لاہور:گورنر پنجاب عمر سرفراز چیمہ نے لاہور ہائیکورٹ کے جج کے خلاف سپریم جوڈیشل کونسل میں ریفرنس بھیجنے کا اعلان کیا ہے۔

ایک بیان میں گورنر پنجاب نے کہا کہ عالمی سازش کی وجہ سے بھٹو کو پھانسی پر چڑھا دیا گیا، آج عمران خان کے خلاف سازش ہوئی اور ایک جمہوری حکومت کو ختم کیا گیا۔

علاوہ ازیں عمر سرفراز چیمہ نے سوشل میڈیا پر جاری بیان میں کہا کہ ہر گزرتا لمحہ پنجاب کے بے قصور غیرت مند جوانوں کے لیے زندگی مشکل کرتا جا رہا ہے ۔انہوں نے مزید لکھا کہ سسیلین مافیا اپنے مخالفوں پر ناموس رسالت ﷺ جیسے سنگین جرائم کے جھوٹے پرچے کاٹ رہی ہے۔

گورنر پنجاب کا کہنا تھا کہ پنجاب کے غریب اور معصوم شہریوں کو ہراساں کیا جا رہا ہے، وزیراعظم وقت ضائع نہ کریں، آپشننز محدود ہوتے جا رہے ہیں۔

گورنر پنجاب عمر سرفراز چیمہ نے وزیراعظم شہباز شریف کے بعد آرمی چیف جنرل قمر جاوید باجوہ کو بھی خط لکھ دیا۔گورنر پنجاب نے آرمی چیف کو صدر مملکت اور وزیر اعظم کو لکھے گئے خطوط کی نقول بھی بھیجوا دیں۔

ہر گزرتا لمحہ پنجاب کے بے قصور غیرت مند جوانوں کے کئے زندگی مشکل کرتا جا رہا ہے
Sicilian mafia اپنے مخالفوں پر جھوٹے ناموس رسالت جیسے سنگین جرائم کے جھوٹ پرچے کاٹ رہی ہے

غریب پنجابی معصوم شہریوں کو ہراساں کیا جارہا ہے

وزیراعظم وقت ضائع نہ کریں ،آپشننز محدود ہوتی جا رہی ہیں pic.twitter.com/1wq1uvpLYJ

— Omar Sarfraz Cheema (@OmarCheemaPTI) May 5, 2022

خط میں گورنر پنجاب نے آرمی چیف سے پنجاب کی موجودہ صورتحال میں کردار ادا کرنے کی اپیل کی ہے۔خط میں کہا گیا ہے کہ آرمی چیف پنجاب میں آئینی فریم ورک پر عمل درآمد کیلئے کردار ادا کریں۔خط میں وفاقی اور صوبائی حکومتوں پر عوامی اعتماد بحال کرنے کیلئے بھی کردار ادا کرنے کی اپیل کی گئی ہے۔

خیال رہے کہ اس سے قبل عمر سرفراز چیمہ کا وزیراعظم شہباز شریف کو لکھا گیا خط سامنے آیا تھا جس میں انہوں نے کہا کہ کوئی طاقت مجھے آپ کے بیٹے کے غیر آئینی اقدامات کو روکنے سے منع نہیں کر سکتی، میں تمام صلاحیتوں کو بروئے کار لا کر آئین پاکستان کی حفاظت کروں گا۔

اسلام آباد:حکومت کا انکوائری کمیشن مسترد:کون انکوائری کرے توقبول کریں گے:اطلاعات کے مطابق پاکستان تحریک انصاف نے غیر ملکی سازش کے الزام کی تحقیقات کے لیے وفاقی حکومت کے مجوزہ انکوائری کمیشن کو مسترد کر دیا۔

اسلام آباد میں پی ٹی آئی رہنماؤں کے ہمراہ پریس کانفرنس کرتے ہوئے فواد چوہدری کا کہنا تھا کہ ہم صرف وہ کمیشن قبول کریں گے جو آزاد عدلیہ کے تحت ہو اور کمیشن کی کارروائی براہ راست دکھائی جائے۔

