Tag: پاکستان

اسلام آباد: اسٹیٹ بینک آف پاکستان نےہفتے کی چھٹی بحال کردی ہے۔،اطلاعات کے مطابق ا سٹیٹ بینک کی جانب سے جاری کردہ اعلامیے کے مطابق پیر سے جمعرات بینک صبح 9 سے شام 5:30 بجے تک کھلے رہیں گے جبکہ 1:30 سے 2:15 تک نماز اور کھانے کا وقفہ ہو گا۔

ا سٹیٹ بینک کے مطابق جمعے کو بینک صبح 9 سے شام 6 بجے تک کھلے رہیں گےجبکہ 1:30 سے 2:30 بجے تک نماز اور کھانے کا وقفہ ہوگا۔ حکومت نے ہفتے کی چھٹی بحال نہ کرنے کا فیصلہ کیا ہے۔وزیراعظم کی منظوری کے بعد نوٹیفیکیشن جاری کر دیا گیا۔سرکاری دفاتر کے اوقات کار میں کمی کر دی سرکاری دفاتر کے اوقات کار صبح 8 بجے سے 3 بجے تک ہوں گے جب کہ جمعے کے روز 8 بجے سے ایک بجے تک ہوں گے۔اس سے قبل سرکاری اوقات کار صبح 9 سے 5 بجے تک تھے۔

یاد رہےکہ حکومت کی جانب سے عیدالفطر کے بعد ہفتے کی چھٹی بحال کیے جانے کا امکان ظاہر کیا گیا تھا۔وزیراعظم شہباز شریف کی جانب سے عہدے کا چارج سنبھالتے ہی ہفتہ وار دو چھٹیاں کم کرکے ایک کردی گئی تھیں جس پر متعدد حلقوں کی جانب سے احتجاج کیا گیا اور وزیراعظم سے ہفتے کی چھٹی دوبارہ بحال کرنے کا مطالبہ کیا گیا تھا۔ حکومت پر کام کے حوالے سے کافی دباؤ ہے کہ اس وقت زیادہ سے زیادہ کام کیا جائے۔

کہا گیا تھا کہ وزیراعظم شہباز شریف کی جانب سے عید الفطر کے بعد ہفتہ کی چھٹی بحال کر دی جائے گی تاہم ایسا نہ ہوا۔علاوہ ازیں بینکوں کے ملازمین نے پشاور پریس کلب کے سامنے ہفتے کی چھٹی کے خاتمے کے خلاف مظاہرہ کیا ، مظاہرے کی کال خیبر بینک ایمپلائز یونین کی جانب سے دی گئی تھی ، مظاہرے کی قیادت بینک آف خیبر ایمپلائز یونین کے صدر طارق نواز اور دیگر کر رہے تھے۔

مظاہرین نے کہا کہ ہفتے کی چھٹی کے باعث عام عوام کو ہفتے کے دن بینک نہیں آنا پڑتاتھا اور اسی عادت کے باعث ہفتے کے دن بینک میں کام نہ ہونے کے برابر ہوتا ہے۔ انہوں نے کہا کہ صبح آٹھ بجے سے بینک ملازمین بینکوں میں حاضر ہوتے ہیں اور شام تک اپنا کام کرتے ہیں تاہم ہفتے کی چھٹی کے باعث غمی خوشی اور بچوں کو وقت دینے میں سہولت تھی جو ختم کر دی گئی ہے ۔انہوں نے مطالبہ کیا کہ ہفتے کے دن کی چھٹی دوبارہ بحال کی جائے۔

اسلام آباد :شوکت ترین کی آئی ایم ایف کو پٹرولیم قیمتوں میں اضافہ کی یقین دہانی کی تردید،اطلاعات کے مطابق سابق وزیر خزانہ شوکت ترین نے آئی ایم ایف کو جون سے پہلے پٹرولیم قیمتوں میں اضافہ کی یقین دہانی کی تردید کر دی۔

