔

ایس ایس پی مفخر عدیل 12 فروری 2020 سے لاپتہ تھے۔ 10 مارچ کو پنجاب پولیس نے ایس ایس پی مفخرعدیل کو گلگت سے حراست میں لے کر لاہور منتقل کیا تھا۔ وہ پنجاب پولیس کو شہباز تتلہ کے اغوا اور مبینہ قتل میں پولیس کو مطلوب تھے۔

اس سے قبل ملزم مفخرعدیل نے شہباز تتلہ کو قتل کرنے کا اعتراف کیا تھا۔ ملزم نے اعتراف کیا تھا کہ اس نے قتل کے بعد لاش کوتلف کردیا۔

لاہور : پنجاب میں‘منکی پکس’کے پھیلاؤ کا خدشہ:احتیاطی تدابیراختیارکرنے پرزور ،اطلاعات کے مطابق پنجاب حکومت نے منکی پکس کے علاج کیلئے ٹیکنیکل ورکنگ گروپ تشکیل دے دیا، ورکنگ گروپ صوبے میں منکی پوکس کی صورتحال سے نمٹنے کا جائزہ لے گا۔

تفصیلات کے مطابق پنجاب میں منکی پکس کے پھیلاؤ کے خدشے کے پیش نظر پنجاب حکومت نےبیماری کے علاج کیلئے ٹیکنیکل ورکنگ گروپ تشکیل دے دیا۔ڈائریکٹر جنرل ہیلتھ سروسزڈاکٹر ہارون جہانگیر کو ورکنگ گروپ کا چیئرمین نامزد کیا گیا ہے ، ورکنگ گروپ میں جلد، انفیکشن، میڈیسن اور وائرس کے ماہرین شامل ہیں۔

ورکنگ گروپ پنجاب میں منکی پوکس کی صورتحال سے نمٹنے اور مریضوں کی تعداد، ادویات سمیت اسپتالوں کی تیاری کا جائزہ لے گا۔ورکنگ گروپ اسپتالوں میں علاج سے متعلق آڈٹ اور انسپکشن بھی کرے گا۔

یاد رہے گذشتہ ہفتے قومی ادارہ صحت نے منکی پاکس کے حوالے سے ہائی الرٹ جاری کیا تھا، جس میں کہا تھا کہ مختلف ممالک میں منکی پاکس کے 92 مصدقہ کیسز سامنے آچکے ہیں ، منکی پاکس زونوٹک وائرس سےلاحق ہونے والامرض ہے ، افریقی چوہے اور بندر منکی پاکس کےانسانوں میں منتقلی کاسبب بن رہے ہیں۔

الرٹ میں کہا گیا تھا کہ منکی پاکس کی علامات 1سے 3 روز میں ظاہرہوتی ہیں اور اس سے مریض کے چہرے، جلد پر سرخ نشانات ظاہر ہوتے ہیں، بخار، سر، پٹھوں کا درد منکی پاکس کی اہم علامات ہیں۔

کراچی : ریلویز پولیس کراچی نے کارروائی کرتے ہوئے 4 ریلوے مٹیریل چور گرفتار کر لیے ہیں۔تفصیلات کے مطابق ترجمان ریلویز پولیس کا کہنا ہے کہ ملزمان کو دو الگ واقعات میں گرفتار کیا گیا، ملزمان بہادر خان،سلمان، طاہر اور داؤد خان کو نقیب کباڑ خانہ واقع ٹائر کمپنی این ٹی آر کالونی سے اور ریلوے یارڈ کے بی ایکس نیٹی جیٹی پل سے گرفتار کیا گیا۔

ترجمان ریلویز پولیس نے کہا کہ ملزمان ریلوے مٹیریل چنگچی رکشہ میں لوڈ کر کے بھاگنے کی کوشش کر رہے تھے، ملزمان کو موقع پر گرفتار کر کے قبضہ سے بھاری مقدار میں قیمتی ریلوے مٹیریل برآمد کر لیا گیا۔

ترجمان ریلویز پولیس کے مطابق ملزمان کیخلاف تھانہ ریلویز پولیس کراچی سٹی میں دو مقدمات درج کرلئے گئے ہیں، ریلویز پولیس ریلوے مٹیریل چوری کی روک تھام کیلئے مؤثر اقدامات کر رہی ہے۔