وفاقی حکومت کے بشریٰ بی بی کی قریبی دوست پر الزامات کے حوالے سے فواد چوہدری نے کہا کہ فرح خان کے خلاف ابھی تک کوئی کیس نہیں بنا سکے، الزام لگا نہیں رہے، پریس کانفرنسیں کر رہے ہیں۔

یاد رہے کہ وفاقی حکومت نے سابق وزیراعظم عمران خان کی جانب سے لگائے گئے بیرونی سازش کے الزامات پر انکوائری کمیشن بنانے کا اعلان کیا ہے۔

وفاقی وزیر اطلاعات مریم اورنگزیب کا پریس کانفرنس کرتے ہوئے کہنا تھا کہ انکوائری کمیشن غیر جانبدار ہوگا جو شفاف طریقے سے ان الزامات کی آزادانہ تحقیقات کرے گا اور کمیشن کی جانب سے جو بھی فیصلہ ہوگا اس کے بعد وہ لوگ جنھوں نے ملک کو جھوٹی سیاست کے لیے استعمال کیا انھیں قانون کے کٹہرے میں لایا جائے گا۔

مریم اورنگزیب کے مطابق انکوائری کمیشن کے لیے ایسا سربراہ مقرر کیا جائے گا جس پر کوئی بھی انگلی نہیں اٹھا سکے گا۔

اسلام آباد:عوامی مسلم لیگ کے سربراہ شیخ رشید نے کہا ہےکہ سعودی عرب کی تحقیقات سے ثابت ہوگیا میرا بھتیجا وہاں نہیں تھا، 15 تاریخ کو فیصل آباد جلسہ میں جا کر گرفتاری دینا چاہتا تھا مگر عمران خان نے روک دیا۔

راولپنڈی میں میڈیا سے گفتگو کرتے ہوئے سابق وزیر داخلہ شیخ رشید کا کہنا تھا کہ میں تو چاہتا ہوں کہ میرا بھتیجا ایک دو مہینے جیل میں رہے ،اس کی اچھی ٹرینگ ہو جائے گی۔ سعودی عرب کی تحقیقات سے ثابت ہوگیا کہ میرا بھتیجا وہاں نہیں تھا ، اگر ن لیگ کے احسن اقبال ،مریم اورنگزیب یا کوئی بھی کہہ دے کہ راشد وہاں تھا تو میں ذمہ دار ہوں۔

انہوں نے کہا کہ فیصل آبادکی شیطانی چمگادڑنے مدینہ ٹاؤن میں مجھ پرمقدمہ درج کرایا،15 تاریخ کو فیصل آباد جلسہ میں جا کر گرفتاری دینا چاہتا تھا، عمران خان نے منع کر دیا۔ عابدشیرعلی کہتاہےراناثنااللہ پر18قتل کےمقدمےہیں۔ نوازشریف سے جو ملاقاتیں ہو رہی تھیں، میں اور عمران خان ان سے باخبر تھے۔ ہماری حکومت کے خلاف سامراجی پلان بنایا گیا، دو ووٹوں کی اکثریت سے امپورٹڈ حکومت لائی گئی، چودھری سالک اور طارق بشیر چیمہ الگ ہوجائیں تو حکومت ختم ہوجائے گی۔

دوسری طرف رانا ثنااللہ نے حسب روایت اپنی بندوقوں کا رُخ پی ٹی آئی رہنماوں کیطرف کرتے ہوئےکہا ہےکہ مسجد نبوی میں بے حرمتی پر عمران نیازی بلا تاخیر قوم سے معافی مانگیں، ڈیوٹی جج کے کہنے کے باوجود راشد شفیق نے اپنا فون پولیس کو نہیں دیا، یہ عمران اور شیخ رشید کے واقعے میں ملوث ہونے کوتقویت دیتا ہے۔

وزیر داخلہ نے اپنے بیان میں کہا کہ عدالت نے شیخ راشد کے ویڈیو پیغام کی تصدیق کیلئے موبائل فون برآمد کرنے اور فرانزک کاحکم دیا ہے، عدالت کے اصرار کے باوجود شیخ راشد شفیق نے فون پولیس کو نہیں دیا، یہ عمل عمران خان اور شیخ رشید کے واقعے میں ملوث ہونے کوتقویت دیتا ہے۔