تفصیلات کے مطابق سابق وزیر خزانہ شوکت ترین نے سماجی رابطے کی ویب سائٹ ٹوئٹر پر اپنے بیان میں کہا ہے کہ آئی ایم ایف کو پیٹرولیم قیمت میں جون سے پہلے اضافے کی یقین دہانی نہیں کرائی، جس کی میں پہلے بھی تردید کرچکا ہوں، اس کےبرعکس سبسڈی کی ادائیگی سے متعلق طریقہ کار دیا۔

شوکت ترین نے مزید لکھا کہ مفتاح صاحب اب آپ پاکستانی عوام پر بوجھ نہ ڈالیں اور تسلیم کریں پاکستان تحریک انصاف حکومت کی پالیسی درست تھی ۔

گذشتہ روز وفاقی وزیر خزانہ مفتاح اسماعیل نے کراچی میں پریس کانفرنس کرتے ہوئے کہا تھا کہ پی ٹی آئی حکومت آئی ایم ایف کیساتھ جون سے قبل پٹرولیم مصنوعات کی قیمتوں میں اضافے کا وعدہ کر چکی ہے۔

مفتاح اسماعیل کا کہنا تھا کہ عمران خان کے معاہدے کے تحت پیٹرول کی قیمت245روپے ہونی چاہیے تھی، پیٹرول کی قیمت بڑھنے کے اثرات اشیائے خورد ونوش پر بھی ہوتے ہیں، عمران خان نے آئی ایم ایف سے پیٹرولیم کی قیمتیں بڑھانے کا معاہدہ کیا تھا۔

اسلام آباد :ملک کے معاشی حالات اب ٹھیک نہیں:مگربہتربجٹ پیش کریں گے:اطلاعات کے مطابق وفاقی وزیر تجارت سید نوید قمر کا کہنا ہے کہ ملک کے معاشی حالات ان دنوں ٹھیک نہیں ہیں ، مگر اس کے باوجود وفاقی حکومت آئندہ ماہ بہتربجٹ پیش کرے گی۔ میڈیا رپورٹس کے مطابق سید نوید قمر کا کہنا ہے کہ ملک کے معاشی حالات اس وقت بہتر نہیں، مگر معاشی حالات کو مد نظر رکھتے ہوئے بجٹ پیش کیا جائے گاْ،اگر سابق حکومت چلتی رہتی تو پاکستان کے حالات اور بدتر ہو جاتے۔

سید نوید قمر کا کہنا ہے کہ کہ عمران خان جعلی خط لے کر گھوم رہے ہیں ہر اداروں نے تصدیق کر دی کی ایسا کچھ نہیں ہے تاہم اپنی ذات کے لئے ملک کو داؤ پر لگانا غلط ہے۔ انہوں نے کہا ہے کہ سابق وزیر اعظم کو یہ بات زیب نہیں دیتی کہ اپنی اہلیہ کی دوست کو بچانے کے لئے منظر عام پر آکر بولیں۔ان کا کہنا ہے کہ گورنر کا آرمی چیف کو خط لکھنا یہ غیر آئینی بات ہے لیکن کچھ لوگوں نے فیصلہ کر لیا ہے کہ ہم نے آئین شکنی کرنی ہے۔

وفاقی وزیر تجارت کا کہنا ہے کہ اوور سیز پاکستانی کو ووٹ کا حق ہے اور وہ حق کوئی نہیں چھین سکتا لیکن اصل مسلئہ یہ ہے کہ الیکٹرانک ووٹنگ اور انٹر نیٹ کے ذریعے ووٹنگ کی کوئی گارنٹی نہیں ہے۔ انہوں نے کہا ہے کہ اگلے ماہ بجٹ پیش کیا جائے گا مگر معاشی حالات کو مد نظر رکھتے ہوئے بجٹ لایا جائے گاْ جبکہ ملک کے معاشی حالات اس وقت بہتر نہیں ہیں۔