ادھر کراچی پولیس کے مطابق شہر میں جرائم کی شرح میں مسلسل اضافہ ہورہا ہے اور زیادہ ترسٹریٹ کرائم میں شہری بہت زیادہ نقصان اٹھا رہے ہیں، یہ بھی کہا جارہا ہےکہ اس وقت کراچی وسطی اور دیگر علاقوں میں روزانہ سیکڑوں کی تعداد میں ڈاکوموبائل اورنقدی چھین کرفرار ہوجاتے ہیں ، یہ بھی بتایا جارہا ہےکہ موٹرسائیکلوں کے ساتھ ساتھ بڑی گاڑیوں کی چوری کے واقعات بھی بڑھ گئے ہیں،

ادھر سندھ ہائی کورٹ نے دعا زہرا کے حوالے سے دیئے گئے احکامات پرپھر انتظامیہ سے پوچھ لیا ہے اور کہا ہےدعا زہرا کو ہرصورت پیش کیا جائے ،اس حوالے سے پنجاب حکومت سے بھی سندھ پولیس کے رابطے جاری ہیں

اسلام آباد:چیئرمین نیب کی تعیناتی ،اطلاعات کے مطابق قومی احتساب بیورو کے چیئرمین کی تعیناتی کے لئے حکومت اور اپزیشن کے درمیان مشاورت کا آغاز ہوگیا ہے۔

اس حوالے سے ذرائع کا کہنا ہے کہ حکومت اور اپوزیشن کی جانب سے مشترکہ طور پر فیصلہ کیا گیا ہے کہ ریٹائرڈ جج کی بجائے ریٹائرڈ بیورو کریٹ کو چیئرمین نیب لگایا جائے۔ذرائع کے مطابق اس سلسلے میں وزیراعظم شہباز شریف اور اپوزیشن لیڈر راجہ ریاض کے درمیان ملاقاتوں کا سلسلہ شروع ہوچکا ہے۔

ذرائع کا کہنا تھا کہ ابتدائی طور پر تین ناموں پر مشاورت کی گئی ہے جس کے مطابق سابق بیورو کریٹ فواد حسن فواد، سابق چیئرمین نیب قمر الزماں اور سابق ڈی جی ایف آئی اے بشیر میمن چیئرمین نیب کی دوڑ میں شامل ہیں جبکہ عرفان قادر شیخ کے نام پر بھی مشاورت کی گئی ہے۔

وزیراعظم اور اپوزیشن لیڈر کے درمیان ان ناموں پر اپنی اتحادی جماعتوں سے مشاورت پر اتفاق کیا گیا ہے۔اس حوالے سے بول نیوز سے غیررسمی گفتگو کے درمیان اپوزیشن لیڈر راجہ ریاض کا کہنا تھا کہ دو جون سے پہلے چیئرمین نیب کا تقرر کرلیں گے تاہم ابھی کوئی نام فائنل نہیں ہوا ہے۔

لندن :اوورسیزپاکستانی ووٹ کاسٹ کے حق کےمحروم کیےجانے پرسخت پریشان ونالاں ،اطلاعات کے مطابق قومی اسمبلی میں اوورسیز پاکستانیوں سے ووٹ کا حق واپس لینے کے لیے نیا بل پیش کیے جانے اور محروم کرنے پردنیا بھرمیں موجود پاکستانی سخت پریشان ہیں اور نالاں بھی ہیں

آئی پی سی پاکستان کے چیئرمین  امجد علی سید اوورسیز پاکستانیوں سے ووٹ کا سلب کرنے پر بہت پریشان ہیں ،اطلاعات کے مطابق قومی اسمبلی میں بیرون ملک مقیم پاکستانیوں کو ووٹ کے حق سے دستبردار رکھنے کےلیے نیا بل پیش کردیا گیا۔ آئی پی سی پاکستان کے چیئرمین  امجد علی سید نے اوورسیز پاکستانیوں کا ووٹ کا حق سلب کرنے پر تشویش کا اظہار کرتے ہوئے حکومت کے اقدام کی سخت مذمت کی۔

آئی پی سی پاکستان کے چیئرمین  امجد علی سید کا کہنا تھا کہ جس طرح آج پاکستان قومی اسمبلی میں نیا بل پیش کرکے اوورسیز پاکستانیوں  سےووٹنگ کا حق چھینا گیاہے اسکی اوورسیز پاکستانی پرزور مذمت کرتے ہیں۔