اسلام آباد:‏موٹروے پولیس نے شہباز گل کی گاڑی کو ٹکر مارنے والی گاڑی کی شناخت کرلی،اطلاعات کے مطابق موٹروے پولیس نے یہ اعلان جاری کردیا ہےکہ سابق وزیراعظم عمران خان کے قریبی ساتھی ڈاکٹرشہازگل کی گاڑی کو ٹکرمارنے والی گاڑی کی شناخت ہوگئی ہے

موٹروے پولیس کا کہنا ہے کہ ٹکر لگنے کے بعد گاڑی کا ڈرائیور رکنے کے بجائے فرار ہوگیا ، پولیس کی طرف سے یہ بھی کہا گیا ہے کہ گاڑی کے مالک کی بھی شناخت کرلی ہے

حکام کا کہنا ہے کہ وہ متعلقہ افراد تک جلد پہنچ جائیں گے، یہ بھی معلوم ہوا ہے کہ موٹروے کے اعلی افسران پر مشتمل ٹیم واقع کی مزید تحقیقات بھی کررہی یے ،

دوسری طرف شہاز گل نے اللہ کا شکرادا کرتے ہوئے کہا ہےکہ مجھے جان سے مارنے کی کوشش کی گئی:میرے اللہ نے بچا لیا،اطلاعات کے مطابق سابق وزیراعظم عمران خان کے قریبی ساتھی اورپی ٹی آئی رہنما شہبازگل کی طرف سے موٹروے حآدث کے حوالے سے ردعمل آگیا ہے ،

مجھ پر قاتلانہ حملہ کروانے والوں کو بتانا چاہتا ہوں۔ اپنے مولا اور قوم کی دعاؤں کی وجہ سے زندہ ہوں۔ میری گاڑی کا پیچھا کر کے جان بوجھ کر ہٹ کیا گیا۔یہ ایک منصوبے کے تحت کیا گیا

میں نے کل ہی کہا تھا کہ کیا زیادہ سے زیادہ آپ ہمیں قتل کروا دیں گے ؟ کروا لیں۔ غداری نہیں کروں گا۔

— Dr. Shahbaz GiLL (@SHABAZGIL) May 5, 2022

شہبازگل نے اپنے ٹویٹ پیغام میں کہا ہےکہ مجھ پر قاتلانہ حملہ کروانے والوں کو بتانا چاہتا ہوں۔ اپنے مولا اور قوم کی دعاؤں کی وجہ سے زندہ ہوں۔ میری گاڑی کا پیچھا کر کے جان بوجھ کر ہٹ کیا گیا۔یہ ایک منصوبے کے تحت کیا گیا

میں نے کل ہی کہا تھا کہ کیا زیادہ سے زیادہ آپ ہمیں قتل کروا دیں گے ؟ کروا لیں۔ غداری نہیں کروں گا۔

تحریک انصاف کے رہنما شہباز گل کارحادثے میں زخمی ہو گئے:پیچھے سے ٹکر ماری گئی ،اطلاعات کےمطابق تحریک انصاف کے رہنما شہباز گل کی گاڑی کو حادثہ پیش آیا جس میں وہ زخمی ہو گئے۔

بتایا گیا ہے کہ شہباز گل کی گاڑی کو پیچھے سے آنے والی گاڑی نے ٹکر ماری، حادثے کے بعد موٹروے پولیس حکام موقع پر پہنچ گئے۔

عمران خان کے ساتھی تحریک انصاف کے اہم رکن شہبازگل کی گاڑی کوموٹروے پرحادثہ،پیچھے سے آنے والی گاڑی نے ٹکرماری
شہبازگل شدید زخمی pic.twitter.com/w5ZxbLLIKb