ان کا کہنا ہے کہ اگر سابق حکومت چلتی رہتی تو پاکستان کے حالات اور بدتر ہو جاتے ۔ ان کا کہنا ہے کہ عمران خان اگر تحریکیں چلائیں تو ہمیں کوئی اعتراض نہیں، ہم لانگ مارچ کو ویلکم کریں گے۔ چند روز قبل وفاقی وزیرخزانہ مفتاح اسماعیل نے کہا تھاکہ عیدالفطر کے بعد بجٹ پر مشاورت شروع کریں گے، ایسا بجٹ لائیں گے جو خسارے، قرض اور افراط زر کو کم کرسکے، بجٹ میں غریب اور متوسط طبقات کو برابری کے مواقع میسر کریں گے۔

اگلے بجٹ پر اسٹیک ہولڈرز کے ساتھ مشاورت شروع کریں گے، مشاورت میں کسان، ایکسپورٹرز، چھوٹے درجے کے تاجر، صنعت کار، ملٹی کارپوریشنز، کیپیٹل لیڈرز اور دیگر کے ساتھ مشاورت کی جائے گی۔ انہوں نے کہا تھا کہ ہم ایسا بجٹ پیش کریں گے جو خسارے، قرض اور افراط زر کو کم کیا جاسکے۔ آئندہ مالی سال کا بجٹ جاری کھاتوں کے خسارے میں کمی یقینی بنا سکے، ایکسپورٹ انڈسٹری،جس میں زراعت اور پیداوار میں بڑھوتری ممکن بنائیں گے۔

لاہور:ملک کے تمام مکاتب فکر کے علماءو مشائخ اور متحدہ علماءبورڈ پنجاب نے مسجد نبوی کے تقدس کی خلاف ورزی پر 06 مئی جمعتہ المبارک کو ملک بھر میں یوم حرمت مسجد نبوی شریف منانے اور قراردادیں منظور کرنے کا اعلان کرتے ہوئے واضح کیاہے کہ تمام سیاسی ومذہبی قائدین رسول اللہ ﷺسے محبت رکھتے ہیں اور کسی کافر کو بھی بغیر قرآن وسنت کے شواہد کے گستاخ رسول ﷺ قرارنہیں دیاجاسکتا سیاسی قائدین کو چاہیے کہ ایک دوسرے کے خلاف نفرتیں ختم کریں شیری مزاری کے توہین مذہب پر اقوام متحدہ کو لکھا جانےوالا خط بیرونی مداخلت کو دعوت دینے کے مترادف ہے اس سے توہین ناموس رسالت اور توہین مذہب کے خلاف چلائی جانے والی سازشوں کو تقویت ملے گی اور پاکستان پر دباﺅ بڑھے گا عمران خان شریں مزاری کو حکم دیں کہ وہ اقوام متحدہ کو لکھا جانیوالا خط واپس لیں

ان خیالات کا اظہار چیئرمین پاکستان علماءکونسل و متحدہ علماءبورڈ اور نمائندہ خصوصی وزیر اعظم پاکستان برائے بین المذاہب ہم آہنگی و مشرق وسطیٰ حافظ محمدطاہر محمود اشرفی ، علامہ عبد الحق مجاہد ، مولانا محمد خان لغاری ، مولانا سید ضیاءاللہ شاہ بخاری ، ڈاکٹر راغب نعیمی ، مفتی محمد علی نقشبندی ، مولانا اسعد زکریا قاسمی ، مولانا نعمان حاشر ، مولانا محمد شفیع قاسمی ، علامہ طاہر الحسن ، مولانا اسد اللہ فاروق ، علامہ زبیر عابد، مولانا طاہر عقیل اعوان، مولانا محمد اسلم صدیقی ، مولانا عزیز اکبر قاسمی ، مولانا محمد اشفاق پتافی ، مولانا سعد اللہ شفیق ، مولانا عبید اللہ گورمانی، قاری عبد الحکیم اطہر، مولانا محمد اسلم قادری، قاری مبشر رحیمی، مفتی عمر فاروق، مولاناقاسم قاسمی، مولانا ابو بکر حمید صابری، صاحبزادہ ثاقب منیر، مولانا طلحہ صدیقی، مولانا انوار الحق مجاہد، مولانا امین الحق اشرفی، مولانا حبیب الرحمن عابد اور دیگر نے ایک مشترکہ کانفرنس سے خطاب کرتے ہوئے کیاایک سوال کے جواب حافظ طاہر محمود اشرفی کاکہناتھاکہ پاکستان علماءکونسل کسی سیاسی جماعت کی غلام نہیں ہے ہم اپنے فیصلے کرنے میں مکمل آزاد وخودمختار ہیں