امجد علی سید نے خصوصی طور پر عدلیہ سے اپیل کرتے ہوئے فوری طور پر سوموٹو نوٹس لینے کا مطالبہ کیا اور  اس بل کو روکنے کی درخواست کی۔ ان کا کہنا تھا کہ اوورسیز پاکستانی دراصل پاکستانی ہی ہیں وہ پاکستانی پاسپورٹ کے حامل لوگ ہیں ،پاکستانی شناختی کارڈ استعمال کرتے ہیں اور پاکستان آتے جاتے ہیں۔ تاریک وطن پاکستانی اپنے ملک اور اہلخانہ کے بہتر معاش  کے لیے اپنے ملک اور خاندان سے دور رہتے ہیں ۔ تاریک وطن پاکستانیوں کےاہلخانہ پاکستان میں ہی موجود ہیں، ان کی پاکستان میں سرمایہ کاری میں خاطرخواہ حصہ ہے اور تجارت موجود ہے۔ اور ایک بہت بڑا رویونیو پاکستان بھیجتے ہیں

سید علی امجد نےاس بات پر بھی تشویش کا اظہار کیا کہ کسی بھی حکومت کو سیاسی مفادات کی خاطر یہ حق نہیں پہنچتا کہ وہ کہ اوورسیز کو جوکہ اسی طرح سے پاکستانی ہیں جس طرح دوسرے پاکستانی پاکستان میں رہتے ہیں ان سے ان کا بنیادی حق جوکہ ووٹنگ کا حق چھین لے۔ انہوں نے کہا کہ جب بطور شہری ہمیں حقوق  ہی نہیں دیے جارہے تو ہم کس منہ سے پاکستانی کہلانے کا حق رکھتے ہیں ۔ انہوں نے مزید کہا کہ یہ بلکل اسی طرح ہے کہ کل کوئی دوسری حکومت آکر ہم سے پاکستانی پاسپورٹ چھین لے۔

سید امجد علی نے اس بات پر زور دیا کہ اوورسیز پاکستانیوں کی خدمات کو ت سلیم کیاجائے۔اوورسیز پاکستانیوں  کوجو پچھلی حکومت نے ووٹنگ کا حق دیا تھا اور ڈیجیٹل ووٹنگ کا طریقہ متعارف کروایا تھا تاکہ وہ باہر ممالک میں بیٹھ کر بھی اپنے ملک میں ووٹ ڈال سکیں ، اس طریقے کو بحال کیا جائے

امجد علی سید نے مطالبہ کیا کہ قومی اسمبلی میں پیش کییے گئے بل کو واپس لیا جائے پرانے بل کو لاگو کیا ۔ اوورسیز پاکستانی ہیں انہیں عزت دی جائے اور ان سے آئینی اور بنیادی  حقوق نہ چھینے جائیں۔

اسلام آباد: وزیراعلیٰ خیبرپختونخوا کیخلاف وفاقی حکومت نے بڑا فیصلہ کرلیا ،اطلاعات کے مطابق وفاقی حکومت نے تحریک انصاف کے لانگ مارچ میں شرکت پر وزیراعلیٰ خیبرپختونخوا (کے پی) محمود خان کے خلاف کارروائی کا فیصلہ کیا ہے۔

وفاقی وزیر داخلہ رانا ثنااللہ کا کہنا ہےکہ وزیراعلیٰ خیبر پختونخوا نے وفاق پر چڑھائی کرکے عہدےکا غیرآئینی استعمال کیا، مسلح پولیس افسران کے ہمراہ وزیراعلیٰ کے پی کی شرکت وفاق پرحملہ ہے۔

رانا ثنااللہ کا کہنا ہےکہ وزیراعلیٰ کے غیرآئینی اقدام پر ان کےخلاف قانونی کارروائی کا فیصلہ کیاہے، اس سلسلے میں وزارت قانون سےرائے طلب کرلی ہے، وزارت قانون سے حاصل قانونی رائے پرعمل کریں گے۔

وفاقی وزیر داخلہ کا کہنا ہےکہ خیبرپختونخوا میں تعینات وفاقی سرکاری ملازمین اور پولیس افسران نے پی ٹی آئی کے فتنہ مارچ میں سہولت کاری کی، ان کے خلاف بھی کارروائی کا فیصلہ کیا ہے۔

رانا ثنااللہ کا کہنا ہےکہ بعض پولیس افسران مسلح ہوکرپی ٹی آئی فتنہ مارچ میں وفاق پر چڑھائی میں ملوث پائےگئے، ایسے افسران کے خلاف اپنے عہدوں کا خلاف قانون استعمال کرنے پرکارروائی کا فیصلہ کیا ہے۔