— Baaghi TV باغی ٹی وی (@BaaghiTV) May 5, 2022

شہباز گل کا اپنے بیان میں کہنا تھا کہ موٹروے پرگاڑی حادثے کا شکارہوئی جس کے دوران میں زخمی ہواہوں۔ ان کے ساتھی کا کہنا تھاکہ شہباز گل کی گاڑی کو پیچھے سے آنے والی گاڑی نے ہٹ کیا، بظاہر یہ حادثہ سوچے سمجھے منصوبے کے تحت پیش آیا۔ پولیس نے حادثے کی تحقیقات شروع کر دیں۔

اسلام آباد: وفاقی حکومت نے سابق وزیراعظم عمران خان کے گوشواروں اور آمدن کی جانچ پڑتال کرانے کا فیصلہ کیا ہے۔

ذرائع کا بتانا ہے کہ حکومت نے پی ٹی آئی سینٹرل سیکرٹریٹ کے 4 ملازمین کے بینک اکاﺅنٹس کی تفصیلات حاصل کرنے کا بھی فیصلہ کیا ہے۔

ذرائع کے مطابق جن ملازمین کی تفصیلات حاصل کرنے کا فیصلہ کیا ہے ان میں طاہر اقبال، محمد نعمان افضل، محمد ارشد اور محمد رفیق شامل ہیں، 2008 سے 2022 تک ان ملازمین کے نجی اکاﺅنٹس میں جتنی رقوم آئیں ان کا ریکارڈ حاصل کیا جا رہا ہے۔

ذرائع کا کہنا ہے کہ پی ٹی آئی کے 4 ملازمین کے نجی اکاﺅنٹس میں آنے والی بھاری رقوم کا ریکارڈ اسٹیٹ بینک سے منگوایا جا رہا ہے، شواہد کی روشنی میں گرفتاریاں بھی عمل میں آئیں گی۔

حکومتی ذرائع کا بتانا ہے کہ پی ٹی آئی فارن فنڈنگ کے 2013 سے 2022 کا ریکارڈ بھی منگوایا جا رہا ہے، پی ٹی آئی فارن فنڈنگ کیس میں صرف 5 سال تک کے عرصے کا ریکارڈ ہے۔

ذرائع کے مطابق آزاد آڈیٹرز کے ذریعے ریکارڈ کی فارنزک جانچ پڑتال کروائی جائے گی جبکہ ایف آئی اے اور ایف بی آر اپنی اپنی سطح پر ریکارڈ حاصل کرکے کارروائی کریں گے۔

حکومتی ذرائع کا کہنا ہے کہ پی ٹی آئی اور عمران خان کے انٹرنیشنل بینک اکاﺅنٹس کے ریکارڈ کے لیے عالمی بینکس کو خط لکھنےکا فیصلہ بھی کیا گیا ہے۔

حکومتی ذرائع کا بتانا ہے کہ سابق وزیر خزانہ اسحاق ڈارکے دور میں ڈیٹا ایکسچینج معاہدہ ہوا تھا جس کے تحت کارروائی کی جائے گی، معاہدے کے تحت ایف بی آر کو قانونی اختیار حاصل ہے کہ وہ عالمی بینکس سے ریکارڈ لے سکتا ہے۔

ذرائع کا یہ بھی بتانا ہے کہ امریکا، برطانیہ، کینیڈا، ناروے، فن لینڈ، نیوزی لینڈ اور آسٹریلیا سمیت دیگر غیر ملکی بینک اکاﺅنٹس کا ریکارڈ حاصل کیا جائے گا۔

ذرائع کے مطابق وفاقی حکومت نے عمران خان کے گوشواروں اور آمدن کی جانچ پڑتال کرانے کا بھی فیصلہ کیا ہے، گوشواروں اور ریکارڈ کا تقابلی جائزہ لے کر قانونی کارروائی کی جائے گی۔

اسلام آباد:‏حکومت کا عمران خان کے بیرونی سازش کے الزام پر انکوائری کمیشن بنانے کا اعلان ،اطلاعات کے مطابق وفاقی حکومت نے سابق وزیراعظم عمران خان کی جانب سے لگائے گئے بیرونی سازش کے الزامات پر انکوائری کمیشن بنانے کا اعلان کیا ہے۔