عمران خان کے ساتھ 16ماہ کام کیا کبھی کوئی مراعات یا ذاتی فائدہ نہیں لیا اسی طرح موجودہ وزیر اعظم کے دورہ سعودی کے دوران ہم نے پاکستان اور دین اسلام کے خدمت کیلئے کرداراداکیا ہے سعودی عرب ، متحدہ عرب امارات اور اسلامی ممالک کے ساتھ پاکستان کے تعلقات بہت مضبوط ہیں، ملک و قوم اور دین کیلئے کسی بھی فرد اور حکومت سے تعاون کرنا جرم نہیں ہے ایک سوال پر حافظ طاہر محمود اشرفی کاکہناتھاکہ عمران خان کو کیسے گستاخ رسول قرار دیدیں ؟ایسی باتیں ہی تباہی کا باعث بنتی ہیں جب تک ٹھوس شواہد نہ ہوں کسی کو کافر یا گستاخ کہنا درست نہیں ہے،

عمران خان تو درکنارکسی کافر کو بھی گستاخ رسول قرآن و سنت کے شواہد کے بغیرقرار نہیں دے سکتے انہوںنے کہاکہ سعودی دورے کے دوران حکومتی وفد کے حق اور مخالفت میں نعرہ بازی حرمین کی حدود میں ہوئی جونہیں ہونی چاہیے تھی اس پر سعودی حکومت تحقیقات کررہی ہے انہوںنے کہاکہ عمران خان رسول اکرم ﷺ کے امتی ہیں ان پر ذمہ داری عائد ہوتی ہے کہ وہ مسجد نبوی میں نعرہ بازی کے عمل کی بھرپور مذمت کریں انہوں نے کہا کہا کہ گذشتہ دو سال سے ملک میں توہین مذہب و توہین ناموس رسالت کے قانون کا غلط استعمال نہیں ہوا ہے ، عوام الناس نے اگر ایف آئی آرز کروائی ہیں یا درخواستیں دی ہیں تو ان کو میرٹ پر دیکھا جانا چاہیے ، اس سلسلہ میں وزیر اعظم میاں شہباز شریف ، وفاقی وزیر قانون اور وزیر داخلہ یقین دہانی کروا چکے ہیں۔ انہوں نے سابق وزیر شیریں مزاری کی طرف سے اقوام متحدہ اور دیگر اداروں کو لکھے جانے والے خطوط پر انتہائی افسوس کا اظہار کرتے ہوئے کہا کہ شیریں مزاری اور تحریک انصاف کے قائدین کو عدالتوں ، متحدہ علماءبورڈ یا اسلامی نظریاتی کونسل سے رجوع کرنا چاہیے تھا، شیریں مزاری کا خط پاکستان کے نظام میں بیرونی مداخلت کو دعوت دینا اور توہین ناموس رسالت و توہین مذہب کے قوانین کے خلاف چلائی جانے والی مہم کو تقویت دے گا، عمران خان صاحب کو اس پر فوری خطوط کو واپس لینے کاحکم دینا چاہیے ،

