عید الاضحیٰ کے موقع پر پشاور بھر میں صفائی اور آلائشیں ٹھکانے لگانے کیلئے خصوصی پلان تیار کر لیا گیا ہے۔ ترجمان ڈبلیو ایس ایس پی کے مطابق عید صفائی آپریشن میں 3259اہلکار حصہ لینگے، 683 گاڑیوں کے ذریعے قربانی کے جانوروں کی آلائشیں اٹھائی جائیں گی، 1827سنیٹری ورکرز ، 756 کٹھہ قلی ، 383 ڈرائیوروں سمیت دیگر اہلکار بھی فرائض انجام دینگے، ترجمان نے مزید وضاحت دیتے ہوئے کہا کہ پرائمری سطح پر آپریشن 324، سیکنڈری آپریشن 30 بڑی اور 329 آؤٹ سورس گاڑیوں کے ذریعے چلایا جائے گا۔ الائشوں کے پوائنٹس کی نشاندہی کیلئے چونے اور سپرے کا بھی بندوبست کیا گیا ہے۔
ڈبلیو ایس ایس پی ترجمان کا کہنا تھا کہ گلی محلوں سے آلائشیں جمع کرنے کے لئے 25 کلیکشن پوائنٹس اور ٹرانسفر سٹیشن قائم کئے گئے ہیں اور صفائی کے حوالے سے شہریوں میں نہ صرف پمفلٹس تقسیم کئے گئے ہیں بلکہ آلائشیں اٹھانے کے لئے شہریوں میں تھیلے بھی فراہم کئے گئے ہیں۔
ترجمان نے کہا کہ شہر بھر میں آپریشن کی مانیٹرنگ کیلئے ٹیمیں بھی تشکیل دی گئی ہیں جبکہ ڈمپنگ سائٹ میں دو سو فٹ لمبا اور 90 فٹ چوڑا گڑھا کھودا گیا ہے جہاں شہر بھر سے الائشین تلف کی جائیں گی۔

نگران وزیراعلی خیبرپختونخوا محمد اعظم خان سے گزشتہ روز پشاور میں قتل ہونے والے سکھ شہری من موہن سنگھ اور زخمی ترلوک سنگھ کے ورثاء اور دیگر نے ملاقات کی ہے، اس موقع پرنگران صوبائی وزیر برائے اقلیتی امور اور متعلقہ حکام بھی موجود تھے۔ نگران وزیراعلی نے من موہن سنگھ کے قتل کی شدید الفاظ میں مذمت کرتے ہوئے کہا کہ اقلیتی شہریوں کو نشانہ بنانا انتہائی افسوس ناک ہے، وزیراعلیٰ نے سکھ کمیونٹی اور متاثرہ خاندان سے تعزیت اور ہمدردی کا اظہار کرتے ہوئے کہا کہ سکھ برادری کے لوگ انتہائی پرامن اور محب وطن ہیں،قومی تعمیر و ترقی میں اقلیتوں کا کردار قابل ستائش ہے۔
انہوں نے مذید کہا کہ نگران صوبائی حکومت اقلیتوں کے اس کردار کو قدر کی نگاہ سے دیکھتی ہے، شرپسندوں کا اقلیتوں کو نشانہ بنانے کا مقصد ملک میں مذہبی ہم آہنگی کو نقصان پہنچانا اور ملک کو عدم استحکام پیدا کرنا ہے لیکن ان عناصر اپنے مذموم مقاصد میں کبھی کامیاب نہیں ہونے دینگے،
محمد اعظم خان نے کہا کہ حکومت اقلیتوں کے تحفظ کے لئے ہر ممکن اقدامات کررہی ہے، اس موقع پر انہوں نے آئی جی پی کو سکھ کمیونٹی کے ساتھ بیٹھ کر ان کے لئے سیکورٹی پلان ترتیب دینے اور سکھ کمیونٹی کے رہائشی اور کاروباری علاقوں میں سی سی ٹی کیمروں کی تنصیب کے خصوصی اقدامات کی ہدایت جاری کئے،اور سکھ برادری کے قتل ہونے والے من موہن سنگھ اور زخمی ترلوک سنگھ کے خاندانوں میں چیک تقسیم کئے، جس پروفد نے صوبائی حکومت کا ہر مشکل وقت میں ساتھ کھڑے ہونے پر نگران وزیر اعلی کا شکریہ ادا کیا۔

