متحدہ عرب امارات سے تعلق رکھنے والی آن لائن ٹیکسی سروس کمپنی کریم نے پاکستان میں اپنی سروس بند کرنے کا اعلان کر دیا۔
کمپنی کو پاکستان کے مشکل معاشی ماحول میں سرمایہ کاری کے لیے درکار وسائل کے حصول میں مشکلات کا سامنا کرنا پڑا جس کے اعث کمپنی نے پاکستان میں اپنی سروس بند کرنے کا اعلان کیا،آن لائن ٹیکسی سروس نے اعلان کیا ہے کہ 18 جولائی 2025ء سے پاکستان میں کریم کی رائیڈ ہیلنگ سروسز بند کر دی جائیں گی-
کمپنی نے کہا ہے کہ صارفین کو جلد ہی کریم والٹ میں فنڈز واپس لینے کے طریقہ کار سے متعلق ہدایات موصول ہوں گی، کمپنی کی کسٹمر سپورٹ سہولت کریم کیئر سروس 18 ستمبر 2025ء تک دستیاب رہے گی تاکہ صارفین اپنے کسی بھی متعلقہ معاملے کو حل کرسکیں۔
کریم کمپنی کے سی ای او مدثر شیخہ نے اپنی لنکڈ اِن پوسٹ میں کہا کہ انتہائی افسوس سے میں یہ اعلان کررہا ہوں کہ کریم اگلے ماہ 18 جولائی 2025 سے پاکستان میں اپنی رائیڈ ہیلنگ سروس بند کرنے جارہی ہےیہ فیصلہ انتہائی مشکل تھا لیکن پاکستان میں مسلسل بگڑتے معاشی حالات، بڑھتی ہوئی مسابقت اور عالمی سرمایہ کاری کے چیلنجز کے باعث محفوظ اور قابلِ اعتماد سروس مہیا کرنا ممکن نہیں رہا۔
کمپنی بند ہونے کی ایک بنیادی وجہ پاکستان میں دو مزید کمپنیوں یانگو (Yango) اور ان ڈرائیو (inDrive) آنا ہے اور زیادہ تر صارفین کی جانب سے ان دونوں کمپنیوں کو ترجیح دی جارہی ہے۔
واضح ہے کہ کریم نے 2016 میں پاکستان میں اپنی خدمات کا آغاز کیا تھا اور کمپنی کو صارفین کی جانب سے خاص طور پر کراچی، لاہور اور اسلام آباد میں کافی اچھا رسپانس ملا کمپنی کی جانب سے کریم کار، کریم بائیک اور کریم ڈیلیوری جیسی سروسز متعارف کروائی گئیں –