وفاقی وزیر اطلاعات مریم اورنگزیب کا پریس کانفرنس کرتے ہوئے کہنا تھا کہ انکوائری کمیشن غیر جانبدار ہوگا جو شفاف طریقے سے ان الزامات کی آزادانہ تحقیقات کرے گا اور کمیشن کی جانب سے جو بھی فیصلہ ہوگا اس کے بعد وہ لوگ جنھوں نے ملک کو جھوٹی سیایست کے لیے استعمال کیا انھیں قانون کے کٹہرے میں لایا جائے گا۔

مریم اورنگزیب کے مطابق انکوائری کمیشن کے لیے ایسا سربراہ مقرر کیا جائے گا جس پر کوئی بھی انگلی نہیں اٹھا سکے گا۔

مریم اورنگزیب نے سابق وزیر اعظم عمران خان کی جانب سے اپنی اہلیہ بشریٰ بی بی کی قریبی دوست فرح خان سے متعلق بیان پر بھی چیئرمین پی ٹی آئی کو شدید تنقید کا نشانہ بنایا۔

مریم اورنگزیب کا کہنا تھا کہ یہ بیرونِ ملک سازش کا رونا نہیں یہ گوگی بچاؤ کا ماتم ہے، معاشی دہشتگرد، معاشی بارودی سرنگیں بچھانے والے نالائقی کا ماتم کر رہے ہیں، سازشی ٹولے نے 4 سال ملک کو لوٹا اور عوام کے خلاف سازش کی، اس ٹولے نے 4 سال خزانہ اورتوشہ خانہ لوٹا۔

انھوں نے کہا کہ تباہ حال معیشت، بیروزگاری، بدترین مہنگائی کی وجہ عمران صاحب کی کرپشن اور لوٹ مار ہے، عمران خان کے دور میں آٹا،چینی،گھی، دوائی اور کھاد کی قیمت تاریخ کی بلند ترین سطح پر رہی۔

دوسری جانب مریم اورنگزیب نے موجودہ حکومت کی کاوشوں کو سراہتے ہوئے کہا کہ وزیراعظم شہباز شریف نے 4 سال سے ستائی عوام کو 2 ہفتے میں مہنگائی سے ریلیف دیا، آج الحمدللّٰہ یوٹیلٹی اسٹورز کے باہر رمضان میں ایک کلوچینی کے لیے قطاریں نہیں لگیں، آج عوام کو 4 سال کے بعد صرف 2 ہفتوں میں سستا آٹا،چینی اورگھی مل رہا ہے۔

انھوں نے مزید کہا کہ آج سعودی عرب اور یو اےای سے ملکی ترقی کے لیے کاروباری شراکت داریاں ہو رہی ہیں، عمران صاحب کشکول لے کر دردرکی ٹھوکریں کھاتے رہے، عمران صاحب کا پھیلایا گند اور غلاظت صاف کر رہے ہیں۔

اسلام آباد:پاکستان علماء کونسل کے چیئرمین حافظ طاہر اشرفی نے کہا ہے کہ شیریں مزاری نے اقوام متحدہ کے ہائی کمشنر اور دیگر اداروں کو خط لکھا ہے۔

شیریں مزاری نے رانا ثنا کیخلاف اقوام متحدہ کے ہائی کمشنر برائے انسانی حقوق کو مراسلہ لکھ دیا

انہوں نے کہا کہ شیریں مزاری اس قانون کے حوالے سے پاکستانی عدالتوں، متحدہ علماء بورڈ یا اسلامی نظریاتی کونسل سے رابطہ کرسکتی تھیں۔

طاہر اشرفی نے کہا کہ شیریں مزاری کے عمل سے عالمی سطح پر پروپیگنڈا کرنے والوں کو تقویت ملے گی ، امید ہے پی ٹی آئی کی قیادت اس خط کو واپس لے گی۔

یاد رہے کہ پاکستان تحریک انصاف کی رہنما اور سابق وزیر انسانی حقوق شیریں مزاری نے حکومت کے خلاف اقوامِ متحدہ کے مندوب کو خط لکھا ہے جبکہ یو این ہائی کمشنر برائے انسانی حقوق کو بھی خصوصی مراسلہ ارسال کیا ہے۔