پشاور پولیس لائن کو کسی بھی نا خوشگوار واقعات سے بچنے کیلئے پولیس لائن سمیت دیگر اہم عمارتوں کی حفاظت کیلئے سنٹرل کمانڈ اینڈ کنٹرول روم قائم کر دیا گیا ہے، ریڈ زون سیکورٹی کے لیے قائم جدید حفاظتی سسٹم کا افتتاح کور کمانڈر پشاور لیفٹیننٹ جنرل حسن اظہر حیات نے کیا اس موقع پر آئی جی پی اختر حیات گنڈاپور بھی ان کے ہمراہ موجود تھے، کور کمانڈر نے افتتاح کے بعد سینٹر پولیس آفس میں یادگار شہداء پر پھولوں کی چادر چڑھائی اور فاتحہ خوانی بھی کی۔
انسپکٹر جنرل آف پولیس اختر حیات گنڈاپور نے کہا کہ سینٹرل سیکورٹی کمانڈ روم ملک میں اپنی نوعیت کا پہلا جدید حفاظتی سسٹم ہے، نیا قائم شدہ نظام جدید خودکار شناخت اور سیکورٹی سے مربوط ہے، اس سسٹم کا مانیٹرنگ نظام جدید آرٹیفشل اینٹیلیجنس نظام پر قائم ہے۔
انہوں نے کہا کہ حفاظت کا نیا اور جدید نظام گاڑیوں کی شناخت کرنے کے ساتھ ساتھ پیدل چلنے والوں کی شناخت اور مواصلاتی نظام پر بھی مشتمل ہے، اس نظام کو ہائی سیکورٹی زون میں مشتبہ افراد کے داخلے کو روکنے کےلئے متعارف کرایا گیا ہے اور اس جدید سسٹم کے تحت پولیس لائنز، گورنر و وزیر اعلی ہاوسزاورسیکرٹریٹ سمیت حساس عمارتوں کی نگرانی کی جائے گی۔
پشاور میں سیف سٹی پراجیکٹ بننا بہت ضروری ہے اور یہ سسٹم اس جانب ایک قدم ہے، آئی جی پی نے مزید کہا کہ پشاور میں داعش اقلیتوں پر حملوں میں ملوث ہے،سکھ برادری پر رواں سال تیسرا حملہ ہوا ، اقلیتوں اور مذہبی رہنمائوں پر حملے ایک ہی گروہ کررہا ہے، آئی جی پی نے اس سلسلے میں مزید وضاحت دیتے ہوئے کہا کہ ملزمان کے قریب پہنچ چکے ہیں۔

ٹک ٹاکر صندل خٹک نے حریم شاہ کی طرف سے لگائے گئے تمام الزامات بے بنیاد اور جھوٹے قرار دئے ہے،پشاور پریس کلب میں میڈیا سے گفتگو کرتے ہوئے ٹک ٹاکر صندل خٹک نے بتایا کہ حریم شاہ جس کا اصل نام فضا حسین ہے کا عدالت میں الگ کیس چل رہا ہے جبکہ میڈیا پر الگ کیس کا ٹرائل ہو رہا ہے ،صندل خٹک نے کہا کہ اج کے پریس کانفرنس کا مقصد آپ کے سامنے سچ لے کر آنا ہے،اس نے کہا کہ حریم شاہ کی جانب سے مجھ پر ایف آئی آر میں الزام لگایا گیا کہ میں نے سوشل میڈیا پر اسکے خلاف باتیں کئے اور گالیاں دی،جس کے انویسٹیگیشن ایف آئی اے نے کی لیکن انکو کچھ نہیں ملا صند ل خٹک نے کہا کہ اسکا موبائل اب بھی ایف ائی اے کے قبضے میں ہے،جبکہ عدالت نے مجھے ضمانت پر رہا کر دیا ہے کیونکہ میرے خلاف انکو کوئی ثبوت نہیں ملا،صندل خٹک نے کہا کہ اسکی اور حریم شاہ کی دوستی بہت پہلے ختم ہو چکی ہے جتنا عرصہ اسکے ساتھ رہی مختلف سکینڈلز کا سامنا کیا،ایک سوال کے جواب میں اس نے کہا کہ میرا سیاست سے کوئی تعلق نہیں ہے،اور نہ ہی سیاست میں آنے کا کوئی ارادہ رکھتی ہوں،صندل خٹک نے کہا کہ جیل میں اچھا وقت گزارا وہاں مختلف لوگوں سے ملنے کا موقع ملا ،ایک اور سوال کے جواب میں صندل خٹک نے کہا کہ حریم شاہ سے نہ معافی مانگی ہے اور نہ کبھی ایسا ہوگا،حریم شاہ کے تمام الزامات جھوٹ کا پلندہ ہے،