ایک منظم سازش کے تحت ان قوانین کے خلاف پہلے ہی بے بنیاد مہم چلائی جا رہی ہے جس کو ان خطوط سے تقویت ملے گی۔ ایک سوال کے جواب میں حافظ محمد طاہر محمود اشرفی نے کہا کہ متحدہ علماءبورڈ کے پاس جب ایف آئی آرز یا درخواستیں آئیں گی تو قرآن و سنت اور ملک کے قوانین کے مطابق فیصلہ کریں گے، ہم اللہ کے سامنے جوابدہ ہیں کسی حکومت ، فرد ، گروہ یا جماعت کے سامنے نہیں وزیر اعظم شہبازشریف ،وزیر قانون اور وزیر داخلہ سے واضح بات کی کوئی مقدمہ سیاسی و ذاتی مخالفت پر توہین مذہب پر نہیں ہونا چاہئے جس پر انہوںنے یقین دہانی کروائی ہے انہوںنے کہاکہ متحدہ علماءبورڈ نے گذشتہ تین سال میں جو کام کیا ہے وہ روز روشن کی طرح واضح ہے ، ہم نے ہمیشہ درخواست کی ہے کہ غیر شرعی فتوے بازی ، غداری اور گستاخی کے فتوے بند ہونے چاہئیں ایک اور سوال کے جواب میں حافظ محمد طاہر محمود اشرفی نے کہا کہ متحدہ علماءبورڈ غیر سیاسی پلیٹ فارم ہے ، اس فورم کا سیاست سے کوئی تعلق نہیں ہے ، حق کو حق کہیں گے اور سچ کو سچ کہیں گے۔انہوں نے کہاکہ ملک کے مسائل کا حل صاف شفاف احتساب اور آزادانہ انتخابات سمجھتے ہیں، فوری طور پر انتخابی اصلاحات کی جائیں تا کہ انتخابات کا راستہ آسان ہو۔پاکستان علماءکونسل کی مرکزی مجلس شوریٰ و عاملہ کا اجلاس مئی کے آخری ہفتہ میں ہو گا جس میں مستقبل کے حوالے سے فیصلے کریں گے۔

لاہور:پامی ایگزیکٹو کمیٹی نے متفقہ طور پر فیصلہ کیا ہے کہ احتجاج کے طورپر 9مئی کو پی ایم سی کی طرف سے ڈینٹل کالجز کو میڈیکل کالجزمیں ضم کرنے کے حوالے سے انعقاد کی جانے والی میٹنگ کا بائیکاٹ کریں گے۔پامی پہلے ہی پی ایم سی کی جانب سے جاری کردہ ڈینٹل کالجز کو میڈیکل کالجز میں ضم کرنے کے مراسلے مسترد کرتے ہوئے وضاحت مانگ چکی ہے کہ واضح کیا جائے کہ قانون کے کس سیکشن تحت ڈینٹل کالجز کو میدیکل کالجز میں ضم کیا جاسکتا ہے ۔ اگر قانون میں ایسی کوئی شق نہیں ہے تو پی ایم سی کو ابہام اور جھوٹ پھیلانے سے باز رہنا چاہے۔

اسلام آباد ہائی کورٹ کی آبزرویشن کے بعد پاکستان میڈیکل کمیشن کے ممبران کے پاس کوئی اخلاقی جواز نہیں ہے کہ وہ اپنی سیٹوں پر براجمان رہیں۔پامی ایگزیکٹو سیکرٹری آفتاب احمد کاکہنا ہے کہ پامی پہلے ہی پاکستان میڈیکل کمیشن کی جانب سے ڈینٹل کالجز کو میڈیکل کالجز میںضم کرنے کے مراسلے کو مسترد کرچکی ہے۔آئندہ نو مئی کو رکھے گئے اجلاس کا بائیکاٹ کا اعلان کرتے ہیں۔قانون کے تحت ڈینٹل کالجز کی آزاد حیثیت ہے۔مذکورہ معاملے پر پامی ہر طرح سے قانون کے مطابق ڈینٹل کالجز کادفاع کرے گی،پی ایم سی ڈینٹل کالجز میں اپنی خراب داخلہ پالیسیوں کا دفاع کرنے کی کوشش کررہی ہے۔