شیریں مزاری نے اپنے خط میں کہا ہے کہ حکومت نے دہشت گردوں کے اتحادی مبینہ قاتل کو وزیر داخلہ مقرر کیا ہے جبک سانحہ ماڈل ٹاؤن کا ملزم ریاستی سطح پر سیاسی مخالفین کے خلاف توہین مذہب کارڈ استعمال کر رہا ہے۔
انہوں نے اپنے خط میں لکھا پاکستان اقوام متحدہ کا ایک ذمہ دار رکن، عالمی معاہدوں اور قانون کی پابند ریاست ہے، امریکی سازش کے نتیجے میں مقامی میرجعفروں کی حکومت عوامی تائید سے مکمل محروم ہے، امپورٹڈ حکومت فاشسٹ اقدامات سے اقتدار کا دوام چاہتی ہے۔

سابق وزیر برائے انسانی حقوق نے اپنے خط کے متن میں کہا ہے کہ حکومت نے دہشت گردوں کے اتحادی ایک مبینہ قاتل کو داخلی امن کا نگراں وزیر مقرر کیا ہے جو ریاستی سطح پر سیاسی مخالفین کیخلاف توہین مذہب کارڈ استعمال کررہا ہے، میڈیا پر بھرپور بندشوں کے بعدمخصوص صحافیوں کو چن چن کر نشانہ بنانے کا سلسلہ بھی جاری ہے

کراچی :‏پرویزالٰہی وعدہ کرکے بھاگ گئے لیکن ان کا بڑا بھائی میرے ساتھ کھڑا ہے،اطلاعات کے مطابق پاکستان پیپلز پارٹی کے صدر آصف علی زرداری نے نواب شاہ کے علاقے باندھی میں عید ملن پارٹی سے خطاب میں کہا ہے کہ جومزاعوام میں رہنے کا ہے وہ کہیں بھی نہیں۔

کارکنوں سے خطاب میں ان کا کہنا تھا کہ میں بھٹواوربے نظیرجیسا نہیں بن سکتا لیکن ان کے نقش قدم پرچلنے کی کوشش کر رہا ہوں۔

میرا ویژن صرف عوامی خدمت کرنا ہے، جب بے نظیربھٹوکوگڑھی خدابخش میں دفنایا گیا تب میں نے عہد کیا تھا کہ بے نظیرکا مشن جاری رکھوں گا۔

آصف علی زرداری کا کہنا تھا کہ سیاست کوعبادت سمجھتا ہوں، عوامی طاقت سے ہرسازش کا مقابلہ کیا ہے اور کرتا رہوں گا۔ کیوں کہ عوامی طاقت میرے ساتھ ہے۔

سابق صدرکا کہنا تھا کہ میں نے پہلے ہی کہا تھا کہ عمران کو گرانے کی ضرورت نہیں وہ خود ہی گر جائے گا۔ آج ملک کی معیشت شدید بحران کا شکار ہے۔ ملک کی ترقی اورمعیشیت کوصرف پیپلزپارٹی ہی بہتراندازمیں چلا سکتی ہے۔

انہوں نے مزید کہا کہ سندھ کی عوام کی خدمت کا مشن جاری رکھیں گے۔ زبان کا پکا ہوں، اتحادیوں کے ساتھ جوبھی وعدے کیے ہیں وہ وعدے وفا ہوں گے۔ اب ضلع شہید بینظیرآباد کے تمام ترقیاتی کاموں کی خود نگرانی کروں گا۔

سابق صدر مملکت آصف علی زرداری نے کہا ہے کہ عمران خان اپنے کیے کا خود شکار ہوئے، ان کا سیاست سے کوئی واسطہ نہیں،

آصف علی زرداری نے نواب شاہ کے علاقے باندھی میں عید ملن پارٹی میں کارکنوں سے خطاب میں کہاکہ ظالموں کے چہرے بدلتے رہتے ہیں، وہ کبھی مشرف اور کبھی ضیاء الحق کی شکل میں آتے ہیں۔ آج کا ظالم عمران خان ہے۔

