صوبہ پنجاب کے دارالحکومت لاہور سے 48 گھنٹوں کے دوران 14 خواتین سمیت 16 افراد کو اغوا کر لیا گیا ہے۔
باغی ٹی وی : پولیس کے مطابق لاہور کے علاقے گرین ٹاؤن سے ایک لڑکی، رائیونڈ سٹی سے خاتون،نشتر کالونی اور شیرا کوٹ کے علاقوں سے بھی خواتین کو اغوا کیا گیا ہے۔
لاہور کے علاقے سبزہ زار سے تین لڑکیاں، ریس کورس اور شمالی چھاؤنی کے علاقوں سے لڑکیاں اغوا کی گئی ہیں جب کہ نواب ٹاؤن سے ایک خاتون اور ایک لڑکی کو اغوا کیا گیا ہے۔
پولیس اعداد و شمار کے تحت فیکٹری ایریا سے بھی ایک لڑکی کو اغوا کیا گیا ہے جب کہ مناواں سے ایک لڑکا اور شمالی چھاؤنی کے علاقے سے بھی ایک لڑکا اغوا کیا گیا ہے-
دوسری جانب کراچی کے علاقے کورنگی میں اسٹریٹ کرمنلز نے موبائل فون چھیننے کے دوران مزاحمت پر ایک نوجوان کو فائرنگ کر کے قتل کر دیا گیا، رواں سال مجموعی طور پر 95 سے زائد شہری ڈاکوؤں کے ہاتھوں قتل ہوچکے جبکہ 400 سے زائد شہری زخمی ہوئے ہیں ۔
کراچی کے کورنگی ساڑھے پانچ دھوبی گھاٹ کے قریب ڈکیتی کی واردات کے دوران نامعلوم مسلح ملزمان نے فائرنگ کرکے ایک نوجوان کوقتل کردیا جب کہ مسلح ملزمان موقع سے فرار ہونے میں کامیاب ہوگئے۔
مقتول نوجوان کی لاش جناح اسپتال منتقل کی گئی جہاں مقتول نوجوان کی شناخت 20 سالہ عبدالباسط گورچانی ولد دلاور کے نام سے کرلی گئی مقتول نوجوان کا تعلق میر پور خاص سے تھا مقتول نوجوان چھ سو روپے یومیہ پر ہوٹل کے باہر برگر کے ٹھیلے پر مزدوری کرتا تھا، مقتول چار بہن بھائیوں میں سب سے بڑا تھا۔
اہلخانہ کے مطابق مقتول عبدالباسط گھر سے نکل کر پیدل دودھ لینے کے لیے جا رہا تھا کہ موٹرسائیکل سوار دو ملزموں نےعبد الباسط سے موبائل فون چھیننا چاہا اور مزاحمت پر سینے میں گولی ماردی مسلح ملزمان نے 5 ہزار روپے کے موبائل فون کے لیے ان کے بھائی کو گولی مار دی۔
علاقہ مکینوں کا کہنا ہے کہ کراچی پولیس شہریوں کی تحفظ فراہم کرنے میں مکمل ناکام ہو گئی ہے روزعلاقے میں سرچ آپریشن کے نام پر تماشہ کیا جاتا ہے لیکن کسی کو گرفتار نہیں کیا جاتا، علاقے میں منشیات کھلےعام فروخت ہورہی ہے ملزمان سکون سے نشہ کرتے ہیں اور پھر وارداتیں کرتے ہیں پہلے رات کے اوقات میں وارداتیں کیا کرتے تھے لیکن اب صورتحال ایسی ہے کہ مسلح ڈاکو دن دیہاڑے وارداتیں کرکے فرارہوجاتے ہیں انہیں کوئی پکڑنے والا ہے۔