پی ایم سی کی بڑی غلطی تھی کہ سرکاری اور پرائیویٹ کالجوں میں داخلوں کا ایک ہی وقت رکھا تھا اور داخلوں کی تاریخ بھی ایک ہی تھی ۔ پی ایم سی کو آخر میں سمجھنا ہوگا کہ ایم بی بی ایس کا میرٹ ہمیشہ بی ڈی ایس سے زیادہ ہوتا ہے اور طلباءکی پہلی ترجیح ایم بی بی ایس میں داخلہ لینا ہوتا ہے جبکہ بی ڈی ایس میں داخلہ ان کی آخری ترجیح ہوتی ہے۔پرائیویٹ سیکٹر میں بی ڈی ایس کے داخلے سرکاری سیکٹر میں ایم بی بی ایس اور بی ڈی ایس میں داخلے کرنے کے بعد ہی کیے جاسکتے ہیں۔

پی ایم سی کو پبلک سیکٹر میں ایم بی بی ایس کالجوں میں داخلے کے لیے یقینی طور پر حتمی اختتامی تاریخ دینا چاہیے اور پھر پبلک سیکٹر میں ایم بی بی ایس کالجوں کے داخلے مکمل کرنے کے کم از کم تین ہفتوں کے بعد پرائیویٹ سیکٹر میں بی ڈی ایس میں داخلے کرنے کی آخری تاریح دینی چاہیے۔ پی ایم سی پبلک سیکٹر کے میڈیکل کالجزمیں داخلے مکمل کرنے کے بعد سرکاری ڈینٹل کالجز میں داخلوں کی حتمی تاریخ کا اعلان کرے اور جب سرکاری ڈینٹل کالجز میں داخلے مکمل ہوجائیں تو کم ازکم تین ہفتوں کا وقف دینے کے بعد پرائیویٹ ڈینٹل کالجز میں بی ڈی ایس کی سیٹوں پر داخلے کرنے کی حتمی تاریخ دی جائے۔ اگرمذکورہ پالیسی پر عمل درآمد کیا جاتا ہے تو تمام کالجوں میں تمام مختص نشستیں آسانی سے پر ہو جائیں گی۔

لاہور:پاکستان تحریک انصاف کے رہنما اور سابق وفاقی وزیر برائے توانائی حماد اظہر نے کہا ہے کہ وزیر خزانہ نے پٹرول اور ڈیزل کی قیمتوں کے حوالے سے ابہام پیدا کیا، مفتاح اسماعیل کو آٹے کے بھاؤ کا بھی علم نہیں، امپورٹڈ حکومت اپنی ناکامی چھپانے کیلئے آئی ایم ایف کے پیچھے نہ چھپے، قوم کو اصل حقائق سے آگاہ کیا جائے۔

مفتاح اسماعیل کی پریس کانفرنس کے ردعمل میں حماد اظہر نے کہا کہ انہوں نے رمضان میں لوگوں کو لوڈشیڈنگ کے عذاب سے گزارا، ہمارے دور حکومت میں کبھی بھی اس طرح لوڈ شیڈنگ نہیں ہوئی، انہوں نے امپورٹڈ ایندھن پر پاور پلانٹ لگائے، 27 ڈالر پر انہوں نے تاریخ کے مہنگے ایل این جی کے معاہدے کیے

اپنی پریس کانفرنس میں پی ٹی آئی رہنما نے کہا کہ روس کے ساتھ بطور وزیر تیل کے معاہدے کرلیے تھے، مجھے پتہ ہے امپورٹڈ حکومت روس سے معاہدے نہیں کریگی، 2 ایل این جی کے سودے جو (ن) لیگ کی حکومت کر کے گئی تھی وہ ڈیفالٹ کر گئے۔

حماد اظہر نے کہا ہے کہ یہ وہی حکومت ہے جو آج سے 2 ماہ پہلے مہنگائی مارچ کر رہی تھی، وزیر خزانہ کو یہ نہیں پتہ کہ آٹے کی قیمت کیا ہے، انہوں نے کہا کہ سبز بیگ سستے آٹے کی سکیم کا اجراء تو ہم نے کیا تھا، وزیرخزانہ نے گزشتہ روز سیاسی پریس کانفرنس کی، قوم کو بتا دیں کہ پٹرولیم مصنوعات کی قیمتوں میں اضافہ کرنا ہے یا نہیں، یہ یوٹیلٹی سٹورز پر جتنی قیمتیں بتا رہے ہیں ہماری حکومت نے مقرر کیں، ہماری حکومت نے یوٹیلٹی سٹورز کو فعال کیا، یہ ہمارے ہی کھاتے سے چیزیں ہمیں نہ گنوائیں، 32 دن کا ڈیزل کا اسٹاک میں چھوڑ کر گیا تھا۔