آصف علی زرداری نے اس موقع پرپاکستان مسلم لیگ کی قیادت پر تنقید کرتے ہوئے کہا کہ ‏پرویزالٰہی وعدہ کرکے بھاگ گئے لیکن ان کا بڑا بھائی میرے ساتھ کھڑا ہے،ان کا یہ بھی کہنا تھا کہ وہ جمہوری روایات کا پاس کرنے کے قائل ہیں‌

اسلام آباد:پاکستان تحریک انصاف کی مرکزی قیادت کی مقامی قیادت کے ساتھ رابطوں میں تیزی آگئی ہے۔ جس کا مقصد’غلامی نا منظور‘ مارچ کی تیاریوں کوتیزکرنا ہے۔

پی ٹی آئی کے مرکزی رہنماؤں ڈاکٹر بابر اعوان اور سابق رکن اسمبلی علی اعوان نے مرکزی سیکرٹریٹ کا دورہ کیا، جہاں انہوں نے مختلف علاقوں کے ذمہ دار مرد و خواتین سے بھی ملاقات کی۔

ملاقات میں لانگ مارچ کی تیاریوں کا جائزہ لیا گیا اور آزادی مارچ میں شرکت کے لیے مختلف طبقہ فکر کے حلقوں سے ملاقاتیں شروع کرنے کا بھی فیصلہ کیا گیا۔ پی ٹی آئی کے ذمہ داران انہیں مارچ میں شرکت کے لیے با ضابطہ دعوت دیں گے۔

ملاقات میں طے کیا گیا کہ ملک بھر سے آنے والے قافلوں کا استقبال اسلام آباد کی تنظیم کرے گی۔

اس موقع پر بابر اعوان کا کہنا تھا کہ عمران خان کے خلاف پروپیگنڈے کوقوم نے پہلے بھی مسترد کیا ہے اور اب بھی کرے گی۔ آزادی مارچ کو کسی صورت ڈی ریل نہیں ہونے دیا جائے گا۔ عمران خان کی کال پرلاکھوں پاکستانی ملک بھرسے اسلام باد پہنچیں گے۔

پاکستان تحریک انصاف کے رہنما علی اعوان کا اس بابت کہنا تھا کہ امپورٹڈ حکومت کے خاتمے کے دن گنے جا چکے ہیں، پاکستانی قوم نے آزاد خارجہ پالیسی کی نئی تحریک کا ساتھ دینے کا فیصلہ کیا ہے۔
پاکستان تحریک انصاف نے عمران خان کے ملک گیر جلسوں کا شیڈول جاری کردیا،اطلاعات کے مطابق پاکستان تحریک انصاف نے پارٹی چیئرمین اور سابق وزیر اعظم عمران خان کے ملک گیر جلسوں کے حوالے سے شیڈول جاری کردیا ہے۔

پی ٹی آئی ترجمان کی جانب سے جاری ہونے والے بیان کے مطابق عمران خان 6 مئی کو میانوالی سے اپنے جلسوں کا آغاز کریں گے۔ 7 مئی کو عمران خان ورچوئلی یورپی یونین اور برطانیہ ہونے والے جلسے سے خطاب کریں گے۔

تیسرا جلسہ 8 مئی کو ایبٹ آباد، چوتھا جلسہ 9 مئی کو راولپنڈی اور پانچواں جلسہ 10 مئی کو جہلم میں منعقد کیا جائے گا۔پاکستان تحریک انصاف کی طرف سے مزید بتایا گیا ہے کہ کپتان کرک، اٹک اور مردان میں بالترتیب 11، 12 اور 13 مئی کو جلسہ عام سے خطاب کریں گے۔

سیالکوٹ اور فیصل آباد میں 14 اور 15 مئی کو جلسہ عام کیا جائے گا۔ عمران خان صوابی اور کوہاٹ میں 16 اور 17 مئی کو جلسے سے خطاب کریں گے۔

پاکستان تحریک انصاف کے چیئرمین عمران خان 18 مئی کو لاہور میں وکلاء کنوینشن سے خطاب کریں گے۔ 19 مئی کو چکوال اور 20 مئی کو ملتان میں جلسہ کیا جائے گا۔