انہوں نے کہا کہ یہ اپنی ناکامی کو چھپانے کے لیے آئی ایم ایف کے پیچھے نہ چھپیں، ہماری حکومت نے سستے تیل کے لیے روس سے مذاکرات شروع کیے تھے، یہ روس سے سستا تیل نہیں خریدیں گے ان کی ٹانگیں کانپیں گی، امپورٹڈ حکومت سے معیشت سنبھالی نہیں جا رہی، وزیرخزانہ عجیب باتیں کر رہے ہیں، خود ساختہ ڈیزل کا بحران کھڑا کر دیا گیا ہے، کسان آج ڈیزل کے لیے پریشان ہو رہے ہیں، آئی ایم ایف کو پٹرولیم قیمتوں کے تعین کا اختیار نہیں دیا گیا، مسلم لیگ (ن) کی حکومت کے پہلے ہی ماہ مہنگائی میں 10 فیصد اضافہ ہوا، مہنگائی کی شرح 13 فیصد سے زائد ہوچکی ہے۔

سابق وفاقی وزیر نے کہا کہ ان کی نالائقی کی وجہ سے لوڈشیڈنگ ہو رہی ہے، مہنگے ترین چار ایل این جی کے سودے کیے گئے، ایسے معاملات نہیں چلیں گے، عوام کی نمائندہ حکومت ہی عوام کو ریلیف دیتی ہے، یہ ایک ووٹ پر حکومت کھڑی ہے کیسے فیصلہ سازی کر سکتی ہے، امپورٹڈ حکومت سے معاملات نہیں سنبھل رہے، فوری الیکشن کرائے جائیں۔

پی ٹی آئی رہنما کا کہنا تھا کہ اگر انہوں نے گرفتاریاں کیں تو معاملات کسی اور طرف چلے جائیں گے، ہم اقتدار نہیں مانگ رہے ہم تو الیکشن کا مطالبہ کر رہے ہیں، سی پیک اتھارٹی ہم نے بنائی، سنا ہے یہ ختم کرنے جا رہے ہیں، ان کے چین کے ساتھ تعلقات تسلی بخش نہیں، کٹھ پتلی حکومت پتا نہیں کس طرح چین کے ساتھ تعلقات رکھے گی، کراچی، پشاور، اسلام آباد، لاہور میں کارکنوں کی مدد سے جلسے کیے، یہ جو ہمارے ساتھی دوسری طرف گئے ان کو تھوڑی دیر بعد سمجھ آجائے گی۔

سابق وفاقی وزیر نے کہا کہ حکومت ایک ووٹ پر کھڑی ہے، ڈیزل اور پٹرول مہنگا کرنے سے مہنگائی کا طوفان آئے گا، ہم نے کبھی فورس لوڈشیڈنگ نہیں ہونے دی تھی، اس وقت تحریک انصاف کا کارکن نہیں عوام بھی الیکشن کا مطالبہ کر رہے ہیں، تحریک انصاف اس وقت ملک کی سب سے بڑی جماعت ہے، الیکشن کمیشن کا فیصلہ آئے گا تو ان کی حکومت ختم ہو جائے گی، سندھ کے عوام بھی اب تبدیلی چاہتے ہیں، خود مختاری تو تباہ کردی اب آپ معیشت بھی تباہ کرنے جا رہے ہیں، یہ الیکشن سے بھاگ رہے ہیں، انہیں پتا ہے عمران کو بھاری اکثریت ملے گی، جب جوڈیشل کمیشن بنے گا تو بہت ساری چیزوں کا پتا چلے گا۔